1. Was hot Yeehoowa fer yeete eene fon uns kemacht?

YEEHOOWA hot yeete eene fon uns tsu tëm ketsoo. (Yoo. 6:44) Tenk mool een pisye noo aan was tas wil saan. Yeehoowa hot pilyoone hërtse noo kekukt, awer aan tich hot eyer was ekstras kefun: een eerlich hërts woo tëm liipe wolt. (1 Kro. 28:9) Yeehoowa khënt tich, ferxteet tich un liipt tich. Tas tuut sicher yeete eene fon uns uf muute.

2. Wii hot Yeesus uns keholef ferxteen wii fiil Yeehoowa sich mit yeete eene fon uns khimert?

² Yeehoowa khimert sich fiil mit tich un aach mit al tayn priiter un xwestere. Fer uns helfe tas ferxteen, hot Yeesus Yeehoowa mit een xeefer ferklaycht. Wën tswixich 100 xeef, 1 sich ferliire tuut, was macht te xeefer? Tee lost ti ‘99 ufm përich un keet suuche tas woo sich ferloer hot’. Wën eyer tas xoof fint woo sich ferloer hot, wërt eyer net pees mit tëm, awer eyer tuut sich fraye. Was lërne mer too temit? Tas yeete xoof wichtich fer Yeehoowa is. Tas is wii Yeesus kesaat hot: “Mayn Fater, woo im himel is, wil net hon tas soo kaar eene fon tiise kleene ferliirt sich.” (Mat. 18:12-14)

3. Iwer was tuun mer in tiise artikel xpreche?

³ Sicher, meyer wole khee eene fon unser priiter un xwestere oone muut lose. Awer, wii khene mer tas hin kriin? Un was khene mer mache wën yemant uns wee macht? Es is kraat tas was mer in tiise artikel lërne tuun. Awer eyerst, wole mer een pisye xpreche iwer weer sin “tiise kleene” woo in Matheus kapitel 18 foer khome.

4. Weer sin “tiise kleene”?

⁴ “Tiise kleene” sin ti kanse tisipele fon Yeesus, een tuun wii alt se sin. Tii sin al wii “khinerche” wayl se wilich sin fer fon Yeesus lërne. (Mat. 18:3) Tii hon unerxiitliche personaliteete  un khome fon unerxiitliche pletse un kulture, awer tii al klaape aan Kristus. Un Yeesus liipt se aarich fiil. (Mat. 18:6; Yoo. 1:12)

5. Wii fint Yeehoowa sich wën yemant eene fon Tëm sayn tiiner wee orer xtolpere macht?

⁵ “Tiise kleene” al hon fiil weyert foer Yeehoowa. Fer se ferxteen was Yeehoowa xpiirt, wole mer een pisye noo tenke iwer was meyer iwer ti khiner mëne. Tii hon fiil weyert fer uns. Meyer wole tëne xitse wayl es feelt tëne ti kluucheet, ti kraft un ti speryens fon te folyëriche layt. Tsum payxpiil: wën een persoon yemant wee macht, tas lost uns traurich; awer wën een persoon een khint wee macht, tas lost uns wuutich. In te selwich aat, wil Yeehoowa uns xitse. Tee wërt traurich — orer soo kaar wuutich — wën yemant eene fon Tëm sayn tiiner wee orer xtolpere macht. (Isa. 63:9; Mar. 9:42)

6. Tëm noo 1^te Korinter 1:26-29, wii tuut ti welt Yeesus sayn tisipele siin?

⁶ Weeche was noch sin Yeesus sayn tisipele wii “kleene” kenënt? Tenk mool: weer is wichtich foer ti welt? Tii woo raych, pekhant un xtark sin. Awer ti meyerste fon Yeesus sayn tisipele sin net soo. Tan, foer ti welt sin se kleen un hon se weenich weyert. (Lees 1^te Korinter 1:26-29.) * Awer ti aat wii Yeehoowa tëne siit is kans anerste.

