1. Was hot te aphostel Phaul erkhënt?

TE APHOSTEL Phaul hot erkhënt tas eyer hot sich als mool xwach kexpiirt. Tee hot kesaat tas sayn khërper waar am alt kepe, tas eyer must khëmpfe fer tas richtiches mache un tas sayn kepeete waare net imer keantwort soo wii eyer wolt. (2 Cor. 4:16; 12:7-9; Rom. 7:21-23) Phaul hot aach erkhënt tas sayn faynte hon ketacht tas eyer xwach waar. * Awer, eyer hot net kelos tas ti xlechte tinge woo ti anere keeche tëm kexprooch hon orer sayn aychne xwacheete, teete tëm mache sich oone weyert xpiire. (2 Cor. 10:10-12, 17, 18)

2. Tëm noo 2 Coríntios 12:9, 10, was fer wichtich lisyoon hot Phaul kelërnt?

² Phaul hot een aarich wichtich lisyoon kelërnt — soo kaar wën een persoon sich xwach xpiirt, khan se xtark sin. (Lees 2 Coríntios 12:9, 10.) * Yeehoowa hot fer Phaul kesaat: “Mayn macht is in te xwacheet kans ketsaycht.” Yeehoowa wolt saan tas eyer teet fer Phaul kepe te macht woo eyer praucht. Eyerst, wole mer sin warom sole mer net uns ketanke mache wën ti keechner uns ferxëne.

3. Warom khene mer uns fraye wën mer pelaytichunge mit mache?

³ Nimant wërt kërn pelayticht. Awer, manich mool, tuun unser faynte uns pelaytiche. Wën meyer tsu fiil ketanke uns mache mit was se saan, khene mer oone muut wëre. (Pro. 24:10) Tan, wii khene mer mit pelaytichunge um keen? Meyer khene Phaul noo mache un ‘uns fraye wën meyer pelaytichunge mit mache’. (2 Cor. 12:10) Warom? Wayl wën ti layt uns pelaytiche un sich keeche uns xtele, tas tsaycht tas meyer wërklich Yeesus sayn tisipele sin. (1 Ped. 4:14) Yeesus hat xon kesaat tas sayn nookeener keyacht weyere. (João 15:18-20) Tas is in te eyerst yoer hunert pasiirt. In tiise tsayt, tii woo waare fon te kreekix kultuer influëntsiirt, hon ti kriste wii tum un xwach aan kesiin. Un ti yuute hon ti kriste, wii te aphostele Pheeter un Yoohan, wii ‘keweenliche un oone xuul’ aan kesiin. (Atos 4:13) Es hot aus kesiin tas ti kriste xwach waare. Tii hate khee influëns in te politik un khee militeer kraft. Fer ti layt, hon ti kriste khee respëkt fertiint.

4. Was hon ti eyerste kriste kemacht wën ti keechner tëne pelayticht hon?

⁴ Hon ti eyerste kriste noo kelos se preetiche un Yeesus noo se keen weeche ti pelaytichunge fon te keechner? Nee. Kuk tas payxpiil fon te aphostele Pheeter un Yoohan. Fer tëne, waar es een eere yachtung mit mache wayl se Yeesus noo kang sin un sayn inlërnunge kepreeticht hon. (Atos 4:18-21; 5:27-29, 40-42) Ti tisipele hate khee uersach fer sich xeeme. In woerheet, tiise teemuutiche kriste hon fiil mee fer ti mënxheet kemacht wii yeete eene fon sayn keechner. Tsum payxpiil, ti inspiriirte piicher woo etliche fon tiise kriste kexrip hon, tuun pis hayt hilef un hofnung fer milyoone layt kepe. Un tas Raych woo se kepreeticht hon, is xon im himel in kesetst un tuut klaych iwer ti kans eyert rechiire. (Mat. 24:14) Im keeche teel, te mechtiche romaanix rechiirung, woo ti kriste keyacht hot, is rom kang; awer tiise leaale tisipele sin yets kheeniche im himel. Tëne sayn keechner sin al toot; un aach wën se uf keruuft fom toot wëre, mise se tas Raych, woo tiise kehaste tisipele kepreeticht hon, aan heere. (Apo. 5:10)

5. Tëm noo João 15:19, warom sin Yeehoowa sayn tiiner wii weenicher aan kesiin?

⁵ Hayt, etliche tuun Yeehoowa sayn tiiner xpoote un niter xtele. Tii tenke tas meyer xwach un tum sin. Warom? Wayl meyer uns net aan xtele wii ti layt fon te welt. Meyer tuun uns aan xtrenge fer teemuutich, tsaam un folich sin. Uf te aner sayt, tuut ti welt fiil weyert kepe fer tii woo hoochmuutich, inkepilt un unfolich sin. Un noch, meyer hon khee teel in te politik orer militeer kraft fon yeete lant. Meyer lose net tiise welt uns mustere; tes weeche, tuut se uns weenich weyert kepe. (Lees João 15:19; * Rom. 12:2)

