XTUUTYUM ARTIKEL 23
LIIT 28 Unser froyntxaft mit Yeehoowa
Kot wil hon tas mer sayn fraaynte wëre
“Mayn parak wërt mit tëne sin, un ich wëre sayn Kot sin.”(ESEKYËL 37:27)
WAS TUUN MER SIIN?
Tiise artikel leet aus was petayt een inkelaatne in Yeehoowa sayn parak sin un wii eyer uns uf phase tuut.
1-2. Was fer inlaatung macht Yeehoowa fer sayn troye aanpeeter?
WËN yemant tich frooe teet “Weer is Yeehoowa fer tich?”, was teest tuu saan? Fiilaycht teest tuu antworte: “Yeehoowa is mayn Fater, mayn Kot un mayn Fraaynt.” Un es kept anere wërter woos tuu im xtant penutse teest fer Yeehoowa pexraype. Awer host tuu xon ketenkt tas tuu khenst eene fon Yeehoowa sayn inkelaatne wëre?
2 Wii te kheenich Tawi kexproch hot iwer Yeehoowa sayn fraayntxaft mit sayn aanpeeter, hot eyer Kot sayn troye tiiner mit inkelaatne ferklaycht un Yeehoowa mit te persoon woo se in Sayn parak aan nëmt. Tee hot kefroot: “Oo Yeehoowa, weer khan in tayn parak woone? Weer khan uf tayn haylich përich woone?” (Psal. 15:1) Mit tiise inspiriirte wërter, lërne mer tas mer khene Yeehoowa sayn inkelaatne sin — es wil saan, sayn fraaynte. Tas is wërklich een kroos eer!
YEEHOOWA WIL HON TAS MER SAYN INKELAATNE WËRE
3. Weer waar Yeehoowa sayn eyerste inkelaatne un was waare sayn xpiirunge eene noom aner kewees?
3 Eep Yeehoowa aan kefang hot ales mache, waar eyer aleen kewees. Awer tan, hot eyer sayn eyerste kepoerne Soon kemacht. Es waar wii wën Yeehoowa sayn eyerste inkelaatne in sayn parak aan kenom hët, un Tee waar froo too temit. Ti Piipel saat tas Kot sayn Soon waar tëm “sayn kreest frayt”; un sayn Soon hot sich “foer [Yeehoowa] ti kans tsayt kefrayt”. (Xpr. 8:30)
4. Weer noch sin Yeehoowa sayn inkelaatne kep?
4 Xpeeter, hot Yeehoowa ti engele kemacht un tii sin aach Sayn inkelaatne kep. Ti Piipel nënt ti engele ‘Kot sayn soone’ un tsaycht tas se sich fraye wayl se mit Yeehoowa sin. (Yoop 38:7; Tan. 7:10) Torich fiile yoore, waare Yeehoowa sayn inkelaatne ploos tii woo im himel mit tëm keleept hon. Xpeeter hot Kot ti mënxe kemacht un tii khonte aach sayn inkelaatne wëre. Etliche fon tiise inkelaatne waare Enok, Noee, Apraham un Yoop. Ti Piipel tsaycht tas se Yeehoowa sayn fraaynte waare wayl se tëm kefolicht hon. (Xee. 5:24; 6:9; Yoop 29:4; Isa. 41:8)
5. Was khene mer lërne mit te profetsii in Esekyël 37:26, 27?
5 Torich ti yoore, hot Yeehoowa wayter sayn fraaynte in kelaat fer in sayn parak rin khome. (Lees Esekyël 37:26, 27.) a Tsum payxpiil: in Esekyël sayn profetsii, lërne mer tas Yeehoowa wil hon tas sayn leaale tiiner een ticht fraayntxaft mit tëm hon. Kot ferxprecht “een pakt fon friit mit tëne mache”. Tiise profetsii xprecht iwer een tsayt wën Yeehoowa sayn tiiner — ekaal ep sayn hofnung im himel orer uf te eyert leepe is — wëre mitsamer wii ploos “een trop xeef” in tëm sayn parak. (Yoo. 10:16) Tas is hayt am pasiire!
