1. Warom hot Yeehoowa sich mit een muter ferklaycht?

“KHAN een fraa sayn nëneche ferkese?” Yeehoowa hot tiise frooch kemacht in te taache fon tëm profeet Isaiias. Tee hot tiise sicherheet fer sayn folek kep: “Soo kaar wën tiise fraa sich ferkese, ich teet nii tich ferkese.” (Isa. 49:15) Yeehoowa tuut sich net eftas mit een muter ferklayche, awer too, hot eyer tas kemacht. Yeehoowa hot ti liip tswixich een muter un sayn khint penutst fer tsayche wii tiif is tëm sayn liip tsu sayn tiiner. Ti meyeste muter xpiire sich kraat soo wii een xwester kenënt wii Jasmin. * Tii saat: “Wëns tuu phast tayn nëneche uf, tuust tuu een ekstra ferpiinung ëntwikele, woo torich tas kanse leepe tauert.”

2. Wii tuut Yeehoowa sich xpiire wën eene fon sayn khiner sich fon tëm ap lënkt?

² Yeehoowa mërkt wën soo kaar eene fon sayn khiner, tuut noo lose preetiche orer in te fersamlunge khome. Tan, iwerlee tich wii traurich tuut Yeehoowa sich xpiire wën tee siit, yeetes yoer, tausente fon sayn tiiner inatiiw * wëre.

3. Was wil Yeehoowa?

³ Fiile fon tiise priiter un xwestere woo sin inatiiw kep, khome tsurik fer ti kemaynt — un tii sin hërtslich wilkhome! (1 Ped. 2:25) Yeehoowa wil tas tii tsurik khome, un meyer wole tas selwiche. Wii khene mer tëne helfe retuer khome? Eep mer tas antworte, weyer es kuut wise warom etliche tuun noo lose in te fersamlunge khome un in te preetich keen.

4. Was pasiirt mit etliche priiter weeche sayn aarwayt?

⁴ Etliche hon erlaupt tas sayn aarwayt tas haupste in sayn leepe weyer. Hung, eene pruuter woo leept in Asia, saat: “Ich hon tsu fiil tsayt un kraft aan te aarwayt fertrip. Ich hon mich selepst tum kemacht! Ich hon ketenkt tas wën ich mee kelt hët, teet ich peser Yeehoowa tiine. Tan hon ich mee xtune kexaft. Ich hon aan kefang mee un mee aan te fersamlunge feele, pis ich noo kelos hon tsu te Raych Saal keen. Siit es aus tas tiise welt is kepaut kep fer ti layt lamsam fon Kot ap lënke.”

5. Wii hot een ray fon xwiirichkheete een xwester petrof?

⁵ Welche priiter un xwestere wëre iwer kelaat weeche sayn propleeme. Anna, fon Ënglant, hot 5 khiner. Tii leet aus: “Eene fon mayn khiner is uf te welt khom mit een xweyer propleem in sayn khërper. Xpeeter, een fon mayn meetche waar ap kesetst fon te kemaynt. Un eene fon mayn puupe hot een krankheet in sayn ferxtant ëntwikelt. Ich sin soo tiifsinich kep, tas ich hon noo kelos in te fersamlunge khome un in te preetich keen. Am ën, sin ich inatiiw kep.” Tuut ma tauere, wën mer siin Anna un sayn familye un noch anere, woo soo fiil xwiirichkheete mit mache!

6. Wii khan yemant sich fon Yeehoowa sayn folek ap lënke, wën tee net Colossenses 3:13 aan wënt?

⁶ Lees Colossenses 3:13. * Etliche fon Yeehoowa sayn tiiner wëre pees, weeche etwas woo een xwester orer eene pruuter tëne kemacht hot. Te aphostel Phaul hot erkhënt tas, manich mool, hon mer een woere uersach fer uns keeche een xwester orer eene pruuter peklaae. Fiilaycht, waare mer unkerecht pehantelt kep. Wën mer net uf phase, khene mer motsich wëre. Un, am ën, weeche ti piter xpiirunge, khene mer uns ap lënke fon Yeehoowa sayn folek. Kuk te speriens fon Pablo, eene pruuter fon Siit Amërika. Opwool eyer unxultich waar, yemant hot keloo un kesaat tas eyer hat etwas ferkheert kemacht. Weeche tas, hot eyer een priwilëj in te kemaynt ferloer. Wii hot Pablo sich aan kextelt? Tee saat: “Ich sin pees kep, un ich hon mich lamsam fon te kemaynt ap kelënkt.”

