XTUUTYUM ARTIKEL 28
LIIT 123 Meyer heere Yeehoowa un sayn Orkanisatsyoon aan
Khanst tuu te unerxiit siin tswixich was woer un falx is?
“Halt aych fest, mit tëm kroose kërtel fon te woerheet.” (ËFESER 6:14)
WAS TUUN MER SIIN?
Lërn wiis tuu siin khanst te unerxiit tswixich ti woerheet woo mer fon Yeehoowa kelërnt hon un ti falxheet woo Satanaas un unser faynte aus prayte.
1. Wii xpiirst tuu tich iwer ti woerheet?
YEEHOOWA sayn tiiner liipe ti woerheet woo in te Piipel xteet. Meyer xtaype unser klaape too traan. (Rom. 10:17) Meyer sin uns sicher tas Yeehoowa ti kristlich kemaynt kextelt hot wii “phayle un xtitsung fon te woerheet”. (1 Tim. 3:15) Un meyer tuun froo aan heere tii “woo [uns] fiire” wii se ti woerheete fon te Piipel aus leye un uns oryentiirunge kepe iwer wii Kot sayn wile mache. (Hep. 13:17)
2. Tëm noo Tyako 5:19, was khent mit uns pasiire noo te woerheet lërne?
2 Awer soo kaar noo tas mer aan kenom hon ti woerheet un tas mer mise ti oryentiirunge fon te Orkanisatsyoon foliche, khente mer noch ap kelenkt wëre. (Lees Tyako 5:19.) a Satanaas teet mechtich froo kepe wën mer noo lose teete se traue aan te Piipel orer aan te Orkanisatsyoon sayn oryentiirunge. (Ëfe. 4:14)
3. Warom mise mer uns fest aan te woerheet hale? (Ëfeser 6:13, 14)
3 Lees Ëfeser 6:13, 14. b Klaych tuut Satanaas liie penutse fer ti natsyoone rom papele tas se sich keeche Yeehoowa xtele. (Apo. 16:13, 14) Meyer wise aach tas Satanaas sich noch mee aan xtrenge tuut fer Yeehoowa sayn tiiner hinerkeen. (Apo. 12:9) Tes weeche, is es wichtich tas mer uns selepst iipe fer te unerxiit siin tswixich was woer un falx is un fer ti woerheet foliche. (Rom. 6:17; 1 Phe. 1:22) Es is neetich tas mache fer ti kroos tripulatsyoon iwerleepe.
4. Was tuun mer in tiise artikel siin?
4 Was fer 2 kwaliteete sin neetich fer ti woerheete fon te Piipel erkhëne un folich tsu te oryentiirunge fon te Orkanisatsyoon sin? In tiise artikel fine mer ti antwort. Meyer siin aach 3 tinge woo mer mache mise fer uns fest in te woerheet hale.
KWALITEETE WOO MER HON MISE FER TI WOERHEET ERKHËNE
5. Wii tuut te tiif respekt tsu Yeehoowa uns helfe ti woerheet erkhëne?
5 Tiif respekt tsu Yeehoowa. Yeehoowa tiif respektiire, petayt tas mer tëm soo fiil liipe tas mer wole nii etwas mache woo tëm traurich lose khent. Meyer wole te unerxiit lërne tswixich was richtich un ferkheert is, un tswixich was woer un falx is, tas mer Yeehoowa kefale khene. (Xpr. 2:3-6; Hep. 5:14) Meyer sole nii lose tas unser pang fom mënx xtërker wii unser liip tsu Yeehoowa wërt, wayl ofts was ti mënxe kefalt, lost Yeehoowa traurich.
