XTUUTYUM ARTIKEL 23
“Tayn naame sol kehaylicht wëre”
“Oo Yeehoowa, tayn naame playpt fer imer.” (SALMO 135:13)
LIIT 10 Loope mer Yeehoowa, unser Kot!
WAS TUUN MER SIIN? *
1-2. Iwer was fer tswaay interesante sache tuun Yeehoowa sayn Tsayer kërn xpreche?
MEYER hon foer uns tswaay wichtiche sache: ti aat wii Yeehoowa rechiirt un ti ferhaylichung fon sayn naame. Wii Yeehoowa sayn Tsayer, meyer tuun kërn iwer tiise tswaay sache xpreche. Tii sin wërklich interesant! Awer, sin tiise tswaay tinge — ti aat wii Yeehoowa rechiirt un ti ferhaylichung fon sayn naame — kans anerste? Nee.
2 Meyer hon xon kelërnt tas Kot sayn naame mus sauwer kemacht wëre fon te liieray. Meyer wise aach tas es mus keproopt wëre tas ti aat wii Yeehoowa rechiirt is ti pest. Tes weeche, tiise tswaay sache sin wërklich wichtich fer uns.
3. Was is tepay in Yeehoowa sayn naame?
3 In woerheet, ti naame Yeehoowa hot se tuun mit ales iwer unser Kot, tepay ti aat wii tee rechiirt. Tan, wën mer saan tas ti haupst sache is Yeehoowa sayn naame fray fon te liieray mache, meyer sin aach am saan tas is neetich proope tas sayn aat fer se rechiire is ti pest. Yeehoowa sayn naame is ticht ferpunt mit te aat wii tee rechiirt als Ale Mechtiche Soweraan. (Kuk te khaste “ Ti sayte fon een wichtich sache”.)
4. Was saat te Salmo 135:13 iwer Kot sayn naame, un was fer frooche wëre in tiise artikel keantwort?
4 Yeehoowa sayn naame is wërklich ekstra. (Lees Salmo 135:13.) * Warom is Kot sayn naame soo wichtich? Wanee hon se te eyerst mool iwer tëm keloo? Wii tuut Kot sayn naame ferhayliche? Un was khene mer mache fer tëm sayn naame xitse? Tas is was mer tuun in tiise artikel lërne.
WAS MACHT EEN NAAME WEYERT HON?
5. Was fer frooch tuun etliche sich mache wën se tenke iwer ti ferhaylichung fon Yeehoowa sayn naame?
5 Yeesus hot taytlich kelos was mus een fon te haupste sache fon unser kepeete sin. Tee hot kesaat: “Tayn naame sol kehaylicht wëre.” (Mat. 6:9) Awer was petayt tas? Tas wort ‘ferhayliche’ petayt etwas hayliche, sauwer orer phuer mache. Awer etliche tuun tan sich frooe: ‘Is net Yeehoowa sayn naame xon haylich, sauwer un phuer?’ Fer tas antworte, mise mer tenke aan ales was mit een naame se tuun hot.
6. Was macht een naame weyert hon?
6 Een naame is mee wii phaar puuchxtaape woo in een papiir sin, orer een wort woo yemant in hart xtim saat. Kuk mool was ti Piipel saat: “Xtats kroose raychtum, suuch eene kuute naame.” (Pro. 22:1; Ecl. 7:1) Warom een naame hot soo fiil weyert? Wayl te naame hot se tuun mit was te anere tenke fon te persoon woo hinich te naame is. Tes weeche, ti aat woo mer een naame xraype orer xpreche, is net tas haupste. Was wërklich wichtich is, is was te mënxe tenke wën se tiise naame siin orer heere.
7. Wii tuun ti layt fersuuche xaat tsu Yeehoowa sayn naame mache?
7 Wën ti mënxe liieray iwer Kot xpreche, tii mache ti layt xlechte tinge iwer tëm tenke. Un wën tii tas mache, tii sin am fersuuche xaat tsu Yeehoowa sayn naame mache. Te eyerst mool woo yemant xlechte tinge iwer Kot sayn naame kexprooch hot, un woo hot kemacht ti anere xlechte tinge iwer tëm tenke, waar in tëm Eetem Kaate. Kuk mool was mer khene too temit lërne.
