1. Tëm noo 3 João 3, 4, was lost uns froo?

TE APHOSTEL Yoohan hot fiile layt keholef ti woerheet lërne. Fer tëm, tiise kriste waare wii sayn khiner. Tii hon fiile xwiirichkheete mit kemacht, un Yoohan hot sich fiil aan kextrëngt fer tëne sayn klaape xtërke. Khanst tuu tich iwerlee wii froo Yoohan waar wën eyer tëne kesiin hot wayter leaal tsu Yeehoowa plaype? In te selwich aat, meyer wëre aarich froo wën meyer siin unser aychne khiner, orer unser khiner in kaystlich aat, sich tsu Yeehoowa tetikiire un wayter leaal tsu tëm plaype. (Lees 3 João 3, 4.) *

2. Was fer waar tas opjetiiw fon Yoohan sayn priife?

² Im yoer 98, khan sin tas Yoohan hot in Ëfeso orer tat ticht kewoont. Woerxaynlich, is eyer tsu tat kang noo eyer fray fom katee kep waar, in tëm insel fon Patmos. Um rom tiise tsayt, hot Yeehoowa sayn hayliche kayst tëm kelënkt fer tray priife xraype. Tas opjetiiw fon tiise priife waar ti troye kriste uf muute net sayn klaape aan Yeesus ferliire un wayter in te woerheet keen.

3. Was fer frooche tuun mer in tiise artikel antworte?

³ Yoohan waar te letste aphostel woo am leepe waar un hot sich ketanke kemacht mit te xlecht influëns fon falxe leerer in te kemaynte. * (1 João 2:18, 19, 26) Tiise aphostate hon kesaat tas tii hon Kot kekhënt, awer tii hon net tëm sayn kepoote aan keheert. In tiise artikel, wole mer noo kuke  ti inspiriirte aanreete woo Yoohan fer uns kep hot un tray frooche antworte: Was petayt in te woerheet keen? Was fer xwiirichkheete khene uns xteere wayter in te woerheet keen? Un wii khene mer uns naner helfe in te woerheet plaype?

4. Tëm noo 1 João 2:3-6 un 2 João 4, 6, was mise mer mache fer in te woerheet keen?

⁴ Fer in te woerheet keen, mise mer ti woerheet khëne woo in Kot sayn Wort, ti Piipel, xteet. Un noch, mise mer Yeehoowa sayn kepoote aan heere. (Lees 1 João 2:3-6; * 2 João 4, * 6. *) Yeesus waar een perfëkt payxpiil fon yemant woo Yeehoowa aan keheert. Tes weeche, een wichtich aat woo mer Yeehoowa aan heere is wën mer Yeesus sayn xrite noo keen, soo fiil ticht wiis meechlich is. (João 8:29; 1 Ped. 2:21)

5. Fon was mise mer uns sicher sin?

⁵ Fer wayter in te woerheet keen, mise mer uns sicher sin tas Yeehoowa is te Kot fon woerheet un tas ales was eyer fer uns saat torich sayn Wort, ti Piipel, woer is. Un meyer mise aach uns sicher sin tas Yeesus te ferxprochne Mesias is. Hayt, fiile tswayfele tas Yeesus is wii Kheenich fon Kot sayn Raych raus kesuucht kep. Yoohan hot aan kesaat tas kepts “fiile hinerkeener”, woo waare am fersuuche ap lënke tii woo net foer perayt waare fer ti woerheet iwer Yeehoowa un Yeesus xitse. (2 João 7-11) Yoohan hot kexrip: ‘Weer is te liichner? Es is net tee woo ap saat tas Yeesus te Kristus is?’ (1 João 2:22) Ti eensich aat fer net hinerkeen wëre is Kot sayn Wort xtutiire. Ploos wën mer tas mache, tuun mer Yeehoowa un Yeesus wërklich khëne. (João 17:3) Un ploos soo, wëre mer sicher tas meyer ti woerheet hon.

