MEECHTE ti kepeete al uf een selwich plats khome, een tuun fer weem tuu peete tuust? Hayt se taach tuun fiile layt soo tenke. Tiise itee tuut ti layt kefale, woo ti ekumenix khërich pay xteen un mëne wëns aach unerxiit unich ti relichyoon kept, sin al kuut. Awer meecht ti aat fer se tenke wërklich richtich sin?

In woerheet lërnt ti Piipel tas fiile kepeete sin net fer ti richtich persoon kefiirt. In ti tsayt woo ti Piipel kexrip kep is, waare ti layt keweent fer xtaatue peete. Awer fiil mools hot Kot acht keruuft fer tiise aktsyoone. Tsum payxpiil, te Psalm 115:4-6 xprecht iwer ti xtaatue: ‘Tii hon oore, khene awer net heere.’ Tiise phunkt is kans klaar. Warom fer een Kot peete woo tich nii aan heert?

Een wichtich Piipel kexicht xprecht iwer te phunkt. Te leaal profeet Eliias hot Paal sayn profeete prowokt fer, fer tëne sayn Kote peete, un nochter teet eyer fer sayn Kot peete. Eliias saat tas te Kot woo woerliche weyer, teet tas kepeet antworte, awer te falxe net. Paal sayn profeete hon tas aan kenom un aan kefang aan heelich un mit hart xtim fer sayn Kot peete, awer umsonst. Tas kexicht saat: Waar awer nimant woo keantwort hot, un aach khee acht fer tëne kep. (1 Kheeniche 18:29) Awer was is mit Eliias pasiirt?

Wii te fërtich kepeete hot, hot sayn Kot klaych keantwort un fayer fon himel kexikt, un tas opfer ferprënt. Was waar te unerxiit fon tii tswaay kepeete? Ti antwort is in een selwich kepeet woo Eliias kemacht hot, in 1 Kheeniche 18:36, 37. Tas kepeet is kans khorts, ploos unkefeer 30 wërter in hepreeyx. Noch soo, in te phaar wërter hot Eliias fer Kot kepeet un tray mool sayn perseenlich naame penuts, Yeehoowa.

Paal petayt “hër”, te waar ti kananëye sayn kot un tas hot noch fiil anere kote kep, tëm noo ti keechënt fom lant. Awer Yeehoowa is te naame fon te eensiche woere kot fom kanse uniwërsum un is ploos tee woo tiise naame hot. Un tiise Kot hot fer sayn tiiner kesaat: “Ich sin Yeehoowa. Tas is mayn naame. Tuun mayn hërlichkheet fer khee anere kepe”. (Isaiias 42:8)

Meecht Eliias sayn kepeet un ti kepeete fon Paal say profeete tsum selwich plats kang sin? Ti aanpeetung tsu Paal hot ti layt sayn aanpeetung fersaut mit sayn imoraalix aanpeetung un soo kaar layt keopfert. In keeche teel, Yeehoowa sayn aanpeetung hot ti Israeliiter raychlich keholef fon tiise xlechte aktsyoone fray mache. Tenk een pisye: Wëns tuu een priif fer een froynt xraype teest, woo fiil respëktiirt weyer, hëst tuu kërn tas se tiise priif tsu een aner persoon ap kepe teete, woo xlecht aan kesiin weyer un sayn aktsyoone kans anerste wëre wii tayn froynt sayn? Sicher net!

Wëns tuu tsu Yeehoowa peete tuust, tuust tuu fer te Kriatoer peete, te fater fon te kans mënxheet. * “Tuu oo Yeehoowa pist unser fater”, saat tee profeet Isaiias in kepeet. (Isaiias 63:16) Soo, es waar iwer te Kot woo Yeesus kristus kexproch hot, wii te fer sayn tisipel kesaat hot: “Ich keen tsu mayn fater un ayre fater, un tsu mayn kot un ayre kot.” (Yoohan 20:17) Yeehoowa is Yeesus sayn papa. Is fer te Kot woo Yeesus kepeet hot un is fer te Kot woo Yeesus sayn tisipele kelërnt hon fer se peete. (Matheus 6:9)

Meecht tii Piipel saan tas meyer solte fer Yeesus un Maria peete, fer hayliche orer ëngele? Nee, ploos fer Yeehoowa. Kukt tswaay uersache. Eyerste, tas kepeet is een saat aanpeetung, un tii Piipel saat tas ploos Yeehoowa thërft aan kepeet wëre. (Eeksotus 20:5) Tsweete, ti Piipel saat tas Yeehoowa “heere fon kepeet is”. (Psalm 65:2) Wën Yeehoowa aach fiile responsapiliteete fer anere kept, tiise responsapiliteet hot tee nii fer yemant kep. Eyer is een kot woo ferxprecht perseenlich unser kepeet heere.

Tan wëns tuu wilst tas Yeehoowa tayn kepeete heert, erinert tich fon ti piiplix aan reet: “Al tii woo Yeehoowa sayn naame aan ruufe wëre keret”. (Aphostele sayn kexicht 2:21) Awer meecht Yeehoowa ale kepeet heere oone siin fon weem un fon woo heyer? Orer eksistiirt noch was, woo meyer wise mise tas tee unser kepeete heere tuut?