XTUUTYUM ARTIKEL 29
Xaf mit unser fiirer Yeesus
“Es waar mich ti kans autoriteet im himel un uf te eyert kep.” (MATHEUS 28:18)
LIIT 13 Cristo, o nosso exemplo
WAS TUUN MER SIIN? *
1. Was is Yeehoowa sayn wile hayt?
HAYT, Kot sayn wile is tas ti kuute notisye fom Raych uf te kans eyert kepreeticht wëre. (Mar. 13:10; 1 Tim. 2:3, 4) Tas is Kot sayn aarwayt, un tas is soo wichtich fer tëm tas Eyer sayn liipe soon Yeesus raus kesuucht hot fer tas fiire. Un wayl Yeesus ti preetich aarwayt fiirt, khene mer uns sicher sin tas ti fërtich wërt eep tas ën khomt, soo wii Yeehoowa es wil. (Mat. 24:14)
2. Was tuun mer in tiise artikel lërne?
2 Wii is Yeesus sayn “troye un ferninftiche sklaaw” am penutse fer kaystlich esmitel fer sayn tisipele fersoriche un ti kreest preetich aarwayt woo xon kemacht kep is orkanisiire? (Mat. 24:45) Was khan yeete eene fon uns mache fer Yeesus un te troye sklaaw uner xtitse? Tas is was mer in tiise artikel lërne tuun.
YEESUS FIIRT TI PREETICH AARWAYT
3. Was fer autoriteet hot Yeesus kriit?
3 Yeesus is ti preetich aarwayt am fiire. Awer, wii khene mer uns sicher too tefun sin? Een pisye foer Yeesus tsurik tsum himel keen, hot eyer etliche fon sayn troye tisipele in een përich in Kalileya ketrof. Tee hot tëne kesaat: “Es waar mich ti kans autoriteet im himel un uf te eyert kep.” Mërk mool was noch eyer kesaat hot: “Keet un macht tisipele fon mënxe fon ale natsyoone.” (Mat. 28:18, 19) Tan, tswixich anere tinge, hot Yeesus autoriteet kriit fer ti preetich aarwayt fiire.
4. Warom khene mer uns sicher sin tas Yeesus ti preetich aarwayt noch am fiire is?
4 Yeesus hot kesaat tas ti aarwayt fer preetiche un tisipele mache teet in “ale natsyoone” kemacht wëre un tas eyer teet mit sayn tisipele sin “ti kans tsayt, pis tsum ën fom sisteem”. (Mat. 28:20) Tiise wërter tuun taytlich tsayche tas ti preetich aarwayt teet wayter unich Yeesus sayn fiirung plaype pis unser taache.
5. Wii helfe mer te Psalm 110:3 erfiile?
5 Yeesus hot sich khee ketanke kemacht ep tas kenuuch aarwayter weyere am ën fon tiise sisteem. Tee wust tas ti wërter fon tëm psalmist sich erfiile teete: “Tayn folek tuut sich fraywilich aan piite im taach woos tuu tayn militeer fiirst.” (Psal. 110:3) Wëns tuu ti kuute notisye preetichst, tuust tuu Yeesus un te troye un ferninftiche sklaaw uner xtitse; tuu pist aach am helfe tiise profetsii erfiile. Ti aarwayt is am kemacht wëre, awer es kept etliche kefoore.
6. Was fer kefoer tuun ti preeticher fom Raych hayt mit mache?
6 Een kefoer woo ti preeticher fom Raych mit mache is ti opositsyoon. Ti aphostate, un ti relichyeese un politixe fiirer hon fiile liie iwer unser aarwayt ferprayt. Wën unser parente, aarwayt koleke orer ti layt woo mer khëne hiner kang wëre fon tiise falxe informatsyoone, fiilaycht wole se uns tswinge noo lose Yeehoowa tiine un preetiche. In etliche lënter, tuun unser faynte uns atakiire, saan tas se xlechte tinge mit uns mache orer soo kaar uns in te katee xmayse. Meyer tuun uns net ferwunere mit te aat wii ti layt uns pehantele, wayl Yeesus foer raus kesaat hot: “Ale natsyoone tuun aych hase weeche mayn naame.” (Mat. 24:9) Tiise has keeche uns is een pewaysung tas mer Yeesus noo keen un tas mer Yeehoowa sayn tsuxtimung hon. (Mat. 5:11, 12) Satanaas is hinich tiise opositsyoon. Awer Yeesus is fiil xtërker wii tee! Mit Yeesus sayn unerxtitsung, sin layt fon te kanse natsyoone ti kuute notisye am heere.