KOT PHAST UNS UF EKAAL WOO MER SIN
6. (a) Wii tuut yemant aan Yeehoowa sayn parak rin khome? (b) Woo is Yeehoowa sayn parak?
6 In te friirixe tsayte, een persoon sayn parak waar een plats fer se ruue un xuts fom weter kriin. Een inkelaatne aan yemant sayn parak weyer kuut uf kephast. Wën mer unser leepe tsu Yeehoowa tetikiire, wëre mer inkelaatne in sayn simpoolix parak. (Psal. 61:4) Tat hon mer fiil kaystlich esmitel un aach ti fraayntxaft mit anere woo in Yeehoowa sayn parak rin khom sin. Layt fon ale lënter khene inkelaatne in Yeehoowa sayn parak sin. Wëns tuu tsu een aner lant kereest pist — fiilaycht weeche een spetsyaal konkrës —, khan sin tas tuu anere ketrof host woo aach ti frooheet hon fer in Kot sayn parak sin. Wën mer Yeehoowa troy tiine, khene mer inkelaatne in sayn parak wëre, ekaal woo mer leepe. (Apo. 21:3)
7. Warom khene mer saan tas Kot sayn tiiner woo xon kextorep sin, noch inkelaatne in Yeehoowa sayn parak sin? (Kuk aach tas pilt.)
7 Un Kot sayn tiiner woo xon kextorep sin? Sin se noch inkelaatne in Yeehoowa sayn parak? Yawool! Warom khene mer tas saan? Wayl tii sin noch in Yeehoowa sayn ketanke. Yeesus hot aus keleet: “Soo kaar Mooses hot ketsaycht tas ti toote uf keruuft wëre, im kexicht fom taarne phutx, wën eyer Yeehoowa wii ‘Kot fon Apraham, Kot fon Isak un Kot fon Yaakop’ keruuft hot. Eyer is Kot, net fon te toote, awer fon te lepeentiche, wayl fer tëm, tuun se al leepe.” (Luk. 20:37, 38)
Soo kaar troye layt woo kextorep sin, khene noch inkelaatne in Kot sayn parak sin (Kuk te apsats 7.)
TI NUTSE UN FLICHTE FON KOT SAYN INKELAATNE
8. Was fer nutse kriin Yeehoowa sayn inkelaatne woo in sayn parak sin?
8 Een persoon woo in een parak rin khomt, khan ruue un aach xuts fom weter fine. Kraat soo, in Kot sayn parak, kriin mer een hofnung fer te futuer un aach xuts fon kwalkee tings woo khent unser fraayntxaft mit tëm fersaue. Wën mer ticht pay Yeehoowa plaype, khan Satanaas kaar niks mache woo uns eewiche xaate pringe khent. (Psal. 31:23; 1 Yo. 3:8) In te nay welt, tuut Yeehoowa wayter sayn fraaynte xitse — net ploos fom kaystlich xaate, awer aach fom toot. (Apo. 21:4)
9. Was waart Yeehoowa tas sayn inkelaatne mache?
9 Es is wërklich een eer een inkelaatne in Kot sayn parak sin. Meyer khene een ticht fraayntxaft mit tëm hon — een fraayntxaft woo fer imer hale khan. Awer wën mer wole wayter Yeehoowa sayn inkelaatne sin, wii sole mer uns aan xtele? Wëns tuu tsu yemant sayn haus in kelaat wërst, teest tuu kërn wise was eyer fon tich waart. Tsum payxpiil: fiilaycht waart eyer tas tuu tayn xuu aus tsiist eeps tuu rin khomst, un sicher teest tuu tas mache. Kraat soo, wole mer aach wise was Yeehoowa ferlangt fon tëne woo wole wayter sayn inkelaatne sin. Unser liip tsu Yeehoowa muut uns uf uns aan xtrenge fer “tee in ales tsufriite [lose]”. (Kol. 1:10) Es is woer tas Yeehoowa unser fraaynt is, awer tee is aach unser Kot un Fater, woo unser respekt fertiint. (Psal. 25:14) Tes weeche, sole mer tas nii ferkese un tëm imer tiif respektiire. Soo een sort respekt tuut uns helfe uns wech hale fon kwalkee tings woo tëm pelaytiche khent. Meyer wole imer unser “Kot mit teemuut aan [heere]”. (Mik. 6:8)
KOT HOT KHEE UNERXIIT TSWIXICH TI ISRAELIITER KEMACHT
10-11. Wii hot Yeehoowa ti israeliiter im tesërt fon Sinaay pehantelt un wii tuut tas taytlich tsayche tas eyer khee sayt raus hoolt?
