1. Warom khene mer Satanaas mit een yachter ferklayche?

EEN yachter hot een eensiche opjetiiw — tas tier fange un um pringe. Fer tas hin kriin fiilaycht penutst eyer fiile fale. Soo kaar eene fon Yoop sayn falxe froynte hot fon tas kexproch. (Yoop 18:8-10) Was macht een yachter fer een tier lokre? Tee tuut tëm peopachte: Woo keet eyer hin? Was tuut tëm interesiire? Was is ti pest fal fer tëm fange? Satanaas is kraat soo wii tiise yachter. Tee xtutiirt uns un mërkt woo mer hin keen un was uns interesiirt. Tan xtelt eyer een fal uf woo eyer mënt uns fange khent wën mer es net waarte tuun. Awer ti Piipel kept uns een sicherheet: wën mer kefang sin, khene mer aus rayse. Tii tuut aach uns lërne wii wayt wech fon tiise fale plaype.

2. Was sin tswaay fon Satanaas sayn peste fale?

² Tswaay fon Satanaas sayn peste fale sin te hoochmuut un ti kiirichkheet. * Satanaas penutst tii xon tausente yoore un tii pariire kuut. Tee is wii een man woo feechel yacht: tee lokert ti feechle tsu te fal orer fangt se mit een nets. (Psal. 91:3) Awer meyer prayche net tat rin fale. Warom net? Wayl Yeehoowa hot xon ketsaycht was fer fale Satanaas penutst. (2 Kor. 2:11)

3. Warom hot Yeehoowa payxpiile in te Piipel kelos fon layt woo hoochmuut un kiirichkheet ketsaycht hon?

³ Yeehoowa tuut uns in lërne wii kefeerlich te hoochmuut un ti kiirichkheet sin. Wii? Tee saat uns was mit etliche fon tëm sayn tiiner pasiirt is un soo lërne mer wii net ti selwiche feeler mache. Mërk aan te payxpiile woo mer siin tuun, tas Satanaas khont soo kaar layt fange woo Yeehoowa xon lang tsayt ketiint hon. Wil tas saan tas es unmeechlich is sich wech hale fon Satanaas sayn fale? Kewis net! Yeehoowa hot tiise payxpiile in te Piipel kelos “wii een aanreet fer uns”. (1 Kor. 10:11) Tee wees  tas mer khene fon te payxpiile lërne un soo uns wech hale orer aus rayse fon Satanaas sayn fale.

4. Was khan mit uns pasiire wën mer hoochmuutich wëre?

⁴ Satanaas wil hon tas mer hoochmuutich wëre. Tee wees tas wën mer hoochmuutich sin, wëre mer soo wii tee un ferliire mer tas eewiches leepe. (Xpr. 16:18) Tes weeche, hot te aphostel Phaul kesaat tas yemant khent ‘hoochmuutich wëre un soo ti selwich xtroof fom Taywel kriin’. (1 Tim. 3:6, 7) Tas khent soo kaar mit uns pasiire, ekaal op mer xon lang tsayt Yeehoowa tiine orer mer khërtslich aan kefang hon.

5. Tëm noo Eklesyastes 7:16, 20, wii khan yemant tsayche tas eyer hoochmuutich is?

⁵ Hoochmuutiche layt sin aach ekoystix. Un es is kraat tas was Satanaas wil hon: tas mer mee aan uns selepst tenke wii aan Yeehoowa, hauptseechlich wën mer een propleem mit mache. Tsum payxpiil: Hot yemant tich xon falx akusiirt? Orer pist tuu xlecht pehantelt kep? Satanaas hët kërn tas tuu pees mit Yeehoowa orer mit tayn priiter kepe teest. Satanaas wil hon tas mer tenke tas fer ti propleeme resolwiire, mise mer tas in unser aat mache xtats Yeehoowa sayn oryentiirung woo in te Piipel xteet noo keen. (Lees Eklesyastes 7:16, * 20. *)