7. Fer tich, was pewayst tas Apokalipsis 14:6, 7 sich am erfiile is?
7 Een aner kefoer woo mer mit mache wën mer preetiche, sin ti fiile unerxiitliche xprooche. Awer in te rewelatsyoon woo Yeesus fer te aphostel Yoohan kep hot, hot eyer kesaat tas, in unser tsayt, teete ti kuute notisye torich tiise kefoer triwer wech khome. (Lees Apokalipsis 14:6, 7.) * Wii? Meyer kepe fer soo fiil layt wiis meechlich is ti xans fer ti kuute notisye aan nëme. Hayt, khene layt fon te kans welt piiplixe artikele in unser site jw.org leese, wayl es hot informatsyoone in mee wii 1000 xprooche! Unser haupste puuch fer tisipele mache, Los tich kuut keen im leepe fer imer!, is aprowiirt fer iwersetst wëre in mee wii 700 xprooche. Meyer hon aach kaystlich esmitel fer ti taape torich wiiteos un fer ti pliinte torich puplikatsyoone in braile. Layt “fon ale xprooche fon te natsyoone” sin am lërne ti “phuer xprooch” fon te woerheet xpreche. (Sak. 8:23; Sof. 3:9) Meyer khene siin ti piiplixe profetsiie sich erfiile. Tas ales wërt kemacht unich te lënkung fon unser fiirer Yeesus Kristus.
8. Pis yets, was sin ti resultaate fon unser preetich aarwayt?
8 Hayt, mee wii 8.000.000 layt in 240 lënter sin teel fon Yeehoowa sayn Orkanisatsyoon, un yeetes yoer tausente tuun sich taafe lose! Awer es kept etwas woo wichticher wii ti numere is: “ti nay personaliteet”, es wil saan, ti kristliche kwaliteete woo tiise naye tisipele ëntwikelt hon. (Kol. 3:8-10) Fiile sin net mee imoraalix orer wyolent; anere hon te prekonseyt im xtich kelos; un noch anere tuun net mee tenke tas sayn lant peser wii ti anere sayns is. Ti profetsii fon Isaiias 2:4 is sich aach am erfiile: tii tuun “net mee te kriich lërne”. Wën mer uns aan xtrenge fer ti nay personaliteet aan tsiie, helfe mer ti layt tsu Kot sayn Orkanisatsyoon khome; un mer pewayse aach tas mer unser fiirer, Yeesus Kristus, noo keen. (Yoo. 13:35; 1 Phe. 2:12) Warom hon mer soo kuute resultaate? Wayl Yeesus kept uns ti hilef woo mer prayche.
YEESUS TUUT EEN SKLAAW IN SETSE
9. Tëm noo Matheus 24:45-47, was hot Yeesus kesaat teet in te tsayt fom ën pasiire?
9 Lees Matheus 24:45-47. * Yeesus hot foer raus kesaat tas in te tsayt fom ën, teet eyer een “troye un ferninftiche sklaaw” in setse fer kaystlich esmitel fersoriche. Meecht tiise sklaaw hayt xtram am xafe sin? Yaa, sicher! Yeesus penutst een kleen krup kesalpte mëner fer “in te richtich tsayt, tas esmitel kepe” fer Kot sayn folek un tii woo interes tsayche. Tiise mëner tenke net tas se hëre iwer te klaape fon te anere sin. (2 Kor. 1:24) Xtats tas, erkhëne se tas Yeesus Kristus te “fiirer un rechiirente” fon sayn folek is. (Isa. 55:4)
10. Was fer puplikatsyoon fon tëm pilt hot tich keholef aan fange Yeehoowa tiine?
10 Fon 1919 aan, hot te troye un ferninftiche sklaaw fiile puplikatsyoone in kericht fer se helfe tii woo sich interesiirt hon, ti woerheet fon te Piipel lërne. In 1921, hot te sklaaw tas puuch A Harpa de Deus puplitsiirt. Tas hot tii woo sich interesiirt hon keholef ti haupste inlërnunge fon te Piipel lërne. Un wii ti tsayt rom kang is, anere puplikatsyoone sin fersoricht kep: “Seja Deus Verdadeiro”, A Verdade que Conduz à Vida Eterna, Poderá Viver Para Sempre no Paraíso na Terra, Conhecimento Que Conduz à Vida Eterna, O Que a Bíblia Realmente Ensina?, Was khan ti Piipel uns in lërne?, un unser letst puplikatsyoon, Los tich kuut keen im leepe fer imer! Was fer puplikatsyoon hot tich keholef unser liipliche Fater khëne lërne un liipe? Al tiise puplikatsyoone sin kepleent kep fer uns helfe tisipele mache un tii sin imer in te richtich tsayt khom.
