1. Meyer khene imer fer Yeehoowa peete. Wii sole mer uns too triwer xpiire?

 TEE woo te himel un ti eyert kemacht hot, hot uns een wunerliche kexenk kep — meyer khene mit tëm xpreche torich tas kepeet. Tenk mool noo: meyer khene unser hërts fer Yeehoowa uf mache in kwalkee xtun un in kwalkee xprooch un mer prayche net tas foer raus ap xpreche. Meyer khene fer tëm peete fon een pet in een krankehaus orer in een katee, mit te sicherheet tas unser liiplich Fater uns heere tuut. Meyer wole uns nii ferkese wii wunerlich tiise kexenk is.

2. Wii hot te kheenich Tawi ketsaycht tas eyer fiil weyert fer tas kepeet kep hot?

² Te kheenich Tawi hot fiil weyert kep fer tas kexenk fon kepeet. Tee hot fer Yeehoowa kesung: “Tas mayn kepeet wërt wii een insëns foer tich in kericht.” (Psal. 141:1, 2) In Tawi sayn taache, te haylich insëns woo ti priister penutst hon, waar mit fiil acht in kericht. (Eeks. 30:34, 35) Wii soo wolt Tawi hon tas sayn kepeete wii tiise insëns weyere? Tee wolt mit acht tenke aan was eyer saan teet wën eyer tsu Yeehoowa peete teet. Tas is aach unser hërtslich wunx. Meyer wole hon tas unser kepeete Yeehoowa kefale.

3. Wën mer tsu Yeehoowa peete, wii sole mer uns aan xtele un warom?

³ Wën mer tsu Yeehoowa peete, sole mer fiil respekt tsayche. Tenk aan te wunerliche wisyoone woo Isaiias, Esekyël, Tanyël, un Yoohan hate. Tii sin net kans ekaal, awer es kept etwas eenlich tswixich tëne: tii al pexraype Yeehoowa wii eene hërliche  Kheenich. Isaiias hot “Yeehoowa kesiin uf een troon kesetst woo hooch un kehërlicht waar”. (Isa. 6:1-3) Esekyël hot Yeehoowa kesiin uf sayn himlixe wan am setse; “een hel licht waar um tëm rom kewees, wii een reen pooche”. (Ese. 1:26-28) Tanyël hot “te Alt fon Taache” kesiin mit een ways tsaych aan, un fayer is fon sayn troon khom. (Tan. 7:9, 10) Yoohan hot aach kesiin Yeehoowa uf sayn troon kesetst. Um troon rom waar een kriin reen pooche, soo wii esmeraalta. (Apo. 4:2-4) Tenk mool noo: nimant is soo hërlich wii Yeehoowa, awer tee lost uns ticht pay tëm khome torich tas kepeet. Tes weeche, mise mer fiil weyert fer tas kepe un aach fiil respekt tsayche. Awer iwer was khene mer peete?

4. Was lërne mer fon te eyerste tinge woo Yeesus ferlangt hot im kepeet fon Matheus 6:9, 10?

⁴ Lees Matheus 6:9, 10. * In te Përich Reet, hot Yeesus sayn tisipele in kelërnt wii se peete solte fer Kot kefale. Noo se saan “tes weeche, mist teyer soo peete”, hot Yeesus eyerst ketsaycht was ti haupste tinge waare. Tee hot im kepeet ferlangt tas Yeehoowa sayn naame solt ferhërlicht sin; tas sayn Raych — woo Kot sayn faynte fernichte tuut — solt khome; un tas ti kuute tinge woo Kot macht fer ti eyert un ti mënxe im futuer solte pasiire. Wën mer too triwer peete, tsayche mer tas Kot sayn wile wichtich fer uns is.

