1. Was hot te kheenich Salomon uns in kelërnt in Eklesyastes 7:20?

 TE KHEENICH Salomon hot kesaat: “Uf te eyert kepts khee kerechte man woo macht imer was richtich is un woo nii mool sint.” (Ekl. 7:20) Tas is wërklich woer! Meyer al sinte. (1 Yo. 1:8) Tes weeche, prayche mer fertsayung fon Kot un ti anere mënxe kriin.

2. Wii xpiire mer uns wën een ticht fraaynt uns fertsayt?

² Kewis, host tuu xon een mool een ticht fraaynt pelayticht. Tuu wolst tëm sayn fraaynt noch mool sin un tes weeche host tuu tich eerlich ëntxulticht. Wii host tuu tich kexpiirt wii tayn fraaynt tich fertsayt hot? Fiil peser un aach froo, kël?

3. Was tuun mer in tiise artikel lërne?

³ Meyer wole hon tas Yeehoowa unser tichste Fraaynt wërt. Awer als mool, tuun mer etwas saan orer mache woo tëm pelayticht. Warom khene mer uns sicher sin tas Yeehoowa uns fertsaye wil? Was is ti unerxiit wën Yeehoowa fertsayt un wën ti mënxe fertsaye? Un tsum xlus: weer khan Yeehoowa sayn fertsayung kriin? Tas is was mer in tiise artikel lërne tuun.

4. Warom khene mer uns sicher sin tas Yeehoowa fërtich fer se fertsaye is?

⁴ Ti Piipel lost uns sicher tas Yeehoowa fërtich fer se fertsaye is. Wii Yeehoowa sich fer Mooses pexrip hot, im Sinay përich, hot eyer een engel kexikt fer se saan: “Yeehoowa, Yeehoowa, een Kot woo parmhërtslich un mitlaytich is, ketultich un fol mit leaale liip un woerheet, woo fer tausente, leaale  liip tsaycht, woo feeler, transkretsyoon un sint fertsayt.” (Eeks. 34:6, 7) Yeehoowa is een liipliche un parmhërtsliche Kot woo imer fërtich is fer se fertsaye ti sintiche mënxe woo sich peroye. (Nee. 9:17; Psal. 86:15)

5. Tëm noo Psalm 103:13, 14, was macht Yeehoowa wayl eyer ti mënxe soo kuut khëne tuut?

⁵ Wayl Yeehoowa unser Kriatoer is, wees eyer ales iwer uns. Tenk mool noo: tee khënt yeete kleenichkheet fon yeete persoon uf te eyert! (Psal. 139:15-17) Tes weeche, khan eyer siin al ti imperfektsyoone woo mer fon unser eltere keërpt hon. Tee wees aach ales was mer mit kemacht hon woo unser personaliteet kemustert hot. Wayl Yeehoowa uns soo kuut khënt, is eyer parmhërtslich mit uns. (Psal. 78:39; lees Psalm 103:13, 14. *)

6. Wii hot Yeehoowa pewayst tas eyer fërtich fer se fertsaye is?

⁶ Yeehoowa hot xon pewayst tas eyer fërtich fer uns fertsaye is. Tee ferxteet tas weeche ti aktsyoone fom eyerste man, Aatam, sin mer al sinter un mer tuun mit te tsayt xtërpe. (Rom. 5:12) Es kept niks woo mer mache khene fer uns un ti anere fom toot un ti sint pefraye. (Psal. 49:7-9) Awer unser liiplich Kot hot mitlayt ketsaycht un hot etwas kemacht fer uns pefraye. Was waar tas? Tëm noo Yoohan 3:16, hot Kot sayn eensiche kepoerne Soon kexikt fer weeche uns xtërpe. (Mat. 20:28; Rom. 5:19) Yeesus is uf unser plats kextorep fer se pefraye ale tii woo aan tëm klaape. (Hep. 2:9) Yeehoowa hot fiil phayn kexpiirt wii eyer kesiin hot sayn liipe Soon soo een xlim toot layte. Kewis, hët Yeehoowa net sayn Soon te toot layte kelos wën eyer uns net fertsaye welt.

