1. Was hot Yeehoowa fer tich kemacht?

WII pist tuu een Yeehoowa sayn Tsayer kep? Eyerst, host tuu ti “kuute notisye” keheert. Fiilaycht waare tayn eltere, een xuul orer aarwayt koleke woo mit tich fertseelt hot; orer im xtant hon se mit tich torich ti preetich aarwayt haus tsu haus fertseelt. (Mar. 13:10) Tan, hot yemant fiil aanxtrengung un tsayt aus kep fer ti Piipel mit tich xtutiire. Torich tas xtuutyum, host tuu aan kefang Yeehoowa liipe un tuu host aach tsu wise kriit tas eyer tich liipt. Yeehoowa hot tich tsu te woerheet ketsoo un yets pist tuu Yeesus sayn tisipel; tes weeche, host tuu ti hofnung fer eewiche leepe kriin. (Yoo. 6:44) Kewis, pist tuu petanklich tas Yeehoowa yemant penutst hot fer tich ti woerheet in lërne un tas Eyer tich aan kenom hot wii Tëm sayn tiiner.

2. Was tuun mer in tiise artikel lërne?

² Yets, khëne mer ti woerheet! Un tes weeche hon mer een kroos eer: ti anere helfe mit uns in tiise weech tsum eewiche leepe keen. Awer, etliche fon uns fine es xweyer Piipel xtuutye aan piite un fiire, opwool mer khee propleem hon fer haus tsu haus preetiche. Finst tuu tich als mool soo? Wën tayn antwort ‘yaa’ is, im xtant tuun ti itee fon tiise artikel tich helfe. Meyer tuun xpreche iwer was uns uf muute tuut tisipele mache. Un meyer tuun aach siin wii khene mer torich ti kefoore triwer wech khome woo uns um hale Piipel xtuutye fiire. Fer se aan fange, wole mer siin warom mise mer net ploos preeticher, awer aach leerer fon te kuute notisye sin.

3. Warom tuun mer preetiche?

³ Wii Yeesus uf te eyert waar, hot eyer sayn tisipele kexikt een aarwayt mache woo 2 teele hot. Eyerst, miste se ti kuute oter fom Raych preetiche un tee hot tëne ketsaycht wii tas mache. (Mat. 10:7; Luk. 8:1) Tsum payxpiil: tee hot tëne kesaat was se  mache wën ti layt se kuut aan keheert hon; awer tee hot aach aus keleet was se mache wën ti layt niks iwer ti noorichte wise wolte. (Luk. 9:2-5) Yeesus hot aach foer raus kesaat tas sayn tisipele teete tsaye tsu “ale natsyoone” kepe — es wil saan, tii teete fer fiile layt in fiile pletse preetiche. (Mat. 24:14; Aph. 1:8) Yeesus hot sayn tisipele kexikt iwer tas Raych preetiche un aus leye was tiise Raych mache teet — ekaal ep ti layt tas heere teete orer net.

4. Tëm noo Matheus 28:18-20, mise mer preetiche un was noch mache?

⁴ Was fer waar tas tsweete teel fon te aarwayt woo Yeesus sayn tisipele kexikt hot se mache? Tii solte ti layt in lërne aan se heere ales was eyer tëne kexikt hot. Tsiimlich sicher, hot Yeesus tiise kepoot kep wii eyer foer mee wii 500 fon sayn tisipele tsum foer xayn khom is. (1 Kor. 15:6) Awer, etliche khene saan tas Yeesus sayn kepoot — preetiche un in lërne — waar ploos fer ti eyerste kriste kewees. Is tas wërklich soo? Nee! Yeesus hot aus keleet tas tiise wichtich aarwayt teet “pis tsum ën fom sisteem” kemacht wëre. (Lees Matheus 28:18-20.) * Un im wisyoon woo Yeesus fer Yoohan kep hot, hot eyer taytlich ketsaycht tas al sayn tisipele sole ti layt iwer Yeehoowa lërne. (Apo. 22:17)

5. Was fer ferklaychung hot te aphostel Phaul in 1^te Korinter 3:6-9 penutst fer ti ferpiinung tswixich preetiche un in lërne tsayche?

⁵ Te aphostel Phaul hot ti aarwayt fer tisipele mache ferklaycht mit te aarwayt fer een plantaaj uf phase — meyer mise mee mache wii ploos seeye. Tee hot fer ti korinter kesaat: “Ich hon keplants, Apolo hot kekos. (...) Teyer sayt plantsung fon Kot.” (Lees 1^te Korinter 3:6-9.) * Meyer xafe aan ‘Kot sayn plantsung’. Tes weeche, wën mer preetiche, tuun mer ti soome seeye; un wën mer in lërne, tuun mer ti soome kiise. (Yoo. 4:35) Awer in te selwich tsayt, wise mer tas Kot macht ti planse wakse — in anere wërter: es is Tee woo ti layt tsu tëm tsiit.

