Ti Piipel tuut leepe ënere

Was hot eene man fon Mëksiko uf kemuut sayn imoraalix leepe neewer lose? Lees was tee tsu saan hot.

“Tii hon mich pehantelt mit respekt.” — GUADALUPE VILLARREAL

KEPORTSYOER: 1964

MUTER LANT: MËKSIKO

FOERKEXICHT: EEN IMORAALIX LEEPE

WII WAAR MAYN LEEPE FRIIER KEWEES: Meyer hon kewoont in Hermosilo, Sonora, Mëksiko, een seer aarm plats. Ich hat seks kexwistere. Mayne fater is kextorep wii ich noch kans kleen waar. Tes weeche, must mayn mama xafe fer soriche fer uns. Ich sin imer paarfuusich kang, wayl meyer hate khee kelt fer xuu khaafe. Wii ich noch tsiimlich yung waar, hon ich aan kefang tsu xafe fer een pisye kelt fertiine fer aach helfe. Soo wii anere familye, hon mer aach in een kans kleen haus kewoont.

Mayn mama waar neekst te kanse taach iwer net tehëm. Tan khont se uns net uf phase. Wii ich seks yoer alt waar, hot eene puup, fon fuftseen yoer, aan kefang mich seksuaale xaate mache, un tas hot fer een lang tsayt aan kehal. Tes weeche, hon ich tswayfele kriit iwich mayn seksuaaliteet. Ich tacht tas weyer normaal seksuaale winxe iwich mëner hon. Wii ich hilef kesuucht hon fon toktere un fon unser khërich, hon se kesaat ich praycht mich khee ketanke mache, ich hët khee propleem un mayn xpiirunge weyer normaal.

Wii ich fërtseen yoer halt waar, hon ich ëntxlist mich wii homosëksuaal foer ti layt tsayche. Ich hon soo foran keleept fer ti neekste elef yoore un hon soo kaar mit fiil mëner kewoont. Ich hon aach kelërnt hoer xnayte, un hon een salon fer hoer xnayte uf kemacht. Awer ich hon mich traurich kexpiirt. In mayn leepe hat ich ploos eelent un hinerlistichkheet. Ich hon kexpiirt tas was ich mache teet, weyer ferkheert. Tan hon ich aan kefang mich frooe: “Meecht tas wërklich kuute un troye layt in tiise welt kepe?”

Ich hon aan mayn xwester ketacht, tii hot aan kefang ti Piipel xtutiire mit Yeehoowa sayn Tsayer un mit te tsayt hot se sich taafe kelos. Tii hot iwich iire klaape mit mich kexproch, awer ich hon khee acht kep too tsu. Ti aat wii se keleept hot un iire hayrat hot mich kefal. Ich hon kesiin tas tii un iire man sich wërklich keliipt hon un sich respektiirt. Mit te tsayt, hot een fon Yeehoowa sayn Tsayer aan kefang ti Piipel mit mich xtutiire. Am aanfang, hot mich tas net soo aarich kefal, awer ti tinge hon sich keënert.

WII HOT TI PIIPEL MAYN LEEPE KEËNERT: Yeehoowa sayn Tsayer hon mich in kelaat fer uf een fersamlung keen un ich hon tas aan kenom. Tas waar was nayes kewees. Ti meyerste layt hon mich ferxpot, awer Yeehoowa sayn Tsayer hon tas net kemacht. Tii hon mich mit respëkt pehantelt un waare fraayntlich mit mich. Tas hot mich aan kekrif.

Ti kuut mënung woo ich hat iwich Yeehoowa sayn Tsayer hot sich ferkreest wii ich uf een konkrës kang sin. Ich hon kesiin tas tiise mënxe waare wii mayn xwester, liiplich un ufrichtich, soo kaar wën fiil tsu samer waare. Meechte tas net sin ti kuute un troye layt woo ich kesuucht hon? Ti liip un eenichkheet unich tëne hot mich ferwunert, aach wayl se ti Piipel penutse fer ti frooche antworte un ich hon kemërkt tas ti Piipel waar ti kraft hiner ale kuutes in iire leepe. Soo wën ich wolt aach eene fon tëne sin, mist ich kroose ënerunge mache.

In woerheet, ich must komplët ënerunge in mayn leepe mache, wayl ich hon keleept wii een fraa. Ich must ales ënere in mayn leepe — ti aat wii ich kexproch hon, mich aan kextelt, aan ketsoo, mayn hoer un aach mayn fraaynte. Mayn fraaynte hon aan kefang mich ferxpote un saan: “Warom machst tuu tas? Tuu waarst toch kuut traan eyerst. Los noo ti Piipel xtutiire. Tuu host toch ales.” Awer tas xweyerste waar mayn imoraalix leepe im xtich lose.

Awer ich wust tas es meechlich weyer tiise ënerunge mache. Ti wërter fon te Piipel in 1 Korinter 6:9-11 hon mich muut kep. Too saat: “Orer wist teyer net tas ti unkerechte Kot sayn Raych net ërpe tuun? Tuut aych net hiner keen lose. Tii woo seksuaal imoraalix sin, woo falxe keeter aan peete, woo in te hayrat untroy sin, ti mëner woo sëks mit anere mëner mache . . . tuun Kot sayn Raych net ërpe. Awer, tas is was etliche fon aych waare. Awer teyer sayt kewext kep.” Yeehoowa hot ti mënxe in tiise tsayt keholef ti ënerunge mache un tee hot mich aach keholef. Ich must fer een lang tsayt khëmpfe, awer Yeehoowa sayn Tsayer sayn oryentiirunge un liip hon mich fiil keholef.

WAS FER NUTSE HON ICH KRIIT: Hayt hon ich een normaal leepe, ich sin ferhayrat un ich un mayn fraa lërne in unser soon leepe tëm noo was ti Piipel saat. Mayn friirix leepe is kans wayt tsurik keplip. Yeehoowa hot mich seer peloont un hot mich fiil xeene responsapiliteete kep. Ich sin een elteste in te kemaynt un khan anere helfe ti woerheet lërne iwich Kot sayn wort. Mayn mama hot sich soo kefrayt mit te ënerunge woo ich im leepe kemacht hon, tas se aach een piiplixe xtuutyum aan kenom hot, un hayt is se een ketaaftne krist. Een fon mayn xwestere, woo een imoraal leepe hat, is aach Yeehoowa sayn Tsayer kewoer.

Soo kaar etliche, woo eyerst kextitst hon tas sort leepe woo ich hat, siin tas ich yets peser traan sin. Ich wees was hiner tiise ënerunge is. Friier, wii ich profitsyonaale hilef kesuucht hon, hon ich xlechte aanreete kriit, awer Yeehoowa hot mich wërklich keholef. Ale tëm ich mich oone weyert kexpiirt hon, hot tee noo mich kekukt un hot mich pehantelt mit liip un ketult. Wise tas een wunerliche, kluuche un liipliche Kot sich um mich kekhimert hot un wolt tas ich solt een pesere leepe hon, hot te kroose unerxiit kemacht.