7. Was fer sin etliche piiplixe payxpiile fon layt woo Kot fertsayt hot?

⁷ In te Piipel, fine mer fiile payxpiile fon layt woo Yeehoowa fertsayt hot. (Ëfe. 4:32) Aan weem tenkst tuu traan? Fiilaycht, tenkst tuu am kheenich Manasës. Tiise xlechte man hot xlime sinte keeche Yeehoowa kemacht. Tee hot falxe keeter aan kepeet un ti anere uf kemuut tas aach mache. Tee hot sayn aychne khiner um keprung un hot se fer falxe keeter  keopfert. Manasës hot soo kaar een xtaatue fon een falx kot in Yeehoowa sayn haylich thempel ketuun. Ti Piipel saat iwer tëm: “Tee hot fiile tinge kemacht woo foer Yeehoowa sayn aue xlecht waare, un soo hot eyer Tëm pelayticht.” (2 Kro. 33:2-7) Awer, wii Manasës sich wërklich peroyt hot, hot Yeehoowa tëm fertsayt. Kot hot soo kaar erlaupt tas eyer noch mool kheenich weyer. (2 Kro. 33:12, 13) Im xtant, host tuu aach iwer te kheenich Tawi ketenkt. Tee hot atultëryo kemacht un een man um keprung — tswaay xlime sinte keeche Yeehoowa. Awer, wii Tawi erkhënt hot tas eyer kesint hat un sich wërklich peroyt hot, hot Yeehoowa tëm aach fertsayt. (2 Sam. 12:9, 10, 13, 14) Yawool, meyer khene uns sicher sin tas Yeehoowa fërtich fer se fertsaye is. Un wii mer noch siin tuun, wën Yeehoowa fertsayt, tas is net soo wii ti mënxe fertsaye tuun.

8. Warom khan ma saan tas Yeehoowa te peste Richter is?

⁸ Yeehoowa is “te Richter fon te kans eyert”. (Xee. 18:25) Een kuut richter mus ti kesetse kuut ferxteen. Un Yeehoowa is soo, wayl tee is net ploos unser Richter, awer aach Tee woo ti kesetse macht. (Isa. 33:22) Kot is tee woo te pest ferxteet was richtich un ferkheert is. Een richter mus aach al ti informatsyoone iwer een prosës wise eep eyer een ëntxlus macht. Tes weeche, is Yeehoowa te peste Richter: tee wees imer ales.

9. Was fer informatsyoone hot Yeehoowa wën eyer ëntxlist yemant fertsaye orer net?

⁹ Anerste wii ti mënxliche richter, tuut Yeehoowa imer al ti informatsyoone iwer kwalkee prosës wise. (Xee. 18:20, 21; Psal. 90:8) Ti mënxliche richter wise ploos was se siin orer heere khene. Awer Yeehoowa is anerste. Tee tuut kenau ferxteen wii ti aktsyoone fon een persoon influentsiirt sin fon te kwaliteete woo se fon sayn eltere keërpt hot, fon wii se kroos ketsoo waar, fom plats woo se woont, un fon sayn emotsyonaal un mentaal kesuntheet. Yeehoowa leest aach tas hërts. Tee ferxteet kenau warom een persoon etwas macht. Niks is fon Yeehoowa ferxtekelt. (Hep. 4:13) Tan, wën Yeehoowa yemant fertsayt, is wayl eyer ales iwer ti situatsyoon wees.

10. Warom khan ma saan tas Yeehoowa sayn kerichte imer kerecht sin? (Teuteronoomyum 32:4)

¹⁰ Yeehoowa sayn kerichte sin imer kerecht. Tee macht khee unerxiit tswixich ti layt. Kot tuut net een persoon fertsaye wayl se xeen aus siit, wayl se raych orer wichtich foer ti anere is, orer wayl se fiil apiliteete hot. (1 Sam. 16:7; Tya. 2:1-4) Nimant khan Yeehoowa tswinge was mache orer tëm khaafe. (2 Kro. 19:7) Kot macht nii een ëntxlus wayl eyer pees orer traurich is. (Eeks. 34:7) Kewis, is Yeehoowa te peste Richter — eyer ferxteet ales iwer uns un unser situatsyoon! (Lees Teuteronoomyum 32:4.) *

