XTUUTYUM ARTIKEL 28
Kot sayn Raych rechiirt xon!
“Tas raych fon te welt is tas Raych fon unser Hër un fon sayn Kristus kep.” (APOKALIPSIS 11:15)
LIIT 22 Kot sayn Raych sol khome!
WAS TUUN MER SIIN? *
1. Was fer sicherheet khene mer hon un warom?
WËN mer siin was uf te welt pasiirt, is es laycht ti hofnung ferliire. Ti familye tuun sich net mee naner liipe. Yeete taach, kepe ti layt ekoiistixer un kroper. Fiile fine es xweyer se klaape aan tëne woo autoriteet hon. Awer tas ales khan uns sicher lose tas ti tinge klaych peser wëre. Warom? Wayl ti layt xtele sich kenau aan wii ti Piipel foer raus kesaat hot in een profetsii iwer ti “letste taache”. (2 Tim. 3:1-5) Ti erfiilung fon tiise profetsii pewayst un kept uns sicherheet tas Yeesus kheenich fon Kot sayn Raych kep is. Awer tas is ploos eene fon te fiile profetsiie iwer Kot sayn Raych. Wën mer noo kuke anere profetsiie woo sich in te letste yoore erfiilt hon, wërt unser klaape xtërker.
Ti xtike fon een quebra-cabeça tuun kenau phase fer een komplët pilt mache. Kraat soo, in te piiplixe piicher fon Tanyël un Apokalipsis, kepts profetsiie iwer unser futuer woo kenau phase tuun. Tiise profetsiie noo kuke helft uns ferxteen tas tas ën klaych khome tuut, soo wii Yeehoowa ferxproch hot. (Kuk te apsats 2.)
2. Was siin mer in tiise artikel un warom? (Xprech iwer tas pilt am aanfang fom piichelche.)
2 In tiise artikel, siin mer (1) een profetsii woo helft uns ferxteen wanee Kot sayn Raych aan kefang hot se rechiire, (2) profetsiie woo uns helfe ferxteen tas Yeesus kheenich fon Kot sayn Raych im himel kep is, un (3) profetsiie woo tsayche wii ti faynte fon Kot sayn Raych fernicht wëre. Meyer siin tas tiise profetsiie sin wii xtike fon een quebra-cabeça woo kenau phase. Wën mer se samer setse, khene mer tas komplët pilt siin, es wil saan, ferxteen tas tas ën klaych khome tuut, soo wii Yeehoowa ferxproch hot.
WËN HOT KOT SAYN RAYCH AAN KEFANG SE RECHIIRE?
3. Was fer sicherheet iwer te kheenich fon Kot sayn Raych kept uns ti profetsii in Tanyël 7:13, 14?
3 Ti profetsii fon Tanyël 7:13, 14 lost uns sicher tas Yeesus Kristus wërt te pest Rechiirente fer Kot sayn Raych sin. Layt fon ale natsyoone tuun tëm froo tiine un nimant ersetst tëm wii kheenich. Een aner profetsii fon Tanyël hot aach kesaat tas Yeesus teet aan fange wii kheenich fom Raych rechiire am ën fon te 7 tsayte. Is es meechlich se wise wën Yeesus kheenich kep is?
4. Wii helft uns ti profetsii fon Tanyël 4:10-17 raus fine was fer yoer Yeesus kheenich kep is? (Kuk aach ti noote.)
4 Lees Tanyël 4:10-17. * Ti “7 tsayte” petayte 2.520 yoore. Tii hon aan kefang in 607 F.K., wii ti papilooner te letste kheenich uf Kot sayn troon in Yeruusalem, wech kenom hon. Tii sin tsum ën khom in 1914, wii Yeehoowa Yeesus — “woo tas kesetsliche recht hot” — wii kheenich fon Kot sayn Raych in kextelt hot. * (Ese. 21:25-27)
5. Wii khan ti profetsii fon te “7 tsayte” uns helfe?
5 Wii khan tiise profetsii uns helfe? Wën mer ti profetsii iwer ti 7 tsayte ferxteen, kriin mer ti sicherheet tas Kot tuut sayn ferxpreche kraat in te richtich tsayt erfiile. Yeehoowa hot een spetsiifix tsayt raus kesuucht fer Yeesus wii kheenich in xtele; un wii tiise tsayt khom is, hot eyer tas kemacht. Tes weeche, wise mer tas eyer al ti anere profetsiie erfiilt in te tsayt woo eyer pextimt hot. Yawool, Yeehoowa sayn taach “tuut sich net ferxpeete”! (Hap. 2:3)
WII WISE MER TAS YEESUS KHEENICH FON KOT SAYN RAYCH KEP IS?