6. Was fer wunerliche tinge is Yeehoowa, torich sayn folek, am mache?

⁶ Opwool ti layt fon te welt tenke tas meyer weenicher sin, is Yeehoowa uns am penutse fer wunerliche tinge mache. Torich sayn folek, is Yeehoowa am mache ti kreeste preetich aarwayt fons mënxlich kexicht. Yeehoowa sayn tiiner tuun hayt mache ti piichelche woo, uf te kans eyert, mee iwerkesetst un aus keteelt wëre. Un tii tuun aach ti Piipel penutse fer milyoone layt helfe een peser leepe hon. Yeehoowa fertiint ti kanse eere fer al tiise wunerliche tinge. Eyer penutst een krup fon  layt, woo siit xwach aus, fer kroose aarwayte mache. Un tuu? Khan Yeehoowa tich helfe xtark wëre? Was must tuu mache fer tëm sayn hilef kriin? Wole mer tray tinge noo kuke woo khene mer fon Phaul sayn payxpiil lërne.

7. Was is een lisyoon woo khene mer mit Phaul lërne?

⁷ Een lisyoon woo mer khene fon Phaul lërne, is: wëns tuu Yeehoowa tiinst, trau net aan tayn aychne kraft orer apiliteete. Fiile layt hon Phaul keloopt weeche sayn situatsyoon. Phaul khënt laycht hoochmuutich un selepstëntich wëre. Tee is in Tarso, ti haupst xtat fon een romaanixe teritoryum, kroos kewakst. Tarso waar een raych xtat, woo een pekhant uniwersiteet hat. Phaul waar net oone xuul. In woerheet, Kamaliël, eene respëktiirte yiitexe fiirer fon sayn taache, hot tee in kelërnt. (Atos 5:34; 22:3) Fer een tsayt, hat Phaul soo kaar influëns tswixich ti yuute. Eyer hot kesaat: “Ich sin mee in yuutaiismus forem kang wii fiile fon mayn natsyoon, woo hate ti selwich elter wii ich.” (Gál. 1:13, 14; Atos 26:4) Awer, Phaul hot net aan sich selepst ketraut.

8. Tëm noo Filipenses 3:8 un te noote, wii hot Phaul ti tinge kesiin woo eyer uf kep hat? Un warom hot eyer sich ‘kefrayt wën eyer xwacheete mit kemacht hot’?

⁸ Phaul hot wilich uf kep fon ales woo kemacht hot tas eyer mechtich fer ti anere aus siin teet. In woerheet, tee hot al tiise tinge wii “lix” kesiin. (Lees Filipenses 3:8 un noote.) * Phaul hot fiile xwiirichkheete mit kemacht wayl eyer Yeesus sayn nookeener kep is. Sayn aychne natsyoon hot tëm kehast. (Atos 23:12-14) Eyer is ferxlaa un in kexpërt kep fon mëner woo romaaner waare soo wii eyer waar. (Atos 16:19-24, 37) Un Phaul hot aach kelit weeche sayn aychne imperfëktsyoone un wayl es waar aarich xweyer tas richtiches mache. (Rom. 7:21-25) Awer, eyer hot net erlaupt tas sayn faynte orer sayn imperfëktsyoone tëm runer kexmis hon. Xtats  tas, hot eyer sich ‘kefrayt wën eyer xwacheete mit kemacht hot’. Warom? Wayl yeetes mool woo Phaul sich xwach kexpiirt hot, khont eyer Yeehoowa sayn macht in sayn leepe siin. (2 Cor. 4:7; 12:10)