TI EYERST LII KEECHE YEEHOOWA SAYN NAAME
8. Was wuste Aatam un Ewa, un was fer frooche sin foer khom?
8 Aatam un Ewa wuste Yeehoowa sayn naame un aach wichtiche woerheete iwer tëm, woo tiise naame kenom hot. Tii hon tëm kekhënt wii te Kriatoer, te eene woo hot ales fer tëne kep — tas leepe, tas xeene Paratiis un yemant woo mit tëne kenau kephast hot. (Gên. 1:26-28; 2:18) Awer, teete Aatam un Ewa wayter sayn perfekte ferxtant penutse fer traan tenke aan ales was Yeehoowa fer tëne kemacht hot? Teete se wayter liip un petanklichkheet tsayche fer te Persoon woo tiise naame kenom hot? Ti frooche waare taytlich keantwort wën Kot sayn faynt hot tëne keproopt.
9. Soo wii in Gênesis 2:16, 17 un 3:1-5 xteet, was hot Yeehoowa fer Aatam un Ewa kesaat, un wii hot Satanaas ti woerheet rom ketreet?
9 Lees Gênesis 2:16, 17 * un 3:1-5. * Satanaas hot een xlang penutst un hot fer Ewa kefroot: “Hot Kot wërklich kesaat tas teyer net fon ale oopst peem fom kaate ese thërft?” Tiise frooch hat een kiftich lii hiner traan. Was Kot in woerheet kesaat hot, waar tas tii khonte fon ti kanse peem ese, ploos fon eens net. Ti unerxiitliche sorte friichte woo se hate, waar sicher mechtich kroos. (Gên. 2:9) Yaa, sicher Yeehoowa is krooshërtslich! Soo wii soo, tee hot Aatam un Ewa ferpoot fon te frucht fon een paam ese. Tan, Satanaas sayn frooch hot ti woerheet rom ketreet. Satanaas wolt es aus siin mache tas Kot net krooshërtslich waar. Fiilaycht, hot Ewa ketenkt: ‘Meecht Kot mich etwas kuutes ferxtekele?’
10. Wii hot Satanaas keeche Kot sayn naame kexprooch, un was fer waar te resultaat?
10 Pis aan tiise tsayt, Ewa hot noch Yeehoowa aan keheert. Tii hot soo kaar fer te Taywel keantwort mit te kenaue wërter woo Yeehoowa tëne kexikt hat, un hot noch kesaat tas tii thërfte net aan tas paam traan krayfe. Tii wust tas tiise kepoot net aan heere, teet tsum toot nëme, soo wii Yeehoowa taytlich kelos hat. Awer te Taywel hot kesaat: “Es is sicher tas teyer net xtërpe tuut.” (Gên. 3:2-4) Satanaas sayn lii waar nii mee ferxtekelt. Tee hot aus ferxeemt keeche Kot sayn naame kexprooch. In woerheet, tee hot fer Ewa kesaat tas Yeehoowa een liichner waar. Soo is Satanaas te Taywel kep, orer in anere wërter, een liichner. Ewa waar kans hiner kang — tii hot aan Satanaas keklaapt. (1 Tim. 2:14) Tii hot aan tëm mee fertraut wii aan Yeehoowa. Tas hot te weech uf kemacht fer Ewa ti xlechste ëntxlus woos kept, mache — Yeehoowa net aan heere. Tii hot aan kefang fon tëm frucht ese woo Yeehoowa ferpoot hat. Noo heyer, hot se aach fer Aatam kep un tee hot aach kes. (Gên. 3:6)
11. (a) Was khente Aatam un Ewa mache? (b) Was hon se net kemacht?
11 Hal mool een pisye xtil un tenkt traan aan was Ewa khent fer Satanaas saan. Tenk tas tii teet etwas soo saan: “Ich khëne tich net! Awer ich khëne Yeehoowa, mayn Fater. Ich liipe mayn Kot un traue uf tëm. Ales was ich un Aatam hon, waar Yeehoowa woo uns kept hot. Weer tenkst tuu tas tuu pist fer keeche tëm xpreche? Kee fat!” Wii froo teet Yeehoowa plaype, wën tee tiise leaale wërter fon een liiplich tochter heere teet! (Pro. 27:11) Awer Ewa hot net leaale liip tsu Yeehoowa kehat, un Aatam aach net. Tes weeche, hon se net Yeehoowa sayn naame kexitst keeche tiise liie.
