Ti Piipel tuut leepe ënere

WAROM hot een elter fraa noo kelos itole aan peete? Warom hot een xintoiistixe priister sayn aarwayt in een thempel kelos un is Yeehoowa sayn Tsayer kep? Wii hot een fraa, woo fon sayn eltere im xtich kelos waar, noch mool frooheet kefun? Mërk mool was tiise layt uns saan tuun.

“Ich tiine net mee ti itole.” — ABA DANSOU

KEPORTSYOER: 1938

MUTER LANT: BENIN

FOERKEXICHT: ITOLE TIINER

WII WAAR MAYN LEEPE FRIIER KEWEES: Ich sin kroos kewakst in So-Tchahoué, een wiile in een rechyoon woo sumpich is, ticht aan een lakoo. Ti layt tat leepe fon fixe, un tsiie fii — okse, kaprite, xeef, xwayn un hingele. Sin khee xtroose, ti layt penutse kanooe fer fon een plats tsum anere keen. Ti meyerste hayse sin kepaut mit hols un kraas, un etliche sin fon pakxteen. Ti meyerste layt sin aarm. Awer toch, is weenicher kriminaliteet wii in ti xtëte.

Wii ich kleen waar, hot mayne papa mayn xwester un ich tsu een internat xuul fer meet kexikt, woo se in lërne klaape un tratitsyoone fon een relichyoon woo mit okultismus hantelt. Wii ich kroos waar, hon ich raus kesuucht Dudua (Oduduwa), fon ti yoruupa kultuer, fer mayne kot sin. Ich hon een haus kepaut fer tiise kot un reekelmeesich opfer kemacht fon inyaami, tentee eel, xneeke, hingele, taupe un aner tiere. Tiise opfer waare tayer, oft mools hon ich neekst mayn kans kelt too mit aus kep.

WII HOT TI PIIPEL MAYN LEEPE KEËNERT: Wii ich aan kefang hon ti Piipel xtutiire, hon ich kelërnt tas Yeehoowa te eensiche woere Kot is. Ich hon aach kelërnt tas tee net aan nëmt itole penutse. (Eeksotus 20:4, 5; 1 Korinter 10:14) Ich wust was ich mache mist. Soo, hon ich ti kanse xtatue fon te itole wech kexmis un mayn haus sauwer kemacht fon ales woo tsu tuun hat mit itole aan peete. Ich hon noo kelos tinge mache un mit layt mich ferhale woo te tsukhunft in foer raus saan wole. Ich hon aach khee teel mee kemacht in peërtichunge un anere lokaal rituaale.

Fer een fraa soo wii ich, mit mee wii 60 yoore, waar tas net laycht tiise ënerunge mache. Mayn fraaynte, ferwanter un nochpere hon sich keeche mich kextelt un aan kefang se xpote. Awer ich hon tsu Yeehoowa kepeet un ferlangt tas tee selt mich kraft kepe fer mache was richtich weyer. Ti wërter in Xpriiche 18:10 hon mich fiil ketreest: “Yeehoowa sayn naame is een xtark thorm. Te kerechte xpringt tat rin un kriit xits.”

Was mich aach keholef hot waar uf Yeehoowa sayn Tsayer fersamlunge keen. Tat hon ich kristlich liip kexpiirt. Tas hot mich kewunert siin tas tiise layt sich aan xtrenge fer noo ti hooche moraalixe muster fon te Piipel leepe. Was ich kesiin hon hot mich ti sicherheet kep tas Yeehoowa sayn Tsayer ti woere relichyoon hon.

WAS FER NUTSE HON ICH KRIIT: Ti piiplixe oryentiirunge aan wëne, hot keholef mich peser kepe mit mayn khiner. Ich xpiire aach tas een xweer kewicht is fon mayn xuler runer kehool woer. Ich hat mayn kans kelt penutst fer aan peete itole woo khee leepe hon un khene aan niks mich helfe. Yets is Yeehoowa mayne Kot, un tee khan unser propleeme fer imer am ën pringe. (Apokalipsis 21:3, 4) Ich fraye mich tas ich net mee itole tiine, awer Yeehoowa! Pay iim hon ich woere xits kefun.

