1. Was helft Yeehoowa sayn folek tëm wayter aan peete opwool ti propleeme?

 TI PIIPEL saat tas mer in “xlime tsayte [leepe], woo xweyer [sin] fer um se keen”. (2 Tim. 3:1) Yeehoowa sayn folek macht ti propleeme mit woo ti layt in Satanaas sayn xlechte welt mit mache. Awer wayl mer Yeehoowa tiine, tuun mer aach opositsyoon un yachtung layte. Was tuut uns helfe Yeehoowa wayter aan peete, opwool tiise propleeme? Een wichtich tings is tas mer xon kemërkt hon in unser aychne leepe tas Yeehoowa “te lepeentiche Kot” is. (Yee. 10:10; 2 Tim. 1:12)

2. In was fer aat is Yeehoowa te “lepeentiche Kot”?

² Yeehoowa is een echt Persoon woo uns helft torich ti proope un woo oportuniteete suucht fer uns unerxtitse. (2 Kro. 16:9; Psal. 23:4) Wën mer uns traan tenke tas Yeehoowa sich mit uns khimert un imer fërtich is fer uns helfe, kriin mer kraft fer kwalkee proop aus hale. Kuk mool wii tas mim kheenich Tawi pasiirt is.

3. Was wolt Tawi saan mit te wërter “Yeehoowa leept”?

³ Tawi hot Yeehoowa kuut kekhënt un hot uf Tëm ketraut. Wii te kheenich Saul un anere faynte tëm keyacht hon, hot Tawi hilef tsu Yeehoowa in kepeet ferlangt. (Psal. 18:6) Kot hot sayn kepeet keantwort un tëm keret. Tes weeche, hot Tawi kesaat: “Yeehoowa leept!” (Psal. 18:46) Was wolt Tawi too temit saan? Een puuch leet aus tas Tawi wolt sayn fertraung tsayche tas Yeehoowa “te woere Kot is, woo sayn folek imer helfe wil”. Yawool, Tawi waar sich sicher tas Yeehoowa kemërkt hot was mit tëm pasiirt is un fërtich waar fer tëm helfe. Tas hot Tawi uf kemuut wayter Yeehoowa tiine un loope. (Psal. 18:28, 29, 49)

4. Was fer nutse kriin mer wën mer Yeehoowa wii te lepeentiche Kot siin?

 ⁴ Wën mer uns sicher sin tas Yeehoowa te lepeentiche Kot is, tas khan uns helfe tëm flaysich tiine. Meyer kriin ti kraft fer ti proope aus hale un aach ti muut fer wayter in Kot sayn tiinst xtram xafe. Meyer wëre aach pextimt ticht pay Yeehoowa plaype.

TE LEPEENTICHE KOT FERXTËRKT TICH

5. Was kept uns ti sicherheet tas mer ti proope aus hale khene? (Filiper 4:13)

⁵ Meyer khene kwalkee proop aus hale — ti kleene un ti kroose — wën mer uns traan tenke tas Yeehoowa leept un tas eyer fërtich fer uns helfe is. Tee khan uns mit kwalkee proop helfe, wayl niks is tsu xweyer fer tëm. Tee is te Ale Mechtiche Kot un tee khan uns ti kraft fer aus hale kepe. (Lees Filiper 4:13.) a Tes weeche, khene mer ti sicherheet hon tas mer ti proope aus hale khene. Wën mer Yeehoowa sayn hilef mërke in te kleene proope, kriin mer ti sicherheet tas eyer uns aach helfe tuut in te kroose proope.

6. Wii Tawi yung waar, was fer situatsyoone hon sayn fertraung uf Kot ferxtërkt?

⁶ Kuk mool 2 situatsyoone woo Tawi sayn fertraung uf Yeehoowa ferxtërkt hon. Wii eyer een yunge xeefer waar un te trop xeef fon sayn papa uf kephast hot, hon een leep un, een aner mool, een pëer een xoof fom trop wech kefang. In tiise 2 situatsyoone hot Tawi mit koraaj ti wilte tiere noo keyacht un ti xeef keret. Awer Tawi hot net ketenkt tas eyer tas aleen kemacht kriit hat: tee wust tas Yeehoowa too hiner traan waar. (1 Sam. 17:34-37) Tawi hot sich nii fon tiise situatsyoone ferkes. Wii eyer sich too traan ketenkt hot, hot eyer ti sicherheet kriit tas te lepeentiche Kot tëm aach im futuer ferxtërke teet.