9. Wii sole mer siin ti tinge woo mache tas meyer xwach aus siin?

⁹ Wën meyer wole Yeehoowa sayn macht kriin, sole mer net tenke tas kraft, xuul, kultuer orer kelt tuun unser weyert pextime. Tiise tinge tuun net uns nutslich fer Yeehoowa mache. In woerheet, tswixich Yeehoowa sayn tiiner, kepts net fiile woo ‘kluuch sin noo tëm was ti mënxe tenke, net fiile woo meechtich sin, net fiile woo fon wichtiche familye khome’. Xtats tas, hot Yeehoowa raus kesuucht ‘ti xwache tinge fon te welt’ penutse. (1 Cor. 1:26, 27) Tan, soo kaar wëns tuu net host ti tinge woo am aanfang fom apsats xteet, khanst tuu noch Yeehoowa tiine. Kuk tayn situatsyoon in een positiiw aat — wii keleechenheete fer Yeehoowa sayn macht in tayn leepe xpiire. Tsum payxpiil, wëns tuu pang fon layt host, woo keeche tayn klaape keen, peet tsu Yeehoowa fer koraajich wëre un tas tuu khanst tayn klaape xitse. (Efé. 6:19, 20) Wëns tuu een xlim krankheet host, ferlang fer Yeehoowa te macht woos tuu prauchst fer tayn pestes in tëm sayn aarwayt mache. Yeetes mool woos tuu siist Yeehoowa tich helfe, tuut tayn klaape sich ferkreese un wërst tuu xtërker.

10. Warom is es nutslich ti payxpiile fon troye tiiner xtutiire, soo wii tii woo in Hebreus 11:32-34 xteen?

¹⁰ Phaul hot ti Xrifte ernst xtutiirt. Tes weeche, hot eyer net ploos fakte kelërnt, awer aach fon payxpiile fon troye layt woo in tëne xteen. Wii eyer fer ti hepreeyxe kriste kexrip hot, hot eyer ferlangt tas se aan te payxpiile fon een lang ray fon troye tiiner tenke solte. (Lees Hebreus 11:32-34.) * Kuk tas payxpiil fon ploos een fon tiise troye tiiner, te kheenich Tawi. Eyer must net ploos te yachtung fon sayn faynte mit mache, awer aach fon etliche woo, foer heyer, sayne froynte waare. Aan Tawi sayn payxpiil triwer noo tenke hot Phaul woerxaynlich ferxtërkt. Tas selwiche mache khan aach fiil nutslich fer uns sin.

11. Warom hot Tawi xwach aus kesiin? (Kuk tas pilt am aanfang fom piichelche.)

¹¹ Fer Kolias, te mechtiche kriicher, Tawi waar xwach. Wii eyer Tawi kesiin hot, hot eyer Tawi ‘mit xpooteray niter kextelt’. Fer Kolias, es waar taytlicht weer kreeser waar un weer te pest ekipamënt un iipung fer te kriich hat. Tawi waar ploos eene puup, net een keiipte kriicher. Awer, in woerheet, Tawi waar net xwach. Eyer hot aan Yeehoowa ketraut, un Yeehoowa hot tëm te macht kep fer Kolias ap kewine. (1 Sam. 17:41-45, 50)

12. Was fer aner kefoer hot Tawi mit kemacht?

¹² Tawi hot een aner kefoer mit kemacht, woo khënt mache eyer sich xwach xpiire. Tee hot Saul, te kheenich woo Yeehoowa iwer Israël in kesetst hot, leaal ketiint. Am aanfang, hot te kheenich Saul Tawi respëktiirt. Awer xpeeter, weeche hoochmuut, is Saul naytich iwich Tawi kep. Saul hot aan kefang Tawi xlecht pehantele un hot soo kaar fersuucht tee um pringe. (1 Sam. 18:6-9, 29; 19:9-11)

13. Wii hot Tawi sich aan kextelt wën Saul tee xlecht pehantelt hot?

¹³ Opwool Tawi fon Saul xlecht pehantelt waar, hot eyer wayter respëkt fer Saul  ketsaycht. Eyer hot erkhënt tas Kot hat Saul wii kheenich raus kesuucht. (1 Sam. 24:6) Tawi hot net Yeehoowa ti xult kep weeche ti xlechte tinge woo Saul tëm kemacht hot. Xtats tas, Tawi hot ketraut tas Yeehoowa teet tëm te neetich kraft kepe fer tiise xweyer situatsyoon aus hale. (Sal. 18:1 un iwerxrift)

14. Soo wii Tawi, was fer xlim situatsyoon hot Phaul mit kemacht?

¹⁴ Te aphostel Phaul hot een situatsyoon mit kemacht woo eenliche wii Tawi sayns waar. Phaul sayn faynte waare fiil mechticher wii tee. Fiile wichtiche fiirer fon sayn taache hon tee kehast. Fiil mools, hon se kexikt tas Phaul ferxlaa un in kexpërt weyer. Soo wii Tawi, Phaul waar xlecht pehantelt kep fon layt woo sayn froynte solte sin. Soo kaar etliche in te kemaynt hon sich keeche tëm kextelt. (2 Cor. 12:11; Fil. 3:18) Awer Phaul hot tiise xlim situatsyoon kephakt. Wii? Opwool eyer keyacht waar, hot eyer wayter kepreeticht. Eyer is wayter leaal tsu ti priiter un xwestere keplip, soo kaar wën se tëm traurich kelos hon. Un tas haupste — eyer is troy tsu Kot keplip pis sayne toot. (2 Tim. 4:8) Phaul is iwich fiile kefoere triwer wech khom, net wayl eyer aan sayn aychne kraft ketraut, awer wayl eyer aan Yeehoowa sayn macht ketraut hot.