6. (a) Was siin mer uf te eyert woo pewayst tas Yeesus im himel rechiirt? (b) Wii xtime tiise ewënte mit te profetsii fon Apokalipsis 6:2-8?
6 Neekst am ën fon sayn preetich aarwayt too uf te eyert, hot Yeesus foer raus kesaat etliche ewënte woo uf te welt pasiire teete. Tii teete tëm sayn tisipele helfe se wise tas eyer aan kefang hat im himel rechiire. Yeesus hot iwer kriiche, hungernoot, eyertxutere un anere tinge kexproch. Tee hot aach foer raus kesaat tas krankheete teete “uf een plats noom aner pasiire”; ti pantemii fon coronavirus is een payxpiil too tefun. Tiise ewënte sin teel fon was ti Piipel wii “te tsayche” fon Kristus sayn presëns nënt. (Mat. 24:3, 7; Luk. 21:7, 10, 11) Mee wii 60 yoore noo tas Yeesus kextorep un tsurik tsum himel kang is, hot eyer fer te aphostel Yoohan noch mee pewaysunge kep tas tiise ewënte pasiire teete. (Lees Apokalipsis 6:2-8.) * Un tii al pasiire tsayt Yeesus kheenich kep is in 1914.
7. Warom pasiire soo fiil xlime tinge uf te welt tsayt Yeesus kheenich kep is?
7 Warom is ti welt xlechter kep wii Yeesus kheenich kep is? Apokalipsis 6:2 kept uns een wichtich kleenichkheet: tas eyerste tings woo Yeesus kemacht hot wii eyer kheenich kep is, waar een kriich khëmpfe. Te kriich waar keeche Satanaas un sayn temoone. Un tëm noo Apokalipsis 12, hot Yeesus se ap kewun un tsu te eyert kexmis. Satanaas is aarich wuutich kep un atakiirt ti mënxe. Tes weeche, saat ti Piipel: “Oo aarme eyert.” (Apo. 12:7-12)
Ti xlechte notisye lose uns net froo. Awer wën mer siin ti piiplixe profetsiie sich erfiile, tas kept uns ti sicherheet tas Kot sayn Raych xon rechiirt (Kuk te apsats 8.)
8. Wën mer siin ti profetsiie iwer tas Raych sich erfiile, wii khan tas uns helfe?
8 Wii khene tiise profetsiie uns helfe? Was in te welt pasiirt un ti ënerung in te layt sayn aanxtelung pewayse tas Yeesus kheenich kep is. Tan, mer sole net pees orer traurich plaype wën ti layt sich krop orer ekoiistix aan xtele. Xtats tas, sole mer uns traan tenke: tas erfiilt piiplixe profetsiie. Tas Raych rechiirt xon! (Psal. 37:1) Un wii te Armaxeton tichter khomt, siin mer noch mee xwiirichkheete uf te welt. (Mar. 13:8; 2 Tim. 3:13) Meyer tanke unser liipliche Fater im himel, wayl tee helft uns ferxteen warom es soo fiil propleeme kept.
WII WËRE TI FAYNTE FON KOT SAYN RAYCH FERNICHT?
9. Wii tuut ti profetsii fon Tanyël 2:28, 31-35 ti letst kroos welt rechiirung pexraype, un wën hot se aan kefang se rechiire?
