XTUUTYUM ARTIKEL 26
“Khomt retuer tsu mich”
“Khomt retuer tsu mich, un ich tuun retuer tsu aych khome.” (MALAQUIAS 3:7)
LIIT 102 Helef tii woo xwach sin
WAS TUUN MER SIIN? *
1. Wii xpiirt sich Yeehoowa wën eene fon sayn xeef retuer tsu tëm khomt?
SOO WII mer in tëm letste artikel kesiin hon, Yeehoowa tuut sich selepst ferklayche mit eene kuute xeefer woo phast sayn xeef liiplich uf. Un eyer suucht yeete eene woo sich fon sayn trop ap lënkt. Tas is pasiirt mit etliche israelite. Yeehoowa hot fer tëne kesaat: “Khomt retuer tsu mich, un ich tuun retuer tsu aych khome.” Un meyer wise tas Yeehoowa tuut sich noch soo xpiire, wayl tee saat: “Ich tuun mich net ënere.” (Mal. 3:6, 7) Yeesus hot kesaat tas Yeehoowa un ti engele tuun sich fiil fraye wën soo kaar eene fon sayn tiiner, woo sich ap kelënkt hot, tsu tëm retuer khomt. (Luc. 15:10, 32)
2. Was tuun mer in tiise artikel lërne?
2 In tiise artikel, meyer tuun xpreche iwer 3 fon Yeesus sayn kexichte, woo tsayche wii khene mer helfe tii woo hon sich fon Yeehoowa ap kelënkt. Meyer tuun aach siin 3 kwaliteete woo mer prauche fer helfe ti ferloerne xeef tsurik tsu Kot khome. Un meyer tuun lërne tas mer fiil frooheet kriin wën mer uns aan xtrënge fer ti inatiiwe helfe tsurik khome.
TI SUUCHUNG NOO TËM FERLOERNE NIKEL
3-4. In tëm kexicht fon Lucas 15:8-10, warom tuut ti fraa sich soo fiil aan xtrenge fer sayn nikel fine?
3 Meyer mise uns aan xtrenge fer se fine tii woo wole tsurik tsu Yeehoowa khome. Im puuch Lucas, Yeesus fertseelt een kexicht iwer een fraa woo etwas ferliirt hot, woo fiil weyert hat — een trakma nikel. Te haupste teel fon tiise kexicht, is wii fiil ti fraa hot sich aan kextrengt fer te nikel fine. (Lees Lucas 15:8-10.) *
4 Yeesus pexraypt wii ti fraa xpiirt sich wën tii sayn ekstra nikel noch mool fint. In Yeesus sayn taache, wën een israelit fraa sich kehayrat hot, manich mool, hot sayn muter fer tëne een phekche mit tseen trakma nikele kep. Fiilaycht, ti fraa fon Yeesus sayn kexicht hot eene nikel fon tiise phekche ferliirt. Ti fraa mënt tas te nikel is uf te pootem kefal. Soo, tuut se een lamp aan mache un kukt um sich rom, awer fint niks. Im xtant, sayn eel lamp tuut net kenuuch licht kepe fer tsayche woo te kleene silper nikel is. Am ën, tuut se lamsam tas kans haus kheere. Un tat soo, tswixich ti kanse xtaap woo se kekheert hot, is etwas am xayne unich te lamp sayn licht — sayn ekstra nikel. Wii xeen! Tii samelt tëne sayn froynte un nochpere fer tiise kuute oter fertseele.
5. Warom khan es fiilaycht xweyer sin ti inatiiwe fine?
5 Yeesus sayn kexicht lërnt uns tas wën meyer etwas ferliire, meyer mise uns aan xtrenge fer tas noch mool fine. In te selwich aat, prauche mer im xtant uns aan xtrenge fer ti inatiiwe fine. Fiilaycht, sin xon phaar yoere tas tii tuun nii mee mit uns sich samele. Orer im xtant, hon se sich kewanert pis een plats woo ti priiter tuun net tëne khëne. Awer, meyer khene sicher sin tas yets, etliche fon tiise inatiiwe wole wërklich tsurik tsu Yeehoowa khome. Tii wole noch mool Yeehoowa tiine mit sayn priiter un xwestere, awer tii prauche unser hilef hon.