6. Wën mer ti layt in lërne, was mise mer mache fer tëne helfe?

⁶ Meyer sin ti layt am suuche woo te “richtich muut fer tas eewiche leepe” hon. (Aph. 13:48) Tas tiise layt khene tisipele wëre, mise mer tii helfe (1) ferxteen, (2) aan nëme, un (3) aan wëne ales was se in te Piipel lërne. (Yoo. 17:3; Kol. 2:6, 7; 1 The. 2:13) Ale in te kemaynt khene ti Piipel xtutënte helfe tiise 3 xrite kepe. Wii? Meyer khene tëne liip tsayche un aach tëne hërtslich wilkhome wën se tsu te fersamlunge keen. (Yoo. 13:35) Als mool, hon ti xtutënte ferkheerte klaape un aanxtelunge tiif in sayn hërts kewortselt. Tes weeche, mus te Piipel leerer fiil tsayt un kraft aus kepe fer te xtutënt helfe tas ales aus rope. (2 Kor. 10:4, 5) Es khan moonate taure fer yemant helfe tiise ënerunge mache soo tas eyer fërtich wërt fer sich taafe lose. Awer unser aanxtrengung wërt net umsonst sin!

7. Warom tuun mer fer ti layt preetiche un tëne in lërne tisipele wëre?

⁷ Warom tuun mer fer ti layt preetiche un tëne in lërne tisipele wëre? Eyerst: wayl mer Yeehoowa liipe. Wëns tuu tayn pestes machst fer tiise kepoot fon preetiche un tisipele  mache aan heere, pewayst tuu tas tuu Yeehoowa wërklich liipst. (1 Yo. 5:3) Tenk mool: tayn liip tsu Yeehoowa hot tich xon uf kemuut preetiche keen. Waar tas laycht tiise kepoot aan heere? Tsiimlich sicher net. Wëns tuu tas eyerste mool preetiche kang pist, waarst tuu nerwees? Kewis! Awer tuu wust xon: tas is ti aarwayt woo Yeesus wil hon tas tuu machst. Tes weeche, host tuu tas kepoot aan keheert. Un tsiimlich sicher, mit te tsayt, is tas laychter fer tich kep in te preetich aarwayt xafe. Awer, was mënst tuu fon een Piipel xtuutyum fiire? Wërst tuu nerwees wëns tuu too triwer tenkst? Im xtant, yaa. Tan, mach soo: peet tsu Yeehoowa un ferlang tëm sayn hilef fer koraaj kriin fer een Piipel xtuutyum aan piite. Soo, khan eyer tich helfe te wunx ferkreese fer tisipele mache.

8. Tëm noo Markus 6:34, was khan uns noch uf muute ti anere in lërne?

⁸ Tsweet: weeche ti liip woo mer fer ti layt xpiire, tuun mer tëne ti woerheet in lërne. Tsum payxpiil: een mool hate Yeesus un sayn tisipele te kanse taach kepreeticht un tes weeche waare se kaput miit. Too, wolte se een plats fine fer se ruue. Awer een kroos folek hot se kefun. Yeesus hot se ketauert, un weeche tas, hot eyer “fiil tings” tëne in kelërnt. (Lees Markus 6:34.) * Yeesus hot sich fiil aan kextrengt, opwool eyer miit waar. Warom? Tee hot sich ufm plats fom folek kextelt. Tee hot kesiin tas se fiil am layte waare — tas se praychte een hofnung hon — un tee wolt tëne helfe. Tas is net fiil anerste hayt. Soo kaar wën es aus siit tas se froo un tsufriite sin, hon ti mënxe sayn propleeme un tii prayche hofnung hon. Tii sin wii ferloerne xeef, oone een xeefer fer tëne lënke. Te aphostel Phaul hot kesaat tas soo sorte layt tuun net Kot khëne un hon khee hofnung. (Ëfe. 2:12) Tii sin ufm “weech woo tsu te fernichtung nëmt”! (Mat. 7:13) Ti layt fon unser teritooryum prayche wërklich fiil Kot khëne lërne. Wën mer too triwer tenke, tuun ti liip un ti mitlayt uns uf muute tëne helfe. Un was is ti pest aat fer tas mache? Uns aan piite fer ti Piipel mit tëne xtutiire.