6. Keeche was mise ti yunge sich uf phase?

⁶ Ale kriste mise uf phase fer net fon mënxliche filosofii hinerkeen wëre. (1 João 2:26) Haupstsechlich ti yunge mise sich uf phase  keeche tiise fal. Alexia *, een franseesix xwester woo 25 yoer alt is, saat: “Wii ich een yung meetche waar, sin ich konfus kep weeche ti inlërnunge fon te welt, soo wii te ewolutsyoon teorii un mënxliche filosofii. Manich mool, hon tiise inlërnunge mich kefal. Awer, ich hon ketenkt tas weyer net richtich heere was se mich in te xuul in kelërnt hon, un khee xans kepe fer Yeehoowa xpreche.” Alexia hot tas puuch A Vida — Qual a Sua Origem? A Evolução ou a Criação? xtutiirt. In weeniche woche, sin sayn tswayfele keantwort kep. Alexia saat: “Ich hon fer mich selepst pewayst tas ti Piipel ti woerheet hot. Un ich hon kemërkt tas was frooheet un friit pringt, is leepe tëm noo was ti Piipel in lërnt.”

7. Was mise ale kriste sich uf phase fer net mache, un warom?

⁷ Ale kriste, ekaal op se yung orer alt sin, mise sich uf phase fer net een topelt leepe hon. Yoohan hot kesaat tas meyer khene net in te woerheet keen, un in te selwich tsayt, een imoraalix leepe hon. (1 João 1:6) Wën mer wole hayt un in te tsukhunft Yeehoowa sayn tsuxtimung kriin, mise mer uns erinere tas eyer siit ales was mer mache. In woerheet, kepts khee ferxtekelte sinte, wayl unser kanse aktsyoone ‘taytlich uf ketekt sin foer Yeehoowa sayn aue’. (Heb. 4:13)

8. Was sole mer net aan nëme?

⁸ Meyer sole net aan nëme was ti welt iwer ti sint tenkt. Te aphostel Yoohan hot kexrip: “Wën mer saan: ‘Mer hon khee sint’, tuun mer uns selepst hinerkeen.” (1 João 1:8) In Yoohan sayn taache, hon ti aphostate kesaat tas een persoon khont een sint wilich mache un noch Kot sayn froynt sin. Hayt, leepe mer tswixich layt woo tas selwiche tenke. Fiile saan tas se aan Kot klaape, awer tii xtime net mit was Kot tenkt iwer ti sint, haupstsechlich iwer was mit sëks se tuun hot. Fer Yeehoowa,  etliche sëksuaale praktixe ferkheert sin; awer tiise layt saan tas es kept khee propleem tëne praktisiire wën mer tas wole.

9. Was fer nutse kriin ti yunge wën se sich aan sayn piiplixe klaape fest hale?

⁹ Haupstsechlich fer ti yunge kriste, khan es aarich xweyer sin tas imoraalix aanxtelung in te richtich aat siin, wën sayn koleke in te aarwayt orer in te xuul fersuuche tëne rom xpreche fer tas selwiche wii tii tenke. Tas is mit Aleksandar pasiirt. Tee erinert sich: “Etliche meet in te xuul hon mich unerketrikt fer sëks mit tëne mache. Tii hon mich kesaat tas, wayl ich khee xetsye hat, tan, waar ich gay.” Tuust tuu een eenlich proop mit mache? Wën yaa, eriner tich tas wëns tuu tich fest halst aan was ti Piipel saat richtich is, tuust tuu xitse tayn selepst respëkt, tayn fiisix un emotsyonaal kesuntheet un tayn froyntxaft mit Yeehoowa. Un yeetes mool tas tuu tich fest halst foer een fersuuchung, wërst tuu xtërker fer tas richtiches mache. Ferkes aach net, tas ti ferkheert aat woo tiise welt iwer sëks tenkt, is fom Taywel khom. Tes weeche, wëns tuu tich keeche tas xtelst, tuust tuu ‘tee woo xlecht is’ kewine. (1 João 2:14)