9 Lees Tanyël 2:28 *, 31-35 *. Hayt, siin mer tiise profetsii sich aach erfiile. Napukotonosoor sayn traam hot ketsaycht was “in te letste taache pasiire [teet]”, noom aanfang fon Yeesus sayn rechiirung. Tswixich Yeesus sayn faynte too uf te eyert, weyer ti letst welt rechiirung. Ti Piipel pexraypt se wii ti fiis “fon ayse un leet” un tii rechiirt xon hayt. Tii hot aan kefang se rechiire torich te 1te Welt Kriich, wën Kroos Pritaanye un ti Fereenichte Xtaate fon Amërika aan kefang hon mitsamer xafe. Ti kroos welt rechiirung fon Kroos Pritaanye un Nort Amërika is anerste wii tii woo friier khom sin un ti xtaatue fon Napukotonosoor sayn traam tsaycht ferweenichst 2 fon tiise unerxiite.
10. (a) Wii tuut Tanyël sayn profetsii kenau pexraype ti kroos welt rechiirung fon Kroos Pritaanye un Nort Amërika? (b) Mit was sole mer uf phase? (Kuk te khaste “ Phas uf mit te leet!”)
10 Eyerst: ti anere welt rechiirunge waare imer pexrip mit ploos een sort metaal, wii kolt orer silper; awer ti kroos welt rechiirung fon Kroos Pritaanye un Nort Amërika is pexrip wii een mixung fon ayse un leet. Ti leet petayt ti “folke fon te eyert”; in anere wërter: ti keweenliche layt. (Tan. 2:43) Hayt, khene mer taytlich mërke ti layt sayn influëns in te waale, in te kampanya fer ti mënxliche rechte xitse, in te protëste un in te sintikaate. Tas ales lost es xweyer fer ti fiirer fon tiise kroos welt rechiirung se mache was se pleene.
11. Ti profetsii iwer ti kroos welt rechiirung fon Kroos Pritaanye un Nort Amërika ferxtërkt unser klaape tas mer in te tsayt fom ën sin. Wii soo?
11 Tsweet: ti kroos welt rechiirung fon Kroos Pritaanye un Nort Amërika, woo pexrip is wii ti fiis fon te xtaatue, is ti letst welt rechiirung fon te piiplix profetsii. Es khomt net een aner welt rechiirung noo tëne. Xtats tas, tuut Kot sayn Raych se im Armaxeton fernichte, mit al ti anere mënxliche rechiirunge. (Apo. 16:13, 14, 16; 19:19, 20) *
12. Was fer aner pewaysung in Tanyël sayn profetsii kept uns troost un hofnung?
12 Wii khan tiise profetsii uns helfe? Tanyël sayn profetsii kept uns noch mee pewaysunge tas mer in te tsayt fom ën sin. Mee wii 2.500 yoore tsurik, hot Tanyël profetisiirt tas, noo Papiloon, noch 4 welt rechiirunge teete iwer Kot sayn folek rechiire. Tee hot foer raus kesaat tas ti kroos welt rechiirung fon Kroos Pritaanye un Nort Amërika teet ti letst fon tëne sin. Tas kept uns troost un hofnung tas klaych, tuut Kot sayn Raych al ti mënxliche rechiirunge fernichte un iwer ti kans eyert rechiire. (Tan. 2:44)
13. Was petayte ti “10 kheeniche” un te “8te kheenich” fon Apokalipsis 17:9-12 un wii erfiilt sich tiise profetsii?
13 Lees Apokalipsis 17:9-12. * Te 1te Welt Kriich hot fiil fernichtung keprung. Tes weeche, is etwas pasiirt woo een aner piiplix profetsii iwer ti letste taache erfiilt hot. Ti fiirer fon te eyert wolte friit tsu te welt pringe. Tan, in yanuer fon 1920, hon se ti Unyoon fon Natsyoone in kextelt. In 1945, hot ti Orkanisatsyoon fon te Fereenichte Natsyoone se ersetst. Tiise orkanisatsyoon is wii een “8te kheenich” keruuft. Awer tii is net een kroos welt rechiirung. Tii hot ploos kraft weeche ti rechiirunge woo se pay xteen. Ti Piipel nënt tiise rechiirunge wii “10 kheeniche”.