5. Is es richtich iwer perseenliche sache peete?

⁵ Im neekste teel fom kepeet, hot Yeesus ketsaycht tas es richtich is iwer perseenliche sache peete. Meyer khene fer Yeehoowa ferlange ese fer te taach, fer unser sinte fertsaye, fer uns fon te fersuuchunge xitse un fer uns fon tëm Xlechte rete. (Mat. 6:11-13) Meyer wise tas mer Yeehoowa sayn hilef prayche un mer wole tëm kefale. Un wën mer iwer tiise tinge peete, tsayche mer tas tsu Yeehoowa.

6. Sole mer ploos peete iwer ti tinge woo im kepeet fon Matheus 6:9-13 xteen? Lee tas aus.

⁶ Yeesus wolt net hon tas sayn tisipele tas kepeet fon Matheus 6:9-13 kenau noo saan teete. In anere kepeete woo Yeesus kemacht  hot, hot eyer kexproch iwer tinge woo wichtich fer tëm in te tsayt waare. (Mat. 26:39, 42; Yoo. 17:1-26) Kraat soo, khene mer peete iwer yeete tings woo uns ketanke macht. Tsum payxpiil, wën mer een ëntxlus mache mise, khene mer kluucheet un ferxtëntnis im kepeet ferlange. (Psal. 119:33, 34) Wën mer een xweyer aarwayt aan fange tuun, khene mer hilef im kepeet ferlange fer se wise wii tas mache. (Xpr. 2:6) Ti eltere khene fer sayn khiner peete, un ti khiner khene fer sayn eltere peete. Un meyer al khene un sole peete weeche unser Piipel xtutënte un tii woo mer preetiche. Awer in unser kepeete, sole mer net ploos tinge ferlange.

7. Warom sole mer Yeehoowa in unser kepeete loope?

⁷ Meyer sole uns net ferkese fon Yeehoowa in unser kepeete loope. Nimant fertiint mee loop wii unser Kot. Tee is “kuut un imer fërtich fer se fertsaye”. Tee is aach “parmhërtslich un mitlaytich, ketultich un fol leaale liipe un troyheet”. (Psal. 86:5, 15) Yeehoowa fertiint loop weeche weer tee is un was tee macht.

8. Was fer sin etliche tinge woo mer khene Yeehoowa tanke? (Psalm 104:12-15, 24)

⁸ In unser kepeete, loope mer Yeehoowa. Awer mer tuun tëm aach tanke weeche ti wunerliche tinge woo eyer uns kept. Tsum payxpiil: meyer khene tëm tanke weeche ti xeene farpe fon te pluume, weeche ti unerxiitliche sorte ese woo soo kuut xmeke tuun, un weeche ti frooheet woo mer xpiire tuun wayl mer kuute fraaynte hon. Yeehoowa, unser liipliche Fater, kept uns tas ales un noch fiil mee ploos fer uns froo siin. (Lees Psalm 104:12-15, * 24. *) Awer noch wichticher: meyer tanke Yeehoowa weeche tas fiil kaystlich esmitel woo eyer fersoricht un ti xeen hofnung woo mer fer te futuer hon.

9. Was khan uns helfe net ferkese Yeehoowa tanke? (1^te Thesalooniker 5:17, 18)

⁹ Es is laycht sich ferkese se tanke ales was Yeehoowa fer uns macht. Was khan tich helfe  tich too tefun traan tenke? Tuu khanst een list mache fon unerxiitliche tinge woos tuu im kepeet ferlangt host. Xpeeter, khanst tuu siin wii Yeehoowa tayn kepeete keantwort hot. Tan, mach een kepeet un tuu tëm tanke weeche sayn hilef. (Lees 1^te Thesalooniker 5:17, 18.) * Tenk triwer noo: wën yemant uns tankt, xpiire mer uns keliipt un froo. Kraat soo, wën mer Yeehoowa tanke wayl eyer unser kepeet keheert hot, lose mer tëm sayn hërts froo. (Kol. 3:15) Awer es kept aach een aner kuut uersach fer unser Kot tanke.

