Tiise wersikele mache een list fon 9 kwaliteete: “Ti frucht fom kayst is: liip, frooheet, friit, ketult, froyntlichkheet, kuutheet, klaape, tsaamheet, selepst kontrol.” Awer, tiise sin net ti eensiche xeene kwaliteete woo Kot sayn kayst khan uns helfe ëntwikele.

Wii wise mer tas? Eep te aphostel Phaul kexprooch hot iwer ti frucht fom kayst, eyer hot kexrip: “Ti aarwayte fom flayx . . . sin sëksuaal imoraaliteet, unraynheet, ausferxeemt aanxtelung, itolatrii, spiritismus, fayntxafte, priike, ayfersuucht, wuutich kepe, uneenichkheete, ferteelheete, sekte, nayt, sauferay, fëste oone kontrol un soo sorte tinge.” (Gál. 5:19-21) Ti wërter “soo sorte tinge” tsayche tas Phaul khent anere tinge tepay tuun aan te list fon “aarwayte fom flayx”, soo wii ti tinge woo in Colossenses 3:5 xteen. Eyer hot etwas eenliches kemacht mit te 9 xeene kwaliteete. Tee saat: “Keeche soo sorte tinge kepts khee kesets.” Tas tsaycht tas Phaul hot net fersuucht een list mache fon ti kanse xeene kwaliteete woo Kot sayn kayst khan uns helfe ëntwikele.

Tas is taytlich wën mer ferklayche tiise list mit was Phaul fer ti kemaynt fon Ëfeso kexrip hot: “Ti frucht fom licht is kemacht kep fon ale sorte kuutheet, kerechtichkheet un woerheet.” (Efé. 5:8, 9) Yaa, “kuutheet”, tepay mit kerechtichkheet un woerheet, is een teel fon te “frucht fom licht”, awer aach, een kwaliteet fon te “frucht fom kayst”.

In te selwich aat, Phaul hot Timoteo uf kemuut fer 6 xeene kwaliteete ëntwikele: ‘ti kerechtichkheet, ti leaaliteet tsu Kot, tas klaape, ti liip, ti persewerans un ti tsaamheet’. (1 Tim. 6:11) Ploos 3 fon tiise kwaliteete (klaape, liip un tsaamheet) sin kexprooch kep wii een teel fon te “frucht fom kayst”. Awer, es is sicher tas Timoteo teet aach te hilef fom hayliche kayst prauche fer ti anere 3 kwaliteete ëntwikele: kerechtichkheet, leaaliteet tsu Kot un persewerans. (Kuk aach Col. 3:12; 2 Ped. 1:5-7.)

Tes weeche, Gálatas 5:22, 23 tuut net xpreche iwer al ti kristliche kwaliteete. Kot sayn kayst khan uns helfe ti 9 kwaliteete fon te “frucht fom kayst” ëntwikele. Awer, kepts anere kwaliteete woo mer mise ëntwikele fer rayfe kriste sin un ti “nay personaliteet aan tsiie, woo ketsoo kep is torich Kot sayn wile, in woere kerechtichkheet un leaaliteet”. (Efé. 4:24)