7. Was khan een xultich kewise mit yemant mache?

⁷ Etliche priiter hon een xultich kewise weeche een xweyer sint woo se friier kemacht hon. Tes weeche, mëne se tas se net Kot sayn liip fertiine. Soo kaar wën tii hon xon sich peroyt, un es waar xon parmhërtslichkheet fer tëne ketsaycht, fiilaycht tii mëne tas se sin net kuut kenuuch fer tswixich Kot sayn folek plaype. Eene pruuter, woo heest Francisco, hot sich soo kefun. Tee saat: “Ich waar tisipliniirt weeche sëksuaal imoraaliteet. Opwool sin ich wayter in te fersamlunge kang, sin ich tiifsinich kep, un hon mich net kuut kenuuch kefun fer tswixich Kot sayn folek plaype. Ich hon mich wayter xultich kexpiirt, un ich waar mich sicher tas Yeehoowa hat net mich fertsayt. Mit te tsayt, hon ich noo kelos aan te fersamlunge khome un in te preetich keen.” Wii xpiirst tuu tich iwer ti priiter un xwestere woo tuun eenliche propleeme mit mache — wii tiise fon te apsetse 4 pis 7? Khanst tuu tich uf tëne sayn plats tuun? Un tas haupste, wii tuut Yeehoowa sich iwer tëne xpiire?

8. Tuut Yeehoowa sich ferkese fon tëne woo hon xon tëm ketiint? Lee aus.

⁸ Yeehoowa tuut sich net ferkese fon tëne woo hon tëm ketiint, awer in te momënt, hon sich ap kelënkt fon Kot sayn folek. Tee tuut  sich aach net ferkese fon te aarwayt woo se hon in tëm sayn tiinst kemacht. (Heb. 6:10) Te profeet Isaiias hot een xeene ferklaychung kexrip, woo tsaycht wii fiil Yeehoowa liipt sayn folek: “Wii een xeefer, tee tuut sayn trop uf phase. Mit sayn aarm, tuut eyer ti leeme samele un tëne ticht aan sayn prust nëme.” (Isa. 40:11) Wii tuut Yeehoowa, te Kroose Xeefer, sich xpiire wën een fon sayn xeef tuut sich ap lënke fon tëm trop? Yeesus hot ketsaycht wii Yeehoowa xpiirt sich wën tee hot fer sayn tisipele kefroot: “Was mënt teyer? Wën eene man hot 100 xeef, un eene fon tëne ferliirt sich, tuut eyer net ti anere 99 uf te përiche lose, un tas woo hot sich ferliirt, suuche keen? Un, wën tee tas fint, tuun ich wërklich fer aych saan, tuut eyer sich mee weeche tëm fraye, wii weeche ti anere 99 woo sich net ferliirt hon.” (Mat. 18:12, 13)

9. In ti piiplixe tsayte, wii hot eene kuute xeefer sayn xeef uf kephast? (Kuk tas pilt am aanfang fom piichelche.)

⁹ Warom is es aarich kuut Yeehoowa mit een xeefer ferklayche? Wayl in te piiplixe tsayte, eene kuute xeefer hot sich fiil mit sayn xeef kekhimert. Tsum payxpiil, Tawi hot mit een leep un mit een peer kekhëmpft fer sayn trop xitse. (1 Sam. 17:34, 35) Eene kuute xeefer teet sicher mërke, wën soo kaar eene xoof feele teet. (João 10:3, 14) Eyer teet ti anere 99 xeef in een xeef xtal lose, orer teet ferlange fer anere xeefer tëne uf phase, un tan, tas xoof woo feelt, suuche keen. Yeesus hot tiise ferklaychung penutst fer uns een wichtiche woerheet in lërne: “Mayn Fater, woo im himel is, wil net tas soo kaar eene fon tiise kleene ferliirt sich.” (Mat. 18:14)