“Ich hon Kot kesuucht fon kleen aan.” — SHINJI SATO

KEPORTSYOER: 1951

MUTER LANT: YAAPAN

FOERKEXICHT: XINTOIISTIXE PRIISTER

WII WAAR MAYN LEEPE FRIIER KEWEES: Ich sin kroos kewakst in een kleen xtat in Yaapan. Mayn eltere waare relichyeese layt kewees. Tii hon mich in kelërnt ti xintoiistixe keeter aan peete. Wii ich yung waar, hon ich imer ketenkt aan mayn retung un ich wolt aarich fiil helfe ti layt woo propleeme mit kemacht hon. Ich tenke mich noch traan was pasiirt is wii ich in te funtamental xuul waar. Te leerer hot fer ti xiiler kefroot was se mache wolte wën se kroos wakse teete. Etliche hate tas kans taytlich; tii wolte, tsum payxpiil, syentiste wëre. Ich hon kesaat tas mayn traam waar Kot tiine. Al hon weeche mich kelacht…

Noo te mitel xuul, sin ich in een xuul rin kang woo relichyeese leerer keiipt hot. In tiise tsayt, hon ich een xintoiistixe priister khëne kelërnt. Ti tsayt woo eyer fray hat, hot eyer een puuch mit een xwartse kapa kelees. Eene taach, hot eyer mich kefroot: “Sato, weest tuu was fer puuch is tas too?” Ich hat ti xwarts kapa peopacht; soo hon ich keantwort: “Ti Piipel.” Tee hot tan kesaat: “Al woo wole xintoiistixe priister sin, mise tiise puuch leese.”

Ich hon terek een Piipel khaaft. Ich hon se kextelt im pest plats fon mayn xrank, un ich hon se kuut uf kephast. Awer wayl ich fiil se tuun hat in te xuul, hon ich khee tsayt kefun fer se leese. Wii ich fërtich mit te xuul waar, hon ich aan kefang in een thempel tiine, wii een xintoiistixe priister. Te traam woo ich hat wii ich kleen waar, hot sich erfiilt!

Awer klaych hon ich kemërkt tas een xintoiistixe priister sin, waar net soo wii ich kewaart hon. Ti meyerste priister hon weenich liip ketsaycht orer sich mit te anere kekhimert. Fiile hate aach khee klaape. Eene, woo iwer mich kexikt hot, hot soo kaar kesaat: “Wëns tuu wilst too foran keen, solst tuu net iwer klaape xpreche. Iwer klaape xpreche is ferpoot. Xprech ploos iwer itee.”

Wii ich tas keheert hon, sin ich traurich mit te xintoiistix relichyoon kep. Opwool ich wayter im thempel kexaft hon, hon ich aan kefang anere relichyoone unersuuche. Awer ich khont niks peseres fine. Woo mee relichyoone ich unersuucht hon, woo trauricher sin ich kep. Ich hon ketenkt tas khee relichyoon ti woerheet hat.

WII HOT TI PIIPEL MAYN LEEPE KEËNERT: In 1988, hon ich een putiistixe man khëne kelërnt un tee hot mich uf kemuut ti Piipel leese. Ich hon mich traan ketenkt te xintoiistixe priister woo mich yoore tsurik uf kemuut hat tas selwiche mache. Soo hon ich ëntxlist te aanreet aan wëne. Wii ich aan kefang hon ti Piipel leese, hon ich tas klaych kërn kehat. Als mool hon ich ti kans nacht kelees, pis wën ich ti sun torich mayn fënster kesiin hon.

Was ich kelees hon, hot mich uf kemuut tsum Kot fon te Piipel peete. Ich hon aan kefang mim kepeet woo in Matheus 6:9-13 xteet. Yeete 2 xtune, hon ich tiise kepeet kemacht — aach wën ich im xintoiistixe thempel am xafe waar.

Was ich kelees hon, hot mich fiile frooche keprung. In tiise tsayt, waar ich xon ferhayrat. Un ich wust tas Yeehoowa sayn Tsayer ti layt iwer ti Piipel in lërne, wayl tii hate xon mayn fraa pesuucht. Ich hon een Yeehoowa sayn Tsayer kesuucht un ich hon se fiile frooche kemacht. Wën se ti Piipel penutst hot fer mayn frooche antworte, hon ich mich ferwunert. Tii hot orkanisiirt tas een pruuter ti Piipel mit mich xtutiire khent.

Klaych tëm noo, hon ich aan kefang tsu te fersamlunge keen. In te tsayt, hon ich tas net kemërkt, awer tswixich ti priiter waare etliche woo ich friier krop pehantelt hat. Noch soo, hon se mich hërtslich wilkhom un mich liiplich kekriis.

In te fersamlunge, hon ich kelërnt tas Kot wil hon tas ti mëner sayn familye liipe un respektiire. Pis tiise tsayt, hat ich soo fiil se tuun in mayn aarwayt wii priister, tas ich khee acht fer mayn fraa un mayn 2 khiner kep hon. Ich hon was xlimes kemërkt: wii ti layt tsum thempel khom sin, hon ich se mit acht keheert; awer noch net een mool, hon ich mayn fraa keheert.

