XTUUTYUM ARTIKEL 27
“Hof uf Yeehoowa”
“Hof uf Yeehoowa; say koraajich un xtark im hërts.” (PSAL. 27:14)
LIIT 128 Persevere até o fim
WAS TUUN MER SIIN? *
1. (a) Was fer hofnung hot Yeehoowa uns kep? (b) Was petayt ‘uf Yeehoowa hofe’? (Kuk “Tuu peser ferxteen”.)
YEEHOOWA hot een xeen hofnung kep fer ale tii woo tëm liipe. Klaych pringt eyer een ën fer ti krankheete, ti traurichkheet un te toot. (Apo. 21:3, 4) Tee helft “ti tsaame” woo uf tëm hofe, fon te eyert een paratiis mache. (Psal. 37:9-11) Un Tee tuut uns aach helfe een xtark fraayntxaft mit tëm hon — noch xtërker wii mer yets xon hon. Tas is wërklich een wunerlich hofnung! Awer, warom khene mer klaape tas Kot sayn ferxpreche sich erfiile tuun? Wayl Yeehoowa tuut imer mache was eyer ferxprecht. Tes weeche, hon mer kuute uersache fer ‘uf Yeehoowa hofe’. * (Psal. 27:14) Meyer mache tas, wën mer mit ketult un frooheet uf Yeehoowa waarte pis eyer sayn ferxpreche erfiilt. (Isa. 55:10, 11)
2. Was hot Yeehoowa xon kemacht?
2 Yeehoowa hot xon pewayst tas eyer sayn ferxpreche in hale tuut. Kuk mool een xeen payxpiil. Im puuch Apokalipsis, hot eyer ferxproch tas in unser tsayt, teet eyer layt fon unerxiitliche natsyoone, xprooche un xteme samele fer Tëm eenich tiine. Hayt wërt tiise ekstra krup layt wii “tas kroose folek” kekhënt. (Apo. 7:9, 10) Opwool tiise mëner, fraae un khiner fon unerxiitliche rase, xprooche un lënter sin, sin se ploos een familye woo in friit leept. (Psal. 133:1; Yoo. 10:16) Tii woo teel fom kroose folek sin, sin aach flaysiche preeticher. Tii sin imer fërtich fer sayn hofnung fon een peser welt mit ale tii woo heere wole teele. (Mat. 28:19, 20; Apo. 14:6, 7; 22:17) Wëns tuu teel fon tëm kroose folek pist, sicher kepst tuu fiil weyert fer tayn hofnung.
3. Was is Satanaas sayn opjetiiw?
3 Te Taywel wil net hon tas tuu een hofnung fer te futuer host. Tëm sayn opjetiiw is uns klaape mache tas Yeehoowa sich net mit uns khimert un tas eyer net sayn ferxpreche in hale tuut. Wën Satanaas unser hofnung fernicht kriit, khene mer oone muut plaype un soo kaar noo lose Yeehoowa tiine. Wii mer noch siin tuun, Satanaas hot fersuucht Yoop sayn hofnung fernichte un tëm uf kepe mache fon Yeehoowa tiine.
4. Was tuun mer in tiise artikel siin? (Yoop 1:9-12)
4 In tiise artikel, tuun mer siin wii Satanaas fersuucht hot Yoop tswinge fon sayn troyheet tsu Kot uf kepe. (Lees Yoop 1:9-12.) * Meyer tuun aach siin was mer khene mit Yoop sayn payxpiil lërne un warom mer mise uns erinere tas Yeehoowa uns liipt un tas Eyer sayn ferxpreche in halt.
SATANAAS HOT FERSUUCHT YOOP SAYN HOFNUNG FERNICHTE
5-6. Was is mit Yoop in een khorts tsayt pasiirt?
