1. Was hot Yeehoowa kemacht klaych noo Aatam un Ewa sayn sint? (Xeenesis 3:15)

 KLAYCH noo Aatam un Ewa sayn sint, hot Yeehoowa hofnung fer tëne sayn nookhomer kep torich een wichtich profetsii. Was Yeehoowa kesaat hot xteet in Xeenesis 3:15. * (Lees.)

2. Warom is ti profetsii fon Xeenesis 3:15 soo wichtich?

² Tiise profetsii xteet im eyerste puuch fon te Piipel. Awer al ti anere piicher fon te Piipel sin mit tiise profetsii ferpun. Soo wii een xtrik woo een last hols samer halt, tuun ti wërter fon Xeenesis 3:15 ti kanse piicher fon te Piipel samer hale in een eensich pexeet: Kot teet een Reetner xike woo teet te Taywel un al sayn xlechte nookeener fernichte. * Tas is sicher was wunerliches fer tii woo Yeehoowa liipe!

3. Was tuun mer in tiise artikel lërne?

³ In tiise artikel, tuun mer tiise frooche iwer ti profetsii fon Xeenesis 3:15 antworte: Iwer weem tuut se xpreche? Wii tuut tiise profetsii sich erfiile? Un was fer nutse kriin mer too temit?

4. Weer is “ti xlang”, un wii wise mer tas?

⁴ Xeenesis 3:14, 15 xprecht iwer een “xlang”, te “nookhomer” fon te xlang, een “fraa”, un te “nookhomer” fon te fraa. Ti Piipel helft uns se wise weer yeete eene is. * Wole mer mit te “xlang” aan fange. Een echt xlang khont net ferxtan hon was Yeehoowa im Eetem kaate kesaat hot. Tes weeche, khene mer saan tas Yeehoowa sayn wërter waare keeche een xlau kriatuer. Mit weem waar Yeehoowa wërklich am xpreche? Apokalipsis 12:9 tuut taytlich aus leye weer ti xlang is. Te tekst saat tas “ti orixinaal xlang” Satanaas te Taywel is. Awer weer meecht te nookhomer fon te xlang sin?

5. Weer is te nookhomer fon te xlang?

⁵ Als mool, penutst ti Piipel tas wort “nookhomer” fer yemant pexraype woo een aner persoon soo ticht noo macht, tas khan ma saan tas eyer sayn khint is. Tes weeche, te nookhomer fon te xlang sin untroye mënxe un engele woo, soo wii Satanaas, sich keeche Kot un sayn folek xtele. Too tepay sin ti engele woo te himel kelos hon in Noee sayn taache un xlechte mënxe woo sich soo wii sayn Fater, te Taywel, aan xtele. (Xee. 6:1, 2; Yoo. 8:44; 1 Yo. 5:19; Yuu. 6)

6. Warom khent “ti fraa” net Ewa kewees sin?

⁶ Yets, wole mer raus fine weer ti “fraa” is. Tii khont net Ewa kewees sin. Warom net? Kuk mool een uersach. Ti profetsii saat tas te nookhomer fon te fraa teet ti xlang sayn khop “fertrike”. Wii mer xon kesaat hon, ti xlang is te xlechte engel Satanaas; un khee imperfekt mënx, nookhomer fon Ewa, hot ti kraft fer tëm fertrike. Es waar neetich was kreeseres.

7. Tëm noo Apokalipsis 12:1, 2, 5, un 10, weer is ti fraa fon Xeenesis 3:15?

⁷ Tas letste puuch fon te Piipel saat uns weer  ti fraa is. (Lees Apokalipsis 12:1, 2, * 5, * 10. *) Tas is net een keweenlich fraa! Te moon is unich sayn fiis un uf sayn khop is een kroon mit 12 xtërne. Tii pringt aach uf te welt een unkeweenlich khint: Kot sayn Raych. Tas Raych is im himel; tes weeche, mus ti fraa aach im himel sin. Soo, ti fraa petayt tas himlix teel fon Yeehoowa sayn Orkanisatsyoon, woo fon te troye engele kemacht is. (Kal. 4:26)

8. Weer is tas haupste teel fon te nookhomer fon te fraa un wanee is eyer tas haupste teel kep? (Xeenesis 22:15-18)

⁸ Ti Piipel helft uns aach se wise weer tas haupste teel fon te nookhomer fon te fraa is. Tee solt een nookhomer fon Apraham sin. (Lees Xeenesis 22:15-18.) * Soo wii ti profetsii foer raus kesaat hot, waar Yeesus een nookhomer fon tiise troye man. (Luk. 3:23, 34) Awer te nookhomer mist mee wii ploos een keweenliche mënx sin, wayl eyer teet Satanaas te Taywel fer imer fernichte. Tan, wii Yeesus unkefeer 30  yoore alt waar, is eyer mim hayliche kayst kesalpt kep. In te xtun, is Yeesus tas haupste teel fon te nookhomer fon te fraa kep. (Kal. 3:16) Noo Yeesus sayn toot un ufxtaye, hot Kot “tëm mit eer un hërlichkheet kekroont” un tëm “ti kans autoriteet im himel un uf te eyert kep”, too tepay autoriteet “fer te Taywel sayn aarwayt se fermache”. (Hep. 2:7; Mat. 28:18; 1 Yo. 3:8)