9. Tëm noo Filiper 2:13, wii khan Yeehoowa tich helfe?

⁹ Wërst tuu een pisye nerwees wëns tuu tenkst aan een Piipel xtuutyum aan piite? Fiilaycht tenkst tuu aan te tsayt woos tuu aus kepe must fer tas xtuutyum in richte un noo heyer fiire. Wën tas tayn situatsyoon is, xprech mit Yeehoowa iwer tayn xpiirunge. Un ferlang tëm fer tich helfe te wunx kriin fer een Piipel xtuutyum fine un fiire. (Lees Filiper 2:13.) * Te aphostel Yoohan lost uns sicher tas Kot tuut unser kepeete antworte wën se mit Tëm sayn wile xtime. (1 Yo. 5:14, 15) Tan, khanst tuu tich sicher sin: Yeehoowa khan tich te wunx kepe fer ti layt in lërne.

10-11. Was khan uns fiilaycht um hale een Piipel xtuutyum fiire?

¹⁰ Meyer wise tas es wichtich is ti layt in lërne. Awer es khan xweyer fer uns sin ales was mer kërn wolte in tiise aarwayt mache. Wole mer siin etliche propleeme woo mer hon un wii khene mer torich tëne triwer wech khome.

¹¹ Fiilaycht weeche unser situatsyoon, khene mer net mache was mer kërn wolte. Tsum payxpiil: etliche puplikatoore sin elter orer hon se een xwach kesuntheet. Is tas tayn situatsyoon? Tan, kuk mool een lisyoon woo mer torich ti pantemii fon coronavirus kelërnt hon: meyer khene Piipel xtuutye torich te telefoon orer torich anere eletroonixe aparate fiire. Tes  weeche, khanst tuu — fon tayn haus — een Piipel xtuutyum aan fange un fiire. Un noch: etliche teete kërn ti Piipel xtutiire, awer tii khene tas net mache in te xtun woo ti meyerste priiter preetiche. Tan, fiilaycht khanst tuu mit tëne moynt frii orer nacht oomt xtutiire. Was mënst tuu: khanst tuu tich aan piite fer tas mache? Yeesus hot Nikotemus nacht oomt in kelërnt wayl tas waar ti xtun woo peser fer Nikotemus ketiint hot. (Yoo. 3:1, 2)

12. Was fer tinge khene tich sicher lose tas tuu khanst een kuute leerer wëre?

¹² Im xtant tenke mer tas mer net kenuuch apiliteet hon fer een Piipel xtuutyum fiire. Fiilaycht tenke mer: ‘Wën ich wil een xtuutyum fiire, mus ich mee khëntnis hon orer een peser leerer wëre.’ Wëns tuu tich soo xpiire tuust, tan kuk mool 3 tinge woo tich sicher lose khene tas tuu een Piipel xtuutyum fiire khanst. Eyerst: Yeehoowa mënt tas tuu kuut kenuuch pist fer ti anere fon te Piipel in lërne. (2 Kor. 3:5) Tsweet: Yeesus — woo ‘ti kans autoriteet im himel un uf te eyert’ hot — hot tich kexikt in lërne. Tas tsaycht tas eyer uf tich traut. (Mat. 28:18) Un trit: tuu khanst hilef fon Yeehoowa un fon te priiter kriin. Yeehoowa hot Yeesus keholef se wise was se saan un Tee khan tas selwiche mit tich mache. (Yoo. 8:28; 12:49) Tuu khanst aach hilef ferlange fer te superintentent fon tayn preetich aarwayt krup, fer een kwape pyoneer orer fer een puplikatoer woo fiil speryens hot. Tii khene tich helfe een Piipel xtuutyum aan fange un fiire. Een aner aat wiis tuu lërne khanst een peser leerer sin, is mit tiise puplikatoore keen wën se een Piipel xtuutyum fiire.