12. (a) Wii hot Satanaas tswayfele in Ewa sayn khop keplantst? (b) Was hon Aatam un Ewa net kemacht?
12 Soo wii mer kesiin hon, tas eyerste tings woo te Taywel kemacht hot, waar tswayfele plantse in Ewa sayn khop, iwer op Yeehoowa eene kuute Fater waar. Tan, Aatam un Ewa hon net Yeehoowa sayn naame kexitst keeche ti xlechte liie fon tëm Taywel. Tas hot te weech uf kemacht fer Satanaas sayn liie aan nëme, un tan, sich mit tëm keeche sayn Fater xtele. Hayt, penutst Satanaas eenliche pleene. Tee tuut wayter liieray iwer Kot sayn naame xpreche. Es is laycht fer tëne woo aan Satanaas sayn liie klaape, net Yeehoowa sayn kerecht rechiirung aan nëme.
YEEHOOWA FERHAYLICHT SAYN NAAME
13. Wii tuut Ezequiel 36:23 ti haupst pexeet fon te Piipel foer pringe?
13 Tuut Yeehoowa tiise liie heere un ruych plaype? Sicher net! Ti kans Piipel xprecht iwer was Yeehoowa is am mache fer sayn naame sauwer mache, fon te liie woo waare im Eetem kexprooch. (Gên. 3:15) In khortse wërter, khene mer ti haupst pexeet fon te Piipel soo pexraype: Yeehoowa ferhaylicht sayn naame torich tas Raych, woo is fon sayn Soon rechiirt, un woo tuut friit un kerechtichkheet fer ti eyert tsurik pringe. Was in te Piipel xteet, heleft uns ferxteen wii Yeehoowa tuut sayn naame ferhayliche. (Lees Ezequiel 36:23.) *
14. Warom khene mer saan tas Yeehoowa hot nii noo kelos xtram xafe fer sayn naame ferhayliche?
14 Satanaas is am mache ales was tee khan fer ti erfiilung fon Yeehoowa sayn propoos xteere. Awer pis hayt, khee eene fon sayn pleene hot pariirt. Tii Piipel tsaycht was Yeehoowa imer macht, un proopt tas nimant soo wii Yeehoowa kepts. Es is wërklich woer tas ti repelyoon fon Satanaas un tii woo tëm xtitse, tuun Yeehoowa aarich traurich lose. (Sal. 78:40) Awer, Yeehoowa tuut mit tiise propleem in een kluuch, ketult un kerechtich aat um keen. Tee tsaycht aach sayne kroose macht in unerxiitliche aate. Un iwer ales, eyer tsaycht liip in ales was tee macht. (1 João 4:8) Sicher, Yeehoowa hot nii noo kelos xtram xafe fer sayn naame ferhayliche.
Satanaas hot fer Ewa iwer Kot keloo, un torich ti yoere, tuut te Taywel wayter keeche Kot xpreche. (Kuk ti apsetse 9, 10 un 15.) *
15. Wii tuut Satanaas hayt keeche Kot sayn naame xpreche, un was is te resultaat?
15 Hayt, Satanaas tuut noch liie iwer Kot sayn naame xpreche. Tee tuut ti layt hiner keen, tas se tswayfele tas Kot wërklich mechtich, kerecht, kluuch un liiplich is. Tsum payxpiil, Satanaas fersuucht ti layt rom paple tas se tenke tas Yeehoowa net te Kriatoer is. Un soo kaar wën ti layt klaape tas een Kot kept, Satanaas xtrengt sich aan fer se mache tas tii tenke tas Kot un was Kot saat richtich is, tsu xtram orer unkerecht is. Tee tuut soo kaar ti layt in lërne tas Yeehoowa een khalt un krop Kot is, woo prënt ti layt in een fayer hël. Un wën se aan tiise liie klaape, te weech keet uf fer te neekste xrit kepe — Yeehoowa sayn kerecht rechiirung net aan nëme. Pis Yeehoowa tee fernicht, tuut Satanaas wayter liie iwer Kot sayn naame xpreche. Un tee tuut tich aach fersuuche fer tëm sayn sayt hoole. Meecht eyer es kemacht kriin?