7. Was wil Yeehoowa hon tas mer iwer unser priiter un xwestere xpiire?

⁷ Yeehoowa liipt sayn tiiner al, ekaal ep se xon een lang tsayt in te woerheet sin orer se khërtslich aan kefang hon tëm tiine. Unser priiter al sin wichtich fer Yeehoowa; tan, mise tii wichtich fer uns aach sin. Meyer wole “ti kans pruuterxaft” liipe, net ploos etliche fon tëne. (1 Phe. 2:17) Meyer mise wilich sin fer se mache ales was mer khene fer tëne uf phase un xitse. Awer wën mer tsu wise kriin tas mer yemant pelayticht orer wee kemacht hon? Meyer sole uns net aan xtele wii wën niks pasiirt weyer orer tenke tas ti persoon mus uns fertsaye un tas ales ferkese. Toch, warom tuun welche sich pelaytiche? Im xtant weeche ti aat wii se ketsoo kep sin, etliche mëne tas se weenicher wii ti anere sin. Tes weeche, tuun tii sich fiil ketanke mache mit was ti anere iwer tëne saan orer mëne. Noch anere sin nay in te woerheet; fiilaycht hon se noch net kelërnt tas tii mise ti anere fertsaye wën se een feele mache. Ekaal ti situatsyoon, mer sole uns aan xtrenge fer ti tinge in te ray tuun. Un aach: wën een persoon sich laycht pelaytiche tuut, mus tii sich aan xtrenge fer tas ënere. Tan, tuut se frooheet xpiire un een kuut froyntxaft mit sayn priiter hon.

8. Was fer aanxtelung hot Yeesus sayn tisipele petrof?

⁸ Warom hot Yeesus aan kefang se xpreche iwer “tiise kleene”? Sayn tisipele hon tëm kefroot kehat: “Weer is te kreeste im Raych fom himel?” (Mat. 18:1) In tiise tsayt, wolte fiile yuuter hon tas ti anere tëne wii wichtich aan siin teete. Een leerer hot kesaat: “Tas haupste in tëne sayn leepe waar eer fon te anere kriin un pekhant sin.”

9. Was miste Yeesus sayn tisipele mache?

⁹ Weeche sayn kultuer, wolte etliche yuuter peser wii ti anere sin. Tan Yeesus wust tas sayn tisipele miste xtram xafe fer ti aat wii se ketenkt hon ënere. Tee hot tëne kesaat: “Te kreeste tswixich aych sol wii te yiingste sin, un tee woo fiirt, wii tee woo tiint.” (Luk. 22:26)  Wii khene mer uns wii “te yiingste” aan xtele? Meyer mise ti anere kreeser wii uns siin. (Fili. 2:3) Wën mer tas mache, tuun mer tsiimlich sicher nimant wee mache.

10. Was fer aanreet fon Phaul sole mer aan wëne?

¹⁰ Unser priiter al sin peser wii uns in etwas. Tas is laycht se mërke wën mer uns aan tëne sayn xeene kwaliteete traan hale. Etwas woo uns helfe tuut is in fiire te aanreet woo Phaul fer ti korinter kep hot: “Was macht tas tuu peser wii ti anere wërst? In woerheet, was host tuu woos tuu net kriit host? Tan, wëns tuu ales kriit host, warom proost tuu tich wii wëns tuu es net kriit hëst?” (1 Kor. 4:7) Kans taytlich, kël? Meyer sole net tenke tas mer peser wii ti anere sin orer tas mer fertiine loop kriin. Tsum payxpiil: was sol een pruuter mache wën eyer kuute reete hale khan? Orer was sol een xwester mache wëns fer tii laycht is Piipel xtuutye aan fange? Tii sole eer fer Yeehoowa kepe weeche ales was se mache khene.