15. Was is tayn tsiil, un wii khanst tuu tas hin kriin?

¹⁵ Tuust tuu pelaytchunge un yachtung mit mache fon koleke in te xuul, in te aarwayt orer parente woo net Yeehoowa sayn Tsayer sin? Pist tuu xon fon een pruuter in te kemaynt xlecht pehantelt kep? Wëns tuu xon soo was mit kemacht host, eriner tich fon te payxpiile fon Tawi un Phaul. Tuu khanst wayter ‘tas xlechte mit tëm kuute ap kewine’. (Rom. 12:21) Wën ti layt keeche tich keen, tayn tsiil is net keeche tëne khëmpfe, soo wii Tawi mit Kolias kemacht hot. Xtats tas, tuust tuu ‘tas xlechte ap kewine’ wëns tuu fersuuchst ti layt se helfe iwer Yeehoowa un ti Piipel lërne. Un tuu khanst tas hin kriin, wëns tuu tiise xrite kepst: trau aan te Piipel fer ti layt sayn frooche antworte, tsaych respëkt un kuutheet tsu tëne woo tich xlecht pehantele un mach tas kuute fer al, soo kaar fer tayn faynte. (Mat. 5:44; 1 Ped. 3:15-17)

16-17. Was hot Phaul nii ferkes?

¹⁶ Eep eyer een tisipel fon Kristus wëre, waar Phaul eene krope yunge man, woo Yeesus sayn nookeener keyacht hot. (Atos 7:58; 1 Tim. 1:13) Phaul, woo wii Saul kenënt waar, hot ti kriste fon sayn tsayt aarich ëngst kemacht. Te aychne Yeesus hot Phaul xtil kehal. Fom himel, hot Yeesus mit tëm kexprooch un tee plint kelos. Tas tee khont noch mool siin, must Phaul hilef ferlange kraat fer ti layt woo eyer keyacht hat. Mit teemuut, hot eyer ti hilef fon tëm tisipel Ananias aan kenom, woo hot kemacht tas Phaul khënt noch mool siin. (Atos 9:3-9, 17, 18)

¹⁷ Xpeeter, is Phaul een pekhant mitkliiter fon te kristlich kemaynt kep. Awer, eyer hot nii ferkes ti lisyoon woo eyer mit Yeesus in tëm xtroos tsu Tamaskus kelërnt hat. Phaul is wayter teemuutich keplip un hot wilich ti hilef fon sayn kristliche priiter un xwestere aan kenom. Eyer hot erkhënt tas ‘torich tëne sayn hilef, is eyer ferxtërkt kep’. (Col. 4:10, 11 un noote)

18. Warom khan es xweyer sin ti hilef fon te anere aan nëme?

¹⁸ Was khene mer fon Phaul lërne? Khan sin tas am aanfang, wii mer ti woerheet kelërnt hon, waar es laychter ti hilef fon te anere aan nëme. Meyer hon uns wii khiner in kaystlich aat kexpiirt, woo hate noch fiil fer se lërne. (1 Cor. 3:1, 2) Awer, un hayt? Tuun mer ti hilef fon te anere aan nëme, soo kaar wën mer Yeehoowa xon fiile yoere am tiine sin un fiil speriëns hon? Tas khan fiilaycht xweyer sin, haupstsechlich wën te persoon woo uns helfe wil, weenicher tsayt in te woerheet is. Awer oft mools, tuut Yeehoowa unser priiter un xwestere penutse fer uns ferxtërke. (Rom. 1:11, 12) Wën mer wole Yeehoowa sayn macht kriin, mise mer uns imer tas erinere.

19. Warom khont Phaul fiile wunerliche tinge mache?

¹⁹ Noo eyer een krist kep is, khont Phaul fiile wunerliche tinge mache. Warom? Wayl eyer hot kelërnt tas es is ekaal fon woo heyer een persoon khomt orer wii fiil kraft, xuul orer kelt tee hot. Wën te persoon teemuutich is un aan Yeehoowa traut, khan se fiile kuute tinge mache. Tes weeche, tuust tuu Phaul sayn payxpiil noo mache wëns tuu (1) aan Yeehoowa traust, (2) fon te piiplixe payxpiile lërnst un (3) ti hilef fon te anere aan nëmst. In tiise aat — soo kaar wëns tuu tich xwach finst — tuut Yeehoowa tich helfe xtark wëre.