6. Wii khene al in te kemaynt helfe ti inatiiwe suuche?
6 Weer khan helfe ti inatiiwe suuche? Meyer al — ti elteste, ti pioneere, ti familye un ti puplikatoore fon te kemaynt. Host tuu een froynt orer een parent woo is inatiiw kep? Host tuu een inatiiw in te preetich orer in tëm puuplix tsaye aan ketrof? Fiilaycht, teet eyer kërn een pesuuch fon te elteste kriin. Wën eyer tas wil, khanst tuu tëm sayn numer orer atrës fer ti elteste fon tayn kemaynt kepe.
7. Was khene mer lërne mit te wërter fon een elteste, woo Thomas heest?
7 Was fer xrite khene haupstsechlich ti elteste kepe, fer se fine tii woo wole retuer tsu Yeehoowa khome? Kuk mool ti wërter fon Thomas, * een elteste woo in Xpaanya leept. Tee hot xon mee wii 40 inatiiwe keholef retuer fer ti kemaynt khome. Tee saat: “Eyerst, tuun ich fer unerxiitliche priiter un xwestere frooe op se wise woo ti inatiiwe yets woone. Orer, tuun ich fer ti puplikatoore frooe op se tuun sich erinere fon yemant woo tuut nii mee in te fersamlunge khome. Fiile in te kemaynt tuun froo helfe, wayl tii xpiire tas se hon een teel in tiise suuchung. Xpeeter, wën ich ti inatiiwe priiter orer xwestere pesuuche, tuun ich iwer sayn khiner un parente frooe. Welche fon te inatiiwe hate imer sayn khiner fer ti fersamlunge kenom, un fiilaycht waare tiise khiner xon puplikatoore kewees. Tii khene aach hilef kriin fer tsurik tsu Yeehoowa khome.”
PRING YEEHOOWA SAYN FERLOERNE SOONE UN TOCHTERE TSURIK
8. In tëm kexicht fom ferloerne soon, woo in Lucas 15:17-24 xteet, wii hot te fater sayn peroytne soon pehantelt?
8 Was fer kwaliteete prauche mer hon, tas meyer khene helfe tii woo wole tsurik tsu Yeehoowa khome? Kuk etliche lisyoone woo khene mer lërne mit Yeesus sayn kexicht iwer te soon woo fom haus fat kang is. (Lees Lucas 15:17-24.) * Yeesus leet aus was pasiirt is, wii te soon aan sich kefal is un hot ëntxlist hëm tsus keen. Te fater is tsu tëm kexprung un hot tëm xtarek um kekrif, tas te soon es wise teet tas sayn fater tëm noch keliipt hot. Te soon hat een xultich kewise un hot kemënt tas eyer net fertiint hot wii soon keruuft wëre. Te fater hot empatii ketsaycht wii te soon sayn hërts uf kemacht hot. Te fater hot tan phaar xrite kep fer tsayche fer sayn soon, tas eyer waar hërtslich wilkhome, net wii eene aarwayter, awer wii eene liipe soon. Fer tas taytlich lose, hot te fater een fest kemacht un xeene tsaych fer te peroytne soon kep.
9. Was fer kwaliteete prauche mer tsayche, fer ti inatiiwe helfe tsurik tsu Yeehoowa khome? (Kuk te khaste “ Wii khene mer helfe yemant woo wil retuer khome?”)
9 Yeehoowa is wii te fater fon tiise kexicht. Eyer liipt unser inatiiwe priiter un xwestere un wil tas tii tsurik tsu tëm khome. Wën mer Yeehoowa noo mache, khene mer tëne helfe tsurik khome. Fer tas se mache, meyer prauche ketult, empatii un liip tsayche. Warom sole mer tiise kwaliteete tsayche, un wii khene mer tas mache?
