Yeesus hot ti layt in kelërnt friitlich eene mit te anere sin. Awer een mool, hot eyer fer sayn aphostele kesaat: “Tenkt net tas ich khom sin fer friit tsu te eyert pringe. Ich sin net khom fer te friit pringe, awer tas xwaart. Ich sin khom fer ausnaner pringe: te soon keeche sayn papa; ti tochter keeche sayn mama un ti xwichertochter keeche sayn xwichermuter.” (Mat. 10:34, 35) Was wolt Yeesus saan?

Yeesus wolt net ti familye aus naner mache; awer tee wust tas, weeche sayn inlërnunge, teet tas in etliche familye pasiire. Tes weeche, tii woo wole Yeesus sayn tisipele sin un sich taafe lose, mise ti konsekwënse fon sayn ëntxlus ferxteen. Manich mool, tuun een persoon sayn man, fraa orer anere parente sich keeche tii xtele un tas lost es xweyer fer ti persoon troy tsu Yeesus sayn inlërnunge plaype.

Ti Piipel muut ti kriste uf “friitlich mit ale kaar” sin. (Rom. 12:18) Awer Yeesus sayn inlërnunge khene wii een “xwaart” in etliche familye sin. Tas pasiirt wën yemant in te familye Yeesus sayn inlërnunge aan nëmt, awer anere xtose tas ap orer tuun sich tekeeche xtele. Wën tas pasiirt, tiise parente xtele sich aan wii “faynte” fon tëm woo ti woerheet am lërne is. (Mat. 10:36)

Wën een persoon, woo Yeesus sayn tisipel is, mit parente fon een aner relichyoon leept, mus se als mool ëntxlise ep se mache tuut was Yeehoowa un Yeesus kefalt orer was sayn parente kefalt. Tsum payxpiil: im xtant wole sayn parente se tswinge een relichyeese fayertaach fayre. Tan, mus ti persoon ëntxlise weer se kefale tuut. Yeesus hot kesaat: “Tee woo sayn papa orer mama mee wii mich selepst liipt, fertiint net mayn tisipel sin.” (Mat. 10:37) Wil tas saan tas tii woo wole Yeesus sayn tisipele wëre, mise sayn eltere weenicher liipe? Kewis net! Too hiir waar Yeesus tëne am in lërne wii khonte se ëntxlise was tas haupste in tëne sayn leepe weyer. Wën unser parente sich keeche unser aanpeetung tsu Kot xtele, tuun mer se wayter liipe; awer meyer ferxteen tas unser liip tsu Yeehoowa wichticher is.

Kewis, ti opositsyoon fon te familye khan uns aarich traurich lose. Noch soo, mise Yeesus sayn tisipele tëm sayn wërter erinere: “Weer wil net sayn kweel phoste nëme un mich noo keen, fertiint net mayn tisipel sin.” (Mat. 10:38) In anere wërter: ti kriste ferxteen tas ti opositsyoon fon te familye is teel fon te xwiirichkheete woo Yeesus sayn tisipele wilich sin fer aus hale. Awer tii hofe tas sayn kuut aanxtelung tuut sayn parente uf muute sayn ketanke ënere un ti woerheet fon te Piipel lërne. (1 Phe. 3:1, 2)