Nicolas un Céline hon een aner kefoer mit kemacht. Ti filyaal fon Frankraych hot se tsu een nay kemaynt in kesetst. Tii saan: “Am aanfang, waare mer aarich froo. Awer tan, hon mer ferlangre fon unser fraaynte kexpiirt. Un ti fraayntxafte woo mer mit te priiter in unser nay kemaynt hate, waare noch net soo xtark kewees. a Opwool ti kefoore, was khan tich helfe wayter froo plaype wëns tuu tich tsu een nay kemaynt wanerst? Was khene ti anere mache fer se helfe? Un in was fer aate khanst tuu ti anere uf muute un aach uf kemuut sin in te nay kemaynt?

FIER FUNTAMENTE FER TICH HELFE TICH AAN PHASE

1. Trau uf Yeehoowa. (Psal. 37:5) Te man fon Kazumi, een xwester in Yaapan, is kexikt kep fer se xafe in een aner plats. Tes weeche, must Kazumi sich wanere fon te kemaynt woo se 20 yoore keplip is. Wii hot Kazumi ‘sayn weech tsu Yeehoowa fertraut’? Tii saat: “Ich hat pang, un ich hon mich aleen un ëngstlich kexpiirt. Ich hon mayn hërts tsu Yeehoowa uf kemacht un hon too triwer mit tëm fertseelt. Yeetes mool woo ich tas kemacht hon, hot eyer mich ti neetich kraft kep.”

Wii khanst tuu noch mee uf Yeehoowa traue? Soo wii een plans praycht waser un anere tinge fom krunt fer xtark wakse, mus unser klaape eneert sin fer xtark wëre. Nicolas, iwer weem mer foner traan kexproch hon, hot triwer noo ketenkt aan te payxpiile fon Apraham, Yeesus un Phaul. Tiise mëner hon fon fiiles uf kep fer Kot sayn wile mache. Tas hot Nicolas sayn fertraung ferxtërkt tas Yeehoowa tëm helfe teet. Wëns tuu imer ti  Piipel xtutiirst, tas tuut tich helfe mit te ënerunge in tayn leepe um keen. Tuu tuust aach tinge lërne woos tuu penutse khanst fer ti anere in tayn nay kemaynt uf muute.

2. Tuu net tayn friirix kemaynt mit te nay kemaynt ferklayche. (Ekl. 7:10) Wii Jules fon Peniin tsu te Fereenichte Xtaate fon Amërika sich kewanert hot, must eyer sich mit een nay kultuer aan phase, woo fiil anerste wii tëm sayns waar. Eyer saat: “Ich hon kexpiirt tas ich must iwer mayn kanse leepe xpreche mit ale kaar woo ich ketrof hon.” Wayl sayn kewoonheete kans anerste waare, hot eyer aan kefang sich wayt wech fon te priiter in te kemaynt hale. Awer wii eyer ti priiter un xwestere peser khëne kelërnt hot, hot eyer sayn mënung keënert. Tee saat: “Yets ferxteen ich tas, een tuun tas plats woo mer leepe, sin mer al ekaal. Meyer sin anerste ploos in te aat wii mer xpreche un uns aan xtele. Es is aarich wichtich ti layt aan nëme wii se sin.” Tes weeche, tuu net ferklaychunge mache. Een pyoneerin, woo Anne-Lise heest, saat: “Ich hon mich net kewanert fer se fine was ich hiner kelos hon, awer fer naye tinge raus fine.”

Ti elteste sole aach net sayn nay kemaynt mit te friirix kemaynt ferklayche. Fiilaycht tuun ti priiter in te nay kemaynt ti tinge in een aner aat mache. Awer, tas wil net saan tas se was ferkheertes am mache sin. Es is kluuch ti situatsyoon im plats khëne eep naye itee foer pringe. (Ekl. 3:1, 7 2^te teel) Es is peser ti priiter torich tayn kuute payxpiil in lërne wii tëne tswinge se tenke soo wiis tuu tenkst. (2 Kor. 1:24)

3. Tuu fiil se tuun hon in tayn nay kemaynt. (Fili. 1:27) Es khost fiil tsayt un enerxii fer sich wanere; awer es is wichtich tsu te fersamlunge keen fom aanfang aan — un perseenlich, wën es meechlich is. Ti priiter un xwestere in tayn nay kemaynt mise tich ofts siin; soo, tuun se sich tichter pay tich xpiire un hilef fer tich kepe. Lucinda hot sich mit sayn 2 meetche tsu een kroos xtat in Siit Afrika kewanert. Tii saat: “Mayn fraaynte hon mich aan kereet mich tichter pay te priiter in te nay kemaynt xafe, mit unerxiitliche priiter preetiche un antworte in te fersamlunge kepe. Meyer hon aach fer ti priiter kesaat tas tii khonte unser haus penutse fer ti preetich fersamlunge mache.