10. Warom prauche mer ketultich sin, wën mer helfe yemant tsurik tsu Yeehoowa khome?
10 Meyer prauche ketult hon, wayl es tsayt nëmt fer yemant sich in kaystlich aat heele. Fiile woo inatiiw waare, saan tas ti elteste un anere in te kemaynt hon tëne noo un noo pesuucht, eep se aan kefang hon noch mool Yeehoowa tiine. Een xwester fon Asia, woo Nancy heest, xraypt: “Een kroos froyntin in te kemaynt hot mich fiil keholef. Tii hot mich keliipt wii een elter xwester. Tii hot mich erinert fon te kuute tsayte woo mer paysamer hate. Tii hot mich mit ketult kehoricht wii ich mayn hërts uf kemacht hon, un tii hot net sich um kehal mich aanreete kepe. Tii hot taytlich ketsaycht tas se een woer froyntin waar, fërtich fer mich helfe in yeete tsayt.”
11. Warom prauche mer empatii hon wën yemant sayn xpiirunge tuun wee?
11 Empatii is wii een xtarek metitsiin. Wën yemant sayn xpiirunge tuun wee, khan ti empatii tëne heele. Welche inatiiwe tuun xon fer phaar yoere mit piter xpiirunge khëmpfe keeche yemant fon te kemaynt. Weeche tas, tii wole net retuer tsu Yeehoowa khome. Etliche fiilaycht tenke tas se waare unkerecht pehantelt. Im xtant, prauche se yemant fer tëne heere un woo tëne sayn xpiirunge ferxteen. (Tia. 1:19) María, woo inatiiw fer een tsayt waar, saat: “Ich praucht een froynt fer mayn hërts uf mache, een hant fer mich xtitse un een xuler fer se prile.”
12. Wii soo is Yeehoowa sayn liip wii een xtrik? Mach een ferklaychung.
12 Ti Piipel ferklaycht Yeehoowa sayn liip fer sayn folek mit een xtrik. In was fer aat is Yeehoowa sayn liip wii een xtrik? Kuk mool tiise ferklaychung: Iwerlee tich tas tuu pist in tas meer kefal. Ti weele sin hooch un tas waser is khalt. Tuu pist am tich fersaufe. Tan, yemant in een xif ticht pay tich, tuut etwas xmayse woos tuu khanst tich traan hale, fer net uner keen. Tuu pist petanklich. Awer, tuu prauchst mee hilef hon fer aus fom waser keen. Soo, tuu prauchst tas ti layt in tëm xif tich een xtrik xmayse fer tich helfe tsu te xif keen. Yeehoowa hot tiise wërter kesaat iwer ti israelite woo hate sich ap kelënkt: ‘Ich hon wayter tëne tsu mich kefiirt, mit te kotele fon te liip.’ (Ose. 11:4) Yeehoowa tuut tas selwiche xpiire iwer tii woo, hayt, hon noo kelos tëm tiine un woo sin am sich fersaufe in propleeme un ëngstlichkheete. Eyer wil hon tas tii wise tuun tas eyer tëne liipt, un wil tëne tsu tëm fiire. Un Yeehoowa khan tich penutse fer sayn liip tsu tëne tsayche.
13. Wii tuut Pablo sayn speriens tsayche tas unser liip khan ti anere helfe retuer tsu Yeehoowa khome?
13 Es is wichtich wayter fer ti inatiiwe saan tas Yeehoowa tëne liipt un tsayche tas meyer tuun aach tëne liipe. Pablo, fon tëm letste artikel, waar mee wii 30 yoere inatiiw. Eyer saat: “Eene taach, moynts frii, wën ich aus tëm haus kang sin, hot een altche xwester mich aan ketrof un mit mich in een liiplich aat kexprooch. Ich hon aan kefang se prile wii een nëneche. Ich hon fer tii kesaat: ‘Siit es aus tas Yeehoowa hot tich kexikt fer mit mich xpreche.’ In tiise xtun, hon ich ëntxlist retuer tsu Yeehoowa khome.”