11. In was fer aat is Yeehoowa sayn fertsayung anerste wii ti mënxe sayns?

¹¹ Ti xrayper fon te Hepreeyxe Xrifte hon erkhënt tas ti aat wii Yeehoowa fertsayt is anerste wii ti mënxe fertsaye tuun. Een puuch saat iwer een hepreeyx wort woo se als mool penutst hon: “Tas is ploos penutst fer se pexraype ti aat wii Kot ti sintiche layt fertsayt. Tas wort is nii penutst fer se pexraype ti xweecher aat wii ti mënxe sich naner fertsaye.” Ploos Yeehoowa hot ti  autoriteet fer een sintich persoon woo sich wërklich peroyt hot, kans fertsaye. Was fer nutse kriin mer wën Kot uns fertsayt?

12-13. (a) Was fer nutse kriit een persoon wën Yeehoowa se fertsayt? (b) Wii lang tuun ti nutse woo mer fon Yeehoowa sayn fertsayung kriin, taure?

¹² Wën mer Yeehoowa sayn fertsayung aan nëme, khome ti tsayte woo mer “nay kraft” kriin — es wil saan, meyer tuun een sauwer kewise un inerlich friit hon. Soo een sort fertsayung khomt net fon te mënxe, awer fon Yeehoowa. (Aph. 3:19) Wën Yeehoowa uns fertsayt, kriin mer tëm sayn fraayntxaft tsurik un es wërt wii wën mer nii kesint hëte.

¹³ Wën Kot uns fertsayt, tuut eyer uns nii net noch mool akusiire orer xtroofe weeche ti sint woo mer kemacht hon. (Isa. 43:25; Yee. 31:34) Yeehoowa tuut unser sinte xtele “soo wayt wii ti sun sayn ufkang fon te sun sayn unerkang is”. * (Psal. 103:12) Es ferwunert uns wën mer tenke aan wii kroos Yeehoowa sayn fertsayung is un tas lost unser hërts fol petanklichkheet. (Psal. 130:4) Awer, weer khan Kot sayn fertsayung kriin?

14. Was hon mer xon kelërnt iwer Yeehoowa sayn ëntxlus fer se fertsaye?

¹⁴ Wii mer xon kesiin hon, Yeehoowa sayn ëntxlus fer se fertsaye xtaypt sich net aan wii kroos orer kleen een sint waar. Meyer hon aach kelërnt tas Yeehoowa unser Kriatoer un Richter is un tas eyer ti kesetse macht. Tes weeche, hot eyer ti kanse informatsyoone fer se ëntxlise yemant fertsaye orer net. Awer, iwer was fer spetsiifixe tinge tenkt Kot eep eyer ëntxlist yemant fertsaye?

15. Tëm noo Lukas 12:47, 48, was is een tings woo Yeehoowa tepay rechent wën eyer ëntxlist yemant fertsaye orer net?

¹⁵ Een tings woo Yeehoowa tepay rechent is ep ti persoon wust tas was se kemacht hot, een sint waar. Yeesus hot tas taytlich kelos in Lukas 12:47, 48. * (Lees.) Wën yemant pleent un fer kërn was xlechtes  macht, opwool eyer wees tas es Kot pelaytiche tuut, is eyer een xweyer sint am mache. Yeehoowa khan ëntxlise tiise persoon net fertsaye. (Mar. 3:29; Yoo. 9:41) Awer als mool, wise mer tas was mer kemacht hon ferkheert waar. Meechts een hofnung fer uns kepe? Yawool! Wayl es kept noch etwas woo Yeehoowa tepay rechent wën eyer ëntxlist ep eyer uns fertsaye tuut.