6. Wii hon ti 10 israeliitixe spyoone ti woerheet fertreet weeche sayn pang fon te mënxe?
6 Wën unser pang fon te mënxe kreeser wii unser tiif respekt tsu Yeehoowa is, khente mer fon te woerheet ap kelenkt wëre. Kuk mool tas payxpiil fon te 12 xëfe fon Israël woo tas Ferxprochne Lant xpekuliirt hon. Fer 10 fon te spyoone, sayn pang fon te kananiiter waar xtërker wii sayn liip tsu Yeehoowa. Tii hon fer ti anere israeliiter kesaat: “Meyer khene net keeche tiise folek keen, weeche tii sin xtërker wii meyer.” (Nuu. 13:27-31) Foer ti mënxe, hots wërklich aus kesiin tas ti kananiiter xtërker wii ti israeliiter waare. Awer saan tas ti israeliiter khonte net ti kananiiter ap kewine, hot Yeehoowa aus te rechnung kelos. Ti 10 spyoone miste sich traan kehal hon aan was Yeehoowa wolt hon tas ti israeliiter mache teete. Tii miste aach triwer noo ketenkt hon aan was Yeehoowa fer ti israeliiter kemacht hat een khorts tsayt tsurik. Soo hëte se kemërkt tas ti kananiiter ploos xtaap waare ferklaycht mim Ale Mechtiche Kot. Anerste wii ti spyoone woo khee klaape hate, wolte Yosuee un Kalëp Yeehoowa kefale. Tii hon fer tas folek kesaat: “Wën Yeehoowa sich fon uns kefalt, tee kept sicher tas fer uns un macht uns tat rin keen in tiise lant.” (Nuu. 14:6-9)
7. Wii khene mer unser respekt tsu Yeehoowa tiifer lose? (Kuk aach tas pilt.)
7 Fer unser respekt tsu Yeehoowa noch tiifer lose, mise mer uns aan xtrenge fer tëm kefale in al ti ëntxlise woo mer mache. (Psal. 16:8) Wëns tuu een piiplixe kexicht leest, froo tich: ‘Wën ich in tiise situatsyoon weyer, was fer ëntxlus hët ich kemacht?’ Tsum payxpiil: xtel tich mool foer tas tuu ti 10 spyoone am heere pist wii se fer ti anere israeliiter aus leye tas se khene net ti kananiiter ap kewine. Hëst tuu too traan keklaapt un pang fon te mënxe kriit? Orer weyere tayn liip tsu Yeehoowa un tayn wunx fer tëm kefale xtërker wii tayn pang? Een kans xeneratsyoon fon israeliiter hot net keklaapt tas Yosuee un Kalëp ti woerheet am saan waare. Tes weeche, hon se ti xans ferloer fer im Ferxprochne Lant rin keen. (Nuu. 14:10, 22, 23)
Weem hëst tuu keklaapt? (Kuk te apsats 7.)
8. Was fer kwaliteet mise mer uns aan xtrenge fer ëntwikele un warom?
8 Teemuut. Yeehoowa lost tas tii woo teemuutich sin ti woerheet ferxteen. (Mat. 11:25) Mit teemuut, hon mer hilef aan kenom fer ti woerheet lërne. (Aph. 8:30, 31) Noch soo, mise mer uf phase fer net hoochmuutich wëre. Wën mer net teemuutich sin, khene mer aan fange se tenke tas unser mënung soo kluuch is wii ti piiplixe funtamente un ti oryentiirunge fon Kot sayn Orkanisatsyoon.
9. Wii khene mer unser teemuut hale?
9 Fer wayter teemuutich plaype, mise mer uns traan tenke wii kleen mer sin ferklaycht mit Yeehoowa. (Psal. 8:3, 4) Meyer khene aach peete tas Yeehoowa uns helft teemuuticher sin un aach wilicher fer in kelërnt wëre. Yeehoowa tuut uns helfe mee weyert kepe fer tëm sayn mënunge, woo mer torich ti Orkanisatsyoon un ti Piipel kriin wii fer unsere aychne mënunge. In tayn Piipel leesung, suuch pewaysunge tas Yeehoowa liipt ti teemuut un hast ti hoochmuut un ti hoochnaasichkheet. Un phas hauptseechlich uf fer teemuutich plaype wëns tuu een priwilëj kriist woo kept tich een teel autoriteet orer macht tas ti anere tich mërke.
WII KHENE MER UNS FEST AAN TE WOERHEET HALE?
10. Wii hot Yeehoowa sayn folek friier oryentiirt un wii macht eyer tas hayt?
10 Trau wayter uf te oryentiirunge fon Kot sayn Orkanisatsyoon. Im friirix Israël, hot Yeehoowa Mooses un xpeeter Yosuee penutst fer sayn folek oryentiire. (Yos. 1:16, 17) Ti israeliiter waare keseechent wën se tiise mëner kesiin hon wii Yeehoowa sayn representante. Hunerte yoore xpeeter, wii ti kristlich kemaynt kekrintet kep is, hon ti 12 aphostele oryentiirunge kep. (Aph. 8:14, 15) Xpeeter hon anere elteste in Yeruusalem aan kefang teel fon tiise krup mache. “Ti kemaynte [sin] im klaape kextërekt woer un taach tsu taach kreeser kewoer” wën se ti oryentiirunge fon tiise troye mëner aan keheert hon. (Aph. 16:4, 5) Hayt tuut Yeehoowa uns aach seechne wën mer ti oryentiirunge fon sayn Orkanisatsyoon foliche. Awer un wën mer net aan nëme teete tas tiise mëner Kot foer xteen? Wii teet Eyer sich xpiire? Fer tiise frooche antworte, wole mer siin was pasiirt is wii ti israeliiter tsum Ferxprochne Lant am keen waare.