10. Wii heleft uns 1 João 1:9 Yeehoowa mit een sauwer kewise tiine?

¹⁰ Meyer erkhëne tas Yeehoowa hot tas recht fer se saan was een sint is. Un meyer tuun unser pestes mache fer net sinte. Awer wën mer een sint mache, tuun mer es fer Yeehoowa im kepeet erkhëne. (Lees 1 João 1:9.) * Un wën mer een xweyer sint mache, tuun mer ti hilef fon te elteste suuche. Tii sin fon Yeehoowa in kesetst kep fer uns uf phase. (Tia. 5:14-16) In te selwich tsayt, mise mer uns uf phase fer uns net xultich xpiire weeche sinte woo xon fertsayt waare. Warom? Wayl unser  liipliche Fater hot sayn Soon fer uns ap kep fer unser sinte fertsaye. Un wën Yeehoowa saat tas eyer fertsayt tii woo sich peroyt hon, eyer es wërklich erfiilt. Soo, khëne mer Yeehoowa mit een sauwer kewise tiine. (1 João 2:1, 2, 12; 3:19, 20)

11. Wii khene mer uns xitse keeche inlërnunge woo unser klaape xwach mache?

¹¹ Meyer sole net aphostate inlërnunge aan nëme. Tsayt te aanfang fon te kristlich kemaynt, tuut te Taywel imer fersuuche tswayfele in te khëp fon Kot sayn troye tiiner plantse. Tes weeche, mise mer lërne unerxiite was een woerheet un was een lii is. * Unser faynte khene fiilaycht te internet orer sotsyaale weepe penutse fer unser fertrau aan Yeehoowa un unser liip tsu ti priiter xwach mache. Eriner tich weer too hiner traan is un xtel tich keeche tiise liie. (1 João 4:1, 6; Apo. 12:9)

12. Warom mise mer unser klaape ferxtërke?

¹² Fer uns fest keeche Satanaas sayn atake plaype, mise mer unser fertraue ferxtërke aan Yeesus un aan tas teel woo eyer in Kot sayn propoos hot. Meyer mise aach traue aan ‘te troy un ferninftiche sklaaw’, te eensiche krup woo Yeehoowa hayt penutst fer sayn orkanisatsyoon fiire. (Mat. 24:45-47) Meyer khene unser fertraue ferxtërke wën mer ti Piipel reeklich xtutiire. Tan, wërt unser klaape wii eene paam woo tiife wortsle hot. Phaul hot was eenliches kesaat wii eyer fer ti kemaynt in Kolosos kexrip hot. Eyer hot kesaat: “Tes weeche, soo wii teyer Yeesus Kristus, te Hër, aan kenom hot, tuut wayter in eenichkheet mit tëm keen. Sayt kewortselt un uf kepaut uf tëm un playpt fest im klaape.” (Col. 2:6, 7) Wën mer uns aan xtrenge fer unser klaape ferxtërke, es wërt unmeechlich fer Satanaas un tii woo tëm xtitse, uns um hale wayter in te woerheet keen. (2 João 8, 9)

13. Was khene mer waarte, un warom?

¹³ Meyer khene waarte tas ti welt uns hase tuut. (1 João 3:13) Yoohan erinert uns tas ‘ti kans welt is unich te macht fon tee woo xlecht is’. (1 João 5:19) Soo fiil tichter tas ën fon tiise welt is, noch kreeser te Taywel sayn wuut kept. (Apo. 12:12) Eyer penutst net ploos atake woo mer net klaych mërke tuun, wii sëksuaal imoraaliteet orer liieray fon te aphostate. Eyer penutst aach xroo yachtung. Satanaas wees tas eyer hot ploos een khorts tsayt fer se fersuuche unser preetich aarwayt xtil hale orer unser klaape xwach mache. Tes weeche, tuun mer uns net ferwunere wën, in etliche lënter, een teel orer unser kanse aktiwiteete ferpoot sin. Awer soo kaar in tiise situatsyoon, tuun unser priiter un xwestere aus hale. Tii tuun pewayse tas, ekaal was “tee woo xlecht is” keeche uns macht, khene mer tëm kewine!