5 Yoop hat een aarich kuut leepe. Tee hat een ticht fraayntxaft mit Yeehoowa. Tee hat een kroos un froo familye un waar aach aarich raych. (Yoop 1:1-5) Awer in ploos een taach, hot Yoop neekst ales ferloer. Eyerst, hot eyer sayn fiitsaych ferloer. (Yoop 1:13-17) Tan, sin al sayn liipe khiner um khom. Tenk mool noo iwer was pasiirt is. Ti eltere xpiire sich kans ër wën eene fon sayn khiner xtërpt. Tan, xtel tich mool foer wii Yoop un sayn fraa sich kexpiirt hon wii al sayn 10 khiner kextorep sin. Tes weeche, is tsum ferxteen tas Yoop sayn tsaych feris hot un sich ufm pootem kexmis hot! (Yoop 1:18-20)
6 Nochter, hot Satanaas een xlim krankheet keeche Yoop keprung. Tas hot fiil xaam un phayn fer tëm kep. (Yoop 2:6-8; 7:5) Eep tas pasiirt is, hon ti layt Yoop aarich respektiirt. Tii hon tëm kesuucht fer oryentiirunge kriin. (Yoop 31:18) Awer yets, hon se sich wech fon tëm kehal. Sayn priiter, sayn tichste fraaynte un soo kaar sayn tiiner wolte niks mee iwer tëm wise! (Yoop 19:13, 14, 16)
Fiile Yeehoowa sayn Tsayer hayt khene ferxteen wii Yoop sich kexpiirt hot, wii eyer ti proope mit kemacht hot (Kuk te apsats 7.) *
7. (a) Weeche was hot Yoop ketenkt tas eyer am layte waar, awer was hot eyer net kemacht? (b) Wii khent een krist een eenlich proop mit mache wii tiise woo mer im pilt siin?
7 Satanaas wolt Yoop klaape mache tas eyer keliit hot wayl Yeehoowa pees mit tëm waar. Tsum payxpiil: te Taywel hot een xtarke wint penutst fer tas haus fernichte woo Yoop sayn 10 khiner am ese waare. (Yoop 1:18, 19) Tee hot aach fayer fom himel fale kemacht fer Yoop sayn fiitsaych un ti tiiner woo se uf kephast hon, fernichte. (Yoop 1:16) Te wint un tas fayer sin fom himel khom. Tes weeche, hot Yoop ketenkt tas se fon Kot khom sin. Tee hot ketenkt tas eyer Yeehoowa pees kelos hat. Noch soo, hot Yoop net sayn Fater im himel ferfluucht. Tee hot erkhënt tas, torich ti yoore, hat eyer fiile kuute tinge fon Yeehoowa kriit. Tan, hot eyer ketenkt tas wën eyer tas kuutes aan kenom hot, mist eyer aach wilich sin fer tas xlechtes aan nëme. Tes weeche hot eyer kesaat: “Tas Yeehoowa sayn naame sol wayter keloopt sin.” (Yoop 1:20, 21; 2:10) Opwool Yoop sayn kelt, khiner un kesuntheet ferloer hat, is eyer wayter troy tsu Yeehoowa keplip. Awer Satanaas hot net uf kep — tee hot noch was aneres fersuucht.
8. Was noch hot Satanaas mit Yoop kemacht?
8 Nochter, hot Satanaas tray falxe fraaynte penutst fer Yoop tenke mache tas eyer khee weyert hat. Tiise mëner hon kesaat tas Yoop am layte waar wayl eyer fiil xlechtes kemacht hat. (Yoop 22:5-9) Tii hon fersuucht tëm klaape mache tas, opwool tas kanse kuutes woo Yoop kemacht hat, hët Kot khee weyert fer tas kep. (Yoop 4:18; 22:2, 3; 25:4) Tii hon fersuucht Yoop tenke mache tas Kot tëm net keliipt hot, tas Kot tëm net uf phase teet un tas Kot tiine, khee weyert hët. Weeche tëne sayn wërter, khent Yoop sich oone hofnung kexpiirt hon.
