1. Weeche was tuun etliche priiter pang xpiire?

 KUK MOOL ti neekste situatsyoone woo etliche Yeehoowa sayn Tsayer mit kemacht hon. Nestor un sayn fraa, María, wolte uf een plats tiine woo mee puplikatoore praycht. * Fer tas hin kriin, miste se sayn leepe keweenlicher lose. Awer tii hate pang tas se net wërklich froo weyere wën se weenicher kelt hëte. Biniam leept in een lant woo unser aarwayt ferpoot is. Wii eyer Yeehoowa sayn Tsayer kep is, hot eyer kemërkt tas eyer khent keyacht wëre. Tes weeche, hot eyer pang kriit. Awer tee hot noch mee pang kexpiirt iwer wii sayn familye sich aan xtele teet wën se iwer sayn nay relichyoon tsum wise kreechte. Valérie hot tsum wise kriit tas se een xlim sort kreeps hat, un es waar xweyer fer tii een tokter fine woo sayn mënung iwer pluut respektiirt hot. Tas is tsum ferxteen tas se pang hat tas se xtërpe teet.

2. Warom mise mer uns aan xtrenge fer torich unser pang triwer wech khome?

² Host tuu xon pang kexpiirt weeche eenliche uersache? Fiile fon uns yaa. Wën mer net lërne unser pang kontroliire, tsiimlich sicher tuun mer xlechte ëntxlise mache, woo unser fraayntxaft mit Yeehoowa fersaue khene. Tas is kraat was Satanaas wil hon. Satanaas fersuucht aach te pang keeche uns penutse tas mer noo lose Yeehoowa sayn kesetse foliche — too tepay ti kuute notisye preetiche. (Apo. 12:17) Satanaas is xlecht, krop un hot fiil kraft. Awer tuu khanst tich keeche tëm xitse. Wii?

3. Was tuut uns helfe torich unser pang triwer wech khome?

 ³ Wën mer uns sicher sin tas Yeehoowa uns liipt — tas eyer uf unser sayt is — kriit Satanaas uns net pang kemacht. (Psal. 118:6) Tsum payxpiil: te xrayper fom Psalm 118 hot etliche xweyere situatsyoone mit kemacht. Tee hat fiile faynte, too tepay layt woo wichtich waare (wersikele 9, 10). Als mool, hot eyer aach unertrikung mit kemacht (wersikel 13). Un tee hot een xtark tisipliin fon Yeehoowa kriit (wersikel 18). Noch soo, hot te psalmist kesung: “Ich tuun khee pang hon.” Warom hot eyer sich soo sicher kexpiirt? Tee wust tas sayn Fater im himel tëm keliipt hot, opwool Eyer tëm tisipliniirt hat. Te psalmist waar sich sicher tas ekaal was fer situatsyoon eyer mit mache teet, weyer sayn liipliche Kot imer fërtich fer tëm helfe. (Psal. 118:29)

4. Torich was fer sorte pang khene mer triwer wech khome wën mer uns sicher sin tas Yeehoowa uns liipt?

⁴ Khanst tuu tich noch traan tenke ti priiter un xwestere fom eyerste apsats? Tii hon es hin kriit torich sayn pang triwer wech khome, wayl se sich sicher waare tas Yeehoowa se keliipt hot. Meyer mise uns aach sicher sin tas Yeehoowa uns liipt. Tas tuut uns helfe torich 3 sorte pang triwer wech khome: (1) pang tas mer net unser familye fersoricht kriin; (2) pang fon te mënxe, un (3) pang fom toot.

5. Weeche was tuut een familye xëf sich im xtant ketanke mache? (Kuk tas pilt am aanfang fom piichelche.)

⁵ Ti familye xëfe hon ti flicht fer sayn familye fersoriche, un tii siin tas wii een ërnst flicht. (1 Tim. 5:8) Wëns tuu een familye xëf pist, im xtant host tuu tich ketanke kemacht torich ti pantemii fon coronavirus tas tuu tayn aarwayt ferliire teest. Fiilaycht host tuu tich kefroot: ‘Meecht ich es hin kriin ese un woonung fer mayn familye fersoriche?’ Im xtant, host tuu tich aach soriche kemacht tas, wëns tuu tayn aarwayt ferliire teest, teest tuu net een aner fine. Orer fiilaycht, soo wii Nestor un María, iwer weem mer foner traan kexproch hon, host tuu ketenkt tas es net meechlich fer tich weyer mit weenicher kelt leepe. Fiile layt hon noo kelos Yeehoowa tiine wayl Satanaas tiise sort pang keeche tëne penutst hot.