11. Im friirix Israël, was is pasiirt mit tëne woo im frooch kextelt hon Yeehoowa sayn ëntxlus fer Mooses raus suuche wii fiirer fom folek? (Kuk aach tas pilt.)
11 Torich ti israeliiter sayn rees tsum Ferxprochne Lant, hon etliche importante mëner im frooch kextelt Mooses un ti xtel woo eyer fon Kot kriit hat. Tii hon kesaat: “Ti kans kemaynt [net ploos Mooses] is haylich, tii al, un Yeehoowa is tswixich tëne.” (Nuu. 16:1-3) Es is woer tas, foer Yeehoowa, “ti kans kemaynt” haylich waar, awer eyer hat Mooses raus kesuucht fer tas folek fiire. (Nuu. 16:28) Wën ti repëlixe mënxe Mooses kritikiirt hon, hon se in woerheet Yeehoowa kritikiirt. Xtats sich traan hale aan was Yeehoowa wolt, hon se sich traan kehal aan was tii wolte — mee autoriteet un heecher xtele. Yeehoowa hot ti fiirer fon tiise repelyoon un tausente anere woo se pay kextan hon, um keprung. (Nuu. 16:30-35, 41, 49) Hayt khene mer uns sicher sin tas Yeehoowa kefalt sich net mit tëne woo net ti oryentiirunge fon sayn Orkanisatsyoon respektiire.
Weem hëst tuu pay kextan? (Kuk te apsats 11.)
12. Warom khene mer imer uf Yeehoowa sayn Orkanisatsyoon traue?
12 Meyer khene imer uf Yeehoowa sayn Orkanisatsyoon traue. Wën es taytlich is tas mer ënere mise ti aat wii mer een piiplix woerheet ferxteen orer wii ti aarwayt orkanisiirt is, tii woo ti Orkanisatsyoon fiire, hale sich net tsurik tiise ënerung mache. (Xpr. 4:18) Tii mache tas wayl, mee wii kwalkee aner tings, wole se Yeehoowa kefale. Tii tuun sich aach aan xtrenge fer sayn ëntxlise uf te Piipel xtaype, woo te muste is woo al Kot sayn tiiner foliche mise.
13. Was is te “muste fon nutsliche wërter” un was sole mer mit tiise muste mache?
13 “Hal tich aan tëm muste fon nutsliche wërter.” (2 Tim. 1:13) Te “muste fon nutsliche wërter” hot se tuun mit te kristliche inlërnunge woo in te Piipel xteen. (Yoo. 17:17) Ales was mer klaape, xtaypt sich aan tiise inlërnunge. Yeehoowa sayn Orkanisatsyoon hot uns in kelërnt uns aan tiise muste hale. Soo lang wii mer tas mache, wëre mer keseechent.
14. Wii hon etliche kriste noo kelos sich “aan tëm muste fon nutsliche wërter” hale?
14 Was khent pasiire wën mer uns ap lenke teete fom “muste fon nutsliche wërter”? Kuk mool een payxpiil. Im eyerste yoer hunert, hon etliche kriste ti falx kexicht aus keteelt tas Yeehoowa sayn taach xon khom weyer. Fiilaycht hot een priif tas kesaat, woo ti layt ketenkt hon fon Phaul khom weyer. Etliche kriste in Thesaloonika hon aan tiise kexicht keklaapt un waare tas soo kaar fer ti anere am aus teele. Awer tii hon net tsayt kehool fer se pewayse ep tiise informatsyoon woer weyer. Wën se sich traan ketenkt hëte was Phaul tëne in kelërnt hat wii eyer mit tëne waar, weyere se net hinerkang. (2 The. 2:1-5) Phaul hot sayn priiter aan kereet net klaape aan ales was se keheert hon. Un fer sayn priiter im futuer helfe, hot Phaul sayn tsweete priif fer ti thesalooniker xlus kemacht mit te wërter: “Too is mayn kriise, fon Phaul, torich mayn aychne hant, woo een sinaal in ale mayn priife is; es is soo wii ich xraype.” (2 The. 3:17)