11. Was wolt Yeesus uns lërne mit tëm kexicht fom kheenich un sayn sklaaw?

¹¹ Klaych noo Yeesus kesaat hot fer net ti anere xtolpere mache, hot eyer tas kexicht fon een kheenich un sayn sklaaw fertseelt. Te kheenich hot een kroos xulte fertsayt, woo te sklaaw nii mools petsaale khent. Xpeeter, wolt tiise sklaaw net een aner sklaaw fertsaye woo een kans kleen xulte mit tëm hat. Tsum xlus, hot te kheenich te xlechte sklaaw in te katee kexmis. Was lërne mer too temit? Yeesus hot kesaat: “Kraat soo tuut mayn Fater im himel aych pehantele, wën teyer net ayre priiter fom hërts aus fertsaye tuut.” (Mat. 18:21-35)

12. Wën mer yemant net fertsaye, wii khan tas ti anere wee mache?

¹² Was te sklaaw kemacht hot, hot net ploos tëm wee kemacht, awer aach ti anere. Wii soo? Eyerst: tee waar krop mit te aner sklaaw, un hot “tëm in te katee kexmis, pis tas eyer sayn xulte petsaale teet”. Tsweet: tee hot ti anere sklaawe, woo kesiin hon was pasiirt is, oone muut kelos. Wii tii tas kesiin hon, “sin se aarich traurich kep”. Tas kilt fer uns aach: unser aktsyoone petrefe ti anere. Tsum payxpiil: was khent pasiire wën mer yemant woo uns xlecht pehantelt hot, net fertsaye teete? Eyerst: mer teete tëm wee mache wayl mer tëm net fertsaye wole un fiilaycht wayl mer tëm uf sayt lose un khee liip mee tsu tëm tsayche. Tsweet: wën ti priiter mërke teete tas es khee friit tswixich uns kept, teete se sich net kuut fine.

13. Was lërnst tuu fon te speryens fon een pyoneerin?

¹³ Wën mer ti priiter un xwestere fertsaye, xpiire mer uns peser un helfe mer aach ti anere sich kuut fine. Tas is was een pyoneerin mit kemacht hot, woo mer Crystal nëne tuun. Een xwester in te kemaynt hot se pelayticht. Crystal erinert sich: “Als mool, sayn wërter waare soo krop tas es waar wii wën se mich am xteche weyer. Ich wolt soo kaar net mit tëne in te preetich aarwayt xafe. Too, hon ich aan kefang mayn frooheet un mayn wunx fer se preetiche ferliire.” Crystal hot kemënt tas se een kuut uersach hat fer sich ëriche, awer tii is net pees mit te xwester wayter keplip. Tii hot sich aach net ploos aan sich selepst un sayn xpiirunge traan kehal. Xtats tas, waar se teemuutich un hot in kefiirt te piiplix aanreet fom artikel “Perdoe de coração”, in A Sentinela 15^te Oktooper fon 1999. Tii hot sayn xwester fertsayt. Crystal saat: “Noo tas, hon ich mich wërklich laychter kexpiirt. Yets, ferxteen ich tas meyer al sin uns am aan xtrenge fer ënerunge mache un tas Yeehoowa fërtich is fer uns yeete taach fertsaye. Yets, xpiire ich noch mool frooheet.”

14. (a) Tëm noo Matheus 18:21, 22, was fer propleem khan Pheeter kehat hon? (b) Was khan uns helfe wën mer een eenlich situatsyoon mit mache?