14-15. (a) Was tsaycht Apokalipsis 17:3-5 iwer “Papiloon ti Kroos”? (b) Was mache hayt fiile layt woo ti falxe relichyoone pay kextan hon?
14 Lees Apokalipsis 17:3-5. * In een wisyoon fon Kot, hot Yoohan een huure fraa kesiin: “Papiloon ti Kroos”, woo al ti falxe relichyoone fon te eyert petayt. Wii erfiilt sich tiise wisyoon? Xon een lang tsayt, tuun ti falxe relichyoone ti welt rechiirunge pay xteen un mit tëne xafe. Awer klaych, xtelt Yeehoowa in te hërtse fon te politixe rechiirunge “te wunx [fer] tëm sayn ketanke aus fiire”. Was wërt te resultaat sin? Ti “10 kheeniche” — es wil saan, ti politixe rechiirunge — tuun ti falxe relichyeese orkanisatsyoone atakiire un fernichte. (Apo. 17:1, 2, 16, 17)
15 Wii wise mer tas tas ën fon Papiloon ti Kroos ticht is? Fer uns helfe ti antwort fine, wole mer uns traan tenke: een tings woo ti friirix Papiloon kexitst hot, waar tas waser fom kroose Eufrates flus. Apokalipsis ferklaycht ti milyoone layt woo Papiloon ti Kroos pay xteen wii “tas waser” woo se xitst. (Apo. 17:15) Awer es saat aach tas tas waser teet ‘troke wëre’, es wil saan, fiile teete noo lose ti falxe relichyoone pay xteen. (Apo. 16:12) Hayt, erfiilt sich tiise profetsii. Een kroose numer layt hot ti falxe relichyoone im xtich kelos un hot aan kefang ti solutsyoon fer sayn propleeme in anere pletse suuche.
16. Wën mer ferxteen ti profetsiie iwer ti fernichtung fon Papiloon ti Kroos un ti kriatsyoon fon te Fereenichte Natsyoone, wii helft uns tas?
16 Wii khene tiise profetsiie uns helfe? Ti kriatsyoon fon te Fereenichte Natsyoone un ti kleener numer layt woo ti falxe relichyoone pay xteen, pewayse tas mer in te letste taache sin. Es is woer tas, yeete taach, tuun weenicher layt Papiloon ti Kroos pay xteen; awer is net tas woo ti falxe relichyeese orkanisatsyoone fernichte tuut. Wii mer xon kesaat hon, Yeehoowa xtelt in te hërtse fon te “10 kheeniche” — es wil saan, ti rechiirunge woo ti Fereenichte Natsyoone pay xteen — “te wunx [fer] sayn ketanke aus fiire”. Uf een mool, tuun tiise natsyoone Papiloon ti Kroos fernichte, etwas woo ti welt net waart. * (Apo. 18:8-10) Ti fernichtung fon Papiloon ti Kroos tuut ti welt tiif petrefe un es khan xwiirichkheete pringe. Awer Kot sayn folek kriit ferweenichst 2 uersache fer sich fraye. Eyerst, ti falxe relichyoone, woo xon een lang tsayt Kot sayn faynte sin, tuun net mee eksistiire; un tsweet, unser pefrayung fon tiise xlechte welt wërt tichter wii noch nii. (Luk. 21:28)
KLAAP TAS KOT SAYN FOLEK IM FUTUER XITST!
17-18. (a) Wii khene mer unser klaape wayter ferxtërke? (b) Was siin mer im neekste artikel?
17 Tanyël hot foer raus kesaat tas “ti woere khëntnis [teet] raychlich pekhant kepe”. Un tas is wërklich woer! Hayt, ferxteen mer ti profetsiie iwer unser tsayte. (Tan. 12:4, 9, 10) Tii sin soo kenau tas unser respekt tsu Kot un Sayn Wort ferkreest sich. (Isa. 46:10; 55:11) Tan, tuu wayter tayn klaape ferxtërke: xtutiir ti Piipel un helf anere een ticht fraayntxaft mit Kot hon. Tee xitst ale tii woo uf tëm kans traue un xenkt tëne “eewich friit”. (Isa. 26:3)
18 Im neekste artikel, hale mer uns traan in te profetsiie iwer Kot sayn folek in te tsayt fom ën. Wii mer noch siin, tuun tiise profetsiie aach pewayse tas mer in te letste taache sin. Un meyer siin anere pewaysunge tas Yeesus — woo xon unser kheenich is — tuut sayn troye nookeener wayter fiire.
