Profetsii 5. Ti eyert fernichtung

‘Kot fernicht tii woo ti eyert fernichte.’ — REVELAÇÃO (Apocalipse) 11:⁠18.

● Hër Pirri xaft in Kpor, Nikeerya, tee samelt phamel saft fer wein mache. Sayn aarwayt is fernicht kewoer wii fiil petroleum aus kelaaft is im Delta fom Niker. “Tas macht unser fix kaput, macht xaate fer unser haut un macht unser fluse trekich,” saat tee. “Ich wees net fon was ich leepe sol.”

WAS TUUT WËRKLICH PASIIRE? Etliche spesialiste saan, yeetes yoer wëre 6,5 milyoone tonelaate apfele in ti weltmeere kexut. Unkefeer 50% fon tiise apfele is plastik woo ufm waser playpt fer hunerte yoore pis tas mool ferxwint. Un ti mënxe tuun net ploos ti eyert trekich mache, awer aach ales in ti natuer flot fernichte. Etliche unersuuchunge tsayche tas ti Eyert prauch een yoer un fenef moonate fer tsurik tuun was ti mënxe in een yoer penutse. “Wën ti mënxe sich soo forem fermeere un forem penutse was fon ti natuer khomt, in 2035 wërt mer xon tswaay planeete wii ti Eyert prayche”, xprecht ti tsaytung Sydney Morning Herald fon Australia.

WAS TUUN ETLICHE TOO KEECHE SAAN? Ti mënxe sin kluuch. Meyer khëne ti xaate woo kemacht sin in te ray xtele fer unser planeet rete.

XTIMT TAS? Fiil persoone un krupe woo sich um ti natuer khimere hon ti layt ferxteen kemacht wii wichtich es is ti natuer uf phase. Ale tëm, wërt ti Eyert forem aarich fersaut.

WAS MËNST TUU? Meecht es neetich sin tas Kot in krayfe mus fer tas unser planeet net fernicht wërt, soo wii eyer ferxproch hot?

Meyer hon xon iwer fenef profetsii kelërnt, awer ti Piipel xprecht aach iwich kuute tinge woo in ti letste taache pasiire teete. Kuk een payxpiil in ti sekst profetsii.

[Hooch phunkt uf sayt]

“Friier hat ich een xtik fom paratiis; yets siits mich aus tas ich ufm plats fol mit kiftiche apfele woone. — ERIN TAMBER, EEN PEWOONER FOM KOLF SAYN LITORAAL, NORT AMERIKA, XPRECHT IWICH TE XAATE WOO PASIIRT SIN WII PETROLIUM AUS KELAFT IS IN KOLF FON MËKSIKO IN 2010.

[Khaste in ti sayt]

Hot Kot ti xult?

Wayl ti Piipel in foer raus xprecht iwich ti xlechte tinge woo mer hayt se taach siin macht tas tas Kot ti xult hot? Is tee woo ti mënxe layte macht? Tuu khanst ti antworte fer tiise frooche fine im puuch Was khant ti Piipel uns in lërne?, im kapitel 11, een puplikatsyoon fon Yeehoowa sayn Tsayer.

[Reechte iwer ti Pilte]

Pilt fon U.S. Coast Guard photo