Fer Yeehoowa kefale, mise mer klaape hon. Awer ti Piipel saat tas “te klaape keheert net fer ale mënxe”. (2 The. 3:2) Wii te aphostel Phaul tas kesaat hot, waar tee am xpreche iwer ti “xlechte layt”, woo tëm am yachte waare. Awer sayn wërter iwer te klaape kile aach fer anere mënxe. Etliche wole net klaape tas es een Kot kept woo ales kemacht hot. (Rom. 1:20) Anere fiilaycht saan tas se klaape aan etwas orer yemant woo xtërker wii ti mënxe is. Awer tiise sort klaape is net kenuuch fer Yeehoowa kefale.

Meyer mise uns sicher sin tas Yeehoowa eksistiirt un tas eyer peloont tii woo een xtarke klaape aan tëm hon. (Hep. 11:6) Fer tiise sort klaape ëntwikele, mise mer ti hilef fon Kot sayn hayliche kayst kriin. Un fer tiise kayst kriin, mise mer tas in kepeet ferlange. (Luk. 11:9, 10, 13) Een aner wichtich aat fer hayliche kayst kriin, is ti Piipel leese, woo kexrip waar unich te lenkung fon Kot sayn kayst. Tan khene mer triwer noo tenke aan was mer kelees hon un uns aan xtrenge fer es aan wëne. Soo, lose mer Kot sayn kayst uns helfe een leepe hon woo tsaycht tas te klaape woo Kot kefalt uns keheert.