Frooche fon te leeser
Weer is ti “fraa” fon Isayas 60:1 un wii tuut se ‘uf xtaye’ un sayn ‘licht xayne lose’?
Isayas 60:1 saat: “Xtay uf, oo fraa, los tayn licht xayne, wayl tayn licht is khom. Yeehoowa sayn hërlichkheet xaynt iwer tich.” Ti tekste um tiise wersikel rom tsayche tas ti “fraa” waar Syoon — orer Yeruusalem — ti haupst xtat fon Yutaa in tii tsayt. a (Isa. 60:14; 62:1, 2) Yeruusalem representiirt ti kans natsyoon fon Israël. Wole mer 2 frooche iwer Isayas sayn wërter antworte. Eyerst: wan un wii is Yeruusalem ‘uf kextii’ un hot sayn simpoolixe licht xayne kelos? Tsweet: hon Isayas sayn wërter een kreeser erfiilung?
Wan un wii is Yeruusalem ‘uf kextii’ un hot sayn simpoolixe licht xayne kelos? Soo lang wii ti yuute in Papiloon torich 70 yoore inkexpërt waare, sin Yeruusalem un te thempel in ruiine keplip. Awer noo ti mëter un ti përser Papiloon iwerfal hon, waare ti israeliiter uf te kans Papiloonixe Raych fray fer tsurik tsu sayn haymat lant keen un Yeehoowa noch mool in te richtich aat aan peete. (Ëst. 1:1-4) Fon 537 F.K. aan, hot een kleen krup troye israeliiter fon te kanse 12 xteme tas kemacht. (Isa. 60:4) Tii hon aan kefang opfere fer Yeehoowa mache, ti feste fayre un te thempel noch mool uf paue. (Ëst. 3:1-4, 7-11; 6:16-22) Yeehoowa sayn hërlichkheet hot aan kefang noch mool iwer Yeruusalem xayne — es wil saan, Sayn folek. Un tas folek is een simpoolixe licht fer ti natsyoone kep, woo in kaystlich tunkelheet waare.
Awer Isayas sayn profetsiie hon sich net kans erfiilt in tii tsayt. Ti meyerste israeliiter hon net wayter Yeehoowa kefolicht. (Nee. 13:27; Mal. 1:6-8; 2:13, 14; Mat. 15:7-9) Xpeeter, hon se soo kaar Yeesus Kristus — te Mesias — ap kextos. (Mat. 27:1, 2) Im yoerkang 70 N.K., sin Yeruusalem un sayn thempel noch mool fernicht kep.
Yeehoowa hot foer raus kesaat tas tas pasiire teet. (Tan. 9:24-27) Es is taytlich tas es waar net Yeehoowa sayn tsiil tas ti eyertlich Yeruusalem ti profetsiie in Isayas kapitel 60 kans erfiile teet.
Hon Isayas sayn wërter een kreeser erfiilung? Ia, awer tas pasiirt mit een aner simpoolix fraa — “ti Yeruusalem fon oower”. Te aphostel Phaul hot iwer tiise fraa kexrip: “Tii is unser muter.” (Kal. 4:26) Ti Yeruusalem fon oower is tas himlixe teel fon Kot sayn Orkanisatsyoon, woo fon sayn troye kaystliche kriatuure kemacht is. Tiise fraa sayn khiner sin Yeesus un ti 144.000 kesalpte kriste woo, soo wii Phaul, ti himlix hofnung hon. Mitsamer, sin ti kesalpte kriste een “haylich natsyoon” — “Kot sayn Israël”. (1 Phe. 2:9; Kal. 6:16)
Wii is Yeruusalem fon oower ‘uf kextii’ un hot sayn ‘licht xayne kelos’? Tii hot tas kemacht torich sayn eyertlich kesalpte khiner. Ferklaych was mit tëne pasiirt is, mit te profetsiie fon Isayas kapitel 60.
Noom toot fon te aphostele, hot ti apostasii sich ferprayt un ti kesalpte kriste sin in een simpoolix tunkelheet keplip. (Mat. 13:37-43) In tii tsayt, sin se unich te kontrol fon Papiloon ti Kroos keplip, woo al ti falxe relichyoone petayt. Tes weeche, miste se “uf xtaye”. Ti kesalpte kriste waare unich tiise kontrol pis tas “ën fon tëm welts sisteem”, woo im yoerkang 1914 aan kefang hot. (Mat. 13:39, 40) Klaych tëm noo, in 1919, sin se pefrayt kep un hon klaych aan kefang tas simpoolixe licht xayne lose wii se ti kuute notisye fon Kot sayn Raych kepreeticht hon. b Torich ti yoore, sin layt fon te kanse natsyoone tsu tiise licht khom, too tepay tii fon Kot sayn Israël woo noch uf te eyert sin — ti “kheeniche”, iwer weem Isayas 60:3 xprecht. (Apo. 5:9, 10)
In te futuer, tuun ti kesalpte kriste Kot sayn licht in een kreeser aat xayne. Wii soo? Wën sayn leepe too uf te eyert tsum ën khomt, wëre se teel fon te “Nay Yeruusalem” sin, es wil saan, Kristus sayn praut fon 144.000 kheeniche un priister. (Apo. 14:1; 21:1, 2, 24; 22:3-5)
Ti Nay Yeruusalem tuut een wichtich teel hon in te erfiilung fon Isayas 60:1. (Ferklaych Isayas 60:1, 3, 5, 11, 19, 20 mit Apokalipsis 21:2, 9-11, 22-26.) Soo wii ti eyertlich Yeruusalem te sentrum fon te rechiirung in friirix Israël waar, soo wëre ti Nay Yeruusalem un Yeesus ti rechiirung fon te nay welt sin. Wii tuut ti Nay Yeruusalem ‘fom himel, yaa, fon Kot heyer runer keen’? Wën se tinge macht woo ti layt uf te eyert petrefe un sayn licht iwer tëne xaynt. Layt fon te kanse natsyoone woo Kot tiif respektiire, “tuun in [te Nay Yeruusalem] sayn licht keen”. Tii tuun net mee sinte un xtërpe. (Apo. 21:3, 4, 24) Tëm noo was Isayas un anere profeete foer raus kesaat hon, wërt “ales noch mool in te ray kextelt”. (Aph. 3:21) Tas hot aan kefang wii Yeesus kheenich kep is, un tuut tsum xlus khome am ën fon sayn Tausent Yoore Rechiirung.
a In Isayas 60:1, tuut ti Nay Welt Iwersetsung tas wort “fraa” penutse, xtats “Syoon” orer “Yeruusalem”, wii etliche iwersetsunge fon te Piipel mache. Tas pasiirt wayl too, ti hepreeyxe wërter woo iwersetst sin “xtay uf”, “licht xayne” un “tich” femininum sin.
b Ti woer aanpeetung is noch mool fest kextelt in 1919. Tiise ewënt is aach pexrip in Esekyël 37:1-14 un Apokalipsis 11:7-12. Esekyël sayn profetsii hot iwer tas simpoolix ufxtaye fon al ti kesalpte kriste kexproch, noo tas se inkexpërt torich een lang tsayt waare. Ti profetsii in Apokalipsis xprecht iwer tas simpoolix ufxtaye fon een kleen krup kesalpte priiter woo ti Orkanisatsyoon kefiirt hon, noo een khorts tsayt woo se net mee soo fiil mache khonte wayl se unkerecht in kexpërt kep sin. In 1919, sin se wii “te troye un ferninftiche sklaaw” in kextelt kep. (Mat. 24:45; kuk A Adoração Pura de Jeová É Restaurada, sayt 118.)
