Profetsii 4. Khee liip in ti familye

Ti mënxe . . . [hon khee] liip tsu ti familye.” — 2 TIMÓTEO 3:⁠1-⁠3, Nova Versão Internacional.

● Chris macht teel fon een krup woo heleft tii woo haus wiolënts mit mache im nort fom Lant fon Wales. “Ich erinere mich fon een fraa woo pay uns khom is. Tii waar soo fiil ferklopt kewoer tas ich khont se kaar net khëne, ale tëm woo ich se xon kesiin hat,” saat Chris. “Anere fraae sin soo emotsyonaalix ferletst tas se khëne net anere in ti aue kuke.”

WAS TUUT WËRKLICH PASIIRE? In een lant fon Afrika unkefeer een in yeete tray fraae hon sëksuaal xaate mit kemacht wën se khiner waare. Im selwiche lant, hot een unersuuchung ketsaycht tas mee wii tas trite teel fon ti mëne tenke tas es net ferkheert weer iire fraae ferklope. Awer is net ploos ti fraae woo haus wiolënts mit mache. Im Kaanata, tsum payxpiil, neekst 3 mëne in yeete 10 sin xon ferklopt orer in anere aate ferkweelt woer fon iire fraae.

WAS TUUN ETLICHE TOO KEECHE SAAN? Haus wiolënts hot es xon imer kep. Hayt xpreche ti layt mee too triwer wii friier.

XTIMT TAS? Is woer tas in ti letste yoore, wërt mee acht tsu haus wiolënts kep. Awer, meecht tes weeche weeniche wiolënts pasiire? Nee, tas is net soo. Ti liip is imer weeniche in ti familye.

WAS MËNST TUU? Tuun ti wërter in 2 Timóteo 3:⁠1-⁠3 sich erfiile? Feelt in ti familye oft ti liip woo mist natiirlich sin?

Ti feneft profetsii woo sich am erfiile is hot tsu tuun mit unser haymat, ti Eyert. Kuk was ti Piipel too triwer saat.

[Hooch phunkt uf sayt]

“Haus wiolënts is hayt se taach een sort kriim woo am meyerst pasiirt un wërt weenich aan kep. Eep een fraa tas aan kept aan ti polise, is se xon unkefeer 35 mool ferklopt kewoer fon iire man.” — EEN XPRECHERIIN FON EEN KRUP WOO TORICH TELEFON HILEF KEPE FER TII WOO HAUS WIOLËNTS MIT MACHE IM LANT FON WALES.