Mit te priiter un xwestere in te nay kemaynt xafe, tuut tich selepst un ti anere ferxtërke. Anne-Lise, iwer weem mer foner traan kexproch hon, is fon te elteste uf kemuut kep sich aan xtrenge fer mit al in te kemaynt preetiche. Was fer waar te resultaat? Tii saat: “Klaych hon ich kemërkt tas tas waar een xeen aat fer se xpiire tas ich teel fon te kemaynt waar.” Un noch, wëns tuu tich aan piite tuust fer te Raych Saal sauwer mache un uf phase, tuust tuu fer ti priiter un xwestere tsayche tas ti nay kemaynt is yets tayn kemaynt. Woo mee tuu mache tuust, woo xneler tuun ti priiter un xwestere tich aan nëme un woo xneler tuust tuu xpiire tas tuu teel fon tayn nay kaystlich familye pist.

 4. Mach naye fraaynte. (2 Kor. 6:11-13) Wën ti layt wise tas tuu tich mit tëne khimerst, wërts laychter tëne sayn fraaynt wëre. Soo, pleen tsayt fer foer un noo te fersamlung mit te priiter fertseele un tëne khëne lërne. Xtreng tich aan fer tëne sayn naame lërne. Wëns tuu ti priiter sayn naame erinerst, fraayntlich pist un wën es laycht is mit tich fertseele, tan wole se tich khëne un wërts laychter fer tich naye fraaynte mache.

Xtats tich anerste aan xtele ploos tas ti layt tich aan nëme, los tas tayn naye priiter un xwestere khëne lërne weer tuu wërklich pist. Lërn mit Lucinda, woo kesaat hot: “Yets hon mer tichte fraayntxafte wayl mer te eyerst xrit kep hon fer ti anere tsu unser haus in laate.”

“TUUT EENE TE ANER HËRTSLICH AAN NËME”

Es khan xweyer fer etliche priiter sin in een Raych Saal fol frëmte layt rin keen. Soo, wii khanst tuu ti situatsyoon laychter lose fer tii woo nay in tayn kemaynt sin? Te aphostel Phaul hot uns uf kemuut: “Tuut eene te aner hërtslich aan nëme, soo wii Yeesus aych aach hërtslich aan kenom hot.” (Rom. 15:7) Wën ti elteste Yeesus noo mache, khene se helfe ti naye sich wilkhom xpiire. (Kuk te khaste “ Was tuut es laychter lose sich wanere?”) Awer al in te kemaynt, too tepay ti khiner, khene tas mache.

Wii khene mer ti anere wilkhome? Meyer khene tëne tsu unser haus in laate; awer meyer khene aach tëne praktix hilef kepe. Tsum payxpiil, een xwester hot tsayt kehool fer een aner xwester — woo khërtslich tsu sayn kemaynt sich kewanert hat — ti xtat tsayche un wii ti puuplix faartsaych penutse. Was ti xwester kemacht hot, hot ti aner xwester tiif aan kekrif un hot se keholef sich aan phase.

EEN OPORTUNITEET FER TICHTER PAY YEEHOOWA KHOME

Wii een hayxrek wakse tuut, mus eyer sayn haut phaar mool ënere un tii wech xmayse eep eyer fliie khan. Kraat soo, wën mer uns tsu een  nay kemaynt wanere, mise mer unser soriche “wech xmayse” eep mer in Yeehoowa sayn aarwayt “fliie” khene, es wil saan, mee fer Tëm mache. Nicolas un Céline saan: “Sich wanere, is een iwer xeen iipung. Es waar neetich naye kwaliteete ëntwikele fer uns mit naye layt un pletse aan phase.” Jean-Charles, iwer weem mer am aanfang fom artikel kexproch hon, xprecht iwer ti nutse woo sayn familye kriit hot: “In unser nay kemaynt, sin ti khiner rayfer kep un tichter pay Yeehoowa khom. Noo ploos phaar moonate, hot unser meetche aan kefang teele in te mitewoch fersamlunge mache un unser puup is een puplikatoer kep.”

Awer was khanst tuu mache wën, weeche tayn situatsyoon, tuu khanst tich net wanere fer een plats woo mee puplikatoore praycht? Fiilaycht khanst tuu etliche itee fon tiise artikel in tayn kemaynt aan wëne. Soo, es wërt wii wëns tuu tich kewanert hëst. Tuu wayter uf Yeehoowa traue un imer fiil se tuun hon in te aktiwiteete fon te kemaynt — pleen mit anere in te preetich aarwayt xafe, mach naye fraaynte un ferxtërk ti fraayntxafte woos tuu xon host. Im xtant, khanst tuu aach praktix hilef kepe fer tii woo nay orer in neetichkheet sin. Ti liip tuut ti woere kriste itentifitsiire; soo, wëns tuu ti anere helfst, tuust tuu tichter pay Yeehoowa khome. (Yoo. 13:35) Tuu khanst tich sicher sin tas “Kot kefalt sich mit tiise opfere”. (Hep. 13:16)

Opwool ti kefoore, hon fiile kriste frooheet in sayn nay kemaynt kefun — un tuu khanst tas aach fine! Anne-Lise saat: “Mich tsu een nay kemaynt wanere, hot mich keholef mayn hërts kans uf mache.” Kazumi is yets sich sicher tas wëns tuu tich wanere tuust, “tuut Yeehoowa tich helfe in aate woos tuu nii kexpiirt host”. Un wii tuut Jules sich xpiire? Tee saat: “Ti fraaynte woo ich kemacht hon, tuun mich helfe mich tehëm xpiire. Yets, xpiire ich mich soo ticht pay te kemaynt tas es weyer xweyer fer mich faart keen.”