10. Soo wii een Ezequiel 34:11-16 xteet, was hot Yeehoowa ferxproch se mache fer sayn ferloerne xeef?

¹⁰ Yeehoowa liipt yeete eene fon uns, tepay ti “kleene” woo hon sich fon tëm sayn trop ap kelënkt. Torich te profeet Esekiël, Yeehoowa hot ferxproch sayn ferloerne xeef suuche un tëne helfe noch mool een xtarek froyntxaft mit tëm hon. Un tee hot pexrip yeete xrit woo tee kepe teet fer tëne reete. Tiise xrite sin ti selwiche woo een israelite  xeefer kepe teet, wën een xoof feele teet. (Lees Ezequiel 34:11-16.) * Eyerst, teet te xeefer te xoof suuche keen, etwas woo khont tsayt un aanxtrengung ferlange. Tan, wii eyer tas ferloerne xoof kefun hot, teet eyer se tsurik fer te trop nëme. Un wën tas xoof sich wee kemacht hat orer waar am hunger noote, te xeefer teet tëm liiplich uf phase, sayn wee tsu wikle, tëm in sayn aarme nëme un tëm eneere. Ti elteste, als xeefer fon “Kot sayn trop”, mise ti selwiche xrite kepe fer helfe tëne woo hon sich ap kelënkt fon te kemaynt. (1 Ped. 5:2, 3) Ti elteste tuun tëne suuche, tëne helfe tsurik fer te trop khome un liip tsayche wën se te neetich kaystlich hilef fer tëne kepe. *

11. Was hot eene kuute xeefer ferxtan?

¹¹ Eene kuute xeefer hot ferxtan tas, fiilaycht, een xoof khan sich ferliire. Un wën tas wërklich pasiirt is, te xeefer hot net sayn xoof krop pehantelt. Kuk te payxpiil woo Yeehoowa fer uns kelos hot, torich te aat wii eyer sayn tiiner in ti piiplixe tsayte pehantelt hot.

12. Wii is Yeehoowa mit Yoonas um kang?

¹² Te profeet Yoonas hot net Yeehoowa aan keheert un is net tsu Niniwe kang. Soo wii soo, Yeehoowa hot net klaych Yoonas im xtich kelos. Wii eene kuute xeefer, Yeehoowa hot tëm keret un tëm tas neetich kraft kep fer sayn insetsung erfiile. (Jon. 2:7; 3:1, 2) Noo heyer, Yeehoowa hot een prungextok penutst fer Yoonas helfe ferxteen wii fiil weyert yeete  mënx hot. (Jon. 4:10, 11) Was is ti lisyoon fer uns? Ti elteste mise net klaych im xtich lose tii woo sin inatiiw kep. Xtats tas, ti elteste fersuuche se ferxteen warom een xoof hot sich fon tëm trop ap kelënkt. Un wën tas xoof khomt retuer fer Yeehoowa, ti elteste tuun wayter tsayche tas tii tuun tëm liipe un sich mit tëm khimere.

13. Was khene mer lërne mit te aat woo Yeehoowa te xrayper fom Salmo 73 pehantelt hot?

¹³ Te xrayper fom Salmo 73 hot sich oone muut kefun wën tee hot ti xlechte peopacht un es hot aus kesiin tas ales kuut mit tëne kang is. Tee hot sich kefroot op Yeehoowa sayn wile mache wërklich een tswek hot. (Sal. 73:12, 13, 16) Was hot Yeehoowa kemacht? Tee hot net tëm ferxënt. In woerheet, Yeehoowa hot tëm sayn wërter in te Piipel kelos. Am ën, hot te salmist kemërekt tas es is niks peser im leepe wii Yeehoowa sayn froynt sin. (Sal. 73:23, 24, 26, 28) Was is ti lisyoon fer uns? Ti elteste sole net klaych richte tii woo tuun aan fange sich frooe op es wërklich nutslich is Yeehoowa tiine. Xtats tëne xëne, ti elteste mise fersuuche ferxteen warom tii tuun soo xpreche un sich aan xtele. Ploos tan, khene ti elteste ti Piipel penutse fer tëne uf muute.