13. Warom mise mer wilich sin fer in unerxiitliche aate in lërne?

¹³ Meyer khene es xweyer fine naye aate un naye feramente fer in se lërne penutse. Ti aat wii mer Piipel xtuutye fiire is anerste hayt. Yets, hon mer een nay puplikatsyoon fer een Piipel xtuutyum fiire: tas puuch Los tich kuut keen im leepe fer imer! Weeche tas, ti aat fer tas xtuutyum in richte un fiire hot sich keënert. Meyer leese weenicher apsetse un mer tuun mee mit tëm xtutënt fertseele. Wën mer in lërne, tuun mer wiiteos un eletroonixe feramente penutse, soo wii ti aplikatiiw JW Library^®. Wëns tuu net weest tiise feramente penutse, xprech mit yemant woo tich helfe khan tas lërne. Ti mënxe al hon sayn aychne kewoonheete un fer uns is es net laycht ënere ti aat wii mer ti tinge imer kemacht hon. Awer, wëns tuu ti hilef fon Yeehoowa un fon te anere aan nëmst, wërt es laychter fer tich ënere un tuu tuust tich noch mee fraye wëns tuu ti Piipel mit te anere xtutiirst. Een pyoneer hot kesaat: “Mit tiise naye aat fer se lërne, te xtutënt un te leerer fine sich kuut.”

14. Fon was sole mer uns erinere wën mer in een xweyer teritooryum preetiche? Un wii tuut 1^te Korinter 3:6, 7 uns uf muute?

¹⁴ Fiilaycht preetiche mer in een teritooryum woos xweyer is Piipel xtuutye aan fange. Etliche layt hon khee interes in unser pexeet orer tuun sich keeche tas xtele. Was khan uns helfe uns froo hale in soo sorte teritoorye? Meyer sole imer traan tenke: in tiise xlim welt, khan ti situatsyoon fon te layt sich fiks ënere. Etliche layt woo khee interes hon, khene mit te tsayt mërke tas se prayche Kot sayn oryentiirung hon. (Mat. 5:3) Etliche woo nii mools unser puplikatsyoone aan kenom hate, hon nochter aan kefang ti Piipel xtutiire. Meyer wise aach tas Yeehoowa te Hër fon te erntung is. (Mat. 9:38) Tee wil hon tas mer wayter planse un kiise awer Tee macht es wakse. (1 Kor. 3:6, 7) Un soo kaar wën mer yets khee Piipel xtuutyum am fiire sin, mise mer imer traan tenke: Yeehoowa peloont uns weeche unser aanxtrengung —  net weeche ti resultaate. Tas tuut uns fiil uf muute! *

15. Wii xpiirt sich Yeehoowa wën yemant een Piipel xtuutyum aan nëmt un tan aan wënt was eyer lërnt?

¹⁵ Wën yemant ti woerheet lërnt un too triwer mit te anere fertseelt, frayt sich Yeehoowa mechtich fiil! (Xpr. 23:15, 16) Khanst tuu tich foer xtele wii froo wërt Yeehoowa wën eyer siit sayn folek flaysich preetiche un in lërne? Tsum payxpiil: een pantemii hot ti kans welt petrof im tiinst yoer fon 2020; awer noch soo, sin 7.705.765 Piipel xtuutye kefiirt kep un 241.994 layt sin keholef kep sich tsu Yeehoowa tetikiire un sich taafe lose. Tiise naye tisipele tuun Piipel xtuutye fiire un mee tisipele mache. (Luk. 6:40) Meyer khene uns sicher sin tas mer Yeehoowa kefale wën mer ti anere in lërne tisipele wëre.

16. Was fer kuut tsiil khene mer xtele?

¹⁶ Tisipele mache is net een laycht aarwayt. Awer mit Yeehoowa sayn hilef, khene mer ti anere in lërne unser Fater im himel liipe. Was mënst tuu fon tëm tsiil xtele fer ferweenichst een Piipel xtuutyum aan fange un fiire? Wën mer yeete oportuniteet penutse fer een Piipel xtuutyum aan piite, khene ti resultaate uns ferwunere. Say tich sicher: Yeehoowa tuut tayn aanxtrengung seechne!

17. Wii tuun mer uns xpiire wën mer khene een Piipel xtuutyum fiire?

¹⁷ Es is een eer fer uns ti woerheet fer ti layt preetiche un in lërne. Tiise aarwayt lost uns wërklich froo! Te aphostel Phaul — woo fiile layt in Thesaloonika keholef hot tisipele wëre — hot sayn xpiirunge soo aus keleet: “Was is unser hofnung, unser frayt orer unser kroon fon frooheet foer unser Hër Yeesus in sayn presens? Sayt net teyer? Yawool, teyer sayt unser hërlichkheet un unser frooheet.” (1 The. 2:19, 20; Aph. 17:1-4) Fiile hayt tsu taach tuun sich kraat soo xpiire. Stéphanie un sayn man hon fiile layt keholef pis aan taaf hin khome. Kuk mool was tiise xwester saat: “Yemant helfe sich tsu Yeehoowa tetikiire is tas kreeste frooheet woos kept.”