1-2. Weer waar Satok kewees? (1 Kroonike 12:22, 26-28)

 XTEL tich mool foer ti situatsyoon: mee wii 340.000 mëner sin fersamelt fer Tawi kheenich iwer ti kans natsyoon fon Israël mache. Torich 3 taache, sin ti mëner in te përiche ticht pay Heprom keplip. Tii hon fertseelt, kelacht un frooe liiter fer Yeehoowa loope kesung. (1 Kro. 12:39) Tswixich ti layt, waar eene yunge man woo Satok keheest hot. Fiile layt hon tëm kaar net kemërkt, awer Yeehoowa wolt sich sicher lose tas meyer wise teete tas eyer tat waar. (Lees 1 Kroonike 12:22, a 26-28. b) Weer waar Satok kewees?

² Satok waar eene priister woo mim hooche priister Apyatar ketiint hot. Tee waar aach een witent woo fiil kluucheet fon Yeehoowa kriit hot un aach ti apiliteet fer Sayn wile ferxteen. (2 Sam. 15:27) Wën ti layt hilef praychte, hon se kluuche aanreete fer Satok ferlangt. Tee waar aach eene koraajiche man kewees. In tiise artikel, lërne mer wii Satok koraaj ketsaycht hot.

3. (a) Warom mise Yeehoowa sayn tiiner koraajich sin? (b) Iwer was tuun mer in tiise artikel xpreche?

³ In tiise letste taache, fersuucht Satanaas mee wii noch nii unser klaape aan Yeehoowa fernichte. (1 Phe. 5:8) Soo, mise mer koraaj hon fer aus hale pis Yeehoowa Satanaas un tiise xlechte welt fernicht. (Psal. 31:24) Wole mer 3 aate kuke wii mer Satok sayn koraaj noo mache khene.

 TUU KOT SAYN RAYCH PAY XTEEN

4. Warom mise Kot sayn tiiner koraaj hon fer Kot sayn Raych pay xteen? (Kuk aach tas pilt.)

⁴ Wii Yeehoowa sayn tiiner, tuun mer Kot sayn Raych mit kans hërts pay xteen. Awer ofts, mise mer koraaj hon fer tas mache. (Mat. 6:33) Tsum payxpiil, in tiise welt mise mer koraaj hon fer Kot sayn kesetse foliche un ti kuute notisye fon Kot sayn Raych preetiche. (1 The. 2:2) Ti welt is aach imer mee keteelt weeche politixe sache. Tes weeche, mise mer koraaj hon fer neutral plaype. (Yoo. 18:36) Fiile fon Yeehoowa sayn tiiner tuun ekonoomixe propleeme layte, sin ferklopt orer in kexpërt wayl se wole sich net in te politik rin mexe orer im militeer tiine.

5. Warom praycht Satok koraaj hon fer Tawi pay xteen?

⁵ Satok is net tsu Heprom kang ploos fer se fayre tas Tawi kheenich kep is. Tee hot sayn wafe mit kenom un waar fërtich fer se khëmpfe. (1 Kro. 12:38) Tee waar wilich fer mit Tawi tsum kriich keen un Israël fon sayn faynte xitse. Fiilaycht hat Satok weenich speryens wii kriichs man, awer tee hat fiil koraaj.

6. Warom waar Tawi een kuut payxpiil fon koraaj fer Satok? (Psalm 138:3)

⁶ Wii hot een priister soo wii Satok kelërnt soo koraajich sin? Tee hot fiile mëner kekhënt woo xtark un koraajich waare. Un kewis, hot eyer fiil kelërnt wii eyer se peopacht hot. Tsum payxpiil: wayl Tawi eene koraajiche fiirer un kriichs man waar, sin al in Israël uf kemuut kep tëm hërtslich pay xteen. (1 Kro. 11:1, 2) Tawi hot imer aan Yeehoowa ketraut fer hilef keeche sayn faynte kriin. (Psal. 28:7; lees Psalm 138:3. c) Satok hot aach mit anere koraajiche mëner kelërnt, soo wii Yeoyata un sayn soon Penaya, woo een kriichs man waar, un aach anere 22 xëfe fom folek woo Tawi pay kextan hon. (1 Kro. 11:22-25; 12:26-28) Tiise mëner al waare fërtich fer Tawi kheenich mache un tëm xitse.