10. Tëm noo 1^te Pheeter 2:21, warom sole mer Yeehoowa tanke wayl eyer Yeesus tsu te eyert kexikt hot?

¹⁰ Lees 1^te Pheeter 2:21. * Meyer sole Yeehoowa tanke wayl eyer uns sayn liipe Soon kexikt hot fer uns in lërne. Wën mer iwer Yeesus leese, lërne mer fiil tings iwer Yeehoowa un wii tëm froo mache. Wën mer klaape aan tëm fray khaaf opfer tsayche, khene mer een ticht fraayntxaft un friit mit Yeehoowa hon. (Rom. 5:1)

11. Warom peete mer in Yeesus sayn naame?

¹¹ Meyer tanke aach Yeehoowa tas mer khene torich sayn Soon tsu Tëm peete. Kot heert un antwort ti kepeete woo in Yeesus sayn naame kemacht sin. Yeehoowa penutst Yeesus fer uns kepe was mer ferlangt hon. Yeesus hot tas soo aus keleet: “Ales was teyer in mayn naame ferlangt, tas mache ich, tas te Fater torich sayn Soon kehërlicht wëre sol.” (Yoo. 14:13, 14)

12. Weeche was noch khene mer Yeehoowa tanke weeche sayn Soon?

¹² Weeche Yeesus sayn fray khaaf opfer, tuut Yeehoowa unser sinte fertsaye. Ti Piipel pexraypt Yeesus wii unser “hooche priister” woo sich “aan te recht sayt fom troon fon Kot im himel kesetst” hot. (Hep. 8:1) Yeesus is aach “een helfer pay te Fater”. (1 Yo. 2:1) Meyer sin aarich petanklich tsu Yeehoowa tas eyer uns een Hooche Priister kep hot, woo unser xwacheete ferxteet un woo “weeche uns aan hale tuut”! (Rom. 8:34; Hep. 4:15) Wayl mer imperfekte mënxe sin, weyer es unmeechlich fer uns tsu Yeehoowa peete oone Yeesus sayn fray khaaf opfer. Meyer khene Yeehoowa net kenuuch tanke weeche tas wunerliche kexenk woo eyer uns kep hot — tas leepe fon sayn liipe Soon!

13. In te nacht foer sayn toot, wii hot Yeesus ketsaycht tas eyer sayn tisipele keliipt hot?

¹³ In te nacht foer sayn toot, hot Yeesus een lang tsayt weeche sayn tisipele kepeet. Tee hot fer sayn Fater ferlangt ‘se uf phase weeche te Xlechte’. (Yoo. 17:15) Tas hot ketsaycht wii fiil Yeesus tëne keliipt hot. Tee wust tas klaych, teet eyer fiil xwiirichkheete mit mache; awer noch soo, hot eyer sich ketanke mit sayn aphostele kemacht.

14. Wii khene mer tsayche tas mer unser priiter un xwestere liipe?

¹⁴ Soo wii Yeesus, tuun mer net ploos aan uns selepst tenke. Xtats tas, tuun mer imer fer unser priiter un xwestere peete. Wën mer tas mache, tuun mer Yeesus sayn kepoot fer uns naner liipe aan heere; un mer tsayche fer Yeehoowa wii fiil mer unser priiter un xwestere liipe tuun. (Yoo. 13:34) Es is net umsonst fer unser priiter un xwestere peete. Kot sayn Wort saat: “Tas eerliche kepeet fon tëm kerechte hot fiil kraft.” (Tya. 5:16)

15. Warom prayche ti priiter un xwestere unser kepeete?

¹⁵ Ti priiter un xwestere prayche unser  kepeete wayl tii tuun fiile xwiirichkheete aus hale. Meyer khene fer Yeehoowa ferlange tëne helfe krankheete, natuer unklike, kriiche, yachtung un anere propleeme aus hale. Meyer khene aach peete fer unser priiter woo xtram xafe fer se helfe tii woo in neetichkheet sin. Im xtant, khënst tuu yemant woo soo sorte propleeme mit macht. Was mënst tuu fon tëm sayn naame in tayn kepeete penutse? Wën mer fer Yeehoowa ferlange fer unser priiter helfe aus hale, tsayche mer tas mer se wërklich liipe tuun.

