Warom is te Eetem kaate wichtich fer tich

ETLICHE unersuucher xpreche keeche tas kexicht fom Eetem wayl se saan tas ti rest fon te Piipel net too triwer xprecht. Tsum payxpiil, Paul Morris, een uniwersiteet leerer, woo relichyeese sache xtutiirt, hot kexrip: “In te piipel, wërt uf khee plats mee kexproch iwich tas kexicht fom Eetem.” Anere “unersuucher” nëme im xtant aan was tee saat, awer tas keet keeche was ti Piipel saat.

In te Piipel xteet fiil iwich te Eetem kaate, Aatam, Ewa un ti xlang. * Awer tiise feeler woo ti unersuucher mache, is kaar niks wën tee ferklaycht wërt mit een fiil kreeser un kefeerlich feeler — tee woo etliche relichyeese xëfe mache wën se saan tas tas kexicht iwich te paratiis net woer is. Wayl soo keen se keeche ales was ti Piipel saat. Wii soo?

Ferxteen was im Eetem kaate pasiirt is, is wichtich fer ti rest fon te Piipel ferxteen. Tsum payxpiil, Kot sayn Wort hot te opjetiiw fer uns helfe raus kriin antworte fer wichtiche frooche woo ti mënxe mit um keen. Tas khan oft sin tas ti antworte fon te Piipel tsu tuun hon mit was im Eetem kaate pasiirt is. Kuk etliche payxpiile.

● Warom wëre mer alt un mise xtërpe? Aatam un Ewa khente fer imer leepe wën se foran Yeehoowa aan keheert hëte. Tii teete ploos xtërpe wën se sich keeche iim xteele teete. Te taach woo se tas kemacht hon, hon se aan kefang se xtërpe. (Xeenesis 2:16, 17; 3:19) Tii hon iire perfektsyoon ferloer un tas eensiche tings woo se khonte lose fer iire nookhomer waar ti sint un ti imperfektsyoon. Tes weeche saat ti Piipel: “Too teweeche, soo wii torich een mënx ti sint in te welt khom is, un torich ti sint te toot, soo hot sich te toot tsu ale mënxe ferprayt, wayl se al kesint hate.” (Romaaner 5:12)

● Warom lost Kot tas es xlechtichkheet kept? Im Eetem kaate, hot Satanaas kesaat tas Kot liie teet un teet etwas kuutes fon sayn kriatuer tsurik hale. (Xeenesis 3:3-5) Soo, hot tee tsum ferxteen kep tas Kot een xlechte rechiirente weyer. Aatam un Ewa sin uf tëm Taywel sayn sayt keplip; soo hon se ketsaycht tas se wolte aach net mee rechiirt wëre fon Yeehoowa, un hon tsum ferxteen kep tas te mënx khent aus sich selepst raus suuche was richtich orer ferkheert is. In sayn perfekt kerechtichkheet un kluucheet, wust Yeehoowa too weyer ploos een aat fer tiise frooch antworte: lose ti mënxe sich selepst rechiire fer een tsayt. Ti xlechtichkheet woo too mit khom is, haupstseechlich wayl te Taywel sich rin mexe, hot noo un noo een kroos woerheet ketsaycht: te mënx khan net sich selepst rechiire oone Kot. (Yeeremias 10:23)

● Warom hot Kot ti Eyert kemacht? Ales xeenes woo Yeehoowa im Eetem kaate ketuun hot, waar fer tsayche wii tee wolt tas ti Eyert solt sin. Tee hot fer Aatam un Ewa kesaat tii selte khiner kriin un selte ti Eyert pewoone, un hot se aan kextelt fer se uf phase tas se mit te tsayt soo xeen solt wëre wii te kaate. (Xeenesis 1:28) Kot hot ti eyert kemacht tas se solt een xeene paratiis wëre un solt pewoont sin mit een eerlich un perfekt familye fon Aatam un Ewa sayn ap xtame. Een kroos teel fon te Piipel hot tsu tuun mit ales was Kot wërt penutse tas ti Eyert solt soo wëre wii tee am aanfang wolt hon.