10 Yeehoowa macht khee unerxiit tswixich sayn inkelaatne. (Rom. 2:11) Meyer khene tiise phunkt taytlicher ferxteen wën mer siin ti aat wii Yeehoowa mit te israeliiter im tesërt fon Sinaay um kang is.
11 Noo tas Yeehoowa sayn folek fon te sklaaweray im Ejipt pefrayt hot, hot eyer priister in kextelt fer im tapernakel tiine. Un Tee hot ti lewiiter in kextelt fer anere flichte im tapernakel uf phase. Hot Yeehoowa peser uf kephast tii woo im tapernakel ketiint hon orer tat ticht keleept hon? Nee! Yeehoowa hoolt khee sayt raus.
12. Was fer kleenichkheete tsayche tas Yeehoowa khee unerxiit tswixich ti israeliiter kemacht hot? (Eeksotus 40:38) (Kuk aach tas pilt.)
12 Yeete israeliiter khont een ticht fraayntxaft mit Yeehoowa hon, ekaal ep eyer im tapernakel ketiint hot orer net, orer ticht fom tapernakel keleept hot orer net. Tsum payxpiil: Yeehoowa hot sich sicher kelos tas ti kans natsyoon khont te wolk un fayer phoste siin woo iwer te tapernakel waar. (Lees Eeksotus 40:38.) b Wën tas wolk aan kefang hot tsu een naye plats keen, khont tas kanse folek tas siin, soo kaar tii woo wayt wech fom tapernakel akampiirt waare. Soo, khonte se sayn tinge samele, sayn parake tsu xpane un mit tëm rest fom folek keen. (Nuu. 9:15-23) Tas kanse folek khont aach heere wën ti 2 silper hëne keploost waare, woo ketsaycht hon tas tas folek solt aan fange sich wanere. (Nuu. 10:2) Soo es is taytlich tas ticht paym tapernakel woone, wolt net saan tas ti persoon een tichter fraayntxaft mit Yeehoowa hët. In woerheet, yeete israeliiter khent een inkelaatne in Yeehoowa sayn parak sin un ti sicherheet hon tas Yeehoowa tëm lenke un xitse teet. Kraat soo hayt, ekaal tas lant woo mer leepe, khene mer xpiire tas Yeehoowa uns liipt, uf phast un xitst.
Te tapernakel waar im mite fom khamp. Tas waar een pewaysung tas Kot khee unerxiit tswixich ti layt macht (Kuk te apsats 12.)
KOT MACHT KHEE UNERXIIT TSWIXICH TI LAYT HAYT
13. Warom khene mer saan tas Yeehoowa khee unerxiit tswixich sayn tiiner hayt macht?
13 Etliche fon te priiter hayt leepe ticht fom haupst sets orer fon een filyaal fon Yeehoowa sayn Tsayer. Anere tuun soo kaar in tiise pletse tiine. Tes weeche, khene se mit helfe in fiile aktiwiteete woo tat pasiire un keselxaft hon mit tëne woo ti Orkanisatsyoon hayt fiire. Anere tiine in te spetsyaal fol tsayt tiinst, soo wii ti reesenter superintentente. Soo kaar wën tas net tayn situatsyoon is, khanst tuu tich sicher sin tas tuu Yeehoowa sayn inkelaatne pist un tas eyer tich liipt. Yeehoowa tuut tich kuut khëne un tee phast tich uf. (1 Phe. 5:7) Tee kept kaystlich esmitel fer yeete eene fon sayn tiiner un tee tuut se lenke un xitse.
