MEYER al klaape tas, torich tiise “letste taache”, Yeehoowa tuut sayn folek in een kaystlich aat fiire un unerxtitse. (2 Tim. 3:1) Awer, meyer prayche unser teel mache — Yeehoowa aan heere. Unser situatsyoon is wii fon te israelite sayns, wën tii aan te tesërt waare. Tii miste ti trompeete sayn ruufe aan heere.

Yeehoowa hot Mooses kexikt tswaay trompeete mache; tii solte fon silper sin, woo waar mit hamer keklopt. Tii waare penutst fer ‘tas folek samele un fer te akampament samer rafe’. (Núm. 10:2) Ti priister solte ti trompeete in unerxiitliche aate ploose fer tsayche was tas folek mache solte. (Núm. 10:3-8) Hayt, tuut Yeehoowa sayn folek orientiirunge in unerxiitliche aate kriin. Kuk mool 3 fon tiise aate, woo uns erinere fon te friiriche trompeete ruufe: (1) wën mer in kelaat wëre fer kroose fersamlunge, (2) wën ti elteste iipung kriin un (3) wën ti orientiirunge fer al ti kemaynte wëre keënert.

Im tesërt, ti israelite xtame hon sayn akampament rom te tapernakel uf kexpant, un waare in fier krupe keteelt. Als mool, Yeehoowa hot kexikt tas ‘tas kans folek’ sich foer tëm lëst sayt fom tapernakel samele solt. (Núm. 10:3) Fer ti xtame ruufe, ti priister solte ti tswaay trompeete ploose. Ti kanse israelite khonte te ruuf heere. Tii woo tichter fon tiise sayt fom tapernakel kewoont hon, khonte in minute khome. Tii woo een pisye wayter kewoont hon, fiilaycht prauchte mee tsayt un aanxtrengung fer pis tat hin khome. Ekaal ti situatsyoon, Yeehoowa wolt tas al sich samele teet un sayn orientiirunge heere teet.

Hayt, meyer tuun uns net foer een tapernakel samele, awer meyer sin in kelaat fer mit Kot sayn folek uns samele. Too tepay sin ti rechionaale konkrëse un anere ekstra ewënte, woo mer wichtiche informatsyoone un orientiirunge kriin. Uf te kans welt, tuut Yeehoowa sayn folek tas selwich prokram kuke. Tes weeche, al tii woo ti inlaatung fer tiise fersamlunge aan nëme, sin teel fon een kroos un froo krup. Etliche mise wayter wii ti anere reese. Awer, al woo tsu tiise fersamlunge keen, xtime in saan tas te aanxtrengung loont sich.

Un ti krupe woo kans wayt sin fon tiise kroose fersamlunge? Khene tii aach nutse kriin? Weeche ti naye teknoloxii, fiile fon tëne khene aach nutse fon tëm selwich prokram kriin un soo kaar sich xpiire wii wën se tat weyere. Tsum payxpiil, een representant fom haupst sets hot te filiaal in Peniin pesuucht. Eene krup in Arlit, een xtat fon Niker woo is in te mite fon tëm Sahara Tesërt, khont tas prokram kuke in te selwich tsayt wii ti priiter in Peniin. In tiise krup waare 21 persoone,  tepay priiter, xwestere un layt woo sich interesiirt hate. Opwool tii waare kans wayt, tii hon sich eenich kexpiirt mit te 44.131 woo hate sich fersamelt in tiise kroos ewënt. Eene pruuter hot kexrip: “Tanke xeen, fon unser kans hërts, tas mer khonte tiise prokram kuke. Tas hot uns noch mool ketsaycht wii fiil teyer uns liipt.”

Wën ti israelite priister hon ploos een trompeet keploos, ‘noore ti hëre, ti khep fon te tausente’ miste pis aan te tapernakel keen. (Núm. 10:4) Tat, hon se orientiirunge un iipung fon Mooses kriit. Tas teet tëne helfe sayn flichte in sayn xtame uf phase. Wëns tuu eene fon tiise fiirer weyerst, teest tuu net tayn pestes mache fer tat sin un nutse kriin?

