XTUUTYUM ARTIKEL 29
LIIT 121 Helef mich selepst kontrol hon
Phas wayter uf mit te fersuuchung
“Tuut aych wach hale un tuut wayter peete tas teyer net in fersuuchung falt.” (MATHEUS 26:41)
WAS TUUN MER SIIN?
Tiise artikel tuut uns erinere tas mer mise uns wayter keeche ti sint xtele un aach uns wech hale fon te xlechte ëntxlise woo tsu te sint nëme khene.
1-2. (a) Was fer xtark aanreet hot Yeesus fer sayn tisipele kep? (b) Warom hon ti tisipele Yeesus im xtich kelos? (Kuk aach ti pilter.)
“TE KAYST is wilich, awer tas flayx is xwach.” a (Mat. 26:41 2te teel) Mit tiise wërter, hot Yeesus ketsaycht tas eyer ferxtan hot tas mer imperfekt sin un tas mer feeler mache. Awer tee hot tas aach kesaat fer uns awisiire tas mer sole net tenke tas mer imer xtark kenuuch wëre fer tas richtiches mache. Phaar xtune eep Yeesus tiise wërter kesaat hot, hon sayn tisipele tëm kesaat tas se teete tëm nii im xtich lose. (Mat. 26:35) Tii wolte tas richtiches mache. Awer tii hon net kemërkt tas in een xweyer situatsyoon, khente se laycht sayn kraft ferliire fer tas richtiches mache. Tes weeche, hot Yeesus se aan kesaat: “Tuut aych wach hale un tuut wayter peete tas teyer net in fersuuchung falt.” (Mat. 26:41 1te teel)
2 Es is xaat, awer ti tisipele hon sich net wach kehal. Tenk mool noo: wii Yeesus in kexpërt kep is, sin sayn tisipele pay tëm keplip orer hon se weeche pang aus keris? Wayl se sich net wachsam kehal hon, hon se kemacht kraat was se kesaat hate, teete se nii mache — tii hon Yeesus im xtich kelos. (Mat. 26:56)
Yeesus hot fer sayn tisipele kesaat tas tii solte sich wach hale un mit te fersuuchung uf phase; awer tii hon tëm im xtich kelos (Kuk ti apsetse 1-2.)
3. (a) Fer leaal tsu Yeehoowa plaype, warom sole mer net rechne tas mer imer xtark kenuuch wëre? (b) Iwer was tuun mer in tiise artikel xpreche?
3 Meyer sole nii mools rechne tas mer imer xtark kenuuch wëre fer tas richtiches mache. Kewis, sin mer pextimt niks mache woo Yeehoowa traurich lose khent. Awer, meyer sin imperfekt, un meyer khente laycht fersuucht wëre tas ferkheertes mache. (Rom. 5:12; 7:21-23) Un tiise fersuuchunge khente uf een mool khome. Fer uns troy tsu Yeehoowa un sayn Soon hale, mise mer Yeesus sayn aanreet aan wëne un uns uf phase keeche ti fersuuchung fer een sint mache. Tiise artikel khan uns too temit helfe. Eyerst, tuun mer xpreche iwer was fer sorte situatsyoone mise mer uns hauptseechlich uf phase. Tan, tuun mer siin wii mer uns keeche ti fersuuchung uf phase khene. Tsum xlus, tuun mer siin wii mer uns wayter uf phase khene.
PHAS UF MIT TAYN XWACHEETE
4-5. Warom sole mer uns uf phase soo kaar keeche ti sinte woo net ërnst sin?
4 Soo kaar sinte woo net soo ërnst sin, khene unser fraayntxaft mit Yeehoowa ferxweeche. Tii khene aach tsu xweyere sinte nëme.