11. Warom is es aarich wichtich tas mer mee iwer Yeehoowa un ti Piipel lërne?
11 Awer sin net ploos tii woo sich kraat interesiirt hon woo mise een tiif khëntnis iwer Yeehoowa un ti Piipel hon. Meyer al mise tas hon. Te aphostel Phaul hot kexrip: “Tas xtark esmitel is fer rayfe mënxe.” Phaul hot aach kesaat tas aan wëne was in te Piipel xteet, teet uns helfe “se wise ti unerxiit tswixich was richtich un was ferkheert is”. (Hep. 5:14) Hayt tsu taach, weeniche layt khimere sich mit was richtich un ferkheert is. Tes weeche, khan es xweyer sin Yeehoowa sayn kesetse aan heere. Awer Yeesus lost sich sicher tas mer lërne was mer prayche fer unser klaape xtark hale. Un mer lërne was mer prayche torich Kot sayn Wort, ti Piipel. Ti kans aarwayt woo te sklaaw macht fer tas in richte un aus teele is unich Yeesus sayn fiirung.
12. Soo wii Yeesus, wii hon mer eer fer Kot sayn naame kep?
12 Soo wii Yeesus, kepe mer fer Yeehoowa sayn naame ti eer woo tee fertiint. (Yoo. 17:6, 26) Tsum payxpiil, in 1931 hon mer te naame Yeehoowa sayn Tsayer raus kesuucht, woo sich aan te Piipel xtaypt. Soo, hon mer ketsaycht wii Kot sayn naame wichtich fer uns is un tas mer wolte kekhënt sin torich te naame fon unser himlixe Fater. (Isa. 43:10-12) Un fon oktooper fon tiise yoer aan, is Yeehoowa sayn naame imer in te eyerst sayt fon Te Wachthorm foer khom. Ti Tradução do Novo Mundo da Bíblia Sagrada hot aach Yeehoowa sayn naame noch mool uf tëm richtiche plats ketuun. Tas is kans anerste wii was ti khëriche kemacht hon: tii hon Yeehoowa sayn naame fon tëne sayn iwersetsunge fon te Piipel raus kehool.
YEESUS TUUT SAYN NOOKEENER ORKANISIIRE
13. Was lost tich sicher tas Yeesus is “te troye un ferninftiche sklaaw” hayt am penutse? (Yoohan 6:68)
13 Torich te “troye un ferninftiche sklaaw”, hot Yeesus sayn nookeener in een wunerlich Orkanisatsyoon uf te eyert kesamelt fer ti phuer aanpeetung pay xteen. Wii xpiirst tuu tich iwer tiise Orkanisatsyoon? Im xtant tenkst tuu tas selwiche wii Pheeter, woo tsu Yeesus kesaat hot: “Fer weem tuun mer keen? Tuu host ausxprechunge fon eewiche leepe.” (Yoo. 6:68) Woo weyere mer hayt wën mer Yeehoowa sayn Orkanisatsyoon net khëne kelërnt hëte? Torich tii, lost Yeesus sich sicher tas mer ales was mer prayche hon fer troy tsu Kot plaype. Yeesus iipt uns aach fer unser preetich aarwayt kuut mache. Un noch: tee helft uns “ti nay personaliteet” aan tsiie tas mer Yeehoowa kefale khene. (Ëfe. 4:24)
14. Torich ti pantemii fon coronavirus, wii teel fon Yeehoowa sayn Orkanisatsyoon mache hot tich keholef?
14 Yeesus kept uns kluuche oryentiirunge wën xlime tsayte khome. Een kuut payxpiil fon wii tiise oryentiirunge uns helfe khene, is was pasiirt is wii ti pantemii fon coronavirus aan kefang hot. In te welt, fiile wuste net was se mache. Awer Yeesus hot sich sicher kelos tas mer taytliche oryentiirunge kreechte fer uns sicher hale. Meyer sin uf kemuut kep fer maskare aan tuun wën mer mit anere layt weyere un uns fiisix wayt wech fon te anere hale. Ti elteste sin aach uf kemuut kep fer imer xpreche mit te kanse priiter fon te kemaynt; soo khente se mërke ep ti priiter etwas praychte fer sich sicher, kesunt un ticht pay Yeehoowa hale. (Isa. 32:1, 2) Un ti relatoorye fon te Rechiirente Khërperxaft hon uns aach oryentiirt un uf kemuut.