14. Warom praucht Eliias hilef hon, un wii hot Yeehoowa tas kep?

¹⁴ Te profeet Eliias is fon te kheenichin Jesapël aus keris. (1 Reis 19:1-3) Eyer tacht tas nimant aneres hot wii profeet fon Yeehoowa mit tëm ketiint, un tee hot kemënt tas sayn aarwayt khee tswek hat. Eliias is soo tiifsinich kep tas eyer wolt xtërpe. (1 Reis 19:4, 10) Xtats Eliias xëne, Yeehoowa hot tëm sicher kelos tas  eyer waar net aleen, tas tee khent aan Yeehoowa sayn macht traue, un es waar noch fiil aarwayt fer se mache. Yeehoowa hot Eliias sayn soriche liiplich keheert, un hot tëm naye insetsunge kep. (1 Reis 19:11-16, 18) Was is ti lisyoon fer uns? Meyer al, haupstsechlich ti elteste, sole Yeehoowa sayn xeef mit kuutheet pehantele. Is een tuun op ti persoon saat tas se pees is, orer tas se mënt tas Yeehoowa tuut nii tëne fertsaye, ti elteste tuun tëne heere wën se iwer sayn xpiirunge xprecht. Noo heyer, ti elteste fersuuche tiise ferloerne xoof helfe se mërke tas se hot fiil weyert fer Yeehoowa.

15. Soo wii in João 6:39 xteet, wii hot Yeesus ti xeef fon sayn Fater kesiin?

¹⁵ Wii wil Yeehoowa tas mer tëm sayn ferloerne xeef siin tuun? Meyer khene fon Yeesus sayn payxpiil lërne. Tee wust tas al fon Yeehoowa sayn xeef fiil weyert fer tëm hon. Tes weeche, hot er kemacht ales was tee khont, fer ti “ferloerne xeef fon Israël sayn haus” helfe retuer tsu Yeehoowa khome. (Mat. 15:24; Luc. 19:9, 10) Yeesus, als kuute xeefer, hot sayn pestes kemacht fer khee eene fon Yeehoowa sayn xeef ferliire. (Lees João 6:39.) *

16-17. Wii sole ti elteste sich xpiire iwer ti inatiiwe helfe? (Kuk ti khaste “ Wii een ferloerne xoof fiilaycht xpiirt sich”.)

¹⁶ Te aphostel Phaul hot ti elteste fon te kemaynt in Ëfeso uf kemuut fer Yeesus sayn payxpiil noo mache. Eyer hot kexrip: ‘Teyer mist ti xwache helfe, un ti wërter fom Hër Yeesus im ketanke pehale, woo kesaat hot: ‘Ti frooheet is kreeser wën mer kepe wii wën mer kriin.’’ (Atos 20:17, 35) Tiise tekst taytlich tsaycht tas ti elteste hon ti wichtich flicht fer Yeehoowa sayn folek uf phase. Salvador, een elteste in Xpaanya, saat: “Wën ich tenke aan wii fiil tuut Yeehoowa sich mit sayn ferloerne xeef khimere, ich xpiire mich uf kemuut fer se mache ales was ich khan fer tëne helfe. Wii een kaystlich xeefer, sin ich sicher tas Yeehoowa wil tas ich tëne uf phase.”

¹⁷ Al ti inatiiwe woo mer hon in tiise artikel kexprooch, waare keholef kep un sin tsurik tsu Yeehoowa khom. In tiise selwich tsayt, fiil anere woo hon sich ap kelënkt, wole tas selwiche mache. Was khene mer mache fer tëne helfe? Te neekste artikel tuut mee kleenichkheete iwer tas kepe.