5 Meyer sin al fersuucht tas ferkheertes mache. Awer meyer al hon unerxiitliche xwacheete. Tes weeche, etliche tinge wëre een fersuuchung woo hauptseechlich xweyer fer uns is. Tsum payxpiil, khan sin tas een persoon keeche ti fersuuchung am khëmpfe is fer seksuaal imoraaliteet mache. Orer khan sin tas een persoon am khëmpfe is keeche unrayne tinge, soo wii masturpatsyoon orer pornokrafii. Noch anere sin am khëmpfe fer net pang fon te mënxe kriin, hoochnaasich wëre, ti ketult laycht ferliire un soo wayter. Es is soo wii Tyako kesaat hot: “Yeete eene is keproopt wën eyer fon sayn aychne wunx ketsoo un fersuucht is.” (Tya. 1:14)
6. Iwer was mise mer eerlich sin?
6 Weest tuu was fer tinge tich laychter fersuuche tuun? Es is kefeerlich se tenke tas mer khee xwacheet hon orer tas mer kenuuch kraft hon fer uns wech fon te sint hale. (1 Yo. 1:8) Eriner tich tas Phaul kesaat hot tas soo kaar tii ‘woo kaystlich kwalifitsiirt sin’, khene een sint mache wën se net uf phase. (Kal. 6:1) Meyer mise eerlich mit uns selepst sin un unser xwacheete erkhëne. (2 Kor. 13:5)
7. Mit was sole mer noch mee uf phase? Mach een ferklaychung.
7 Noo tas mer erkhënt hon was unser xwacheete sin, was sole mer mache? Meyer sole uns aan xtrenge fer unser pextimung ferxtërke fer keeche ti fersuuchung khëmpfe. Kuk mool tiise ferklaychung. In piiplixe tsayte, tas xweechste teel fom mauer fon een xtat waar sayn tooer. Tes weeche, miste fiile wachter pay te toore plaype fer ti xtat xitse. Kraat soo, mise mer noch mee uf phase mit unser xwacheete, tas mer keeche ti fersuuchung khëmpfe khene. (1 Kor. 9:27)
WII KHENE MER UNS WACHSAM HALE?
8-9. Wii khent te yunge man fon Xpriiche 7 sich fon een xweyer sint wech kehal hon? (Xpriiche 7:8, 9, 13, 14, 21)
8 Wii khene mer uns keeche ti sint uf phase? Kuk mool was mer lërne khene mit tëm yunge man iwer weem Xpriiche puuch, kapitel 7 xprecht. Tee hot seksuaal imoraaliteet mit een imoraalix fraa kemacht. Te wersikel 22 saat tas te man is “uf een mool” noo te fraa kang. Awer wii ti wersikele foner traan tsayche, hat eyer phaar xrite kep woo tëm lamsam tsu te sint kenom hon.
9 Was hot te yunge man tsu te xweyer sint kenom? Eyerst, foernacht, is eyer ‘ti xtroos runer kang ticht aan te ek’ fon te imoraalix fraa. Tan, hot eyer te weech tsu iire haus kenom. (Lees Xpriiche 7:8, 9.) b Too, wii eyer ti fraa kesiin hot, is eyer net faart kang. Xtats tas, hot eyer sayn khus aan kenom un hot se kehoricht wii se kexproch hot iwer ti kemaynxaft opfere woo se kemacht hat. Im xtant, wolt se tëm tenke mache tas se net een xlecht persoon waar. (Lees Xpriiche 7:13, 14, c 21. d) Wën te yunge man sich wech kehal hët fon tiise kefoore, weyer tee net in te fersuuchung un sint kefal.
10. Wii khan een persoon hayt ti selwiche feeler fom yunge man mache?
10 Tiise kexicht tsaycht was mit kwalkee tiiner fon Yeehoowa pasiire khan. Khan sin tas eyer een xweyer sint macht un noo heyer tenkt tas ales “uf een mool” pasiirt is. Un etliche fiilaycht saan: “Ich hon net kewaart tas es pasiire teet.” Awer, wën eyer triwer noo tenkt aan was pasiirt is, tuut eyer tsiimlich sicher mërke tas eyer xon xlechte ëntxlise kemacht hat woo tsu te xweyer sint kenom hon. Im xtant, hot eyer fraaynte raus kesuucht woo Yeehoowa net liipe tuun. Khan sin tas etliche fon te ferkniichunge woo eyer raus kesuucht hot, sites woo eyer pesuucht hot orer pletse woo eyer kang is, net kuut fer een krist sin. Fiilaycht, hot eyer aach noo kelos se peete, ti Piipel leese, in te fersamlunge keen orer preetiche. Soo wii te yunge man im Xpriiche puuch, khan sin tas ti sint net wërklich uf een mool pasiirt is.
