1. Was ferxprecht Yeehoowa fer tii woo kesint hon awer sich peroyt hon?

 YEEHOOWA is unser Kriatoer, Richter, un Tee woo ti kesetse macht; awer tee is aach unser liipliche Fater im himel. (Psal. 100:3; Isa. 33:22) Wën mer keeche tëm sinte un uns wërklich peroye, hot eyer ti autoriteet un te wunx fer uns kans fertsaye. (Psal. 86:5) Torich te profeet Isaiias, hot Yeehoowa liiplich ferxproch: “Wën ayre sinte aach root sin, wëre se soo ways wii xnee.” (Isa. 1:18)

2. Wën mer wole friit mit te anere hon, was mise mer mache?

² Wayl mer imperfekt sin, tuun mer al tinge mache un saan woo ti anere pelaytiche. (Tya. 3:2) Awer tas wil net saan tas mer khene net een ticht fraayntxaft mit tëne hon. Meyer khene tas hin kriin wën mer lërne se fertsaye. (Xpr. 17:9; 19:11; Mat. 18:21, 22) Wën yemant was kleenes keeche uns macht orer saat woo uns wee tuut, wil Yeehoowa hon tas mer fertsaye. (Kol. 3:13) Un meyer hon kuute uersache fer tas mache, wayl Yeehoowa uns “krooshërtslich fertsayt”. (Isa. 55:7)

3. Was tuun mer in tiise artikel lërne?

³ Wii khene imperfekte mënxe Yeehoowa sayn fertsayung noo mache? Was fer sinte mise tsu te elteste keprung wëre? Warom tuut Yeehoowa uns uf muute ti anere fertsaye? Un was khene mer mit unser priiter un xwestere lërne woo fiil kelit hon weeche ti sinte fon anere? Tas is was mer in tiise artikel lërne tuun.

4. (a) Wën yemant woo Yeehoowa tiint een xweyer sint macht, was mus eyer mache? (b) Was fer flicht hon ti elteste wën se xpreche mit yemant woo een sint kemacht hot?

⁴ Ti xweyere sinte mise tsu te elteste kenom wëre. Meyer khene payxpiile fon soo sorte sinte fine in 1^te Korinter 6:9, 10. Xweyere sinte keen kans tekeeche Yeehoowa sayn kesetse. Wën een krist soo een sint macht, mus eyer fertsayung fer Yeehoowa im kepeet ferlange un mit te elteste xpreche. (Psal. 32:5; Tya. 5:14) Was fer flicht hon ti elteste? Ploos Yeehoowa hot ti autoriteet fer ti sinte kans fertsaye, un tas is meechlich weeche Yeesus Kristus sayn fray khaaf opfer. * Awer, Yeehoowa hot fer ti elteste ti flicht kep fer ëntxlise, tëm noo te Piipel, ep yemant woo een xweyer sint kemacht hot wayter in te kemaynt plaype khan. (1 Kor. 5:12) Fer tas hin kriin, fersuuche se ti antwort fer tiise frooche fine: Hot ti persoon fer kërn kesint? Hot ti persoon fersuucht ti sint fon te anere ferxtekele? Hot ti persoon ti sint noo un noo torich een lang tsayt kemacht? Un tas haupste: kepts pewaysunge tas ti persoon sich wërklich keraut hot? Kepts pewaysunge tas Yeehoowa ti persoon fertsayt hot? (Aph. 3:19)

5. Was fer kuute tinge khome weeche ti aarwayt fon te elteste?

⁵ Wën ti elteste mit een persoon xpreche woo een sint kemacht hot, tëne sayn opjetiiw is aan tëm selwich ëntxlus hin khome woo xon im himel kemacht kep is. (Mat. 18:18) Was fer nutse kriit ti kemaynt too temit? Tii woo sinte mache un sich net peroye — un weeche tas khente xaate fer ti anere xeef pringe — mise tesasosiirt wëre. Tas xitst ti kemaynt. (1 Kor. 5:6, 7, 11-13; Tit. 3:10, 11) Un noch, ti persoon woo een sint kemacht hot, khan aan sich khome, sich peroye un Yeehoowa sayn fertsayung kriin. (Luk. 5:32) Ti elteste tuun peete fer ti persoon woo sich peroyt hot un ferlange tas Yeehoowa ti persoon helft sayn fraayntxaft mit Tëm tsurik kriin. (Tya. 5:15)