9. Was hot Yoop keholef koraajich un xtark sin?
9 Xtel tich mool foer tiise situatsyoon. Yoop sitst tswixich tëm ëx un is een kroos phayn am xpiire. (Yoop 2:8) Tëm sayn fraaynte tuun tëm wayter saan tas eyer een xlecht persoon is un tas ales was eyer kemacht hot khee weyert hat. Weeche tas ales, xpiirt eyer sich kans xweyer im hërts. Un ti traurichkheet weeche te toot fon sayn khiner tuut tëm iwerlaate. Am aanfang, playpt Yoop ruych. (Yoop 2:13–3:1) Awer wën tëm sayn falxe fraaynte tenke tas es wil saan tas eyer Yeehoowa im xtich lose tuut, sin se kans ferkheert. In een momënt, fiilaycht heept Yoop sayn khop, kukt tsu sayn fraaynte un saat: “Pis ich xtërpe, tuun ich mayn intekriteet nii uf kepe!” (Yoop 27:5) Was hot Yoop keholef soo koraajich un xtark sin opwool eyer fiil am layte waar? Yoop hot sich oone muut kexpiirt, awer hot nii sayn hofnung uf kep tas sayn liipliche Kot tëm helfe teet. Tee wust tas, soo kaar wën eyer xtërpe teet, teet Yeehoowa tëm fom toot uf ruufe. (Yoop 14:13-15)
WII KHENE MER YOOP NOO MACHE?
10. Was khene mer fon Yoop sayn kexicht lërne?
10 Was khene mer fon Yoop sayn kexicht lërne? Satanaas khan uns net tswinge Yeehoowa im xtich lose un Yeehoowa wees ales was pasiirt. Was Yoop mit keleept hot, helft uns aach etliche wichtiche tinge ferxteen. Kuk mool etliche spetsiifixe lisyoone woo mer mit Yoop lërne khene.
11. Wën mer wayter uf Yeehoowa traue, fon was khene mer uns sicher sin? (Tyako 4:7)
11 Yoop hot pewayst tas wën mer wayter uf Yeehoowa traue, khene mer yeete proop aus hale un uns keeche te Taywel xtele. Ti Piipel lost uns sicher tas, wën mer tas mache, tuut te Taywel fon uns aus rayse. (Lees Tyako 4:7.) *
12. Wii hot ti hofnung fom ufxtaye fom toot Yoop ferxtërkt?
12 Meyer mise een xtark hofnung aan tëm ufxtaye fom toot hon. Wii mer im letste artikel kexproch hon, Satanaas tuut ofts te pang fom toot penutse fer uns uf kepe mache fon unser troyheet tsu Kot. Satanaas hot kesaat tas Yoop teet ales mache fer sayn leepe rete, soo kaar noo lose Yeehoowa tiine. Satanaas waar kans ferkheert. Soo kaar wii Yoop ketenkt hot tas eyer xtërpe teet, is eyer wayter troy tsu Yeehoowa keplip. Yoop hot aan Yeehoowa sayn kuutheet ketraut un tee hat een xtark hofnung tas, mit te tsayt, teet Yeehoowa tas ales in te ray tuun. Tas hot tëm keholef aus hale. Yoop waar sich sicher tas, wën Yeehoowa net ales resolwiire teet soo lang wii eyer noch am leepe waar, teet Yeehoowa tëm in te futuer uf ruufe. Yoop hat een xtarke klaape aan tëm ufxtaye fom toot. Wën tiise hofnung aach xtark in uns is, noch net mool foer te toot tuun mer noo lose troy tsu Kot plaype.
13. Warom mise mer acht kepe aan was Satanaas mit Yoop kemacht hot?
13 Meyer mise acht kepe aan was Satanaas mit Yoop kemacht hot, wayl hayt tsu taach, macht eyer was eenliches mit uns. Mërk mool ti akusatsyoon woo Satanaas kemacht hot: “Een mënx [net ploos Yoop] tuut ales kepe fer sayn leepe se rete.” (Yoop 2:4, 5) In woerheet, hot Satanaas kesaat tas mer Yeehoowa net wërklich liipe, un tas mer tuun Tëm in xtich lose wën tas unser leepe rete tuut. Satanaas tuut aach saan tas Yeehoowa uns net liipt un tas Eyer unser aanxtrengung fer Tëm kefale net mërkt. Wayl mer wise was Satanaas am fersuuche is, klaape mer net aan tëm sayn liie.