Wii ich ti Piipel xtutiirt hon, hon ich fiile tinge iwer Yeehoowa kelërnt woo mayn liip tsu Tëm ferkreest hon. Wersikele soo wii Romaaner 10:13 hon mich hauptseechlich aan kekrif. Tiise tekst saat: “Al tii woo Yeehoowa sayn naame aan ruufe, wëre keret.” Ich hon Kot kesuucht fon kleen aan un yets, tsum xlus, hon ich tëm kefun!

Ich hon aan kefang se xpiire tas te thempel net mayn plats waar. Am aanfang hon ich mich ketanke kemacht iwer was ti anere tenke teete wën ich ti xintoiistix relichyoon lose teet. Awer ich hat xon ëntxlist tas ich teet tiise relichyoon lose wën ich te woere Kot uf een aner plats fine teet. Soo, im friiling fon 1989, hon ich ëntxlist mayn kewise noo keen: ich hon te thempel kelos un ich hon ketraut tas Yeehoowa mich helfe teet.

Es waar net laycht te thempel lose. Tii woo iwer mich kexikt hon, hon mich kritikiirt un tii hon fersuucht mich tswinge tat plaype. Awer tas xlimste waar fer mayn eltere too triwer fertseele. Wii ich tsu tëne sayn haus am keen waar, hot ti ëngstlichkheet mich iwerlaat. Mayn hërts waar fol phayn un mayn peen waare ekaal am wakele. Ich hon fiil mool xtil kehal un kraft tsu Yeehoowa im kepeet ferlangt.

Wii ich tsu mayn eltere sayn haus khom sin, hat ich am aanfang tsu fiil pang fer too triwer fertseele. Ti xtune sin rom kang. Awer tsum xlus, noo fiil peete, hon ich ales fer mayn papa aus keleet. Ich hon kesaat tas ich te woer Kot kefun hat un tas ich teet ti xintoiistix relichyoon lose fer Tëm tiine. Mayn papa hot sich ferxrok un is traurich kep. Anere parente sin tsum haus khom un hon fersuucht mayn ketanke ënere. Ich wolt net mayn familye wee mache, awer in te selwich tsayt, wust ich tas Yeehoowa tiine waar tas richtiches fer se mache. Mit te tsayt, hot mayn familye aan kefang mayn ëntxlus respektiire.

Opwool ich te thempel kelos hat, hon ich wayter too triwer ketenkt, wayl es waar een wichtich teel fon mayn leepe kewees. Ich hon mich aan kextrengt fer tas ferkese, awer iweraal hon ich tinge kesiin woo mich erinert hon fon mayn friirixe leepe.

Tswaay tinge hon mich keholef too temit um keen. Eyerst: ich hon mayn haus kans unersuucht fer tinge fine woo mit mayn friirix relichyoon se tuun hate. Tan hon ich ales ferprënt — piicher, pilter un soo kaar anere tayer tinge. Tsweet: ich hon fersuucht soo fiil tsayt wiis meechlich waar mit te priiter plaype. Sayn fraayntxaft un hilef hon een kroos unerxiit in mayn leepe kemacht. Xrit noo xrit hon ich noo kelos se tenke iwer tas leepe woo ich friier hat.

WAS FER NUTSE HON ICH KRIIT: Friier, hon ich khee acht fer mayn fraa un khiner kep un tes weeche hon se sich aleen kexpiirt. Awer wën ich aan kefang hon ti Piipel aan heere un tsayt mit tëne plaype, sin mer tichter khom. Mit te tsayt, hot mayn fraa aach aan kefang Yeehoowa tiine. Yets tiine mer Kot mitsamer — ich, mayn fraa, unser soon, unser tochter un sayn man.

Fon kleen aan, mayn traam waar Kot tiine un anere helfe. Yets mërke ich tas tiise traam sich erfiilt hot. Wërter sin net kenuuch fer aus leye mayn petanklichkheet tsu Yeehoowa!