6. Wën een persoon tesasosiirt wërt, is es noch meechlich fertsayung kriin? Lee tas aus.

⁶ Xtel tich mool foer tas yemant sich net peroyt wën ti elteste mit tëm xpreche. In tiise situatsyoon, wërt eyer fon te kemaynt tesasosiirt. Wën ti persoon een kesets fom lant iwertreet hot, tuun ti elteste tiise persoon net xitse fon te xlechte resultaate. Yeehoowa erlaupt ti autoriteete richte un xtroofe yeete eene woo ti kesetse iwertreet, ekaal ep ti persoon sich peroyt hot orer net. (Rom. 13:4) Awer wën ti persoon xpeeter erkhënt tas was se kemacht hot ferkheert waar un sayn ketanke un aktsyoone ënert, is Yeehoowa wilich fer se fertsaye. (Luk. 15:17-24) Tas kilt soo kaar wën sayn sinte aarich xweyer waare. (2 Kro. 33:9, 12, 13; 1 Tim. 1:15)

7. In was fer aat khene mer yemant fertsaye woo keeche uns kesint hot?

⁷ Meyer sin aarich petanklich tas mer net ti flicht hon fer se ëntxlise ep yemant woo een xweyer sint kemacht hot, Yeehoowa sayn fertsayung fertiint orer net. Awer es kept etwas woo mer ëntxlise mise. Was is tas? In etliche situatsyoone khan een persoon een sint keeche uns mache, awer xpeeter sich ëntxultiche un ferlange tas mer se fertsaye. Awer khan aach pasiire tas ti persoon tas net macht. Noch soo, khene mer raus suuche ti persoon fertsaye un net pees mit tëne plaype. Es is woer tas es khan fiil tsayt un aanxtrengung khoste, hauptseechlich wën ti persoon uns aarich wee kemacht hot. A Sentinela 15^te Septemper fon 1994 saat: “Wën mer yemant fertsaye woo een sint kemacht hot, es wil net saan tas mer ti sint aan nëme. Een krist woo fertsayt,  traut tas Yeehoowa tuut tas in een perfekt aat richte. Yeehoowa is te kerecht Richter fom kanse Uniwërsum, un tee tuut kerechtichkheet pringe in te richtich tsayt.” Warom tuut Yeehoowa uns uf muute se fertsaye un uf tëm traue fer ti sache in een kerecht aat richte?

8. Wii soo tsayche mer tas mer petanklich sin fer Yeehoowa sayn parmhërtslichkheet wën mer fertsaye?

⁸ Wën mer fertsaye, tsayche mer tas mer petanklich sin fer Yeehoowa sayn parmhërtslichkheet. In een kexicht, hot Yeesus Yeehoowa mit een kheenich ferklaycht. Tee hot een iwer kroos xulte fon een sklaaw fertsayt, wayl te sklaaw tas nii petsaale khent. Awer tiise sklaaw hot net parmhërtslichkheet ketsaycht fer een aner sklaaw woo een fiil kleener xulte mit tëm hat. (Mat. 18:23-35) Was waar Yeesus uns am in lërne? Wën mer petanklich sin fer ti kroos parmhërtslichkheet woo Yeehoowa uns ketsaycht hot, wëre mer uf kemuut ti anere aach fertsaye. (Psal. 103:9) Phaar yoore tsurik, hot Te Wachthorm too triwer kesaat: “Een tuun wii ofts mer ti anere fertsaye, tas khomt kaar net ticht aan wii ofts Yeehoowa uns torich Yeesus fertsayt hot.”

9. Fer weem tuut Yeehoowa parmhërtslichkheet tsayche? (Matheus 6:14, 15)

⁹ Wën mer ti anere fertsaye, tuut Yeehoowa uns fertsaye. Yeehoowa tsaycht parmhërtslichkheet fer tii woo parmhërtslich sin. (Mat. 5:7; Tya. 2:13) Yeesus hot tas taytlich kelos wii eyer sayn tisipele in kelërnt hot se peete. (Lees Matheus 6:14, 15.) * Un mer lërne een eenlich lisyoon mit was Yeehoowa fer sayn troy tiiner Yoop kesaat hot. Ti krope wërter fon Elifas, Piltate un Sofar hon fiil phayn fer Yoop keprung. Awer Yeehoowa hot fer Yoop kesaat tas eyer solt weeche tiise mëner peete. Noo tas Yoop tas kemacht hot, hot Yeehoowa tëm keseechent. (Yoop 42:8-10)