6. Was lërnst tuu fon te speryens fon te xwester woo in Holant leept?

⁶ Kuk mool ti speryens fon een xwester woo in Holant leept. Tii is pees kep mit te anere sayn feeler un hot ketenkt tas se khent tas net aus hale. Tii saat: “Ich hon mich aleen kexpiirt un ketenkt tas ich khent se net fertsaye. Ich hon fer mayn man kesaat tas mer miste uns tsu een anere kemaynt wanere.” Un too hot se te JW Broadcasting^® fon Mërts fon 2016 kekukt. Tas prokram hot etliche itee kep iwer wii mit te feeler fon te anere um keen. Ti xwester saat:  “Ich hon kesiin tas ich mist teemuutich sin un tsu mayn aychne feeler kuke xtats ti priiter un ti xwestere fon te kemaynt ënere. Tas prokram hot mich erinert tas mer mise uns aan Yeehoowa traan hale un tas eyer tas recht hot fer se saan was mer mache sole.” Was lërne mer too temit? Wëns tuu een propleem mit machst, hal tich wayter aan Yeehoowa traan. Ferlang Yeehoowa sayn hilef fer ti anere siin wii eyer se siit. Unser Fater im himel mërkt tëne sayn feeler, awer tee is wilich fer tëne se fertsaye. Un tee wil hon tas mer tas selwiche mache. (1 Yo. 4:20)

7. Was is mim kheenich Usiias pasiirt?

⁷ Te kheenich Usiias fon Yuuta hot fiile kuute tinge kemacht. Tsum payxpiil: tee hot fiile kriiche kewun, xtete kepaut un plantaaje kehat. Ti Piipel saat tas ‘te woere Kot hot kemacht tas ales kuut mit tëm keengt’. (2 Kro. 26:3-7, 10) “Awer soo wii eyer xtark kep is, is sayn hërts hoochmuutich kep un tes weeche is eyer unerkang.” Weeche hoochmuut, hot te kheenich Usiias net ti aanreete fon anere aan kenom. Too hot eyer etwas kemacht woo eyer net thërft. Was? Yeehoowa hot friier kesaat tas ploos ti priister khente insëns im thempel opfere. Awer te kheenich Usiias hot kraat tas kemacht — etwas woo eyer net thërft. Yeehoowa is net froo mit tas kep un hot tiise hoochmuutiche man mit lëpra kextrooft. Un pis eyer kextorep is, hot eyer lëpra kehat. (2 Kro. 26:16-21)

8. Tëm noo 1^te Korinter 4:6, 7, was mise mer mache fer net hoochmuutich wëre?

⁸ Khene mer aach, soo wii Usiias, hoochmuutich wëre un sinte? Kuk mool tas payxpiil fon José. Tee hot een kexeft kehat woo kuut kang is un hot wii elteste in te kemaynt ketiint. Tee hot in te konkrëse reete kehal, un ti sirkuyt superintentente hon tëm hilef als mool ferlangt. “Awer ich hon aan mayn aychne apiliteete un speryens ketraut — saat eyer. — Ich hon net uf Yeehoowa ketraut. Ich hon ketenkt tas ich xtark waar, un tes weeche praycht ich net Yeehoowa sayn aanreete aan heere.” José hot een xweyer sint kemacht un tes weeche is eyer tesasosiirt kep. Phaar yoore xpeeter, is eyer noch mool in te kemaynt aan kenom kep. Tee saat: “Yeehoowa hot mich taytlich in kelërnt: tas wichtichste is se mache was eyer wil, net te thitel woo mer hon.” Wole mer uns nii ferkese: ti apiliteete woo mer hon orer flichte woo mer in te kemaynt  kriin, khome fon Yeehoowa. (Lees 1^te Korinter 4:6, 7.) * Wën mer hoochmuutich sin, tuut Yeehoowa uns net penutse.

9. Was hon Satanaas un Ewa weeche sayn kiirichkheet kemacht?

⁹ Wën mer tenke aan yemant woo kiirichkheet ketsaycht hot, tsiimlich sicher tenke mer aan tëm Taywel traan. Wii eene fon Yeehoowa sayn engele, Satanaas wërt wool fiile priwilëje kehat hon. Awer eyer wolt mee. Tee wolt ti aanpeetung hon woo ploos tsu Yeehoowa keheert. Satanaas wil hon tas mer soo wii tee wëre: tas mer tenke tas was mer hon net kenuuch is. Tas eyerste mool wii eyer fersuucht hot tas mache, waar wii eyer mit Ewa kexproch hot. Weeche sayn liip, hot Yeehoowa fiil ese fer Aatam un Ewa fersoricht — tii khonte “fon yeete paam im kaate” ese, ploos fon eene net. (Xee. 2:16) Noch soo, hot Satanaas Ewa hinerkang un se tenke kemacht tas se mist ese fon tëm paam woo se ferpoot waar. Ewa waar net tsufriite mit was se hat; tii wolt mee. Un mer wise was tan pasiirt is: Ewa hot kesint un tsum xlus is se kextorep. (Xee. 3:6, 19)