 ¹⁴ Meyer wise tas mer fertsaye sole — tas is tas richtiches fer se mache. Awer manich mool is tas net soo laycht, kël? Es siit aus tas te aphostel Pheeter khent sich als mool kraat soo kexpiirt hon. (Lees Matheus 18:21, 22.) * Awer tan, was khan uns helfe? Eyerst: tenk aan wii fiil mools hot Yeehoowa tich xon fertsayt. (Mat. 18:32, 33) Meyer fertiine es net, awer eyer tuut uns krooshërtslich fertsaye. (Psal. 103:8-10) In te selwich tsayt, “hon mer aach ti flicht fer eene te anere liipe”. Tan, fertsaye is net etwas woo mer raus suuche khene se mache orer net — tas is een xulte woo mer mit unser priiter hon. (1 Yo. 4:11) Tsweet: tenk aan te kuute resultaate woo khome khene wën mer fertsaye tuun. Im xtant, helfe mer ti persoon woo uns pelayticht hot; awer mer tuun aach ti kemaynt fereeniche, unser froyntxaft mit Yeehoowa xitse un uns laychter xpiire. (2 Kor. 2:7; Kol. 3:14) Un triit: peet tsu Yeehoowa — tee woo ferlangt tas mer fertsaye sole. Meyer mise Yeehoowa sayn hilef hon fer te friit in te kemaynt hale. Tan, los net tas Satanaas tayn froyntxaft mit tayn priiter un xwestere fersaut. (Ëfe. 4:26, 27)

15. Tëm noo Koloser 3:13, was khene mer mache wën een pruuter orer xwester uns pelayticht hot?

¹⁵ Awer, was solst tuu mache wën een pruuter orer xwester tich pelayticht hot? Xtreng tich aan fer te friit hale. Saa fer Yeehoowa wiis tuu tich xpiire tuust. Ferlang tëm fer ti persoon helfe woo tich pelayticht hot. Un ferlang tëm sayn hilef fer ti xeene kwaliteete fon te persoon siin — ti kwaliteete woo  Yeehoowa aan tiise persoon liipt. (Luk. 6:28) Wëns tuu net ferkese khanst was ti persoon tich kemacht hot, pleen aan te pest aat wiis tuu khenst mit te persoon fertseele keen. Tuu nii tenke tas se wolt ferkërn tayn xpiirunge wee mache. (Mat. 5:23, 24; 1 Kor. 13:7) Wëns tuu mit te persoon fertseele tuust, trau tas se te richtich muut hot. Awer, un wën tayn pruuter wil net friit mache, was khanst tuu mache? Tuu tëm wayter “aus hale” un say wayter ketultich mit tëm. (Lees Koloser 3:13.) * Un tas haupste: playp net wayter pees mit tëm. Wën net, khenst tuu tayn froyntxaft mit Yeehoowa fersaue. In anere wërter: los niks tich xtolpere mache; soo, pewayst tuu tas tuu Yeehoowa mee wii ales liipst. (Psal. 119:165)

16. Was fer flicht hot yeete eene fon uns?

¹⁶ Tas is een kroos eer Yeehoowa mit unser priiter un xwestere tiine ‘wii ploos een trop, mit ploos een xeefer’. (Yoo. 10:16) Tas puuch Organizados para Fazer a Vontade de Jeová saat in te sayt 165: “Pist tuu froo weeche ti eenichkheet woos kept? Tan, mach tayn teel fer tii hale.” Tes weeche, prayche mer “lërne unser priiter un xwestere siin wii Yeehoowa tëne siit”. Wii soo? Fer Yeehoowa, meyer al — ti “kleene” — hon fiil weyert. Tuust tuu tayn priiter un xwestere soo siin? Say tich sicher: Yeehoowa mërkt un kept fiil weyert fer ales was tuu machst fer tëne helfe un uf phase. (Mat. 10:42)

17. Was wole mer mache?

¹⁷ Meyer liipe unser priiter un xwestere. Tes weeche, sin mer ‘pextimt fer kheen xtolpere xteen orer etwas woo khent eene fale mache foer tëne tuun’. (Rom. 14:13) Meyer tuun unser priiter un xwestere kreeser wii uns aan siin, un meyer fertsaye tëne fom hërts aus. Meyer wole aach net xtolpere weeche was ti anere mache. Xtats tas, “wole mer ales was meechlich is mache fer te friit suuche un fer uns naner uf muute”. (Rom. 14:19)