TAYN TEEL IN KOT SAYN NAAME FERHAYLICHE
16. Was khanst tuu mache woo Aatam un Ewa net kemacht hon?
16 Yeehoowa erlaupt tas imperfëkte mënxe een teel hon in tëm sayn naame ferhayliche. In woerheet, tuu khanst mache was Aatam un Ewa net kemacht hon. Opwool meyer leepe in een welt fol mit layt woo tuun iwer Yeehoowa sayn naame liie un tëm ferfluuche, tuu host te keleechenheet fer Kot sayn naame xtitse un ti woerheet saan — tas Yeehoowa haylich, kerecht, kuut un liiplich is. (Isa. 29:23) Tuu khanst tsayche tas tuu tëm sayn rechiirung xtitst. Tuu khanst helfe ti layt ferxteen tas ploos ti aat wii Yeehoowa rechiirt kerecht is, un tas ploos tee tuut friit un frooheet fer al pringe. (Sal. 37:9, 37; 146:5, 6, 10)
17. Wii hot Yeesus te naame fon sayn Fater pekhant kemacht?
17 Wën mer Yeehoowa sayn naame xitse, mer mache tas selwiche wii Yeesus. (João 17:26) Yeesus hot te naame fon sayn Fater pekhant kemacht. Tee hot net ploos Kot sayn naame penutst, awer aach ti layt in kelërnt wii Yeehoowa wërklich is. Tsum payxpiil, ti fariseer hon aus kesiin kemacht tas Yeehoowa waar krop, wayt, oone mitlayt un teet tsu fiil fon te anere ferlange. Yeesus, im keeche teel, hot ti layt keholef siin tas sayn Fater waar aanmeesich, ketultich, liiplich un fërtich fer se fertsaye. Tee hot aach ti kwaliteete fon sayn Fater kans kenau noo kemacht. Torich tas, khente ti layt ferxteen wii Yeehoowa wërklich is. (João 14:9)
18. Wii khene mer proope tas ti xlechte tinge woo ti keechner iwer Yeehoowa saan, net woer sin?
18 Soo wii Yeesus, meyer khene fer ti layt saan was mer iwer Yeehoowa wise, un tii in lërne tas Yeehoowa een liiplich un kuute Kot is. Wën mer tas mache, mer proope tas ti xlechte tinge woo ti keechner iwer Yeehoowa saan, net woer sin. Meyer ferhayliche Yeehoowa sayn naame un mache tas ti layt tee wii hayliche siin tuun. Meyer khene aach Yeehoowa noo mache. Tas is meechlich opwool mer imperfëkt sin. (Efé. 5:1, 2) Wën unser wërter un aanxtelung tsayche fer ti layt wii Yeehoowa wërklich is, mer helfe tëm sayn naame ferhayliche. Wën mer ti layt helfe ti woerheet iwer Yeehoowa khëne, un soo sich fray fon ti ferkheerte inlërnunge mache, meyer tuun Yeehoowa sayn naame ferhayliche. Meyer tuun aach proope tas imperfëkte mënxe troye tsu Yeehoowa plaype khene. (Jó 27:5)
Meyer wole unser Piipel xtutënte helfe ferxteen wii liiplich un kuut Yeehoowa is. (Kuk ti apsetse 18 un 19.) *
19. Wii heleft Isaías 63:7 uns siin was sol te haupste opjetiiw fon unser inlërnung sin?
19 Es kept etwas aneres woo mer khene mache fer Yeehoowa sayn naame ferhayliche. In ti meyerste tsayt, wën mer ti Piipel fer ti anere in lërne tuun, meyer tuun foer pringe tas Yeehoowa hot te recht fer tas Uniwërsum rechiire. Un tas is wërklich woer! Awer, opwool es wichtich is Kot sayn kesetse in lërne, unser haupste opjetiiw is ti layt helfe unser Fater Yeehoowa liipe un leaal tsu tëm sin. Tes weeche, mer mise imer ti xeene kwaliteete fon Yeehoowa foer pringe, un tsayche was fer sort Persoon hinich te naame Yeehoowa is. (Lees Isaías 63:7.) * Wën mer soo in lërne, tuun mer ti anere helfe Yeehoowa liipe un tëm aan heere, wayl tii wole leaal tsu tëm sin.