10. Was is mit tëm kheenich Tawi pasiirt wii eyer kiirichkheet ketsaycht hot?

¹⁰ Weeche Yeehoowa, waar Tawi een impor­tant un rayche kheenich kewees un hot fiile kriiche kewun. Tawi waar petanklich kewees un hot soo kaar kesaat tas Yeehoowa sayn kexenke waare “tsu fiil fer se tseele”. (Psal. 40:5) Awer een mool hot Tawi kiirichkheet ketsaycht un hot sich ferkes fon ales was Yeehoowa tëm kep hat. Tee waar net mee tsufriite; tee wolt mee. Opwool Tawi fiile fraae hat, hot eyer aan kefang ti fraa fon een aner man winxe. Ti fraa waar Pat-Sëpa kewees, un sayn man, Uriias te ititer. Tawi hot sëks mit Pat-Sëpa kemacht, un tii is xwanger kep. Tas weyer xon xlecht kenuuch kewees; awer too hot eyer was noch xlimes kemacht: Tawi hot kepleent Uriias um pringe. (2 Sam. 11:2-15) Was waar mit Tawi los? Hot eyer ketenkt tas Yeehoowa tëm net siin khent? Opwool Tawi xon een lang tsayt Yeehoowa troy ketiint hat, hot eyer kiirichkheet ketsaycht un tes weeche  hot eyer tayer petsaalt. Tsum klik, hot Tawi mit te tsayt sayn sinte erkhënt un sich peroyt. Tee is aarich froo kep wii Yeehoowa tëm fertsayt hot! (2 Sam. 12:7-13)

11. Tëm noo Ëfeser 5:3, 4, was khan uns helfe keeche ti kiirichkheet khëmpfe?

¹¹ Was lërne mer mit Tawi sayn payxpiil? Fer keeche ti kiirichkheet khëmpfe, mise mer petanklich sin fer ales was Yeehoowa xon uns kep hot. (Lees Ëfeser 5:3, 4.) * Meyer mise tsufriite sin mit was mer hon. Wën mer mit yemant ti Piipel aan fange se xtutiire, fiilaycht saan mer: ‘Tenk aan etwas spetsiifix un tank Yeehoowa weeche tas.’ Wën tee tas een mool te taach macht, tuut eyer tan, in een woch, iwer siwe unerxiitliche sache peete. (1 The. 5:18) Un tuu? Pist tuu tas xon am mache? Wëns tuu triwer noo tenkst aan ales was Yeehoowa tich xon kep hot, tas tuut tich helfe petanklich sin. Un wëns tuu petanklich pist, playpst tuu tsufriite. Un wëns tuu tsufriite pist, tuust tuu net kiirich sin.

12. Was hot Yuutas Iskaryotis weeche ti kiirichkheet kemacht?

¹² Ti kiirichkheet hot kemacht Yuutas Iskaryotis Yeesus hinerkeen. Awer Yuutas waar net imer een xlecht persoon kewees. (Luk. 6:13, 16) Yeesus hot sicher uf tëm ketraut wayl eyer hot tëm wii aphostel raus kesuucht, un tëm kelos tas kelt khaste uf phase. Yeesus un sayn aphostele hon tas kelt penutst fer ti khoste fon sayn preetich aarwayt uf phase. Meyer khene saan tas tas waar wii ti kontripuytsyoone woo mer hayt mache fer ti preetich aarwayt uf te kans welt. Yuutas hot oft mools Yeesus keheert iwer ti kiirichkheet xpreche, awer noch soo hot eyer aan kefang se xteele. (Mar. 7:22, 23; Luk. 11:39; 12:15) Yuutas hot sich niks traus kemacht mit te aanreete woo Yeesus kep hot.

13. Wën hot Yuutas ketsaycht tas eyer kiirich kep is?

¹³ Een tsayt foer Yeesus sayn toot, hot Yuutas xon kiirichkheet ketsaycht. Tas is klaar kep im haus fon Simon te leproos. Yeesus un sayn tisipele — tepay Marta un sayn xwester Maria — waare tëm maaye kang. Wii se am ese waare, is Maria uf kextii un hot een tayer eel, woo kuut keroch hat, uf Yeesus sayn khop aus kexut. Yuutas un ti anere tisipele hon sich keëricht mit tas. Ti anere tisipele hon fiilaycht kemënt tas es peser weyer tas kelt in te preetich aarwayt penutse. Awer Yuutas hot sich keëricht weeche een aner uersach: tee “waar een xpitspuup” un wolt tas kelt fon tëm khaste xteele. Xpeeter, weeche sayn kiirichkheet, hot Yuutas Yeesus hinerkang fer kelt kriin. (Yoo. 12:2-6; Mat. 26:6-16; Luk. 22:3-6)