7. (a) Was fer payxpiile fon koraaj hayt tsu taach khene uns helfe? (b) Tëm noo te wiiteo, was host tuu mim payxpiil fom pruuter Nsilu kelërnt?

 ⁷ Wën mer tenke wii anere xon koraaj ketsaycht hon fer Yeehoowa un sayn Raych pay xteen, sin mer uf kemuut aach koraajich sin. Wii unser Kheenich Yeesus too uf te eyert waar, hot eyer sich kans wayt wech kehal fon Satanaas sayn politix sisteem. (Mat. 4:8-11; Yoo. 6:14, 15) Tee hot imer uf Yeehoowa ketraut fer kraft un koraaj kriin. Hayt tsu taach, hon mer aach fiile payxpiile fon yunge mëner woo, weeche sayn klaape, net im militeer ketiint hon orer sich in te politik rin kemext hon. Meyer muute tich uf tëne sayn speryense im site jw.org leese. d

HELF TAYN PRIITER

8. Wanee mise ti elteste koraaj hon fer hilef fer sayn priiter kepe?

⁸ Yeehoowa sayn tiiner tuun sich kërn naner helfe. (2 Kor. 8:4) Awer als mool, is es neetich koraaj hon fer tas mache. Tsum payxpiil, wën een kriich aus precht, mise ti elteste ti priiter un xwestere uf muute un sich sicher lose tas se tas neetiches hon in fiisix un kaystlich aat. Ti elteste liipe ti priiter un xwestere; tes weeche tuun se tëne mit tas neetiches fersoriche, soo kaar wën tas kefeerlich is se mache. (Yoo. 15:12, 13) Soo, tuun ti elteste Satok sayn payxpiil fon koraaj noo mache.

9. Tëm noo 2 Samuël 15:27-29, was hot Tawi kexikt Satok se mache? (Kuk aach tas pilt.)

⁹ Kuk mool wii Satok sayn priiter keholef hot torich ti kefeerliche tsayte. Tawi sayn soon, Apsaloon, waar pextimt Tawi um pringe un kheenich uf sayn plats wëre. (2 Sam. 15:12, 13) Tes weeche must Tawi fiks fon Yeruusalem ap haue. Tee hot fer sayn tiiner kesaat: “Wole mer aus rayse; wën net, tuut khee eene fon uns fon Apsaloon ap haue!” (2 Sam. 15:14) Wii ti tiiner am aus rayse waare, hot Tawi kemërkt tas yemant must in Yeruusalem plaype fer mee informatsyoone kriin iwer Apsaloon sayn pleen. Tes weeche hot Tawi Satok un anere priister  tsurik tsu te xtat kexikt tas se khente tëm imer informatsyoone xike. (Lees 2 Samuël 15:27-29.) e Awer tii miste fiil uf phase. Was Tawi tëne ferlangt hot, waar aarich kefeerlich. Tii khente soo kaar too teweeche um keprung wëre. Apsaloon waar eene ekoiistixe un wyolënt man kewees, woo sayn aychne papa hinerkang hot. Xtel tich mool foer was eyer mit Satok un anere priister mache teet wën eyer tsu wise kreecht tas se spyoone waare un Tawi kexitst hon.

10. Wii hon Satok un ti anere priister Tawi kexitst?

¹⁰ Tawi hat een plaan un tee hot ti hilef ferlangt fon Satok un een aner troy fraaynt, Husay, fer tas fërtich pringe. (2 Sam. 15:32-37) Husay must sich ferxtele wii wën eyer Apsaloon pay kextan hët un tëm aanreete kepe iwer wii Tawi atakiire. Soo teet Tawi tsayt kriin fer sich fer een atak foer perayte. Noo heyer, hot Husay mit Apyatar un Satok kexproch iwer was pasiirt is un ti 2 mëner muste sich sicher lose tas Tawi ti informatsyoone kreecht. (2 Sam. 17:8-17) Mit Yeehoowa sayn hilef, hon Satok un ti anere priister es hin kriit Tawi sayn leepe xitse. (2 Sam. 17:21, 22)