LIIT 61 Keet forem Kot sayn Tsayer!
^ Fom kanse mënxliche kexicht, sin mer in eene fon te ufmuutichste tsayte am leepe! Kot sayn Raych is xon in kextelt, soo wii fiile piiplixe profetsiie foer raus kesaat hate. In tiise artikel, tuun mer etliche fon tiise profetsiie noo kuke. Tas tuut unser klaape uf Yeehoowa ferxtërke un uns helfe in ruu plaype un uf Kot traue yets un im futuer.
^ (Tanyël 4:10-17) “‘In te wisyoone woo torich mayn khop kang sin wii ich in mayn pet am laye waar, hon ich een mechtich kroose paam kesiin im mite fon te eyert. 11 Te paam is kewakst un is xtark kep, un sayn kipel is pis tsum himel kang. Fon al ti eke fon te eyert, waars meechlich te paam siin. 12 Te paam hat xeene pleter, fiil friichte, un in tëm waars ese fer ale kaar. Ti wilte tiere hon xate unich tëm kesuucht un ti feechel fom himel hon in sayn nest keleept. Al ti lepeentiche kriatuure hon fon tëm kes. 13 “‘Wii ich ti wisyoone am kuke waar, woo torich mayn khop khom sin wii ich in mayn pet waar, hon ich een wachter, een hayliche, kesiin, woo fom himel runer khom is. 14 Eyer hot mit hart xtim kexraayt: “Tuut te paam ap hake, tuut sayn neste ap xnayte, macht sayn pleter runer fale un tuut sayn friichte aus prayte! Tas ti tiere unich tëm un ti feechel in sayn nest aus rayse. 15 Awer lost te xtam mit sayn wortsle in te eyert, im mite kraas fom khamp, ferpunt mit ayse un khuper. Tas te tau fom himel tëm nas macht, un tas tee mit te tiere im mite fon te planse fon te eyert playpt. 16 Sayn hërts sol keënert wëre: xtats een mënxliche hërts, sol eyer tas hërts fon een wilt tier kriin, un 7 tsayte sole iwer tëm rom keen. 17 Ti wachter hon tas kexikt un ti hayliche hon tas pekhant kemacht, tas al woo leepe wise sole tas te Ale Heechste is te Rechiirente fon te mënxliche raych un tas tee es kept tsu weem eyer wil, un tas tee soo kaar te teemuutichste fon te mënxe in setst fer se rechiire.”
^ Kuk ti lisyoon 32, phunkt 4, im puuch Los tich kuut keen im leepe fer imer!, un kuk te wiiteo Kot sayn Raych hot aan kefang tsu rechiire in 1914 im jw.org.
^ (Apokalipsis 6:2-8) Un ich hon eene wayse kaul kesiin. Tee woo uf tëm truf kehokt hat, hat een poochen. Tee hot een kroon kriit, un tee waar am kewine fer sayn kewinung fërtich mache. 3 Wii eyer te 2te selo uf kemacht hot, hon ich ti 2te lepeentich kriatuer keheert se saan: “Khom!” 4 Un eene aner kaul is raus kang, mit een fayer farp. Tee woo uf tëm kehokt hot, hot tas recht kriit fer te friit fon te eyert wech xafe, tas ti mënxe sich naner um pringe teete, un fer tëm waars een kroos xwaart kep. 5 Wii eyer te 3te selo uf kemacht hot, hon ich ti 3te lepeentiche kriatuer keheert se saan: “Khom!” Un ich hon eene xwatse kaul kesiin. Tee woo uf tëm kehokt hot, hat een woo in sayn hënt. 6 Tswixich ti 4 lepeentiche kriatuure, hon ich was eenliches wii een xtim keheert, am saan: “Een liter wayts fer een tenaaryum un tray liter keerst fer een tenaaryum. Un fersau net ti eel un te wayn.” 7 Wii eyer te 4te selo uf kemacht hot, hon ich ti 4te lepeentich kriatuer keheert se saan: “Khom!” 8 Ich hon eene kaul oone farp kesiin. Tee woo uf tëm kehokt hot, is Toot kenënt kep, un tas Kraap is tëm ticht noo kang. Tii hon autoriteet iwer een fetel fon te eyert kriit, fer mit een lang xwaart, mit hungernoot, mit phest woo tsum toot nëmt, un mit te wilte tiere fon te eyert, um pringe.