9-10. (a) Weer noch macht teel fon te nookhomer fon te fraa, un wanee fange se aan teel fon tiise nookhomer mache? (b) Was tuun mer yets siin?

⁹ Awer anere, net ploos Yeesus, teete nookhomer fon te fraa sin. Weer sin se? Phaul hot se itentifitsiirt wii eyer fer ti kesalpte kriste — too tepay yuute un tii woo net yuute waare — kesaat hot: “Wën teyer tsu Kristus keheert, sayt teyer wërklich Apraham sayn nookhomer, ërper tëm noo tas ferxpreche.” (Kal. 3:28, 29) Wën Yeehoowa een krist mit hayliche kayst salpt, wërt eyer teel fon te nookhomer fon te fraa. Tes weeche, te nookhomer fon te fraa sin Yeesus un ti 144.000 woo mit tëm rechiire tuun. (Apo. 14:1) Tii al fersuuche se tenke un sich aan xtele soo wii sayn Fater, Yeehoowa.

¹⁰ Yets, wise mer xon weer sin tii woo in Xeenesis 3:15 foer khome. Tan, wole mer yets lërne was Yeehoowa xon kemacht hot fer tiise profetsii erfiile un was fer nutse mer too temit kriin.

11. Ti profetsii saat tas te nookhomer fon te fraa teet een wee in sayn “feerst” kriin. Was wil tas saan?

¹¹ Tëm noo te profetsii fon Xeenesis 3:15, teet ti xlang te nookhomer fon te fraa in sayn “feerst” wee mache. Tas hot sich erfiilt wii Satanaas ti romaaner un ti yuute penutst hot fer Kot sayn Soon um pringe. (Luk. 23:13, 20-24) Wën yemant sayn feerst wee macht, khan eyer net torich een tsayt laafe. Kraat soo, ti tsayt woo Yeesus toot im kraap waar, khont eyer kaar niks mache. (Mat. 16:21)

12. Wii un wën wërt ti xlang sayn khop fertrikt?

 ¹² Ti profetsii in Xeenesis 3:15 tsaycht tas Yeesus teet net im kraap plaype. Wii soo? Tii saat tas te nookhomer fon te fraa teet ti xlang sayn khop fertrike. Es wolt saan tas Yeesus mist peser wëre fon te wee in sayn feerst. Un tas is wërklich pasiirt! Im 3^te taach noo sayn toot, is Yeesus uf keruuft kep un hot unxtërplich leepe im himel kriit. In Kot sayn pextimt tsayt, tuut Yeesus Satanaas fer imer fernichte. (Hep. 2:14) Yeesus Kristus un tii woo mit tëm rechiire, tuun aach Kot sayn faynte, te nookhomer fon te xlang, fernichte. (Apo. 17:14; 20:4, 10) *

13. Was fer nutse kriin mer fon te erfiilung fon tiise profetsii?

¹³ Wëns tuu Kot sayn tiiner pist, kriist tuu xon nutse fon te erfiilung fon tiise profetsii. Wii Yeesus uf te eyert waar, hot eyer ti personaliteet fon sayn Fater perfekt noo kemacht. (Yoo. 14:9) Tan, torich Yeesus khene mer Yeehoowa khëne lërne un liipe. Meyer kriin aach nutse fon Yeesus sayn inlërnunge un fon te aat wii eyer ti kristlich kemaynt hayt fiirt. Tee hot uns in kelërnt wii mer leepe khene in een aat woo Kot kefalt. Un meyer al khene nutse kriin fon Yeesus sayn toot — es wil saan, te wee in sayn feerst. Wii soo? Noo Yeesus sayn ufxtaye, hot Kot te perfekt opfer fon sayn Soon aan kenom, un tiise opfer “tuut uns rayn fon yeete sint lose”. (1 Yo. 1:7)

14. Wii wise mer tas ti profetsii woo Yeehoowa im Eetem kaate kemacht hot, hot sich net in te selwich xtun erfiilt?

¹⁴ Yeehoowa sayn wërter im Eetem kaate hon ketsaycht tas ti profetsii teet sich net in te selwich xtun erfiile. Es teet tsayt nëme pis te nookhomer fon te fraa foer khome khent, pis te Taywel sayn nookeener samele teet un pis ti fayntxaft, orer has, tswixich ti tswaay krupe sich ëntwikele teet. Tiise profetsii ferxteen helft uns, wayl tii tsaycht tas ti welt unich Satanaas sayn kontrol teet Kot sayn tiiner hase. Fiile yoore xpeeter, hot Yeesus was eenliches fer sayn tisipele kesaat. (Mar. 13:13; Yoo. 17:14) Es is taytlich tas tiise teel fon te profetsii sich erfiile tuut, hauptseechlich in te letste 100  yoore. Warom khene mer tas saan?