6. Aan was wil Satanaas tas mer klaape tuun?

⁶ Satanaas fersuucht uns klaape mache tas Yeehoowa uns net liipt, un tas Eyer uns net helfe tuut unser familye fersoriche. Tes weeche, khene mer rechne tas mer mise ales was meechlich is mache fer unser aarwayt hale — soo kaar etwas woo khent unser fraayntxaft mit Yeehoowa fersaue.

7. Was fer sicherheet kept uns Yeesus?

⁷ Nimant khënt Yeehoowa peser wii Yeesus; un tee hot uns ti sicherheet kep: “Ayre Fater wees xon was teyer praycht eep teyer es ferlangt.” (Mat. 6:8) Un Yeesus wees tas Yeehoowa fërtich is fer unser neetichkheete fersoriche. Wii kriste, sin mer teel fon Yeehoowa sayn familye. Wayl Yeehoowa te familye Xëf is, khene mer uns sicher sin tas eyer aach mache tuut was eyer fon te familye xëfe ferlangt in 1^te Timoteus 5:8.

8. (a) Wën mer pang hon tas mer net unser familye fersoricht kriin, was khan uns helfe torich tas triwer wech khome? (Matheus 6:31-33) (b) Tëm noo tas pilt, wii khene mer fiilaycht tas pheyerche noo mache woo ese fer een xwester nëmt?

⁸ Wën mer uns sicher sin tas Yeehoowa uns un unser familye liipt, wërts net xweyer fer uns se klaape tas mer imer tas neetiches kriin tuun. (Lees Matheus 6:31-33.) * Yeehoowa wil uns  tas neetiches xenke, un tee tuut tas mit liip un krooshërtslichkheet mache. Tsum payxpiil: wii eyer ti eyert kemacht hot, hot eyer net ploos uns tas neetiches fer se leepe fersoricht. Mit liip, hot eyer ti eyert fol kemacht mit tinge woo khene uns frooheet kepe. (Xee. 2:9) Soo kaar wën mer ploos kenuuch fer se leepe hon un niks mee, sole mer uns traan tenke: meyer hon was mer prayche. Tas is ploos meechlich wayl Yeehoowa uns uf phast. (Mat. 6:11) Meyer mise uns imer erinere tas ales was Yeehoowa uns yets kept, hot fiil mee weyert wii was mer uf kep hon. Un in te futuer, tuut eyer uns tas eewiche leepe xenke. (Isa. 65:21, 22) Tas is was Nestor un María kemërkt hon.

9. Was host tuu mit Nestor un María sayn payxpiil kelërnt?

⁹ Nestor un María hate een xeen haus un een kuut aarwayt in Kolompya. Tii hon kesaat: “Meyer hon kepleent unser leepe keweenlicher lose un mee fer Yeehoowa mache. Awer, meyer hate pang tas mer net froo weyere wën mer weenicher kelt hëte.” Was hot tëne keholef torich sayn pang triwer wech khome? Tii hon triwer noo ketenkt aan te fiile pewaysunge woo se xon hate tas Yeehoowa se keliipt hot. Wayl se ti sicherheet hate tas Yeehoowa imer se uf phase teet, hon se sayn kuut aarwayt kelos. Tii hon sayn haus ferkhaaft un hon sich kewanert pis een plats in sayn lant woo mee preeticher praycht. Wii tuun se sich xpiire weeche sayn ëntxlus? Nestor saat: “Meyer hon kemërkt tas Matheus 6:33 wërklich woer is. Niks was mer praychte hot uns kefeelt. Un yets hon mer een frooer leepe.”

10. Warom is es tsum ferxteen tas ti mënxe pang fon anere mënxe hon?

¹⁰ Tsayt Aatam un Ewa sayn repelyoon pis hayt, mache ti mënxe sich naner xaate. (Ekl. 8:9) Tsum payxpiil: layt penutse sayn autoriteet fer ti anere xlecht pehantele; kriminoose tuun wyolente kriime mache; in te xuul, kepts etliche woo sayn koleke ferxpote un ferxëne; un etliche tuun soo kaar sayn familye krop pehantele. Tes weeche, es ferwunert uns net tas ti mënxe pang fon anere mënxe hon. Wii fersuucht Satanaas tiise pang fom mënx keeche uns penutse?

11-12. Wii penutst Satanaas te pang fon te mënxe keeche uns?