^ (Tanyël 2:28) Awer im himel, kepts een Kot woo uf tekt was kehaymnis is, un tee hot fer te kheenich Napukotonosoor pekhant kemacht was in te letste taache pasiire tuut. Tas is te traam un tas sin ti wisyoone woo torich tayn khop kang sin wiis tuu in tayn pet keleet waarst:
^ (Tanyël 2:31-35) “Oo kheenich, wiis tuu am kuke waarst, is een kroos xtaatue tsum foer xayn khom. Tiise xtaatue — woo mechtich kroos waar, woo fiil kexaynt hot un woo xreklich waar — waar foer tich kewees. 32 Te khop fon te xtaatue waar fon phuer kolt; sayn prust un aarme, fon silper; sayn layp un ower peen, fon khuper; 33 sayn peen, fon ayse; un sayn fiis waare een teel ayse un een teel leet. 34 Wiis tuu am kuke waarst, is een xteen kexnit kep — awer net mit mënxliche hënt. Un te xteen hot ti fiis fon te xtaatue — woo fon ayse un leet sin — ketrof un ferprokelt. 35 Too, sin tas ayse, ti leet, tas khuper, tas silper un tas kolt uf een mool, al mitsamer, ferprokelt kep. Tii sin wii tas xtroo kep, woo im trexpootem fliie tuut im somer; te wint hot se wech kenom, un khont ma noch net een kleene xtikche fon tëne fine. Awer te xteen woo ti xtaatue ketrof hot, is een kroose përich kep un hot ti kans eyert ketekt.
^ Fer mee informatsyoone iwer Tanyël sayn profetsii fine, kuk A Sentinela 15te Yuuni fon 2012, sayte 14-19.
^ (Apokalipsis 17:9-12) “Fer tas is es neetich een kluuch ferxtant hon: ti siwe khep tuun siwe përiche petayte un ti fraa sitst uf tëne. 10 Un es kept 7 kheeniche: 5 sin xon um kefal, eene is, un te aner is noch net khom, awer, wën eyer khome tuut, tuut eyer ploos pisye tsayt plaype. 11 Un tas wilt tier woo waar, awer woo net is, is aach een 8te kheenich; tas khomt fon te 7 kheeniche, un tuut tsu te fernichtung keen. 12 “Ti 10 hëner woos tuu kesiin host, petayte 10 kheeniche. Tii hon noch net een raych kriit; awer, tii kriin autoriteet wii kheeniche torich een xtun, mit tëm wilte tier.
^ (Apokalipsis 17:3-5) Tee hot mich in te macht fom kayst tsu een tesërt kenom. Un ich hon een fraa kesiin woo uf een roote wilt tier hokt un tas tier waar fol mit naame woo Kot pelaytiche tuun un hat siwe khep un tseen hëne. 4 Ti fraa waar aan ketsoo mit een tsaych woo lila plau un root waar un hat xmuke fon kolt, fayne xteen un phërle aan sich, un in tëne sayn hant waar een khelich fon kolt fol apxayliche tinge un unrayniche tinge fon sayn seksuaal imoraaliteet. 5 Aan sayn xtërn waar een naame kexrip, een kehaymnis: “Papiloon ti Kroos, ti muter fon te huure un fon te apxayliche tinge fon te eyert.”
^ Fer mee informatsyoone iwer was klaych im futuer pasiirt fine, kuk tas kapitel 21 fom puuch O Reino de Deus já Governa!