14. Was khene ti proope iwer uns selepst tsayche? Mach een ferklaychung.
14 Meyer sole ti proope siin wii een keleechenheet fer iwer uns selepst lërne. Ti proope woo Yoop mit kemacht hot, hon tëm keholef etliche xwacheete mërke un tëne korikiire. Tsum payxpiil, eyer hot kelërnt tas eyer mist teemuuticher sin. (Yoop 42:3) Meyer khene aach iwer uns selepst lërne wën mer proope mit mache. Een pruuter woo Nikolay * heest, hat xlime kesuntheet propleeme. Noch soo, is eyer tsu te katee kexikt kep. Tee saat: “Ti katee waar soo wii een raio-X maxiin: es hot mich keholef se mërke was fer kwaliteete ich ferpesere mist.” Wën mer mërke was unser xwacheete sin, khene mer uns aan xtrenge fer tëne korikiire.
15. Weer sole mer heere, un warom?
15 Meyer mise Yeehoowa heere, net unser faynte. Wii Yeehoowa mit Yoop kexproch hot, hot Yoop fiil acht kep. Yeehoowa hot etliche frooche fer Yoop kemacht fer tëm helfe ferxteen tas Eyer sich fiil mit tëm kekhimert hot. Yoop hot mit teemuut keantwort un hot petanklichkheet fer Yeehoowa sayn kuutheet ketsaycht. Tee hot kesaat: “Ich hon keheert fon teer se xpreche, awer yets siin ich tich mit mayn aychne aue.” (Yoop 42:5) Wii Yoop tiise wërter kesaat hot, tsiimlich sicher waar tee noch im mite ëx; sayn khërper waar fol wee un tee waar noch mechtich traurich weeche te toot fon sayn liipe khiner. Noch soo, hot Yeehoowa Yoop sicher kelos tas eyer tëm keliipt hot un tas Yoop tëm kefalt hot. (Yoop 42:7, 8)
16. Tëm noo Isaiias 49:15, 16, fon was sole mer uns erinere wën mer proope mit mache?
16 Hayt, khene ti layt uns aach ferxëne un uns pehantele wii wën mer khee weyert hëte. Fiilaycht, fersuuche se unser naame orer te naame fon te Orkanisatsyoon trekich mache. Tii tuun “ale xlechte liie keeche [uns] saan”. (Mat. 5:11) Mit Yoop sayn kexicht, lërne mer tas Yeehoowa traut tas mer troy tsu tëm plaype wën mer proope mit mache. Yeehoowa liipt uns un lost nii im xtich tii woo uf tëm hofe. (Lees Isaiias 49:15, 16.) * Kep khee acht fer ti xlechte liie woo Kot sayn faynte saan! James is een pruuter fon Turkia. Sayn familye hot xlime proope mit kemacht un tee saat: “Meyer hon kemërkt tas ti liie keeche Kot sayn folek heere, teet uns oone muut lose. Tes weeche, hon mer uns traan kehal aan unser hofnung un in unser aarwayt tsu Yeehoowa. Soo, hon mer unser frooheet kehal.” Soo wii Yoop, heere mer Yeehoowa! Ti liie woo unser faynte saan, tuun net unser hofnung fernichte.
TAYN HOFNUNG TUUT TICH FERXTËRKE
Yoop is keseechent kep weeche sayn troyheet tsu Kot. Tee un sayn fraa hon een lang un froo leepe kehat (Kuk te apsats 17.) *
17. Was lërnst tuu mit te payxpiile fon troye mëner un fraae woo in Hepreeyer 11 xteen?
17 Yoop is net te eensiche tiiner fon Kot woo koraajich un xtark keplip is foer xlime proope. In sayn priif fer ti hepreeyer, hot te aphostel Phaul iwer fiil anere tiiner kexproch. Tee hot se kenënt wii “een kroos wolk fon tsayer”. (Hep. 12:1) Tii al hon xlime proope mit kemacht; noch soo, sin se troy tsu Yeehoowa keplip torich sayn kanse leepe. (Hep. 11:36-40) Waare tëne sayn persewerans un xweyer aarwayt umsonst? Sicher net! Opwool se net kesiin hon ti erfiilung fon al Yeehoowa sayn ferxpreche, hon se wayter uf Yeehoowa kehoft. Tii waare sich sicher tas se Yeehoowa sayn tsuxtimung kriit hate. Tes weeche, hate se ti sicherheet tas se teete ti erfiilung fon Kot sayn ferxpreche siin. (Hep. 11:4, 5) Tëne sayn payxpiil khan uns helfe pextimt sin fer wayter uf Yeehoowa hofe.