10. Warom pees mit yemant plaype pringt uns xaate? (Ëfeser 4:31, 32)

¹⁰ Meyer mache uns selepst wee wën mer pees plaype. Wën mer pees plaype, is es wii wën mer een xweyer last nëme teete. Awer Yeehoowa wil hon tas mer te friit xpiire woo khomt fon tas lose. (Lees Ëfeser 4:31, 32.) * Yeehoowa saat uns: “Los ti peesheet un los ti wuut im xtich.” (Psal. 37:8) Tas aan heere is aarich kuut. Pees mit te anere plaype pringt ploos xaate fer unser khërper un unser ferxtant. (Xpr. 14:30) Es is wii kift trinke un wole hon tas ti aner persoon xlecht wërt. Es wil saan: es macht ploos uns selepst wee. Tan, wën mer ti anere fertsaye, tuun mer een kexenk fer uns selepst kepe. (Xpr. 11:17) Meyer tuun inerlich friit xpiire un soo khene mer wayter Yeehoowa tiine.

11. Was saat ti Piipel iwer winkans suuche? (Romaaner 12:19-21)

¹¹ Ti winkans keheert tsu Yeehoowa. Yeehoowa hot uns net tas recht kep fer yemant woo keeche uns kesint hot xtroofe. (Lees Romaaner 12:19-21.) * Weeche unser imperfektsyoon, khene mer net ti sache perfekt richte soo wii Kot. (Hep. 4:13) Un als mool, khene unser xpiirunge uns plint mache un xweyer fer uns lose te richtich ëntxlus mache.  Yeehoowa hot Tyako kelënkt se xraype: “Ti wuut fom mënx pringt net Kot sayn kerechtichkheet.” (Tya. 1:20) Meyer khene uns sicher sin tas Yeehoowa tuut tas richtiches mache un kerechtichkheet pringe.

12. Wii khene mer tsayche tas mer uf Yeehoowa sayn kerechtichkheet traue?

¹² Wën mer fertsaye, tsayche mer tas mer uf Yeehoowa sayn kerechtichkheet traue. Wën mer ti sache in Yeehoowa sayn hënt lose, tsayche mer tas mer ti sicherheet hon tas Yeehoowa tuut te kanse xaate fermache woo ti sint keprung hot. In sayn ferxprochne nay welt, ti ketanke woo uns wee mache “wëre net mee erinert un tuun net mee ins hërts khome” — nii mee! (Isa. 65:17) Awer, un wën yemant uns aarich wee kemacht hot? Is es wërklich meechlich noo lose pees un piterlich mit tëm plaype? Etliche hon es hin kriit, un mer wole iwer tëne sayn payxpiil xpreche.

13-14. Was host tuu iwer fertsayung kelërnt mit Tony un José sayn speryens?

¹³ Fiile fon unser priiter un xwestere hon ëntxlist se fertsaye, wën aach ti aktsyoone fon te anere tëne fiil wee kemacht hate. Was fer seechen hon se kriit wayl se fertsayt hon?

¹⁴ Tony * is een pruuter woo in te Filipinas leept. Fiile yoore eep Tony ti woerheet kelërnt hot, hot eyer tsum wise kriit tas eene man, woo José heest, hot eene fon sayn priiter um keprung. In tiise tsayt, waar Tony een wyolënt persoon un wolt winkans hon. José is weeche tiise kriim in kexpërt kep. Xpeeter, wii José pefrayt kep is, waar Tony pextimt tëm fine un um pringe. Tee hot soo kaar een rewolwer khaaft fer tas mache. Too, hot Tony aan kefang mit Yeehoowa sayn Tsayer xtutiire. Tee saat: “Wii ich xtutiirt hon, hon ich kemërkt tas ich mist mayn personaliteet un aktsyoone ënere; un too tepay waar ti peesheet im xtich lose.” Mit te tsayt, hot Tony sich taafe kelos un xpeeter is eyer een elteste kep. Iwerlee tich wii Tony sich ferwunert hot wii eyer tsum wise kriit hot tas José aach Yeehoowa sayn Tsayer kep is! Wii ti tswaay sich ketrof hon, hon se sich een umaarem kep, un Tony hot fer José kesaat tas eyer tëm fertsayt hat. Tony saat tas José fertsaye, hot tëm soo een kroos frooheet keprung tas eyer  tas kaar net aus leye khan. Yawool, Yeehoowa hot Tony keseechent wayl eyer wilich waar fer se fertsaye.

15-16. Was host tuu iwer fertsayung kelërnt mit Peter un Sue sayn speryens?