Hayt, ti elteste in te kemaynt sin net ‘hëre’ un tuun net hërxe iwer Kot sayn xeef, woo unich sayn hënt is. (1 Ped. 5:1-3) Awer sicher, tuun se sayn pestes mache fer tas trop uf phase. Tes weeche, wën tii sin in kelaat fer mee iipung kriin, wii te Raych Tiinst Xuul, tuun se klaych antworte. In tiise keleechenheete, ti elteste lërne wii te kemaynt peser uf phase. Te resultaat is tas al tuun sich tichter pay Yeehoowa xafe. Soo kaar wëns tuu waarst net inkelaat fer tiise xuule, tuust tuu tsiimlich sicher nutse kriin weeche tëne woo hon tas kemacht.

Als mool, ti israelite priister hon ti trompeete in een kexaltiche aat keploos. Tas hot petayt tas Yeehoowa wolt tas te kans akampament sich wanere teet. (Núm. 10:5, 6) Wën ti israelite hon te akampament samer keraft, tii hon tas in ortnung kemacht. Awer, tas hot fiil aanxtrengung fon al ferlangt. Khan sin tas etliche israelite, manich mool, waare net soo kraat wilich fer sich wanere. Warom?

Fiilaycht, etliche hon kemënt tas ti ruufe fer sich wanere, hon tsu eftas khom orer waare tsu unkewaartne. Als mool, hot te wolk ploos fom oomts pis moynts keplip. Anere mools, es hot tswaay taache, een moonat orer lënger ketauert fer sich noch mool wanere. (Núm. 9:21, 22) Un wii fiil mools hon se te akampament kewanert? Números, kapitel 33, xprecht iwer 40 pletse woo ti israelite hon keplip.

Ti israelite, als mool, hon een plats unich xate kefun. Sicher, es waar mechtich kuut in een xate plaype, kraat in mite fon een ‘kroos un xrekliche tesërt’. (Deut. 1:19) Tas khont een fersuuchung sin, wayl ti israelite khente tenke tas sich wanere, teet se tsu een xlechter plats nëme.

Wën te akampament hot aan kefang sich wanere, es waar fiilaycht xweyer fer welche sayn mool in te ray waarte. Al hon keheert tas trompeet kexaltich ploose, awer net al khonte aan te selwich tsayt sich wanere. In tëm eyerste kexaltich ploos, ti xtame woo waare in te lëst sayt fom akampament — Yuuta, Isakaar un Sepuloon — teete sich wanere. (Núm. 2:3-7; 10:5, 6) Noo tas tii hon sich kewanert, ti priister hon te trompeet in een kexaltich aat een tsweete mool keploos. Tas hot ketsaycht tas ti tray xtame woo in te siit waare, solte sich wanere. Ti priister hon tas wayter kemacht pis te kans akampament sich kewanert hat.

Fiilaycht, waar es xweyer fer tich etliche enerunge in te orkanisatsyoon aan nëme. Im xtant, host tuu kemënt tas es waare tsu fiil unkewaartne ënerunge. Orer fiilaycht, host tuu kërn kehat wii ti tinge foer heyer waare, un wolt net tas tii sich ënere teete. Khan sin tas es xweyer waar ketultich sin, pis tuu tich mit ti ënerunge traan keweene host. Toch noch, wën mer uns aan xtrenge fer se mache was mer wise richtich is, tuun mer woerxaynlich siin tas Yeehoowa uns am seechne is.

In Mooses sayn taache, hot Yeehoowa milyoone mëne, fraae un khiner torich te tesërt kefiirt. Ti israelite khente net iwerleepe oone Yeehoowa sayn unerxtitsung un orientiirung. Hayt, Yeehoowa tuut uns fiire torich tiise kefeerliche letste taache. Ploos mit tëm sayn hilef, khene mer in kaystlich aat iwerleepe un forem keen. Tes weeche, soo wii ti israelite, sole mer pextimt sin fer klaych aan heere ti unerxiitliche ruufe fon te trompeete!