18. Was pist tuu pextimt se mache? (Hepreeyer 11:6)
18 Hayt leepe mer in een welt woo imer xlechter kept. (2 Tim. 3:13) Satanaas is Kot sayn folek imer noch am proope. Ekaal was fer xwiirichkheete noch khome, wole mer pextimt sin wayter xtram fer Yeehoowa xafe mit te sicherheet tas mer “hon unser hofnung uf een lepeentiche Kot kextelt”. (1 Tim. 4:10) Ferkes tich net: ti peloonung woo Yeehoowa fer Yoop kep hot, tsaycht tas eyer “fiil hërtslich liip un parmhërtslichkheet hot”. (Tya. 5:11) Soo wii Yoop, wole mer troy tsu Yeehoowa plaype mit te sicherheet tas eyer peloont “tii woo tëm ërnstlich suuche”. (Lees Hepreeyer 11:6.) *
LIIT 150 Suucht Kot tas eyer aych pefrayt
^ Wën mer tenke aan yemant woo xlime proope mit kemacht hot, ofts erinere mer uns fon Yoop. Was khene mer mit te speryens fon tiise troye man lërne? Meyer lërne tas Satanaas khan uns net tswinge Yeehoowa im xtich lose. Meyer lërne aach tas Yeehoowa wees ales was mit uns pasiirt. Un, soo wii Yeehoowa Yoop sayn proope tsum ën keprung hot, tuut eyer een taach unser xwiirichkheete tsum ën pringe. Wën mer torich unser aktsyoone tsayche tas mer uns sicher fon tas ales sin, wëre mer tswixich tëne sin woo wërklich ‘uf Yeehoowa hofe’.
^ TUU PESER FERXTEEN: Tas hepreeyxe wort woo iwersetst is “hofe” petayt etwas hërtslich “waarte”. Es khan aach petayte uf yemant traue. (Psal. 25:2, 3; 62:5)
^ (Yoop 1:9-12) Too hot Satanaas fer Yeehoowa keantwort: “Meecht Yoop Kot umsonst aan heere? 10 Host tuu net een tsaum um tëm, um sayn haus un um ales was eyer hot, ketuun? Tuu host ales was eyer kemacht hot, keseechent, un sayn kans fii tuut sich iwer ti kans eyert aus prayte. 11 Awer yets, xtrek tayn hant aus un tref ales was eyer hot, un es is sicher tas eyer tich in tayn aychne kesicht ferfluucht.” 12 Tan hot Yeehoowa fer Satanaas kesaat: “Kuk! Ales was eyer hot, is in tayn hant. Awer xtrek net tayn hant aus keeche tëm!” Too is Satanaas foer Yeehoowa wech kang.
^ (Tyako 4:7) Tes weeche, tuut aych unich Kot sayn autoriteet xtele, awer tuut aych keeche te Taywel xtele, un tee tuut fon aych aus rayse.
^ Etliche naame waare keënert.
^ (Isaiias 49:15, 16) Khan een fraa sayn nëneche ferkese, orer net mitlayt xpiire fer te soon fon sayn muterlayp? Soo kaar wën tiise fraae sich ferkese teete, ich teet nii tich ferkese. 16 Kuk! Ich hon tich in mayn hant kexrip! Tayn maure sin imer foer mich.
^ (Hepreeyer 11:6) Un noch, oone klaape is es unmeechlich Kot kefale, wayl weer ticht pay Kot khomt, mus klaape tas eyer eksistiirt un tas eyer peloont tii woo tëm ërnstlich suuche.