¹⁵ In 1985, waare Peter un Sue in een fersamlung im Raych Saal; too, uf een momënt, is een pomp ferplatst. Een man hat een pomp im Raych Saal ferxtekelt. Sue hot sich mechtich wee kemacht un tas hot xlechte resultaate keprung. Tii khont net mee kuut siin un heere. Un tii khan aach net mee te keruch fon te tinge mërke. * Peter un Sue hon sich ofts kefroot: ‘Was fer sort persoon teet soo een xlecht tings mache?’ Fiile yoore tëm noo, hon se te kriminoos, woo khee Yeehoowa sayn Tsayer waar, kefang. Tëm sayn xtroof waar tas kanse leepe in te katee plaype. Wën se fer Peter un Sue kefroot hon ep se te man fertsayt hate, hon se kesaat: “Yeehoowa lërnt uns tas wayter wuutich un piterlich plaype, khan xaate fer unser xpiirunge, khërper un ketanke mache. Tan, klaych noo tëm unklik, hon mer fer Yeehoowa ferlangt fer uns helfe fertsaye tas mer khente wayter im friit leepe.”

¹⁶ Is es laycht fer tëne te man fertsaye? Net imer. Tii tuun noch saan: “Wën Sue weeche ti wee woo keplip sin layte tuut, kepe mer noch mool wuutich. Awer, meyer tuun net wayter too triwer tenke; tan, tuun tiise xpiirunge klaych ferkeen. In woerheet, khene mer eerlich saan tas, wën een taach te kriminoos Yeehoowa tiine teet, teete mer tëm hërtslich wilkhome. Tiise speryens hot uns in kelërnt tas wën mer ti piiplixe funtamente aan wëne, xpiire mer uns fray. Yaa, ti piiplixe funtamente tuun uns pefraye in mee aate wii mer uns foer xtele khene! Meyer wëre aach ketreest wayl mer wise tas klaych tuut Yeehoowa te kanse xaate fermache.”

17. Was host tuu iwer fertsayung mit Myra sayn speryens kelërnt?

¹⁷ Myra hot ti woerheet kelërnt wii se xon ferhayrat waar un 2 kleene puupe hat. Sayn  man hot net ti woerheet aan kenom. Mit te tsayt, hot eyer atultëryo kemacht un ti familye im xtich kelos. Myra saat: “Wii mayn man mich un unser 2 khiner im xtich kelos hot, hon ich kexpiirt was fiile xon kexpiirt hon wën se fon een keliipte hinerkang sin; ich waar ferxrok, hon net keklaapt tas es am pasiire waar, hon mich traurich un xultich kexpiirt un sin pees kep.” Opwool ti hayrat tsum ën khom is, hot se wayter phayn kexpiirt, wayl sayn man se hinerkang hat. Myra tuut noch saan: “Torich phaar moonate, hon ich mich wayter ëngstlich un pees kexpiirt. Un ich hon kemërkt tas tiise xpiirunge waare mayn fraayntxaft mit Yeehoowa un ti anere am petrefe.” Hayt, saat Myra tas se net mee pees is un tii winxt aach niks xlechtes fer sayn friirixe man. Myra sayn hofnung is tas eene taach eyer sich ticht pay Yeehoowa xaft. Yets, halt se sich aan te futuer traan. Tii hot sayn 2 khiner aleen ketsoo un hayt, is Myra aarich froo wayl tii khan Yeehoowa mit sayn khiner un tëne sayn familye tiine.

18. Was fer sicherheet khene mer iwer Yeehoowa, te Heechste Richter, hon?

¹⁸ Es pringt uns fiil friit tas mer net ëntxlise mise wii ti layt kericht wëre sole. Wii te Heechste Richter, tuut Yeehoowa tiise wichtich aarwayt uf phase. (Rom. 14:10-12) Meyer khene uns sicher sin tas eyer imer richte tuut tëm noo sayn perfekte kesetse. (Xee. 18:25; 1 Khe. 8:32) Tee tuut nii was unkerechtes mache!

19. Was tuut pasiire weeche Yeehoowa sayn perfekt kerechtichkheet?

¹⁹ Meyer tuun hërtslich waarte te taach woo Yeehoowa kans fermacht al ti xlechte resultaate fon te imperfektsyoon un ti sint. In tiise tsayt, wëre al unser fiisixe un emotsyonaale wee fer imer keheelt. Tii tuun net mee ins hërts khome. (Psal. 72:12-14; Apo. 21:3, 4) Soo lang wii mer tiise wunerlich tsayt waarte, sin mer aarich petanklich tas Yeehoowa uns ti apiliteet kep hot fer tëm noo mache un ti anere fertsaye.