16. Was petayt sich peroye un warom mise mer tas mache wën mer wole hon tas Yeehoowa uns fertsayt?

¹⁶ Een aner tings woo Yeehoowa tepay rechent is ep ti sintich persoon sich eerlich peroyt hot. Was petayt sich peroye? Wën yemant sich peroyt, tuut eyer sayn “ketanke, aanxtelung orer opjetiiw ënere”. Tee tuut sich aach aarich traurich xpiire weeche ti ferkheerte tinge woo eyer kemacht hot orer wayl eyer net kemacht hot tas kuutes woo eyer mache solt. Ti persoon wërt aach traurich wayl se kelos hot sayn fraayntxaft mit Yeehoowa soo xwach wëre tas se tas xlechtes kemacht hot. Eriner tich tas ti kheeniche Manasës un Tawi xweyere sinte kemacht hon. Awer soo wii soo, hot Yeehoowa se fertsayt wayl se sich wërklich peroyt hate. (1 Khe. 14:8) Yawool, Yeehoowa tuut uns fertsaye ploos wën eyer pewaysunge siit tas mer uns wërklich peroyt hon. * Es is net kenuuch ploos uns traurich xpiire weeche ti sinte woo mer kemacht hon; meyer mise aach fërtich sin fer etwas too triwer mache. Tas is een aner tings woo Yeehoowa tepay rechent.

17. Was petayt een “halpe wolte” kepe un warom is tas wichtich fer net ti selwich sint pratikiire? (Isaiias 55:7)

¹⁷ Een aner tings woo Yeehoowa tepay rechent is ep ti persoon een “halpe wolte” kep hot. In anere wërter: ti persoon mus noo lose tas xlechtes mache un aan fange se leepe in een aat woo Yeehoowa froo lost. (Lees Isaiias 55:7.) * Ti persoon mus ti aat wii se tenkt ënere un lose sayn ketanke fon Yeehoowa kelënkt wëre. (Rom. 12:2; Ëfe. 4:23)  Tii mus pextimt sin sayn xlechte ketanke un aktsyoone im xtich lose. (Kol. 3:7-10) Kewis, is unser klaape aan Yeesus sayn fray khaaf opfer woo een echte funtament kept fer Yeehoowa uns fertsaye un unser sinte teke. Wën mer uns eerlich aan xtrenge fer unser aanxtelung ënere, tuut Yeehoowa tiise fray khaaf opfer penutse fer unser sinte fertsaye. (1 Yo. 1:7)

18. Was hon mer iwer Yeehoowa sayn fertsayung kelërnt?

¹⁸ Was fer wichtiche phunkte hon mer pis yets kelërnt? Wën mer iwer fertsayung xpreche, kepts nimant im Uniwërsum soo wii Yeehoowa. Warom khene mer tas saan? Eyerst: tee is imer fërtich fer se fertsaye. Tsweet: tee wees ales iwer uns. Tes weeche, is eyer ti pest persoon fer se ëntxlise ep mer uns wërklich peroyt hon. Un trit: wën eyer fertsayt, tuut eyer uns komplët fertsaye; fer tëm, is es wii wën mer net kesint hëte. Tes weeche, khene mer een sauwer kewise un tëm sayn tsuxtimung hon.

19. Opwool mer imperfekt sin un wayter sinte mache, warom khene mer froo sin?

¹⁹ Kewis, soo lang wii mer imperfekt sin, tuun mer wayter sinte mache. Awer ti wërter woo im puuch Estudo Perspicaz xteen (wolum 1, sayt 210), khene uns treeste: “Yeehoowa is parmhërtslich un tee wees tas sayn tiiner xwach sin. Tes weeche, prayche se net sich ti kans tsayt traurich xpiire wayl se imperfekt sin un wayl se feeler mache. (Psal. 103:8-14; 130:3) Wën se sayn pestes mache fer tëm noo Kot sayn kesetse leepe, khene se froo sin. (Fili. 4:4-6; 1 Yo. 3:19-22)” Was fer xeene wërter, kël?

20. Was tuun mer im neekste artikel siin?

²⁰ Meyer sin petanklich tas Yeehoowa fërtich fer uns fertsaye is wën mer uns wërklich peroye fon unser sinte. Awer wii khene mer Yeehoowa sayn fertsayung noo mache? In was fer aate is unser fertsayung eenlich wii Yeehoowa sayns? Un in was fer aate is tas anerste? Warom is es soo wichtich tiise unerxiit ferxteen? Te neekste artikel tuut tiise frooche antworte.