14. In was fer aat khene mer unser priiter un xwestere helfe wayter in te woerheet keen?

¹⁴ Fer unser priiter un xwestere helfe wayter in te woerheet keen, mise mer mitlayt tsayche. (1 João 3:10, 11, 16-18) Meyer mise eene ti anere liipe, net ploos wën ales kuut keet, awer aach wën propleeme foer xayn khome. Tsum payxpiil, khënst tuu yemant woo een keliipte persoon im toot ferloer hot un woo troost orer praktix hilef praycht? Orer, host tuu tsu wise kriit tas priiter sin fon een natuer unklik petrof kep, un hilef prayche fer sayn Raych Saale un hayse noch mool uf paue? Meyer tsayche wii fiil liip un mitlayt meyer hon, net ploos torich was mer saan, awer haupstsechlich torich was mer mache.

15. Soo wii in 1 João 4:7, 8 xteet, was mise mer mache?

 ¹⁵ Wën meyer liip eene tsu ti anere tsayche, tuun mer unser liiplich Fater Yeehoowa noo mache. (Lees 1 João 4:7, 8.) * Een wichtich aat woo mer liip tsayche is eene ti anere fertsaye. Tsum payxpiil, yemant khan fiilaycht uns traurich lose, awer xpeeter, sich entxultiche. Meyer tuun liip tsayche wën mer tëm fertsaye un hiner lose was pasiirt is. (Col. 3:13) Eene pruuter, woo Aldo heest, hot tiise kefoer mit kemacht wën een anere pruuter, woo eyer fiil respëktiirt hot, etwas krop iwer ti layt fon Aldo sayn kultuer kexprooch hot. Aldo saat: “Ich hon fiil mools fer Yeehoowa kepeet un ferlangt tas eyer mich helfe teet net fon tëm pruuter xlecht tenke.” Awer Aldo hot mee kemacht. Eyer hot te pruuter in kelaat fer tsu te preetich aarwayt mit tëm keen. Wii se am xafe waare, hot Aldo fer te pruuter aus keleet wii traurich eyer kep is weeche ti pruuter sayn wërter. “Wii te pruuter keheert hot wii ich mich kexpiirt hon, hot eyer sich entxulticht. Weeche ti aat woo eyer tas kesaat hot, khont ich siin tas eyer hot sich wërklich peroyt. Am ën, meyer sin noch mool froynte kep un hon mer tas propleem hiner kelos.”

16-17. Was sole mer pextimt sin fer se mache?

¹⁶ Te aphostel Yoohan hot sayn priiter fiil keliipt un hot sich fiil ketanke kemacht tas se een xtark klaape hëte. Meyer khene tëm sayn xpiirunge taytlich siin in te aanreete woo eyer in sayn tray inspiriirte priife kep hot. Wii kuut is es wise tas Yeehoowa hot liipliche mëner un fraae, wii Yoohan, raus kesuucht fer mit Kristus im himel rechiire! (1 João 2:27)

¹⁷ Es is wichtich ernst aan wëne ti aanreete woo mer in tiise artikel kriit hon. Wole mer pextimt sin fer wayter in te woerheet keen un Yeehoowa aan heere in ales was mer mache. Xtutiir ti Piipel un trau uf tëne. Ferxtërek tayn klaape aan Yeesus. Nëm net aan mënxliche filosofii un aphostate inlërnunge. Phas uf fer net een topelt leepe hon un fer net sinte wilich mache. Leep tëm noo Yeehoowa sayn hooch moraalixe kepoote. Un helef tayn priiter wayter fest in te woerheet plaype — fertsay tii woo tich traurich lose un xtits tii woo hilef prauche. Tas ales mache tuut uns helfe wayter in te woerheet keen, ekaal ti xwiirichkheete woo meyer mit mache tuun.