KHENE ti kepeete uns in een aat helfe? Ya, ti Piipel tsaycht tas ti kepeete fon Kot sayn troye tiiner wërklich tëne helfe khan. (Lukas 22:40; Tiako 5:13) In woerheet, ti kepeete khëne uns fiil in een kaystlich, emotsyonaal un soo kaar in fisik aat helfe. Wii?

Wëns tuu een khint hëst un tee teet een kexenk kriin, teest tuu tëm in lërne tas eyer sich ploos petanklich xpiire praycht? Orer teest tuu tëm in lërne petanklichkheet tsayche? Wën meyer wichtiche xpiirunge aan ti wërter setse, tuun mer fer tëne mee acht kepe un tuun se soo kaar uf muute. Meecht tas aach pasiire wën meyer mit kot xpreche? Mit sicherheet! Kukt etliche payxpiile.

Kepeet fer petanklichkheet tsayche. Wën meyer fer Kot tanke fer ti kuute tinge woo tee uns kept, tuun meyer uns aan ti seechne konsentriire. Tas resultaat is tas mer uns petanklicher, froo un peser xpiire. (Filiper 4:6)

Payxpiil: Yeesus hot petanklichkheet ketsaycht, wayl sayn Fater tëm sayn kepeete kehoricht un keantwort hot. (Yoohan 11:41)

Kepeete fer fertsayung ferlange. Wën meyer fer kot ferlange tas te uns fertsayert, tuun meyer unser kewise iipe un tsayche tas meyer uns wërklich peroyt hon. Meyer tuun aach mërke wii xlim unser sint is un xpiire uns laychter fon te xult fon sint.

Payxpiil: Tawi hot kepeet fer tsayche tas eyer sich peroyt hat un traurich waar. (Psalm 51)

Kepeete fer oryentiirung un kluucheet ferlange. Fer Yeehoowa ferlange tas tee uns oryentiirt orer ti neetich kluucheet kept fer kuute ëntxlise mache, tas heleft uns teemuuticher sin. Tas khan uns helfe erinere tas meyer krënse hon un heleft uns aan Yeehoowa fertraue. (Xpriiche 3:5, 6)

Payxpiil: Salomon hot mit teemuut oryentiirung un kluucheet ferlangt fer Israël rechiire. (1 Kheeniche 3:5-12)

Kepeete wën mer xwiirichkheete mit mache. Wën meyer layte un tuun unser hërts fer Yeehoowa uf mache, xpiire mer uns laychter un trauer aan Yeehoowa xtats aan uns selepst. (Psalm 62:8)

Payxpiil: Te Kheenich Asa hot kepeet wii tee keeche een kewaltiche faynt khëmpfe must. (2 Kroonike 14:11)

Kepeete tas es ti anere kuut keet. Soo kepeete tuun uns helfe keeche te ekoysmus khëmpfe un mee empatii un mitlayt tsayche.

Payxpiil: Yeesus hot tsu Yeehoowa kepeet fer sayn tisipele helfe. (Yoohan 17:9-17)

Kepeete fer Yeehoowa loope. Wën meyer Yeehoowa loope weeche sayn wunerliche kriatsyoone un kwaliteete, tuun mer mee weyert un respekt tsu tëm tsayche. Soo kepeete helfe uns aach tichter pay unser Papa un Kot khome.

Payxpiil: Tawi hot mit frooheet Kot keloopt weeche sayn kriatsyoon. (Psalm 8:)

Anere seechen woo se tuun hon mit kepeet is “kot sayn friit, woo iwer ales keet”. (Filiper 4:7) Friit in tiise welt hon fol mit tripulatsyoon is wërklich een aarich kuut seechent. Tas macht kuut fer unser kesuntheet. (Xpriiche 14:30) Awer meecht ti friit khome fon unser aychne aanxtrengung? Orer is noch was wichtiches tepay?