14. In was fer aner aat tuut Yeehoowa tsayche tas eyer khee sayt hoolt?
14 Een aner tings woo tsaycht tas Yeehoowa khee sayt hoolt, is tas eyer sich sicher lost tas ti kans layt uf te welt ti Piipel leese khene. Ti Hayliche Xrifte waare in 3 xprooche kexrip: hepreeyx, arameeyx un kreekix. Meechte tii woo ti Piipel in te orixinaale xprooche leese khene, een tichter fraayntxaft mit Yeehoowa hon wii tii woo tas net kemacht kriin? Nee. (Mat. 11:25)
15. Was is een pewaysung tas Kot khee sayt hoolt? (Kuk aach tas pilt.)
15 Fer Yeehoowa sayn fraaynte wëre, prayche mer net fiil xuul hon orer ti orixinaale xprooche fon te Piipel ferxteen. Yeehoowa tuut sayn kluucheet aan piite fer ti kanse layt uf te welt, net ploos fer tii woo fiil xuul hon. Kot sayn Wort, ti Piipel, is xon in tausente xprooche iwersetst kep; tes weeche, layt fon te kans welt khene nutse fon sayn kluucheet kriin un lërne wii se khene Kot sayn fraaynte wëre. (2 Tim. 3:16, 17)
Ti Piipel is in tausente xprooche iwersetst. Wii tuut tas tsayche tas Kot khee unerxiit tswixich ti layt macht? (Kuk te apsats 15.)
TUU WAYTER YEEHOOWA KEFALE
16. Tëm noo Aphostele sayn Kexicht 10:34, 35, was mise mer mache fer wayter Yeehoowa sayn inkelaatne sin?
16 Es is een kroos eer Yeehoowa sayn inkelaatne in sayn simpoolixe parak sin. Nimant tuut uns soo kuut, liiplich un krooshërtslich aan nëme. Un noch: Yeehoowa macht khee unerxiit tswixich ti layt. Tee tuut uns al wilkhome — ekaal unser ras, elter, tas plats woo mer leepe, wii mer kroos ketsoo waare, wii fiil xuul meyer hon orer ep mer mëner orer fraae sin. Awer fer Yeehoowa sayn inkelaatne wëre, mise mer sayn kesetse aan heere. (Lees Aphostele sayn Kexicht 10:34, 35.) c
17. Woo fine mer mee informatsyoone iwer een inkelaatne in Yeehoowa sayn parak wëre?
17 Tëm noo Psalm 15:1, hot Tawi kefroot: “Oo Yeehoowa, weer khan in tayn parak woone? Weer khan uf tayn haylich përich woone?” Yeehoowa hot Tawi selepst penutst fer tiise frooche antworte im Psalm 15. Im neekste artikel, xpreche mer iwer etliche tinge woo mer mache sole fer Yeehoowa kefale un wayter sayn fraaynte wëre.
LIIT 32 Hoolt Yeehoowa sayn sayt!
a (Esekyël 37:26, 27) “‘“Un ich tuun een pakt fon friit mit tëne mache; es wërt een eewich pakt mit tëne sin. Ich tuun tëne fest xtele un fermeere; ich tuun aach mayn hayliche plats tswixich tëne fer imer xtele. 27 Mayn parak wërt mit tëne sin, un ich wëre sayn Kot sin, un tii wëre mayn folek sin.
b (Eeksotus 40:38) Un torich ti kans rees, hot tas kanse folek fon Israël kesiin tas Yeehoowa sayn wolk iwer te tapernakel torich te taach keplip is un tas een fayer iwer te tapernakel torich ti nacht waar.
c (Aphostele sayn Kexicht 10:34, 35) Soo, hot Pheeter aan kefang se xpreche; tee saat: “Yets ferxteen ich kans kenau tas Kot khee sayt hoolt, 35 awer, in yeete natsyoon, tee nëmt aan weer tiif respekt tsu tëm hot un macht was richtich is.