● Warom is Yeesus Kristus uf ti Eyert khom? Weeche ti repelyoon im Eetem kaate must Aatam, Ewa un sayn kanse nookhomer xtërpe. Awer Kot, torich sayn kroos liip, hot sayne Soon tsu ti Eyert kexikt fer uns hofnung kepe torich tas fray khaaf opfer. (Matheus 20:28) Was petayt tas? Yeesus, “te letste Aatam”, hot imer Yeehoowa aan keheert. Tee waar net wii te eyerste man. Tes weeche, hot tee sayn perfektsyoon net ferloer. Tee hot sayn perfekt leepe ap kep wii een opfer, orer een fray khaaf opfer, tas ti troye mënxe khente fertsayert wëre fon iire sinte un khente, eene taach, kriin tas leepe woo Aatam un Ewa hate eep se kesint hon. (1 Korinter 15: 22, 45; Yoohan 3: 16) Soo hot Yeesus ti karantii kep fer tas ti Eyert noch mool een paratiis wërt wii Kot es am aanfang wolt. *

Soo, Kot sayn opjetiiw fer ti Eyert is net etwas woo khee funtament hot. Tas is een woerheet. Soo wiis wërklich een Eetem kaate uf ti Eyert kep hot, mit echte tiere un mënxe, soo is Kot sayn ferxpreche fer te tsukhunft een sicherheet woo hatich khomt. Wilst tuu tas aach fer tich? Tas layt aan tich. Kot wil tiise tsukhunft fer soo fiil layt wiis meechlich is, soo kaar fer tii woo yets noch net leepe soo wii tee wil. (1 Timoteus 2:3, 4)

Wii Yeesus am xtërpe waar, hot tee kexproch mit eene man woo xlechte ëntxluse in sayn leepe kemacht hot. Tiise man waar xlecht kewees. Tee wust tas tee te toot fertiint hët. Awer te hat pay Yeesus troost un hofnung kesuucht. Yeesus hat tsu iim kesaat: “Tuu wërst mit meer im Paratiis sin.” (Lukas 23:43) Wën Yeesus wolt tas soo kaar tiise man solt uf keruuft wëre un ti seechen kriin fer fer imer leepe in een paratiis soo wii te Eetem, mënst tuu net tas tee wil tas tuu aach tat solst sin? Kans sicher! Un sayne Fater wil tas aach. Wëns tuu tiise tsukhunft wilst, mach ales was tuu khanst fer lërne iwich te Kot woo te Eetem kaate kemacht hot.

[Noote]

[Khast/​Pilt]

EEN PROFETSII WOO TORICH TI KANS PIIPEL KEET

“Un ich tuun fayntxaft mache tswixich tich un ti fraa, un tswixich tayn nookhomer un te nookhomer fon te fraa. Tee tuut tayn khop ferxtrike, un tuu tuust tëm sayn feerst wee mache.” (Xeenesis 3:15)

Tas is ti eyerst profetsii fon te Piipel, woo Kot im Eetem kemacht hot. Weer is ti xlang, ti fraa, te nookhomer fon te xlang un te nookhomer fon te fraa? Wii wërt ti “fayntxaft” unich tëne sin?

TI XLANG

Satanaas, te Taywel. (Apokalipsis 12:9)

TI FRAA

Yeehoowa sayn himliche orkanisatsyoon fon kaystliche kriatuer. (Kalater 4:26, 27) Isaiias hot profetisiirt tas fon te “fraa” teet een spirituaal natsyoon im tsukhunft khome. (Isaiias 54:1; 66:8)

TE NOOKHOMER FON TE XLANG

Tii woo raus kesuucht hon Satanaas sayn wunx mache. (Yoohan 8:44)

TE NOOKHOMER FON TE FRAA

Haupstseechlich Yeesus Kristus, woo fon te himliche teel fon Yeehoowa sayn orkanisatsyoon khom is. Un too tsu keheere aach Kristus sayn spirituaale priiter, woo ti xtel hon fer mit iim im himel rechiire. Tiise kesalpte kriste sin ti spirituaal natsyoon, “te Israël fom Kot”. (Kalater 3:16, 29; 6:16; Xeenesis 22:18).

TI FEERST WEE MACHE

Wii Kot sayne Soon uf te Eyert waar, hot Satanaas kemacht tas se um kepracht is woer. Tas waar etwas xlimes keweest. Awer tas hat net lang aan kehalt wayl Yeesus is fom toot uf keruuft woer.

KHOP WEE KEMACHT

Satanaas wërt tootlich wee kemacht. Yeesus wërt tee fernichte fer imer. Awer foer tas, wërt tee tsurik mache ales xlechtes was Satanaas im Eetem kemacht hot. (1 Yoohan 3:8; Apokalipsis 20:10)

Fer in khortse wërter wise te haupste theeme fon te Piipel, kuk tas piichelche A Bíblia — Qual É a sua Mensagem?, fon Yeehoowa sayn Tsayer.

[Pilt]

Aatam un Ewa muste aus hale ale xlechtes woo khom is weeche iire sint