¹¹ Satanaas wil hon tas mer soo fiil pang fon te mënxe hon, tas mer noo lose se preetiche un anere tinge mache woo Yeehoowa uns ferlangt. Unich Satanaas sayn influëns, hon rechiirunge unser aarwayt ferpoot un uns keyacht. (Luk.  21:12; Apo. 2:10) In Satanaas sayn welt, tuun fiile mënxe falxe informatsyoone un xlechte liie iwer Yeehoowa sayn Tsayer aus prayte. Tii woo aan tiise liie klaape, khene uns ferxpote orer soo kaar atakiire. (Mat. 10:36) Tuun Satanaas sayn pleen uns ferxreke? Kewis net. Tee tuut tas xon penutse fom eyerste yoer hunert aan! (Aph. 5:27, 28, 40)

¹² Awer te pang tas ti rechiirunge sich keeche uns xtele is net ti eensich waf woo Satanaas penutst. Etliche hon pang fon was sayn familye tenke tuut wën se Yeehoowa sayn Tsayer wëre. Als mool hon se mee pang too tefun wii fon ferklopt wëre. Tii liipe sayn parente aarich fiil un wole hon tas se Yeehoowa khëne lërne un liipe. Tii xpiire sich traurich wën se heere sayn parente xlecht iwer Yeehoowa un sayn tiiner xpreche. Als mool, is pasiirt tas ti parente woo keeche tëne waare xpeeter tsu te woerheet khom sin. Awer, un wën unser familye wil niks mee mit uns se tuun hon weeche unser naye klaape? Wii tuun mer uns aan xtele?

13. Wii khan ti sicherheet tas Yeehoowa uns liipt uns helfe wën unser familye sich keeche uns xtelt? (Psalm 27:10)

¹³ Ti xeene wërter im Psalm 27:10 * khene uns aarich treeste. (Lees.) Wën mer uns erinere wii fiil Yeehoowa uns liipt, tuun mer khee pang hon iwer was noch pasiire tuut, soo kaar wën unser familye sich keeche uns xtelt. Un mer sin uns sicher tas Yeehoowa uns peloone tuut weeche unser persewerans. Peser wii kwalkee aner persoon, tuut Yeehoowa unser fiisixe, emotsyonaale un kaystliche neetichkheete uf phase. Tas is was Biniam, iwer weem mer foner traan kexproch hon, raus kefun hot.

14. Was host tuu mit Biniam sayn payxpiil kelërnt?

¹⁴ Biniam is Yeehoowa sayn Tsayer kep opwool eyer wust tas ti rechiirung in sayn lant unser priiter krop am yachte waar. Tee waar sich sicher tas Yeehoowa tëm keliipt hot un tes weeche khont eyer torich te pang fom mënx triwer wech khome. Tee saat: “Ti yachtung waar xlimer wii ich ketenkt hon. Awer etwas hot mich mee pang kep wii ti yachtung fon te rechiirung: ti opositsyoon fon mayn familye. Ich hat pang tas mayn ëntxlus fer Yeehoowa sayn Tsayer wëre, teet mayn papa traurich lose un tas mayn familye teet mich net mee respektiire.” Awer, Biniam waar sich sicher tas Yeehoowa imer uf phast tii woo tëm liipe. Tee saat: “Ich hon mich traan ketenkt wii Yeehoowa xon anere keholef hat ekonoomixe propleeme, prekonseyt un  wyolents aus hale. Ich wust tas wën ich troy tsu Yeehoowa plaype teet, teet eyer mich seechne. Ti autoriteete hon mich phaar mools in kexpërt un ferkweelt; awer ich khont taytlich siin tas Yeehoowa uns imer helfe tuut wën mer troy tsu tëm plaype.” Yeehoowa is een woere Fater fer Biniam kep, un sayn folek is een woer familye fer tëm kep.

15. Warom is es normaal pang fom toot hon?

¹⁵ Ti Piipel saat tas te toot een faynt is. (1 Kor. 15:25, 26) Wën mer iwer te toot tenke, khene mer uns ëngstlich xpiire, hauptseechlich wën meyer orer yemant woo mer liipe een xlim krankheet hot. Warom hon mer pang fom toot? Wayl Yeehoowa uns kemacht hot mit tëm wunx fer eewiche leepe hon. (Ekl. 3:11) Awer, te pang fom toot khan uns helfe unser leepe xitse. Tsum payxpiil: tee khan uns uf muute kuut raus suuche was mer ese, esersiis mache, een tokter suuche orer metitsiin in nëme wën mer es prayche, un uf phase fer net unser leepe ins kefoer xtele.

16. Wii fersuucht Satanaas te pang fom toot keeche uns penutse?

¹⁶ Satanaas wees tas mer weyert fer unser leepe kepe. Awer tee saat tas mer teete ales uf kepe — soo kaar unser fraayntxaft mit Yeehoowa — fer unser leepe hayt hale. (Yoop 2:4, 5) Satanaas is kans ferkheert! Noch soo, wayl eyer “ti kraft hot fer te toot pringe”, fersuucht Satanaas te pang fom toot keeche uns penutse tas mer Yeehoowa im xtich lose. (Hep. 2:14, 15) Als mool, etliche unich Satanaas sayn influëns saan tas se uns um pringe tuun wën mer net fon unser klaape uf kepe. Manich mool, khene mer aach een krankheet mit mache woo unser leepe tsum ën pringe khan; un Satanaas khan tas keeche uns penutse, tas mer noo lose Yeehoowa aan heere. Im xtant, wole ti toktere orer parente woo net Yeehoowa sayn Tsayer sin uns tswinge pluut aan nëme — etwas woo keeche Kot sayn kesetse keet. Orer khan sin tas yemant wil uns rom papele een tratamënt aan nëme woo keeche ti Piipel keet.