7. Aan was hot Tawi sich traan kehal un wii hot tas tëm keholef keeche Kolias khëmpfe?

⁷ Xpeeter, wii Tawi noch yung waar, is eyer tsum akampament fon Israël sayn militeer kang. Tee hot tsum wise kriit tas ti soltaate fiil pang hate wayl een mechtich kroose filisteer, woo Kolias keheest hot, waar tas militeer fon Israël am ferxpote. (1 Sam. 17:10, 11) Ti soltaate hate pang, wayl se sich traan kehal hon aan wii kroos Kolias waar un aan tëm sayn wërter. (1 Sam. 17:24, 25) Awer Tawi hot sich aan was aneres traan kehal. Tee wust tas, wën Kolias tas militeer fon Israël am ferxpote waar, waar tee in woerheet “tas militeer fom lepeentiche Kot” am ferxpote. (1 Sam. 17:26) Tawi hot aan Yeehoowa ketenkt un tee waar sich sicher tas te Kot woo tëm keholef hot wii eyer een xeefer waar, teet tëm aach yets sicher helfe. Tes weeche, hot eyer keeche Kolias kekhëmpft un tëm ap kewun. (1 Sam. 17:45-51)

8. Was khan unser fertraung uf Yeehoowa ferxtërke wën mer proope mit mache? (Kuk aach tas pilt.)

⁸ Meyer khene aach ti proope aus hale wën mer uns traan tenke tas te lepeentiche Kot fërtich is fer uns helfe. (Psal. 118:6) Meyer khene uns noch sicher too tefun sin wën mer noo kuke was Yeehoowa friier kemacht hot. Lees piiplixe kexichte woo tich helfe tich traan tenke wii Yeehoowa sayn friirixe tiiner keholef hot. (Isa. 37:17, 33-37) Tuu khanst aach ti speryense fon unser priiter hayt tsu taach leese orer kuke im site jw.org. Tiise speryense lose es taytlich wii Yeehoowa sayn tiiner hayt helft. Tuu tich aach traan tenke fon te tsayte woo Yeehoowa tich keholef hot. Mach tich net ketanke wën Yeehoowa net was wunerliches fer tich kemacht hot, soo wii tich fon een leep orer een pëer rete. Ti woerheet is  tas Yeehoowa xon fiile tinge fer tich kemacht hot. Tee hot tich in kelaat fer sayn fraaynt wëre. (Yoo. 6:44) Weeche tëm sayn hilef, pist tuu noch in te woerheet. Was mënst tuu Yeehoowa sayn hilef ferlange fer tich traan tenke situatsyoone woo eyer tayn kepeete keantwort hot, hilef kraat in te richtich tsayt kep hot orer tich uf kephast hot torich een xweyer situatsyoon? Too triwer noo tenke, tuut tayn sicherheet ferxtërke tas Yeehoowa tich wayter helfe tuut.

9. Wii sole mer unser proope siin? (Xpriiche 27:11)

⁹ Yeehoowa wii unser lepeentiche Kot siin, tuut uns helfe ti richtich mënung iwer unser proope hon. Wii soo? Wën mer proope mit mache, mise mer uns traan hale aan was tas haupste is. Satanaas saat tas, wën mer xwiirichkheete mit mache, tuun mer Yeehoowa im xtich lose. Soo, ti aat wii mer uns foer ti proope aan xtele, petreft Yeehoowa sayn xpiirunge. (Yoop 1:10, 11; lees Xpriiche 27:11. b) Wën mer troy tsu Yeehoowa plaype foer ti proope, pewayse mer unser liip tsu tëm un meyer tsayche tas te Taywel een liichner is. Was fer propleeme tuust tuu mit mache? Khan sin tas ti rechiirung fom plats woos tuu woonst sich keeche Yeehoowa sayn Tsayer xtelt. Im xtant, machst tuu ekonoomixe propleeme mit orer fiilaycht tuust tuu in te preetich aarwayt keen, awer nimant wil tich heere. Orer khan sin tas tuu noch anere propleeme mit machst. Wën tas soo is, eriner tich tas tayn situatsyoon kept tich ti oportuniteet fer Yeehoowa sayn hërts froo lose. Eriner tich aach tas Yeehoowa nii lose tuut tas tuu mee fersuucht wërst wiis tuu aus hale khanst. (1 Kor. 10:13) Tee tuut tich ti kraft kepe fer aus hale.