11. Wii khene mer Satok sayn koraaj noo mache wën mer unser priiter helfe?

¹¹ Wii khene mer koraajich soo wii Satok sin wën unser priiter ins kefoer sin un hilef prayche? (1) Folich ti oryentiirunge. In kefeerliche situatsyoone, is es wichtich tas mer eenich plaype. Folich ti oryentiirunge fon te filyaal fon tayn lant. (Hep. 13:17) Ti elteste mise ofts noo kuke ti oryentiirunge iwer wii sich foer perayte fer ti unklike un was se mache wën tas pasiirt. (1 Kor. 14:33, 40) (2) Say koraajich, awer phas tich uf. (Xpr. 22:3) Say kluuch un xtel tich net umsonst ins kefoer. (3) Trau uf Yeehoowa. Eriner tich tas Yeehoowa sich mit tich un  tayn priiter aarich fiil khimere tuut. Tee khan tich helfe tayn priiter unerxtitse awer tas mit sicherheet mache.

12-13. Was host tuu mit Viktor un Vitalii sayn speryense kelërnt? (Kuk aach tas pilt.)

¹² Kuk mool was mit 2 elteste, Viktor un Vitalii, pasiirt is. Tii hon ese un waser fer sayn priiter in Ukraanya kenom. Viktor saat: “Meyer hon ese iweraal kesuucht. Ofts khonte mer ti xiise um uns rom heere. Eene pruuter hot ese woo eyer uf keraumt hat, aus keteelt. Tiise kontripuytsyoon hot fiile priiter keholef torich een tsayt iwerleepe. Wii mer unser khare mit te tinge am laate waare, is een pomp — unkefeer 20 meter fon uns wech — kefal; tsum klik, is tii net ferplatst. Torich te taach, hon ich tsu Yeehoowa aan kehal tas eyer mich ti koraaj kepe solt fer ti priiter wayter helfe.”

¹³ Vitalii saat: “Meyer miste fiil koraaj hon. Mayn eyerste rees hot 12 xtune ketauert. Te kanse taach hon ich tsu Yeehoowa kepeet.” Vitalii waar koraajich kewees, awer tee hot sich aach uf kephast. Tee saat noch: “Ich hon tsu Yeehoowa ferlangt kluucheet un aach tas eyer mich helfe solt se siin wii wayt khent ich keen. Ich sin ploos torich ti xtroose kefaar woo ti autoriteete erlaupt hon. Mayn klaape is ferxtërkt kep wii ich kesiin hon wii ti priiter un xwestere mitsamer kexaft hon. Tii hon ti tinge, woo ti xtroose tsu kemacht hon, wech kenom. Tii hon aach ese, waser, tsaych un anere tinge kesamelt un keholef se laate. Un tii hon ese un een plats fer se ruue fer uns fersoricht.”

PLAYP TROY TSU YEEHOOWA

14. Wën yemant woo mer liipe Yeehoowa im xtich lost, wii khan tas uns petrefe?

¹⁴ Eene fon te xweyerste proope woo mer mit mache khene, is wën een parent orer ticht fraaynt Yeehoowa im xtich lost. (Psal. 78:40; Xpr. 24:10) Woo xtërker unser liip tsu te persoon is, woo xweyer wërts fer uns sin ti situatsyoon aus hale. Wëns tuu soo een sort situatsyoon xon mit kemacht host, Satok sayn payxpiil fon troyheet khan tich ferxtërke.