17. Tëm noo Romaaner 8:37-39, warom mise mer khee pang fom toot hon?

¹⁷ Meyer wole net xtërpe. Awer mer wise tas, soo kaar wën tas pasiirt, tuut Yeehoowa uns wayter liipe. (Lees Romaaner 8:37-39.) * Wën Yeehoowa sayn fraaynte xtërpe, tee erinert sich fon tëne wii wën se noch am leepe weyere. (Luk. 20:37, 38) Kot wil wërklich fiil tëne tsurik tsum leepe pringe. (Yoop 14:15) Kot hot aach een tayer prays petsaalt tas mer khente eewiche leepe hon. (Yoo. 3:16) Meyer wise tas Yeehoowa uns aarich fiil liipe tuut un tas eyer sich mit uns khimert. Tan, xtats tëm im xtich lose wën mer krank orer foer te toot sin, traue mer uf tëm fer troost, kluucheet un kraft kriin. (Psal. 41:3) Tas is kraat was Valérie un sayn man kemacht hon.

18. Was host tuu mit Valérie sayn payxpiil kelërnt?

¹⁸ Wën Valérie 35  yoore alt waar, hot se tsum wise kriit tas se een unkeweenlich un xlime sort kreeps hat. Kuk mool wii Yeehoowa sayn liip se keholef hot torich te pang fom toot triwer wech khome. Tii saat: “Ich un mayn man hon uns mechtich ferxrok wii mer tsum wise kriit hon tas ich kreeps hat. Ich praycht een kroos operatsyoon mache tas ich wayter leepe khont. Ich hon mit fiile toktere kexproch, awer khee eene wolt ti operatsyoon mache oone pluut traan tuun. Ich hon pang kriit, awer weeche Yeehoowa sayn kesets, hon ich khee pluut aan kenom. Torich mayn kanse leepe, hot Yeehoowa mich fiil liip ketsaycht. Un yets, hat ich ti  xans fer mayn liip tsu tëm tsayche. Imer wën ich een xlecht notisye kriit hon, is mayn pextimung fer Yeehoowa froo mache un net lose Satanaas mich ap kewine, xtërker kep. Mit te tsayt, hon ich ti operatsyoon mit khee pluut kemacht un tii is kuut ap kelaaft. Ich hon noch ti kesuntheet propleem, awer Yeehoowa hot mich imer kep was ich praycht. Tsum payxpiil: kraat in te woch foer ich tsum wise kriit hon tas ich kreeps hat, hon mer te artikel ‘Enfrente com coragem os problemas atuais’ in te fersamlung xtutiirt. * Tiise artikel hot uns fiil ketreest; mer hon tas noo un noo kelees. Soo sorte artikele un een kuut kaystlich rutiin hon uns keholef in ruu plaype un kuute ëntxlise mache.”

19. Was tuut klaych pasiire?

¹⁹ Mit Yeehoowa sayn hilef, khene kriste uf te kans welt torich xweyere situatsyoone triwer wech khome; un tii kriin es aach hin sich keeche te Taywel xtele. (1 Phe. 5:8, 9) Tuu khanst tas aach hin kriin! Klaych, xikt Yeehoowa tas Yeesus un tii woo mit tëm rechiire “te Taywel sayn aarwayt se fermache”. (1 Yo. 3:8) Wën tas pasiirt, niks tuut Kot sayn tiiner too uf te eyert “ëngstlich lose un kaar niks tuut [tëne] pang kepe”. (Isa. 54:14; Mik. 4:4) Awer, pis tiise taach khomt, mise mer uns aan xtrenge fer torich unser pang triwer wech khome.

20. Was tuut uns helfe torich unser pang triwer wech khome?

²⁰ Fer torich te pang triwer wech khome, mise mer unser sicherheet ferxtërke tas Yeehoowa tuut sayn tiiner liipe un xitse. Was khan uns helfe tas mache? Triwer noo tenke un fer ti anere xpreche iwer wii Kot xon sayn troye tiiner in te friirixe tsayte kexitst hot. Un meyer khene uns aach traan tenke wii Yeehoowa uns keholef hot in xweyere situatsyoone. Mit Yeehoowa sayn hilef, khene mer torich unser pang triwer wech khome. (Psal. 34:4)