TE LEPEENTICHE KOT TUUT TICH PELOONE

10. Was macht te lepeentiche Kot fer tii woo tëm aan peete?

¹⁰ Yeehoowa tuut imer peloone tii woo tëm aan peete. (Hep. 11:6) Tee helft uns in friit un  tsufriite hayt sin un tee kept uns eewiche leepe im futuer. Meyer traue tas Yeehoowa te wunx un ti kraft hot fer uns peloone. Tes weeche, tuun mer wayter unser pestes mache fer tëm aan peete soo wii sayn tiiner in te friirixe tsayte es kemacht hon. Eene payxpiil is Timoteus. (Hep. 6:10-12)

11. Was hot Timoteus uf kemuut xtram in te kemaynt xafe? (1 Timoteus 4:10)

¹¹ Lees 1 Timoteus 4:10. c Timoteus hot ketraut tas te lepeentiche Kot tëm peloone teet. Tes weeche hot eyer fer Yeehoowa un ti anere xtram kexaft. Wii hot eyer tas kemacht? Te aphostel Phaul hot tëm uf kemuut een peser leerer sin in te kemaynt un in te preetich aarwayt. Phaul hot tëm aach uf kemuut een kuut payxpiil fer ti priiter sin, ekaal ep se yinger orer elter weyere. Un tee hot aach etliche xweyere flichte kriit, soo wii xtarke, awer liipliche aanreete kepe fer tii woo es praychte. (1 Tim. 4:11-16; 2 Tim. 4:1-5) Als mool hon ti anere net kemërkt ti xweyer aarwayt woo Timoteus kemacht hot, orer khan sin tas se net petanklich too teweeche waare. Awer Timoteus waar sich sicher tas Yeehoowa tëm peloone teet. (Rom. 2:6, 7)

12. Warom tuun ti elteste xtram in te kemaynt xafe? (Kuk aach tas pilt.)

¹² Ti elteste hayt khene sich aach sicher sin tas Yeehoowa mërkt un weyert kept fer sayn xeen aarwayt. Fiile elteste tuun net ploos preetiche, in lërne un ti xeef uf phase, awer aach in te paueray proyëkte fon te Orkanisatsyoon un in te umaniteer hilef xafe. Anere tiine in te Krupe fer ti pasyente pesuuche orer in te Krankehaus Ferpiinungs Komisyoone. Ti elteste wise tas ti kemaynt tsu Yeehoowa keheert, net tsu te mënxe. Tes weeche, xafe se xtram in te kemaynt mit te sicherheet tas Yeehoowa se peloone tuut weeche ales was se mache. (Kol. 3:23, 24)

13. Wii xpiirt sich Yeehoowa iwer was mer fer tëm mache?

 ¹³ Net al khene elteste sin. Awer meyer al hon etwas woo mer tsu Yeehoowa kepe khene. Tee kefalt sich aarich fiil wën mer unser pestes mache fer tëm tiine. Tee mërkt unser kontripuytsyoone fer ti weltwayt aarwayt, soo kaar wën mer net fiil kepe khene. Tee frayt sich wën mer unser hant uf heepe, aach wën mer pleet sin, fer in te fersamlunge komentiire un wën mer fertsaye tii woo uns pelaytiche. Soo kaar wëns tuu tenkst tas tuu net fiil fer Yeehoowa mache khanst, say tich sicher tas eyer weyert too tefoer kept. Tee liipt tich too teweeche un tee tuut tich peloone. (Luk. 21:1-4)