15. Wii khene mer uns xitse keeche falxheete woo wii ti woerheet aus siin? Kep een payxpiil. (Kuk aach ti pilter.)
15 Was khene mer fon Phaul sayn wërter fer ti thesalooniker lërne? Wën mer etwas woo xtimt net mit was mer in te Piipel kelërnt hon orer een xreklich kexicht heere, mise mer ferninftichkheet tsayche. In te friirix Sowyët Unyoon, hon unser faynte een priif fer ti priiter kexikt woo hot aus kesiin wii wën se fom haupst sets khom is. Te priif hot etliche priiter uf kemuut een aner un selepstxtëntich orkanisatsyoon mache. Es hot wërklich aus kesiin tas te priif fon te Orkanisatsyoon khom is. Awer ti troye priiter sin net hinerkang kep. Tii hon kemërkt tas ti informatsyoone im priif net kextimt hon mit was se kelërnt hon. Hayt tuun ti faynte fon te woerheet ti internet un ti sotsyaale weepe penutse fer uns konfus lose un uns teele. Xtats “klaych noo lose ferninftichkheet tsayche”, khene mer triwer noo tenke ep was mer heere orer leese, xtimt mit te woerheete woo mer xon kelërnt hon. (2 The. 2:2; 1 Yo. 4:1)
Los tich net hinerkeen fon falxheete woo woer aus siin (Kuk te apsats 15.) d
16. Tëm noo Romaaner 16:17, 18, was sole mer mache wën yemant sich fon te woerheet ap lenkt?
16 Playp eenich mit tëne woo leaal tsu Yeehoowa sin. Yeehoowa wil hon tas mer eenich sin in unser aanpeetung tsu tëm. Meyer tuun eenich plaype soo lang wii mer uns aan te woerheet hale. Tii woo ti informatsyoone aus teele woo net mit te woerheet xtime, tuun ti kemaynt teele. Tes weeche, saat uns Yeehoowa: “Halt aych fon tëne wech”; wën net, khente mer uns fon te woerheet ap lenke. (Lees Romaaner 16:17, 18.) c
17. Was fer nutse tuun mer kriin wën mer ti woerheet erkhëne un uns fest too traan hale?
17 Wën mer ti woerheet erkhëne un uns fest too traan hale, plaype mer ticht pay Yeehoowa un hale mer unser klaape xtark. (Ëfe. 4:15, 16) Meyer wëre net hinerkang fon Satanaas sayn falxe inlërnunge un informatsyoone. Un torich ti kroos tripulatsyoon, tuun mer in sicherheet plaype, wayl Yeehoowa uns uf phast. Hal tich wayter aan was woer is un “te Kot fon friit wërt mit [tich] sin”. (Fili. 4:8, 9)
LIIT 122 Wole mer wayter fest plaype!
a (Tyako 5:19) Mayn priiter, wën eene fon aych fon te woerheet ap kelenkt wërt un een aner tëm tsurik pringt,
b (Ëfeser 6:13, 14) Weeche tas, tsiit Kot sayn komplët ayse west aan tas, wën te xlechte taach khomt, khent teyer es aus hale un, noo tas teyer ales kemacht hot, aych fest hale. 14 Soo halt aych fest, mit tëm kroose kërtel fon te woerheet, mit tëm prust xilt fon kerechtichkheet
c (Romaaner 16:17, 18) Ich muute aych yets uf, priiter: phast uf mit tëne woo fersuuche aych teele un xtolpere mache, wën se keeche was teyer kelërnt hot xpreche. Halt aych fon tëne wech. 18 Wayl soo sorte mëner sin net sklaawe fon unser Hër Kristus, awer tii sin sklaawe fon sayn aychne winxe, un mit siise kexpreeche un loope tuun se tas hërts fon te eenfeliche lookre.
d PILT AUSLEYUNG: (Foerxtelung) Phaar yoore tsurik, hon ti priiter in te Sowyët Unyoon een priif kriit woo fon unser faynte khom is, awer es hot aus kesiin tas te priif fon te haupst sets khom is. In unser taache, khene unser faynte ti internet penutse fer falxe informatsyoone iwer Yeehoowa sayn Orkanisatsyoon aus teele.