15. Warom must Satok koraaj hon fer troy tsu Yeehoowa plaype? (1 Kheeniche 1:5-8)

¹⁵ Satok is troy tsu Yeehoowa keplip, soo kaar wii sayn fraaynt Apyatar raus kesuucht hot untroy sin. Tas is am ën fon Tawi sayn rechiirung pasiirt. Wii Tawi sayn toot ticht waar, hot sayn soon Atoniias fersuucht sich kheenich mache uf Tawi sayn plats, opwool Yeehoowa Salomon raus kesuucht hat fer te neekste kheenich wëre. (1 Kro. 22:9, 10) Apyatar hot ëntxlist Atoniias pay xteen. (Lees 1 Kheeniche 1:5-8.) f Soo khene mer saan tas eyer net ploos untroy tsu Tawi waar, awer aach tsu Yeehoowa. Xtel tich mool foer wii traurich meecht Satok sich kexpiirt hon! Torich mee wii 40 yoore hon Satok un Apyatar mitsamer wii priister kexaft. (2 Sam. 8:17) Tii hon “ti Arich fom woere Kot” mitsamer uf kephast. (2 Sam. 15:29) Ti tswaay hon Tawi wii kheenich pay kextan un fiil anere tinge mitsamer in Yeehoowa sayn tiinst kemacht. (2 Sam. 19:11-14)

16. Was hot fiilaycht Satok keholef troy plaype?

¹⁶ Satok is wayter leaal tsu Yeehoowa keplip opwool Apyatar raus kesuucht hot Tawi hinerkeen. Tawi wust tas eyer khont imer uf Satok traue. Wii Atoniias sayn plaan pekhant kep is, hot Tawi Satok, Natan un Penaya raus kesuucht fer Salomon wii kheenich salpe. (1 Khe. 1:32-34) Sicher tas payxpiil fon anere tiiner fon Yeehoowa, woo troy tsu Tawi keplip sin, soo wii Natan,  hot Satok uf kemuut un ferxtërkt. (1 Khe. 1:38, 39) Wii Salomon kheenich kep is, hot eyer “te priister Satok ufm plats fon Apyatar in kextelt”. (1 Khe. 2:35)

17. Wii khanst tuu Satok noo mache wën yemant woos tuu liipst Yeehoowa im xtich lost?

¹⁷ Wii khanst tuu Satok noo mache? Wën yemant woos tuu liipst raus suucht Yeehoowa im xtich lose, tsaych fer Yeehoowa tas tuu ëntxlist host leaal tsu Tëm plaype. (Yos. 24:15) Yeehoowa tuut tich ti neetich kraft un koraaj kepe. Peet tsu Yeehoowa un playp ticht pay tëne woo leaal tsu tëm sin. Yeehoowa kept weyert fer tayn troyheet un tee tuut tich too teweeche peloone. (2 Sam. 22:26)

18. Was host tuu mit Marco un Sidse sayn speryens kelërnt?

¹⁸ Kuk mool tas payxpiil fon Marco un sayn fraa Sidse. Sayn 2 tochtere hon ëntxlist ti woerheet lose. Marco saat: “Fon te tsayt aan woo tayn khiner uf te welt khome, liipst tuu se aarich fiil. Tuu teest ales was meechlich is mache fer tëne fon kwalkee kefoer xitse. Soo, wën se ëntxlise Yeehoowa im xtich lose, tas ferprecht eene sayn hërts. (…) Awer Yeehoowa helft uns aus hale. Tee lost sich sicher tas, wën ich xwach sin, is mayn fraa xtark. Un wën mayn fraa xwach is, sin ich xtark.” Sidse saat aach: “Meyer kreechte tas net aus kehal wën Yeehoowa uns net kraft kepe teet. Ich waar aarich traurich un ich hon kerechent tas es mayn xult waar tas mayn tochtere noo kelos hon Yeehoowa tiine. Soo hon ich mit Yeehoowa too triwer fertseelt. Klaych tëm noo, een xwester woo ich lang net mee kesiin hon, is pay mich khom, hot ti hënt uf mayn xiiler ketuun, mich aan te aue kekukt un kesaat: ‘Ferkes tich net, Sidse: es is net tayn xult!’ Mit Yeehoowa sayn hilef, hon ich es hin kriit tëm wayter mit frooheet tiine.”

19. Was pist tuu pextimt se mache?

¹⁹ Yeehoowa wil hon tas sayn tiiner soo koraajich wii Satok wëre. (2 Tim. 1:7) Awer tee wil net hon tas mer aan unser aychne kraft traue. Tee wil hon tas mer uf tëm traue! Soo, wëns tuu in een situatsyoon pist woos tuu koraaj praychst, ferlang hilef tsu Yeehoowa. Tuu khanst tich sicher sin tas eyer tuut tich soo koraajich wii Satok mache! (1 Phe. 5:10)