Frooche fon te leeser
Tuun ti wërter “Tuu tuust tëne xitse”, im Psalm 12:7, se tuun hon mit “tii woo hilef prayche” fom wersikel 5 orer mit “Yeehoowa sayn wërter” fom wersikel 6?
Ti tekste um rom tsayche tas tiise wersikel iwer layt xprecht.
Im Psalm 12:1-4, leese mer: “Fint ma kaar khee troy persoon tswixich ti mënxe.” Un tan, Psalm 12:5-7 saat:
“‘Wayl tii woo hilef prayche unertrikt sin,
Wayl ti aarme krayxe,
Tuun ich mich uf xtele un etwas mache’, saat Yeehoowa.
‘Ich rete se fon tëne woo se niter xtele.’
Yeehoowa sayn wërter sin rayn;
Tii sin soo wii tas silper woo in een phak owe kexmols is fer 7 mool rayn kemacht wëre.
Oo Yeehoowa, tuu tuust tëne xitse.
Tuu tuust yeete eene fon tëne fer imer xitse keeche tiise xeneratsyoon.”
Te wersikel 5 saat tas Kot tuut tii woo hilef prayche, rete.
Te wersikel 6 saat tas “Yeehoowa sayn wërter sin rayn”, soo wii tas silper woo rayn kemacht wërt. Sicher tuun mer al too temit xtime. (Psal. 18:30; 119:140)
Yets kuk mool te wersikel 7: “Oo Yeehoowa, tuu tuust tëne xitse. Tuu tuust yeete eene fon tëne fer imer xitse keeche tiise xeneratsyoon.” Iwer was orer weem is tas wort tëne in tiise wersikel am xpreche?
Te wersikel 6 hot kexproch iwer Yeehoowa sayn wërter. Tes weeche, etliche tenke tas im wersikel 7, tas wort tëne petayt Yeehoowa sayn wërter. Es is woer tas Yeehoowa ti Piipel kexitst hot, opwool fiile keechner fersuucht hon se ferpiite un fernichte. (Isa. 40:8; 1 Phe. 1:25)
Awer es is aach woer tas Yeehoowa sayn folek xitst, woo im wersikel 5 foer khomt. Yeehoowa hot xon kexitst un keret “tii woo hilef prayche” un woo unertrikt sin; un sicher tee tuut tas wayter mache. (Yoop 36:15; Psal. 6:4; 31:1, 2; 54:7; 145:20)
Soo, iwer was orer weem is tas wort tëne im wersikel 7 am xpreche?
Wën mer tiise Psalm mit acht kuke, wërts taytlicher tas tas wort tëne is iwer tas folek am xpreche.
Psalm 12:1, 2 xprecht iwer xlechte layt woo tsu Yeehoowa sayn troye tiiner keloo hon. Tan, leese mer tas Yeehoowa etwas mache tuut keeche tii woo xlechte tinge xpreche. Te Psalm lost uns sicher tas Yeehoowa sayn folek xitse tuut wayl Sayn wërter rayn sin.
Soo te wersikel 7 saat tas Yeehoowa tuut tëne xitse, es wil saan, tii woo fon te xlechte unertrikt sin.
Tas wort tëne woo too penutst is, xteet aach in kopye fon te Hepreeyxe Xrifte woo mer traue khene. Ti eyerste iwersetsung fon te Hepreeyxe Xrifte tsu kreekix penutst 2 mool tas wort uns im wersikel 7. Soo es tsaycht tas tiise wersikel am xpreche is iwer ti troye layt woo hilef prayche un unertrikt sin. Te wersikel 7 saat aach tas “yeete eene” fon te troye wërt kexitst “keeche tiise xeneratsyoon”, es wil saan, ti xlechte mënxe woo tas ferkheertes uf muute. (Psal. 12:7, 8) Een iwersetsung fon te Hepreeyxe Xrifte tsu arameeyx, saat: “Oo HËR, tuu tuust ti kerechte xitse; tuu tuust se xitse fon tiise xlechte xeneratsyoon fer imer. Ti xlechte sin iweraal, soo wii een pluut suukler woo tas pluut fon te mënxe aus trokent.” Tas is een aner pewaysung tas te Psalm 12:7 net iwer Kot sayn wërter am xpreche is.
Tes weeche, khene mer saan tas tiise wersikel hofnung fer ti troye layt kept: Kot tuut se xitse.