15. Torich ti pantemii, was fer oryentiirunge hon mer kriit iwer wii uns fersamele un preetiche, un was waare ti resultaate?
15 Torich ti pantemii, hon mer aach taytliche oryentiirunge kriit iwer wii ti fersamlunge hale un in te preetich aarwayt xafe. Kans fiks, hon mer aan kefang ti fersamlunge un konkrëse torich ti internet kuke. Un meyer hon aan kefang unser preetich aarwayt neekst kans torich telefoon un priife mache. Yeehoowa hot unser aanxtrengung keseechent. In fiile filyaale, een kroos numer layt hot aan kefang wii puplikatoore tiine. In woerheet, fiile hate ufmuutiche speryense torich tiise tsayt. (Kuk te khaste “ Yeehoowa seechent ti preetich aarwayt”.)
16. Fon was khene mer uns sicher sin?
16 Etliche hon im xtant ketenkt: ‘Ti Orkanisatsyoon macht sich tsu fiil ketanke mit te pantemii.’ Awer noo un noo, is es taytlich kep tas ti oryentiirunge kluuch waare. (Mat. 11:19) Wën mer triwer noo tenke aan te liiplich aat wii Yeesus sayn folek fiire tuut, kriin mer ti sicherheet tas, ekaal was im futuer pasiire tuut, wëre Yeehoowa un sayn Soon mit uns sin. (Lees Hepreeyer 13:5, 6.) *
17. Wii xpiirst tuu tich wayls tuu unich Yeesus sayn fiirung xafst?
17 Meyer sin aarich froo tas Yeesus unser fiirer is! Unser Orkanisatsyoon is net keteelt weeche unerxiitliche kultuure, lënter orer xprooche. Meyer kriin een raychlich inlërnung fon Kot sayn Wort. Un mer sin kuut keiipt fer ti preetich aarwayt. Yeete eene fon uns tuut aach lërne wii ti nay personaliteet aan tsiie un mer lërne wii uns naner liipe. Yaa, meyer hon kuute uersache fer uns in pile weeche unser fiirer Yeesus!
LIIT 16 Jeová escolheu nosso Rei
^ Hayt, milyoone mëner, fraae un khiner tuun ti kuute notisye flaysich preetiche. Pist tuu too tepay? Tan pist tuu am xafe unich te fiirung fon unser Hër Yeesus Kristus. In tiise artikel, tuun mer pewaysunge siin tas Yeesus ti preetich aarwayt hayt fiirt. Too triwer noo tenke, helft uns wayter Yeehoowa tiine unich te lënkung fon Yeesus Kristus.
^ (Apokalipsis 14:6, 7) Un ich hon een aner engel kesiin, woo im himel am fliie waar, un tee hat eewiche kuute notisye fer ti pewooner fon te eyert se saan, fer yeete natsyoon, xtam, xprooch un folek. 7 Eyer hot mit een hart xtim kesaat: “Tsaycht tiife respekt tsu Kot un kept iim ti eer, wayl ti xtun fon sayn kericht is khom. Soo, peet aan Tee woo te himel, ti eyert, tas meer un ti waser kwele kemacht hot.”
^ (Matheus 24:45-47) Weer is wërklich te troye un ferninftiche sklaaw, woo sayn hër kexikt hot fer sayn haustiiner, in te richtich tsayt, tas esmitel kepe? 46 Froo is tiise sklaaw wën sayne hër khomt un siit, tas eyer tas kenau macht! 47 In woerheet saan ich aych: Tee wërt tiise sklaaw aan xtele iwich sayn kans tings.
^ (Hepreeyer 13:5, 6) Ayre leepe mus fray fon te liip tsum kelt sin; sayt tsufriite mit was teyer hot. Wayl eyer hot kesaat: “Ich tuun tich nii lose un ich tuun tich nii im xtich lose.” 6 Tas mer khene fol koraaj sin un saan: “Yeehoowa is mayn helfer; ich tuun khee pang hon. Was khan te mënx mich mache?”