“Ich wust tas etwas mich kefeelt hot fer wërklich froo sin.” — LYNETTE HOUGHTING

KEPORTSYOER: 1958

MUTER LANT: SIIT AFRIKA

FOERKEXICHT: TII HOT KEXPIIRT TAS SE IM XTICH KELOS WAAR

WII WAAR MAYN LEEPE FRIIER KEWEES: Ich sin in Germiston, een friitlich xtat, uf te welt khom. Mayn eltere hon ketenkt tas se khonte net mich kuut uf phase un tes weeche, hon se ëntxlist mich fer een aner familye ap kepe; soo, wën ich 14 taache alt waar, hot een liipliche pheyerche mich in sayn familye aan kenom. Mit te tsayt, hon ich aan kefang tëne siin wii mayn mama un mayn papa. Noch soo, wii ich iwer mayn kexicht kelërnt hon, hon ich kexpiirt tas mayn eltere mich im xtich kelos hate. Ich hon aan kefang se tenke tas ti eltere woo mich aan kenom hon net wërklich mayn familye waare un tas se mich net ferxtan hon.

Wii ich unkefeer 16 yoore alt waar, hon ich aan kefang tsu pletse keen woo se alkohool petiint hon. Tat hon ich un mayn fraaynte ketanst un musike keheert. Wii ich 17 yoore alt waar, hon ich aan kefang se rauche. Ich wolt soo tër sin wii ti fraae fon te tsiker propakanta. Wii ich 19 yoore alt kep sin, hon ich aan kefang in Johannesburg xafe un klaych hon ich xlechte fraaynte kemacht. Ich hon aan kefang trekiche wërter saan, fiil rauche un aach fiil trinke in te wochënte.

Noch soo, hon ich fiil esersiis un sports pratikiirt. Mayn aarwayt hat mit komputatoore se tuun. Ich hon mich fiil too traan aan kextrengt un een kuut naame fer mich kemacht. Tes weeche hon ich fiil kelt fertiint un fiile hon ketenkt tas ich een kuut leepe hat. Awer im hërts waar ich traurich. Ich hon mich ër un oone muut im leepe kexpiirt. Im hërts, ich wust tas etwas mich kefeelt hot fer wërklich froo sin.

WII HOT TI PIIPEL MAYN LEEPE KEËNERT: Wii ich aan kefang hon ti Piipel xtutiire, hon ich tsum wise kriit tas Yeehoowa een Kot fon liip is. Ich hon aach kelërnt tas eyer uns sayn Wort, ti Piipel, kep hot weeche liip tsu uns. Es is wii wën eyer een priif kexrip hët fer unser leepe lenke. (Isayas 48:17, 18) Awer ich hon kemërkt tas ich must kroose ënerunge in mayn leepe mache wën ich wolt nutse too tefun kriin.

Een tings woo ich ënere must waare mayn fraaynte. Ich hon fiil ketenkt iwer Xpriiche 13:20, woo saat: “Weer mit kluuche layt um keet, wërt kluuch, awer weer sich mit te tume halt, keets xlecht.” Tiise aanreet hot mich keholef mayn alte fraaynte lose un naye fraaynte tswixich Yeehoowa sayn Tsayer mache.

Awer tas xweyerste fer mich waar noo lose se rauche. Lamsam, hon ich es hin kriit. Awer too is een aner propleem khom: wayl ich noo kelos hon se rauche, hon ich mee wii 13 kilo tsu kenom! Ich hon mich aarich traurich too teweeche kexpiirt un es hot mich neekst 10 yoore kenom fer tiise kilo noch mool ap nëme. Noch soo, wust ich tas noo lose se rauche waar tas richtiches fer se mache. Ich hon tsu Yeehoowa kepeet un tee hot mich kraft kep fer aus hale.

WAS FER NUTSE HON ICH KRIIT: Yets sin ich kesunter un froo. Ich fersuuche net mee frooheet fine in mayn aarwayt orer am kelt. Xtats tas, fine ich frooheet wën ich ti woerheet fon te Piipel mit anere teele. Tes weeche, tuun 3 fon mayn friirixe koleke yets Yeehoowa tiine — tepay mit mich un mayne man. Ti eltere woo mich in sayn familye aan kenom hon, sin xon kextorep. Awer eep se kextorep sin, khont ich mit tëne xpreche iwer tas ferxpreche fon te Piipel iwer een ufxtaye in een paratiis too uf te eyert.

Ich hon friier kexpiirt tas ich im xtich kelos waar. Awer ticht pay Yeehoowa khome, hot mich keholef too temit um keen. Yets xpiire ich tas ich teel fon een weltwayt familye sin. Tswixich tëne, hon ich fiile mama, papa, priiter un xwestere. (Markus 10:29, 30)

[Pilt]

Tswixich Yeehoowa sayn Tsayer, hon ich ti kristlich liip kexpiirt

[Pilt]

Te xintoiistixe thempel woo ich friier ketiint hon