11. Fon was mise mer uns wech hale wën mer wole net een sint mache?
11 Was is ti lisyoon fer uns? Meyer mise uns net ploos fon te sint wech hale, awer aach fon te xlechte ëntxlise woo tsu te sint nëme. Salomon hot kraat tas aus keleet noo tas eyer pexrip hot was mit tëm yunge man un ti imoraalix fraa pasiirt is. Tee hot iwer ti fraa kesaat: “Laaf net uf iire weech.” (Xpr. 7:25) Tee hot aach kesaat: “Playp wech fon tëne. Khom net ticht paym teer fon tëne sayn haus.” (Xpr. 5:3, 8) Yawool, fer uns keeche ti sint xitse, mise mer wech plaype fon tinge un situatsyoone woo khente uns tsu te sint nëme. e Es wil saan, wën mer wise tas etwas khent een fersuuchung fer uns sin, tuun mer tas net mache, soo kaar wën tas net ferkheert fer een krist is. (Mat. 5:29, 30)
12. Was fer ëntxlus hot Yoop kemacht un wii teet tas tëm helfe sich keeche ti fersuuchung xtele? (Yoop 31:1)
12 Fer uns wech hale fon situatsyoone woo khente tsu te sint nëme, mise mer te fest ëntxlus mache fer uns wachsam hale. Tas is was Yoop kemacht hot. Tee hot “een pakt mit [sayn] aue kemacht” fer nii tsu anere fraae mit imoraalixe winxe kuke. (Lees Yoop 31:1.) f Sayn ëntxlus hale, teet tëm helfe sich wayt fon atultëryo hale. Meyer sole aach pextimt sin uns wech hale fon kwalkee tings woo khent uns tsu te fersuuchung nëme.
13. Warom mise mer unser ketanke xitse? (Kuk aach ti pilter.)
13 Meyer mise aach unser ketanke xitse. (Eeks. 20:17) Etliche tenke tas es khee propleem is sich foer xtele was ferkheertes mache soo lang wii se tas net in krayfe. Awer, soo se tenke is ferkheert. Een ferkheerte wunx wërt xtërker wën ti persoon wayter too triwer tenkt. Khan ma saan tas ti persoon selepst is een fersuuchung am uf pringe; un yets, mus se too tekeeche khëmpfe. Kewis, als mool, tuun ferkheerte ketanke in unser khop khome. Wën tas pasiirt, mise mer tiise ketanke klaych ap xtose un se mit kuute ketanke ersetse. Soo, tuun mer net lose tas ti ferkheerte ketanke xtarke winxe wëre, woo khente tsu een xweyer sint nëme. (Fili. 4:8; Kol. 3:2; Tya. 1:13-15)
Meyer mise uns wech hale fon kwalkee tings woo khent uns tsu te fersuuchung nëme (Kuk te apsats 13.)
14. Was noch khene mer mache fer uns keeche ti fersuuchunge xitse?
14 Was noch khene mer mache fer uns keeche ti fersuuchunge xitse? Meyer mise uns kans sicher sin tas Yeehoowa sayn kesetse aan heere, tuut uns imer nutse pringe. Als mool, khan es xweyer sin unser ketanke un winxe mit Yeehoowa sayn wile xtime mache. Awer, unser aanxtrengung tuut sich loone: meyer wëre wërklich froo sin.
15. Richtiche winxe ëntwikele, tuut uns helfe keeche ti fersuuchung khëmpfe. Wii soo?
15 Meyer mise richtiche winxe ëntwikele. Wën mer lërne ‘tas xlechtes hase un tas kuutes liipe’, tuun mer unser pextimung ferxtërke fer tas richtiches mache un uns wech hale fon situatsyoone woo tsu te sint nëme khente. (Amo. 5:15) Als mool, khene fersuuchunge foer khome woo mer net am waarte sin orer woo mer uns net wech hale khene. Es wërt laychter uns too tekeeche xtele, wën mer richtiche winxe ëntwikelt hon.