TUU TI XWACHE MIT LIIP HELFE
14. Tëm noo tas kexicht woo in Lucas 15:4, 5 xteet, was hot te xeefer kemacht wii eyer tas ferloerne xoof kefun hot?
14 Meyer prauche ti inatiiwe wayter helfe un uf muute. Soo wii te ferloerne soon fon Yeesus sayn kexicht, fiilaycht sayn xpiirunge tuun wee. Un, im xtant, sin se xwach in kaystlich aat weeche ales woo se mit kemacht hon in te Taywel sayn welt. Tes weeche, mise mer tëne helfe sayn klaape aan Yeehoowa ferxtërke. In tëm kexicht fom ferloerne xoof, Yeesus saat tas te xeefer tuut tas xoof uf sayn xuler tuun un nëmt se tsurik fer te trop. Te xeefer hot xon tsayt un kraft fertrip fer tas xoof fine. Awer, tee mërkt tas tee praucht tas xoof tsurik fer te trop nëme, wayl tii hot net kenuuch kraft fer tas aleen mache. (Lees Lucas 15:4, 5.) *
15. Wii khene mer helfe tii woo xwach sin, sayn froyntxaft mit Yeehoowa noch mool xtarek lose? (Kuk te khaste “ Een piichelche woo fiil weyert hot”.)
15 Fiilaycht, prauche mer tsayt un kraft fertraype fer ti inatiiwe helfe sayn xwacheete triwer wech khome. Awer, mit Yeehoowa sayn kayst, sayn Wort un ti puplikatsyoone fon sayn orkanisatsyoon, khene mer tëne helfe sayn froyntxaft mit Yeehoowa noch mool xtarek lose. (Rom. 15:1) Wii khene mer tas mache? Een elteste, mit fiil speriens, saat: “Wën ti inatiiwe ëntxlise tsurik fer ti woerheet khome, in te meyeste tsayt, prauche se een Piipel xtuutyum hon.” * Soo, wën ti elteste tich ferlange een Piipel xtuutyum mit een inatiiw fiire, was mënst tuu fon tas priwilëj aan nëme? Te elteste saat aach: “Te puplikatoer woo te xtuutyum fiirt, praucht eene kuute froynt sin, yemant aan woo te inatiiw traue khan.”
FRAYT IM HIMEL UN FRAYT UF TE EYERT
16. Wii wise mer tas ti engele tuun uns helfe?
16 Fiile speriense tsayche tas ti engele helfe uns ti inatiiwe fine woo wole tsurik tsu Yeehoowa khome. (Apo. 14:6) Tsum payxpiil, Silvio, fon Ekwatoer, hot fer Yeehoowa aan kehal tëm helfe tsurik fer ti kemaynt khome. Wën eyer waar noch am peete, hot eyer tas klinkel keheert. Tswaay elteste waare aan sayn teer. Tii waare froo tas se khonte tëm helfe ti eyerste xrite kepe fer tsurik tsu Yeehoowa khome.
17. Wii xpiire mer uns wën mer ti inatiiwe helfe?
17 Meyer tuun fiil frooheet kriin wën mer helfe tii woo kaystlich xwach sin retuer tsu Yeehoowa khome. Kuk was saat Salvador, een pioneer woo tuut sich fiil aan xtrenge fer ti inatiiwe helfe: “Waare xtune woo es waar xweyer fer mich net fon frooheet prile. Tas frayt mich tas ich hat te priwilëj fer Yeehoowa helfe een fon sayn liipe xoof fon Satanaas sayn welt rete.” (Atos 20:35)
18. Wëns tuu inatiiw pist, was khanst tuu tich sicher sin?
18 Wëns tuu host noo kelos tich mit Yeehoowa sayn folek samele, tuu khanst tich sicher sin tas eyer liipt tich noch. Tee wil tas tuu tsu tëm retuer khomst. Es is woer tas tuu prauchst phaar xrite kepe fer tsurik khome. Awer, soo wii te fater fon Yeesus sayn kexicht, Yeehoowa waart te taach wëns tuu tsurik khomst. Un wëns tuu hëm khomst, eyer tuut tich hërtslich wilkhome.