20. Was fer frooch tuut te neekste artikel antworte?
20 Noo tas mer kexprooch hon iwer was is tepay aan ti ferhaylichung fon Yeehoowa sayn naame, ti frooch yets is: Wii khene mer sicher sin tas unser aanxtelung un unser inlërnung eere tsu Yeehoowa sayn naame pringe un mee layt tsu tëm tsiie? Te neekste artikel tuut tas antworte.
LIIT 2 Sayn naame is Yeehoowa
^ parágrafo 5 Was fer wichtich sache is foer al ti mënxe un engele? Warom is tiise sache soo wichtich, un was is unser teel aan tëm? Ti antworte fer tiise un anere frooche ferxteen, tuut uns helfe unser froyntxaft mit Yeehoowa ferxtërke.
^ parágrafo 4 (Salmo 135:13) Oo Yeehoowa, tayn naame playpt fer imer. Oo Yeehoowa, tayn naame playpt torich al ti xeneratsyoone.
^ parágrafo 9 (Gênesis 2:16, 17) Yeehoowa Kot hot tëm man aach tas kepoot kep: “Fon yeete paam im kaate khanst tuu ese soo fiil wiis tuu wilst. 17 Awer, fom paam fon te khëntnis fom kuute un fom xlechte, thërfst tuu net ese, wayl aan tëm taach woos tuu fom tëm est, tuust tuu sicher xtërpe.”
^ parágrafo 9 (Gênesis 3:1-5) Ti xlang waar tas foersichtiste fon tëm kanse fii woo Yeehoowa Kot kemacht hot. Soo, hot se fer ti fraa kesaat: “Hot Kot wërklich kesaat tas teyer net fon ale oopst peem fom kaate ese thërft?” 2 Too hot ti fraa fer ti xlang kesaat: “Meyer khene fon te oopst peem woo im kaate sin, ese. 3 Awer, iwer ti frucht fom paam woo in te mite fom kaate is, too hot Kot kesaat: ‘Tuut net fon tëm ese, nee, un tuut aach net aan tëm traan krayfe, tas teyer net xtërpe tuut.’” 4 Too, hot ti xlang fer ti fraa kesaat: “Es is sicher tas teyer net xtërpe tuut. 5 Wayl Kot wees tas am selwiche taach woo teyer fon tëm est, tuun ayre aue uf keen un teyer wërt wii Kot, un teyer tuut tan wise was kuut un was xlecht is.”
^ parágrafo 13 (Ezequiel 36:23) ‘Sicher tuun ich mayn kroose naame ferhayliche, woo waar unich ti natsyoone mit khee respëkt pehantelt, woo teyer mit khee respëkt unich tëne pehantelt hot; un ti natsyoone mise es tsum wise kriin tas ich sin Yeehoowa’, saat te Soweraan Hër Yeehoowa, ‘wën ich, unich aych, foer tëne sayn aue kehaylicht wëre.
^ parágrafo 19 (Isaías 63:7) Ich tuun Yeehoowa sayn aktsyoone fon leaale liip pekhant mache, Yeehoowa sayn aktsyoone woo loop fertiine, weeche ales woo Yeehoowa fer uns kemacht hot, ti fiile kuute tinge woo eyer fer Israël sayn haus kemacht hot, tëm noo sayn parmhërtslichkheet un sayn kroose leaale liip.
^ parágrafo 66 PILTER AUSLEYUNGE: Te Taywel hot keeche Kot kexprooch wën tee fer Ewa kesaat tas Kot een liichner waar. Torich ti yoere, Satanaas hot falxe itee ferprayt, wii ti inlërnung tas Kot krop is un tas Tee hot net ti mënxe kemacht.
^ parágrafo 68 PILTER AUSLEYUNGE: Wii eene pruuter een Piipel xtuutyum fiirt, tuut tee Yeehoowa sayn kwaliteete foer pringe.