16. Wii khene ti kaystliche aktiwiteete uns helfe uns keeche ti fersuuchung xitse? (Kuk aach ti pilter.)
16 Wii khene mer richtiche winxe ëntwikele? Meyer sole imer tinge mache woo unser liip tsu Yeehoowa ferxtërke. Wën mer in te preetich aarwayt orer in te fersamlunge sin, wëre mer net laycht fersuucht tas ferkheertes mache. Xtats tas, tuun mer unser wunx fer Yeehoowa kefale, ferxtërke. (Mat. 28:19, 20; Hep. 10:24, 25) Wën mer ti Piipel leese, xtutiire un too triwer noo tenke, ferxtërke mer unser liip tsu tas kuutes un unser has tsu tas xlechtes. (Yos. 1:8; Psal. 1:2, 3; 119:97, 101) Tenk tich traan was Yeesus fer sayn tisipele kesaat hot: “Tuut wayter peete tas teyer net in fersuuchung falt.” (Mat. 26:41) Wën mer tsu unser Fater im himel peete, kepe mer tëm een xans fer uns helfe un meyer ferxtërke unser pextimung fer tëm kefale. (Tya. 4:8)
Een kuut kaystlich rutiin ferxtërkt uns fer ti fersuuchunge ap xtose (Kuk te apsats 16.) h
PHAS TICH WAYTER UF
17. Keeche was fer xwacheet must Pheeter wayter khëmpfe?
17 Tsiimlich sicher, khene mer torich etliche fon unser xwacheete triwer wech khome. Awer khan sin tas mer wayter khëmpfe mise keeche anere xwacheete. Kuk mool was mim aphostel Pheeter pasiirt is. Weeche ti pang fom mënx, hot eyer 3 mool kesaat tas eyer Yeesus net kekhënt hot. (Mat. 26:69-75) Xpeeter, hots aus kesiin tas Pheeter torich tiise pang triwer wech khom is, wayl tee hot mit koraaj foer te Sinëtryum iwer Yeesus kepreeticht. (Aph. 5:27-29) Awer phaar yoore xpeeter, hot eyer noo kelos se ese mit te kriste woo net yuute waare, “wayl eyer pang fon te krup fon te pexnite layt kriit hot”. (Kal. 2:11, 12) Sayn xwacheet is tsurik khom. Fiilaycht, is tee in woerheet nii torich tëne triwer wech khom.
18. Khan een xwacheet tsurik khome? Lee tas aus.
18 Fiilaycht, soo wii Pheeter, mise mer wayter khëmpfe keeche een xwacheet woo mer ketenkt hon, xon ferkang weyer. Tsum payxpiil, een pruuter erkhënt: “Torich 10 yoore, hon ich net pornokrafii kekukt un ich waar mich sicher tas es xon net mee een propleem waar. Awer mayn xwacheet waar wii een kefeerliche tier, woo sich ferxtekelt un waart ti pest xtun fer mich atakiire.” Tsum klik, hot tee net uf kep. Tee hot kemërkt tas eyer mus keeche sayn xwacheet yeete taach khëmpfe — un tsiimlich sicher wërts neetich tas mache soo lang wii tiise welt halt. Mit te hilef fon sayn fraa un ti elteste fon sayn kemaynt, tuut eyer noch mee uf phase fer sich wech fon te pornokrafii hale.
