TIISE frooch lost fiile layt aarich naykerich. Ti Piipel tsaycht tas Yeehoowa wërklich ti kepeete hayt heert. Awer, tas hëngt aan uns ap eep Yeehoowa unser kepeete heert orer net.

Yeesus hot kesaat tas ti relichyeese fiirer fon sayn taache ferkheert waare wayl se hoochmuutich kepeet hon. Tii wolte sich ploos tsayche wii se haylich waare. Yeesus hot kesaat tas tiise mëner “hon xon sayn kans peloonung” orer tas se ploos kriin teete was se wolte hon, ti layt sayn acht, awer net was se praychte, Kot sayn acht. (Matheus 6:5) Tas selwiche pasiirt hayt. Fiile layt, wën se peete, tuun se ploos aan sayn wile tenke un net aan was Kot tenkt. Wayl se ti piiplixe funtamente net in hale, woo meyer noo kekukt hon, too te weeche tuut Kot se net aan heere.

Awer was saan fon uns? Meecht Kot tayn kepeete heere un antworte? Ti antwort hot net se tuun mit te ras, natsyonaaliteet orer wii fiil tinge yemant hot. Ti Piipel ferxprecht uns tas “Kot khee sayt hoolt, awer, in yeete natsyoon, tee nëmt aan weer tiif respëkt tsu tëm hot un macht was richtich is”. (Aphostele sayn Kexichte 10:34, 35) Meechte tiise wërter fer tich phase? Weyer tiife respekt tsu Kot hot, wil net Kot pelaytiche. Weyer ti kerechtichkheet macht xtrengt sich aan fer se mache was Yeehoowa saat richtich is, xtats sayn aychne orer ti mënxe sayn wile mache. Wilst tuu wërklich hon tas Kot tayn kepeete heert? Ti Piipel khan tich helfe tas hin kriin. *

Fiile layt wole hon, tas Kot tëne sayn kepeet in een wunerlich aat antworte tuut. Awer, soo kaar in te piiplixe tsayte hot Kot tas ploos als mool kemacht. Als mool, sin hunert yoer torich khan tswixich eene un anere wuner. Awer ti Piipel saat tas noo ti aphostele sayn toot, hot tas khee wunere mee kep. (1 Korinter 13:8-10) Meecht tas saan wole tas Kot net ti kepeet hayt antworte tuut? Mit sicherheet tuut Kot heere. Kuk etliche payxpiile fon kepeete woo Kot antwort tuut.

Kot kept kluucheet. Is fon Yeehoowa woo ti woerlich kluucheet heer khomt. Yeehoowa tuut kuuthërtslich tas kluucheet kepe fer tëne woo sich aan xtrenge fer sayn oryentiirung noo keen. (Tiako 1:5)

Kot kept hayliche kayst. Te hayliche kayst is Kot sayn macht. Es kept khee macht woo soo kewaltich is wii te hayliche kayst. Tee kep uns hilef fer ti prowatsyoone aus hale. Khan uns friit kepe wën mer ëngstlich sin. Khan uns helfe fer anere xeene kwaliteete ëntwikele. (Kalater 5:22, 23) Yeesus hot fer sayn tisipele ti karantii kep, tas Kot sayn hayliche kayst in een liiplich aat kept. (Lukas 11:13)

Kot hot ti eerliche layt woo tëm suuche in kelërnt. (Aphostele sayn Kexichte 17:26, 27) Uf ti kans welt, kepts layt woo eerlich ti woerheet suuche. Tii wole iwer Kot lërne — wii tëm sayn naame is, was hot Kot fer ti eyert un ti mënxe foer un wii ticht pay Kot khome. (Tiako 4:8) Fiil mools, tuun Yeehoowa sayn Tsayer soo layt aan trëfe un tuun se kërn helfe ti antworte fon te frooche in te Piipel fine.

Wilst tuu Kot khëne lërne? Waars weeche tas woos tuu tas piichelcher aan kenom host? Tas is im xtant ti antwort fon Kot iwer tayn kepeet.