LIIT 103 Os anciãos são um presente de Jeová
^ parágrafo 5 Yeehoowa tuut fer tii woo hon sich ap kelënkt fon te kemaynt tiise inlaatung mache: “Khomt retuer tsu mich.” Un meyer khene fiil mache fer uf muute tii woo wole tiise inlaatung aan nëme. Tiise xtuutyum tuut tsayche was khene mer mache fer tëne helfe.
^ parágrafo 3 (Lucas 15:8-10) “Orer was fer fraa woo tseen trakme hot, macht net een lamp aan, wën se een trakma ferliirt, un kheert tas haus un tuut mit acht suuche pis tii es fint? 9 Un wën se tii fine tuut, ruuft se sayn froynte un nochpere tsusamer un saat: ‘Frayt aych mit meer, wayl ich hon ti trakme kefun woo ich ferloer hat.’ 10 Ich saan aych tas, kraat soo tuun ti engele sich fraye weeche een sinter woo sich peroyt.”
^ parágrafo 7 Etliche naame waare keënert.
^ parágrafo 8 (Lucas 15:17-24) “Wën tee aan sich kefal is, hot eyer kesaat: ‘Wii fiil aarwayter fon mayn fater khene sich sat fom proot ese, un ich sin too, fon hunger am xterpe! 18 Ich tuun keen, un pis mayn fater reese, un fer tëm saan: “Fater, ich hon keeche te himel un keeche tich kesint. 19 Ich tuun net mee fertiine wii tayne soon kenënt wëre. Tuu mich wii eene fon tayne aarwayter pehantele.’” 20 Soo, is eyer uf kextii un pis sayne fater kang. Wii tee noch wayt wech waar, tëm sayn fater hot iim kesiin un hot mitlayt kexpiirt; tan is eyer kexprung, un hot tëm um kekrif un liiplich kekhus. 21 Te soon hot tan fer tëm kesaat: ‘Fater, ich hon keeche te himel un keeche tich kesint. Ich tuun net mee fertiine wii tayn soon kenënt wëre.’ 22 Awer te fater hot fer sayne sklaawe kesaat: ‘Xnel! Pringt een lang tsaych, ti pest, un tuut tëm mit tëne aan tsiie, un tuut een ring uf sayn finge un santalye aan sayne fiis. 23 Pringt aach eene fet hëmes, xlacht tëm, un wole mer ese un fayre, 24 wayl mayn soon, tee too, waar toot un is noch mool am leepe; tee waar ferloer un is wiiter kefun.’ Un tii hon aan kefang se fayre.
^ parágrafo 14 (Lucas 15:4, 5) “Was fer man tswixich aych woo 100 xeef hot, un woo eens fon tëne ferliirt, tuut net ti anere 99 hiner im tesërt lose, un ti ferloerne suuche, pis wën eyer tas fint? 5 Un, wën eyer tas fint, tuut se uf sayn xuler tuun un sich fraye.
^ parágrafo 15 Etliche inatiiwe khene fiilaycht keholef wëre wën se xtike fon tëm puuch Continue a Amar a Deus xtutiire. Anere khene nutse kriin fon noch mool etliche kapitele fom puuch Achegue-se a Jeová xtutiire. Te Tiinst Komisyoon fon te kemaynt tuut raus suuche was fer puplikatoer kompetent is fer tiise xtuutyum fiire.
^ parágrafo 71 PILTER AUSLEYUNGE: Tray unerxiitliche priiter helfe eene pruuter woo wil retuer khome. Tii tuun soo mache wën tii: net noo lose mit tëm xpreche, tsayche tas Yeehoowa un te kemaynt tëm liipe un tëm mit acht horiche.