19. Wii khene mer uns fest xtele keeche een xwacheet woo noo un noo foer khomt?
19 Wii khene mer uns fest xtele keeche een xwacheet woo noo un noo foer khomt? Meyer mise mache was Yeesus uns kesaat hot: “Tuut aych wach hale.” Es wil saan, meyer mise uns uf phase keeche ti fersuuchung. Soo kaar wëns tuu tenkst tas tuu xtark pist, tuu tich wayter wech hale fon kefeerliche situatsyoone. (1 Kor. 10:12) Mach wayter was tich xon keholef hot keeche tayn xwacheet khëmpfe. Xpriiche 28:14 saat: “Froo is te man woo imer wachsam is.” (2 Phe. 3:14)
TI NUTSE WOO MER KRIIN WËN MER UNS WACH HALE
20-21. (a) Was fer nutse kriin mer wën mer uns wayter keeche ti fersuuchung xitse? (b) Wën mer unser teel mache, wii tuut Yeehoowa uns helfe? (2 Korinter 4:7)
20 Meyer khene uns sicher sin tas wayter keeche ti fersuuchung khëmpfe, tuut sich loone. Wën mer een sint mache, khene mer fiilaycht, “torich een tsayt een kuut leepe hon”. Awer, wën mer Yeehoowa sayn kesetse foliche, wëre mer noch frooer. (Hep. 11:25; Psal. 19:8) Tas pasiirt wayl mer kemacht kep sin fer Tëm foliche. (Xee. 1:27) Wën unser aktsyoone Yeehoowa kefale, kriin mer een sauwer kewise un ti xans fer eewiche leepe kriin. (1 Tim. 6:12; 2 Tim. 1:3; Yuu. 20, 21)
21 Es is woer tas ‘tas flayx xwach is’. Awer, es wil net saan tas mer kaar niks keeche unser xwacheete mache khene. Yeehoowa is fërtich fer uns ti neetich kraft kepe. (Lees 2 Korinter 4:7.) g Awer, mërk mool tas Yeehoowa kept uns iwermeesich kraft. Meyer mise unser moos kraft kepe, es wil saan, uns aan xtrenge yeete taach fer keeche ti fersuuchung khëmpfe. Wën mer unser teel mache, khene mer uns sicher sin tas Yeehoowa unser kepeete antworte tuut un uns mee kraft kepe tuut wëns neetich is. (1 Kor. 10:13) Yawool, mit Yeehoowa sayn hilef, khene mer uns wayter keeche ti fersuuchung xitse.
LIIT 47 Peet tsu Yeehoowa yeete taach
a TUU PESER FERXTEEN: Wii Yeesus iwer “te kayst” in Matheus 26:41 kexproch hot, waar eyer am xpreche iwer unser wunx fer tas richtiches mache. Wii eyer iwer “tas flayx” kexproch hot, hot eyer ketsaycht tas wayl mer imperfekte un sintiche mënxe sin, tuun mer ofts tas ferkheertes tenke un mache. Soo, als mool, opwool mer tas richtiches mache wole, wën mer net uf phase, khente ti ferkheerte winxe uns ap kewine un uns lenke was ferkheertes mache.
b (Xpriiche 7:8, 9) Eyer is ti xtroos runer kang, ticht aan tëne sayn ek, un hot te weech tsu iire haus kenom 9 am ën fom taach, wiis palt tunkel waar, wiis nacht un tunkel kewoer is.
c (Xpriiche 7:13, 14) Tii krayft tee un kept iim een khus. Mit frecheet saat se tsu iim: 14 “Ich must kemaynxaft opfere mache; hayt hon ich mayn ferxpreche erfiilt.
d (Xpriiche 7:21) Tii tuut tëm hinerkeen mit iire kexpreech. Un lookert tee mit siise wërter.
e Yemant woo een xweyer sint kemacht hot, khan hilef fine im puuch Los tich kuut keen im leepe fer imer!, lisyoon 57, phunkte 1-3 un im artikel “‘Kuk richt foran’ fer ti futuer!” in Te Wachthorm fon Nofemper fon 2020, sayte 27-29, apsetse 12-17.
f (Yoop 31:1) “Ich hon een pakt mit mayn aue kemacht. Wii khent ich fer een yung meete kuke mit een ferkheerte wunx?
g (2 Korinter 4:7) Awer meyer hon tiise xats in leet waase, tas ti iwermeesich kraft fon Kot khomt, net fon uns selepst.
h PILT AUSLEYUNG: Moynt, tuut een pruuter te tekst fom taach leese; tee leest ti Piipel torich sayn mitaach ese; oomts, tuut eyer tsu te mitewoch fersamlung keen.
