IS MOOL sicher tas tuu xon kemërekt host tas ti meyeste relichyoone kepe weyert fer kroose khëriche orer thempele un tuun een ekstra uertsayt mache fer se peete. Meecht ti Piipel saan tas mer ploos aan spetsiifixe pletse orer aan etliche xtune fon taache peete khene?

Is woer tas ti Piipel tsaycht tas etliche tsayte peser sin fer een kepeet mache. Tsum payxpiil, eep Yeesus mit sayn tisipele ese, hot eyer fer Kot in kepeet ketankt. (Lukas 22:17) Un wii sayn tisipele sich kesamelt hon fer Kot aan peete, hon se mitsamer kepeet. Soo, hon se wayter ti kewoonheet in kehal, woo xon kans lang in ti yitixe sinakooke un in thempel fon Yeerusalem kemacht kep waar. Yeehoowa wolt tas te thempel een haus weyer “fer ti kanse natsyoone kepeete mache”. (Markus 11:17)

Wën Kot sayn tiiner sich samele un mitsamer peete hon sayn kepeete fiil kraft. Kot tuut sich fraye wën tiise krup sich samelt un hon ti selwiche ketanke un tëne sayn kepeet tuun piiplixe funtamente wayse. Tas kepeet khan se helfe etwas mache woo se in een anere aat net mache teete. (Hepreeyer 13:18, 19) Yeehoowa sayn tsayer tuun imer peete in sayn fersamlunge. Tuu pist in kelaat fer ticht aan tayn haus een Raych Saal pesuuche fer tiise kepeete heere.

Ti Piipel tuut net saan tas es een spesiifix plats orer uertsayt kept fer se peete. In ti Piipel khene mer siin tas Kot sayn tiine hon in unerxiitliche uertsayte un pletse kepeet. Yeesus hot kesaat: “Awer wëns tuu peete tuust, kee in tayn ekstra tsimer, un mach ti tier tsu, peet fer tayn papa woo ferxtekelt is. Un tan tayn papa woo fon tëm ferxtekelt plats kuke tuut, tuut tich peloone.” (Matheus 6:6)

Is tas net uf muutich kël? In woerheet, tuu khanst tsu yeete xtun ticht pay te Soweraan fon Uniwërsum khome, ploos tuu un tee, un khanst ti sicherheet hon tas tee tich heert. Is net se ferwunere tas Yeesus fiil mools kesuucht hot aleen plaype fer se peete. Selich mool, hot eyer een kans nacht kepeet, wiis aus siit fer hilef un oryentiirunge ferlange fer een wichtich entxlus mache. (Lukas 6:12, 13)

Ti Piipel tuut xpreche iwer anere mëne un fraae woo kepeet hon, wii se ërnste entxluse mache muste un wayl se kroose xwiirichkheet foer sich hate. Als mool hon se ruych kepeet un als mit hart xtim. Tii hon kepeet wii se paysamer waare un wii se aleen waare. Tas haupst waar tas se kepeet hon. Kot tuut soo kaar sayn tiiner inlaate fer ‘wayter se peete’. (1 Thesalooniker 5:17) Tee is imer pextimt aan heere, weer tëm sayn wile macht. Tas tsaycht Yeehoowa sayn liip tsu uns, kël?

In unser taach woo ti layt palt khee mee klaape hon, tuun fiile tswayfele op tas kepeet wërklich praktixe weyert hët. Tuu tuust tich fiilaycht frooe: ‘Meecht tas kepeet mich wërklich helfe?