16. Warom sole mer peete fer tii woo fiile flichte in te Orkanisatsyoon hon?

¹⁶ Tii woo fiile flichte in te Orkanisatsyoon hon, sin aarich petanklich wën mer fer tëne peete un tiise kepeete tuun wërklich tëne helfe. Te aphostel Phaul wust tas eyer ti anere sayn kepeete praycht. Tes weeche, hot eyer kexrip: “Tuut aach fer mich peete, tas wën ich mayn maul uf mache, ti wërter fer mich kep wëre; soo khan ich mit koraaj xpreche fer tas kaystlich kehaymnis fon te kuute notisye pekhant mache.” (Ëfe. 6:19) Hayt, hon mer aach flaysiche priiter woo xtram in te Orkanisatsyoon xafe. Wën mer fer Yeehoowa ferlange tëne sayn aarwayt seechne, tsayche mer tas mer tëne liipe.

17-18. In was fer situatsyoone im xtant mise mer ti anere im kepeet representiire, un was sole mer uns erinere?

¹⁷ Als mool, wëre mer in kelaat fer ti anere im kepeet representiire. Tsum payxpiil: im xtant, een xwester woo een Piipel xtuutyum fiirt, ferlangt fer ti aner xwester woo se mit helft, tas kepeet mache. Fiilaycht, ti xwester woo mit helft khënt net ti xtutëntin soo kuut; tes weeche, teet se liiper tas kepeet am ën fom xtuutyum mache. Soo khan se peser wise was se saan wën se fer ti xtutëntin peete tuut.

¹⁸ Een pruuter im xtant wërt in kelaat fer een kepeet mache in te preetich aarwayt fersamlung orer in te kemaynt. Ti priiter woo tiise priwilëj kriin sole sich erinere fon was tas opjetiiw fon tiise fersamlung is. Tas kepeet sol net penutst wëre fer ti kemaynt aan reete orer fer etwas pekhant mache. In te meyerste fersamlunge, 5 minute sin kepleent kep fer tas liit un kepeet. Tes weeche, te pruuter woo tas kepeet macht, sol net “fiil wërter” penutse,  hauptseechlich am aanfang fon te fersamlung. (Mat. 6:7)

19. Was tuut uns helfe fërtich fer Yeehoowa sayn kerichts taach sin?

¹⁹ Tas kepeet sol een wichtich teel fon unser leepe sin, wayl Yeehoowa sayn kerichts taach aarich ticht is. Yeesus hot too triwer kesaat: “Playpt wachsam, tuut ti kans tsayt peete tas teyer khent aus rayse fon ale tiise tinge woo pasiire mise.” (Luk. 21:36) Wën mer imer peete, tuut unser klaape xtark sin un wën Yeehoowa sayn kerichts taach khomt, sin mer xon fërtich.

20. Wii khene unser kepeete wii een insëns mit kuute keroch sin?

²⁰ Was hon mer hayt kelërnt? Meyer kepe fiil weyert fer tas kepeet, tiise kroose kexenk fon Kot. Tas haupste in unser kepeet sole tinge sin woo mit Yeehoowa sayn tsiil se tuun hon. Meyer tuun aach tanke weeche Yeesus un tas eyer unser Kheenich is; un mer peete fer unser priiter un xwestere. Kewis, khene mer aach fer Yeehoowa peete fer tas neetiches fer yeete taach hon un tas eyer uns helft unser klaape xtark hale. Wën mer mit acht tenke aan was mer in unser kepeete saan, tsayche mer tas mer fiil weyert kepe fer tiise wunerliche kexenk. Unser wërter wëre wii een insëns mit kuute keroch fer Yeehoowa — etwas woo ‘tëm frayt’. (Xpr. 15:8)