14. Wii hot een pheyerche te aanreet fon Lukas 16:13 aan kewënt?

¹⁴ Yeesus hot sayn nookeener fon een wichtich woerheet erinert: “Teyer khent net sklaawe fon Kot un aach fom Raychtum sin.” (Lees Lukas 16:13.) * Tas kilt fer uns hayt aach. Tsum payxpiil: kuk mool wii een pheyerche in Rumeenya hot aan kewënt was Yeesus kesaat hot. Tii sin in kelaat kep fer torich een tsayt in een aner lant woo raych is xafe. Tii saan: “Meyer hate een kroos xulte fer mit te pank petsaale. Tan am aanfang hon mer ketenkt tas es een seeche fon Yeehoowa weyer.” Awer too waar een fal tehiner. Wën se ti aarwayt aan nëme teete, teete se tsu fiil xafe un fer Yeehoowa teet es weenich tsayt kepe. Noo tas se te artikel “Mantenha a lealdade  com um coração unificado” in A Sentinela 15^te Akust fon 2008 kelees hon, hon se sayn ëntxlus kemacht. Tii saan: “Wën mer tsu een aner lant kengte fer mee kelt kriin awer teet es xlim sin Yeehoowa tiine, tan weyer Yeehoowa sayn aanpeetung net tas haupste in unser leepe. Sicher, teet unser froyntxaft mit tëm layte.” Tes weeche hon se ti inlaatung net aan kenom. Was is tan pasiirt? Te man hot een aarwayt kefun in sayn muter lant woo kenuuch petsaalt hot fer sayn neetichkheete. “Yeehoowa sayn hant is net khorts” — hot ti fraa kesaat. Tas pheyerche is froo tas Yeehoowa tëne sayn Hër is, net tas kelt.

15. Warom khene mer sicher sin tas es meechlich is fon Satanaas sayn fale aus rayse?

¹⁵ Was sole mer mache wën mer mërke tas mer aan kefang hon kiirich orer hoochmuutich sin? Meyer mise uns ënere. Phaul hot kesaat tas tii woo ‘lepeentich fon Satanaas sayn fal kefang sin’, khene noch aus rayse fon tas. (2 Tim. 2:26) Tsum payxpiil: Tawi hot Natan sayn xtark aanreet aan keheert, sich fon sayn kiirichkheet peroyt, un sayn froyntxaft mit Yeehoowa noch mool tsurik kriit. Ferkes tich net: Yeehoowa is xtërker wii Satanaas. Tan, wën mer Yeehoowa sayn hilef aan nëme, khene mer aus rayse fon yeete fal woo Satanaas uns uf xtelt.

16. Was tuut uns helfe wayt wech fon Satanaas sayn fale plaype?

¹⁶ Kewis tas is noch peser nii mools hoochmuutich orer kiirich wëre; awer mer kriin tas ploos hin mit Yeehoowa sayn hilef. Mer sole nii mools tenke: ‘Ich sin xtark; ich wëre nii mools hoochmuutich orer kiirich.’ Es is xaat, awer tas is soo kaar pasiirt mit etliche fon Yeehoowa sayn tiiner woo tëm xon een lang tsayt ketiint hon. Tan, peet yeete taach tsu Yeehoowa un ferlang tëm sayn hilef fer tayn ketanke un aktsyoone noo kuke. (Psal. 139:23, 24) Soo, khanst tuu tiise eekliche xpiirunge mërke soo xnel wiis meechlich is. Los nii ti kiirichkheet orer te hoochmuut tich kontroliire!

17. Was tuut klaych pasiire mit unser faynt, te Taywel?

¹⁷ Xon tausente yoore, is Satanaas tee woo yacht. Awer klaych, es is tee woo kepun wërt un tsum xlus, fernicht. (Apo. 20:1-3, 10) Meyer waarte tiise taach wërklich fiil. Awer pis te taach khomt, phas uf! — Satanaas wil tich fange. Xtreng tich aan fer net hoochmuutich orer kiirich wëre. Un ‘xtel tich keeche te Taywel un tee tuut fon tich aus rayse’. (Tya. 4:7)