FIILE khëne tas kexicht iwer Yeesus sayn toot — tas eyer uf een kweel phoste, tswixich 2 xpitspuupe, aan kenaachelt waar. (Mat. 27:35-38) Awer etliche klaape net tas ti Piipel richtich is wën se saat tas Yeesus sayn khërper fer tas pekreepnis foer perayt kep is un nochter pekraapt waar. (Mar. 15:42-46)

Etliche woo keeche ti Ewankeelye xpreche, hon ketswayfelt tas yemant woo in een kweel phoste um keprung kep is, khent wërklich een normaale pekreepnis kriin. Tii rechne tas ti xpitspuupe tsiimlich sicher anerste pehantelt waare. Te jornalist Ariel Sabar hot im piichelche Smithsonian aus keleet warom se soo tenke: “Ploos ti xlimste mënxe sin uf een krayts aan kenaachelt kep. Un etliche kelërntne layt tenke tas es net xtimt tas ti romaaner teete fer soo sorte mënxe ti eer kepe fer een normaale pekreepnis hon.” Ti romaaner wolte ti xpitspuupe kans niter xtele. Tes weeche, hon se ofts ti khërper aan te phoste kelos tas ti wilte tiere tëne frese teete. Xpeeter, hon se was fom khërper iwrich keplip is, in een keweenlich kraap rin kexmis.

Awer ti arkeoloxii hot was aneres ketsaycht — ferweenichst iwer etliche yuuter woo um keprung kep sin. In 1968, hon se ti knoche kefun fon een man woo im eyerste yoer hunert um keprung kep is. Tii waare in een yiitix familye kraap neewich Yeruusalem, in een khaste fol knoche trin. Too tepay, waar te knoche fon een feerst kewees. Ti feerst waar in een pret aan kenaachelt (te ayse naachel waar 11,5 cm lang). Sabar saat: “Ti feerst waar fon een man woo Yehochanan keheest hot. Tiise feerst hot pewaysunge kep tas tas kexicht in te Ewankeelye iwer Yeesus sayn pekreepnis im xtant woer is. (…) Weeche Yehochanan sayn feerst, wise mer tas eene man — woo in Yeesus sayn taache uf een krayts aan kenaachelt waar — hot erlaupnis fon te romaaner kriit fer een yiitixe pekreepnis hon.”

Meecht tiise feerst knoche tsayche wii Yeesus aan kenaachelt waar? Es kept noch unerxiitliche mënunge too triwer. Awer tiise knoche tsaycht tas ferweenichst etliche xpitspuupe hon een normaale pekreepnis kriit; tii sin net in een keweenlich kraap rin kexmis kep. Es is taytlich tas ti Piipel richtich is wën se saat tas Yeesus een normaale pekreepnis hat. Ti pewaysunge tsayche tas es wërklich soo pasiirt is.

Awer noch wichticher: Yeehoowa hot foer raus kesaat tas Yeesus teet im kraap fon een rayche man pekraapt wëre un nimant khan Kot sayn Wort um hale sich erfiile. (Isa. 53:9; 55:11)