PLAYP TICHT PAYM LEPEENTICHE KOT

14. Wën mer ticht pay Yeehoowa plaype, wii tuut tas uns helfe troy tsu tëm sin? (Kuk aach tas pilt.)

¹⁴ Wën Yeehoowa reaal fer uns is, wërt tas laychter fer uns troy tsu tëm plaype. Tas is mit Yoosef pasiirt. Tee hot ti imoraaliteet fest ap kextos. Kot waar reaal tsu tëm un tee wolt niks mache woo Tëm traurich lose khent. (Xee. 39:9) Wën mer wole hon tas Yeehoowa reaal fer uns wërt, mise mer tsayt hoole fer tsu tëm peete un sayn Wort xtutiire. Soo, tuun mer unser fraayntxaft mit tëm ferxtërke. Wën mer een ticht fraayntxaft mit Yeehoowa hon, soo wii Yoosef hat, wole mer niks mache woo Tëm traurich lose khent. (Tya. 4:8)

15. Was fer lisyoon khene mer lërne fon was mit te israeliiter pasiirt is? (Hepreeyer 3:12)

¹⁵ Tii woo sich ferkese tas Yeehoowa te lepeentiche Kot is, khene sich laycht fon tëm ap lenke. Kuk mool was mit te israeliiter pasiirt is wii se im tesërt waare. Tii wuste tas Yeehoowa eksistiirt hot, awer tii hon aan kefang se tswayfele tas eyer se fersoriche teet. Tii hon soo kaar kefroot: “Is Yeehoowa tswixich uns orer net?” (Eeks. 17:2, 7) Tes weeche, hon se sich keeche Kot repeliirt. Kewis, wole mer net sayn xlecht payxpiil noo keen un unfolich wëre. (Lees Hepreeyer 3:12.) d

16. Was khent unser klaape proope?

 ¹⁶ Ti welt lost es xweyer fer uns ticht pay Yeehoowa plaype. Fiile saan tas Kot net eksistiirt. Ofts, siits aus tas tii woo Kot sayn kesetse ap xtose een kuute leepe hon. Wën mer tas siin, khan unser klaape keproopt wëre. Opwool mer klaape tas Kot eksistiirt, khene mer aan fange se tswayfele tas eyer uns helfe tuut. Te xrayper fom Psalm 73 hot was eenliches mit kemacht. Ti layt um tëm rom hon Yeehoowa sayn kesetse ap kextos, awer noch soo, hate se een kuute leepe. Tes weeche, hot eyer aan kefang sich frooe ep Yeehoowa tiine, sich loone teet. (Psal. 73:11-13)

17. Was tuut uns helfe ticht pay Yeehoowa plaype?

¹⁷ Was hot te psalmist keholef sayn mënung ënere? Tee hot aan kefang se tenke iwer was pasiire teet mit tëne woo noo lose aan Yeehoowa traue. (Psal. 73:18, 19, 27) Tee hot aach ketenkt aan te nutse woo ma kriit wën ma Kot tiint. (Psal. 73:24) Meyer khene aach triwer noo tenke aan te seechen woo Yeehoowa uns xon kep hot. Tan khene mer tas ferklayche mit wii unser leepe weyer wën mer Yeehoowa net tiine teete. Tas mache, tuut uns helfe troy plaype un, soo wii te psalmist, tuun mer saan: “Fer mich, is es kuut ticht pay Kot khome.” (Psal. 73:28)

18. Warom prayche mer khee pang fom futuer hon?

¹⁸ Meyer khene kwalkee proop in tiise letste taache aus hale wayl mer “sklaawe fom lepeentiche un woere Kot” sin. (1 The. 1:9) Unser Kot is een echt Persoon, woo helft tii woo tëm aan peete. Tee hot sayn tiiner in te friirixe tsayte keholef un tee macht tas selwiche hayt. Klaych tuun mer ti kreest tripulatsyoon woo ti eyert xon petrof hot, mit mache. Awer meyer wëre net aleen: Yeehoowa wërt pay uns sin. (Isa. 41:10) Soo, wole mer “fol koraaj sin un saan: ‘Yeehoowa is mayn helfer; ich tuun khee pang hon’.” (Hep. 13:5, 6)