15. Warom tuut ti welt uns hayt hase mee wii noch nii, awer warom prayche mer khee pang fon Satanaas hon?

¹⁵ Klaych tëm noo wii Yeesus aan kefang hot se rechiire in 1914, is Satanaas fom himel runer kexmis kep. Hayt, khan eyer net fon te eyert faart keen un tee is sayn fernichtung am waarte. (Apo. 12:9, 12) Awer Satanaas is net ruych am waarte. Tee is aarich wuutich un tuut Kot sayn folek atakiire. (Apo. 12:13, 17) Tes weeche, tuut Satanaas sayn welt uns hase mee wii noch nii. Awer mer prayche khee pang fon Satanaas un sayn nookeener hon. Xtats tas, khene mer ti selwich sicherheet hon woo te aphostel Phaul hat, wii eyer kexrip hot: “Wën Kot pay uns is, weer khan sich keeche uns xtele?” (Rom. 8:31) Meyer khene kans uf Yeehoowa traue, wayl wii mer xon kesiin hon, tas kreeste teel fon te profetsii in Xeenesis 3:15 hot sich xon erfiilt.

16-18. Was fer nutse hon Curtis, Ursula un Jessica kriit wayl se Xeenesis 3:15 ferxteen?

¹⁶ Yeehoowa sayn profetsii in Xeenesis 3:15 khan uns helfe yeete xwiirichkheet in unser leepe phake. Curtis, woo wii misyoneer in Guam tiint, saat: “Etliche tinge woo in mayn leepe pasiirt sin, hon es fer mich xweyer kelos troy tsu Yeehoowa plaype. Awer triwer noo tenke aan te profetsii fon Xeenesis 3:15 helft mich wayter uf mayn himlixe Fater traue.” Curtis tuut hërtslich waarte te taach woo Yeehoowa al unser xwiirichkheete tsum ën pringt.

¹⁷ Ursula is een xwester woo in Payern leept. Tii saat tas ti profetsii fon Xeenesis 3:15 ferxteen, hot se keholef ti sicherheet kriin tas ti  Piipel fon Kot inspiriirt is. Wii se kesiin hot tas al ti anere profetsiie mit tiise profetsii ferpun sin, hot se sich ferwunert. Tii saat aach: “Es hot mayn hërts aan kekrif wii ich kelërnt hon tas Yeehoowa was klaych kemacht hot fer uns hofnung kepe.”

¹⁸ Jessica, fon Mikroneesya, saat: “Ich khan mich noch mayn xpiirunge traan tenke wii ich ferxtan hon tas ich ti woerheet kefun hat! Ti profetsii fon Xeenesis 3:15 waar sich am erfiile. Tii helft mich erinere tas was mer hayt layte is net was Yeehoowa fer uns wolt. Tii ferxtërkt aach mayn sicherheet tas Yeehoowa tiine, kept mich tas peste leepe woos hayt meechlich is, un een noch peser leepe im futuer.”

19. Warom khene mer uns sicher sin tas tas letste teel fon te profetsii sich erfiile tuut?

¹⁹ Wii mer kesiin hon, ti profetsii fon Xeenesis 3:15 is sich hayt am erfiile. Meyer wise kans taytlich weer te nookhomer fon te fraa un te nookhomer fon te xlang sin. Yeesus is tas haupste teel fon te nookhomer fon te fraa; tee is kuut fon sayn wee in te feerst kep, un yets is eyer een mechtich unxtërplich Kheenich. Yeehoowa hot xon neekst al raus kesuucht woo mit Yeesus im himel rechiire tuun. Tas eyerste teel fon te profetsii hot sich xon erfiilt; tes weeche, khene mer uns sicher sin tas tas letste teel fon te profetsii — ti fertrikung fon te xlang sayn khop — tuut sich aach erfiile. Kot sayn tiiner wëre aarich froo sin wën Satanaas fernicht is! Pis tiise tsayt khomt, kep net uf. Meyer khene wërklich uf unser Kot traue. Torich te nookhomer fon te fraa, tuut eyer fiil seechen pringe fer “ale natsyoone fon te eyert”. (Xee. 22:18)