Yeehoowa wil hon tas tii woo sich hayrate froo sin, un tas sayn ferpiinung fer imer halt. (Mat. 19:4-6) Wëns tuu tich hayrate wilst, wii khanst tuu een kuute man orer fraa fine? Yeehoowa is unser Kriatoer; tes weeche, Eyer wees was mer mache mise fer een froo hayrat hon. Tan, wën mer ti oryentiirunge woo eyer uns kep hot aan wëne, wëre mer froo. Wole mer etliche fon tiise oryentiirunge noo kuke.

Eyerst, mise meyer tiise woerheet iwer uns ferxteen: “Tas hërts is hinerlisticher wii yeete aner tings un is ausensich.” (Yee. 17:9) Wën tswaay persoone woo sich hayrate wole, sich trefe un aan fange namoriire, khene se xnel xtarke xpiirunge eene noom aner ëntwikele. Wën tas pasiirt, wërt es xweyer fer tëne richtich se tenke un kluuche ëntxlise mache. Wën yemant ëntxlist sich hayrate ploos weeche was eyer xpiirt, fiilaycht macht eyer sich noo heyer wee. (Xpr. 28:26) Tes weeche, is es net kluuch, wën se kraat aan kefang hon sich naner khëne, iwer sayn tiifste xpiirunge eene noom aner xpreche orer ferxpreche mache.

Xpriiche 22:3 saat: “Ti kluuch persoon siit te kefoer un ferxtekelt sich; awer ti unferninfticher keen foran un layte ti xtroof.” Weeche was khene ti sites fer een xetsye fine kefeerlich sin? Es is traurich, awer etliche hon sich mit frëmte layt in tiise sites ketrof; too hon se aan kefang namoriire. Awer xpeeter, hon se raus kriit tas ti frëmte wolte ploos tëne hinerkeen. Es pasiirt aach tas uneerliche layt een falx perfil mache fer unferninftiche layt hinerkeen un tëne kelt xteele. Als mool, tii woo tas kemacht hon, hon kesaat tas se Yeehoowa sayn Tsayer waare.

Kuk mool een aner kefoer. Etliche fon tiise sites penutse prokrame fon komputatoore woo saan was fer layt teete kuut sin fer namoriire. Awer es kept kheen pewaysung tas tiise prokrame wërklich funtsyoniire. Es weyer net kluuch aan een prokram woo ti mënxe kemacht hon traue fer soo een wichtich ëntxlus mache — een man orer een fraa raus suuche. Kheen komputatoer prokram khomt ferweenichst ticht fon te kluucheet fon te piiplixe oryentiirunge. (Xpr. 1:7; 3:5-7)

Kuk mool te aanreet woo in Xpriiche 14:15 xteet: “Weer unferninftich is, klaapt aan ales was se tëm saan, awer ti kluuch persoon tenkt kuut foer een xrit kepe.” Eeps tuu ëntxlist op yemant een kuut man orer fraa fer tich wërt, must tuu ti persoon wërklich kuut khëne. Awer tas khan  xweyer sin fer se mache ploos torich ti internet. Fiilaycht khanst tuu ti persoon sayn perfil siin, un tuust fiil tsayt mit tëne fertseele, awer khanst tuu wërklich saan tas tuu ti persoon kuut khënst? Etliche woo ketenkt hon tas se ti richtich persoon fer sich hayrate kefun hate, hon sich ferxrok wën se tsum xlus ti persoon aus te internet ketrof hon.

Te psalmist hot kesaat: “Ich keen net um mit hinerlistiche mëner, un hale mich wayt fon tëne woo ferxtekele was se sin.” (Psal. 26:4) Fiile layt tenke tas es net ferkheert is, in sayn perfil in te internet liie fer xeener foer ti anere aus siin. Im xtant ferxtekele se sayn xlechte kwaliteete in sayn perfil; un wën se torich internet fertseele, khan ma tas net taytlich mërke. Tes weeche, is es wichtich mit acht tenke aan te antworte fon tiise frooche: Etliche layt saan tas se Yeehoowa sayn Tsayer sin; awer sin se wërklich een ketaafte krist? Hon se een ticht froyntxaft mit Yeehoowa? Meecht tëne sayn kemaynt tëne respektiire? Orer sin se een xlecht payxpiil, soo kaar een ‘xlecht keselxaft’? (1 Kor. 15:33; 2 Tim. 2:20, 21) Tëm noo te Piipel, sin se fray fer sich hayrate? Tuu must ti antwort fer tiise frooche fine. Awer es khan xweyer sin tas mache oone ti hilef fon anere Yeehoowa sayn Tsayer woo ti persoon kuut khëne. (Xpr. 15:22) Un kewis, een troy tiiner fon Yeehoowa teet nii mools pleene sich unich “een unklayches yoch xtele” — es wil saan, sich hayrate mit yemant woo Yeehoowa net tiine tuut. (2 Kor. 6:14; 1 Kor. 7:39)

Wii mer kesiin hon, khan es kefeerlich sin tiise sites penutse fer een xetsye fine. Es kept peser aate fer yemant fine un khëne lërne woo khan in te futuer tayn man orer fraa sin. Tan, woo khanst tuu yemant fine? Wën mer uns samele khene, is es meechlich anere Yeehoowa sayn Tsayer khëne lërne in te fersamlunge, konkrëse un anere ewënte.

Wën es net meechlich is tiise puuplix fersamlunge hon, tsum payxpiil weeche ti pantemii fon coronavirus, tuun mer uns fersamele torich ti internet. In tiise fersamlunge, khene mer anere letiche Yeehoowa sayn Tsayer khëne lërne. Tuu khanst tëne heere wën se teele in te fersamlunge hon un aach wën se antworte kepe. (1 Tim. 6:11, 12) Teyer khent aach fertseele in een sala simultânea am ën fon te fersamlung. Als mool tuun Yeehoowa sayn Tsayer sich aach torich ti internet fersamele fer een pisye xpas hon. In tiise momënte, khanst tuu ti persoon woos tuu interesiirt pist peopachte un siin wii se ti anere pehantelt. Soo, khanst tuu tëne sayn kwaliteete mërke. (1 Phe. 3:4) Mit te tsayt, wëns tuu ti persoon xon kuut khënst, khanst tuu raus fine ep teyer ti selwiche tsiile hot un op teyer aych kuut ferxteen tuut.

Wën letiche layt ti piiplixe oryentiirunge penutse fer tëne helfe een kuute man orer fraa fine, tuun se tsiimlich sicher een kuut hayrat hon. Es is kraat soo wii te xpruuch saat: “Ti persoon woo een kuut fraa [orer man] fint, fint was kuutes. Un eyer [orer tii] kriit Yeehoowa sayn tsuxtimung.” (Xpr. 18:22)