• KEPORTSYOER: 1957

• MUTER LANT: AUSTRAALYA

• FOERKEXICHT: TRAURICH KHINTHEET

WII WAAR MAYN LEEPE FRIIER KEWEES:

Ich sin kroos kewakst in Newcastle, Nova Gales do Sul. Ich sin ti elst fon siwe khiner. Mayne papa waar een sifer, un tee un aach mayn mama waare aarich krop. Mayn mama hot mich ferkweelt in ale aate, fiisix un aach mit wërter. Tii hot imer kesaat tas ich weyer xlecht un ich teet kextrooft wëre in te fayer hel. Tiise wërter hon mich aarich angst kemacht.

Oft khont ich net in te xuul keen, wayl mayn mama hot mich aarich ferhaut. Wii ich 11 yoer waar, hon ti autoriteete mich wech kenom fon mayn eltere un hon mich in een haymat fer khiner fon te Xtaat ketuun un xpeeter in een konwënt. Wii ich 14 yoer alt waar, sin ich fon te konwënt aus keris. Ich wolt net tsurik hëm keen, tes weeche sin ich ufm weech woone keplip in Kings Cross, ticht aan Sydney.

Uf ti xtroose, hon ich aan kefang um se keen mit trooke, alkohool, pornokrafii un imoraalix leepe. Een mool, is etwas mit mich pasiirt woo mich aarich angst kep hot. Fer een tsayt hon ich kewoont in een apartament fon te hër fon te boate. Eene oomt, sin tswaay mëner tee pesuuche khom. Tee hot mich kexikt ins tsimer keen, awer ich khont heere was tii kexproch hon. Te hër fon te boate wolt mich ferkhaafe fer tiise mëner. Tii teet mich in een fracht xif ferxtekele un mich tsu Yaapan nëme fer xafe in een bar. Tan, hon ich kroos angst kexpiirt, sin runer kexprung fon een hooche foerkang un sin aus keris fer hilef suuche.

Ich hon eene man aan ketrof woo fer een tsayt in Sydney waar un hon aus keleet was mit mich pasiirt waar. Ich hon kewaart tee selt mich pisye kelt kepe. Xtats tas, hot tee mich inkelaat fer mit iim keen tas ich khent mich paate un etwas ese. Fon tat aan, hon ich tee nii mee kelos. Een yoer xpeeter hon mer uns ferhayrat.

WII TII PIIPEL MAYN LEEPE KEËNERT HOT:

Wii ich aan kefang hon ti Piipel xtutiire mit Yeehoowa sayn Tsayer, hon ich fiil sorte xpiirunge mit kemacht. Ich hon wuut kexpiirt wii ich tsu wise kriit hon tas es Satanaas is woo ales xlechtes macht, ich hon imer kelërnt tas Kot teet ti layt kweele. Tas is mich laychte kewoer, wii ich tsu wise kriit hon tas tee ti mënxe net kweelt in een fayer hel. Tiise inlërnunge hon mich angst kemacht mayn kans leepe lang.

Tas hot mich kewunert siin tas Yeehoowa sayn Tsayer sayn ëntxlise sich aan ti Piipel hale. Tii leepe tëm noo iire klaape. Tas waar net laycht fer mit mich um keen, awer tas waar ekaal was ich kesaat hon orer was ich kemacht hon, Yeehoowa sayn Tsayer waare imer liiplich mit mich un hon mich respektiirt.

Mayne kreeste khampf waar tas ich mich kexpiirt hon oone weyert. Ich hat eekel fon mich selepst kexpiirt, un tiise xpiirung hot een lang tsayt aan kehalt, soo kaar noo tëm woo ich xon ketaaft waar wii Yeehoowa sayn Tsayer. Ich wust tas ich Yeehoowa liipe teet, awer ich waar mich sicher tas tee khent net soo een persoon wii ich liipe.

Noo 15 yoore woo ich taaf waar, is een kroos ënerung in mayn ketanke pasiirt. In een reet, im Raych Saal fom Yeehoowa sayn Tsayer, hot te reetner keleest Tyako 1:23, 24. Tiise wërse ferklayche Kot sayn Wort mit een xpiichel woo mer uns siin khene in te aat wii Yeehoowa uns siit. Ich hon aan kefang tsu tenke ep ti aat woo ich mich siin teet, weyer anerste wii ti aat woo Yeehoowa mich aan siin teet. Am aanfang, khont ich tas net aan nëme. Ich hon imer noch ketacht tas es weyer tsu fiil waarte tas Yeehoowa mich liipe teet.

Phaar taache xpeeter, hon ich een tekst keleest woo mayn leepe keënert hot. Tas waar Isaiias 1:18, woo Yeehoowa saat: “Khomt, un wole mer ti sache tswixich uns in te ray tuun. . . . Wën ayre sinte aach root sin, wëre se soo ways wii xnee.” Tas hot mich aus kesiin tas Yeehoowa saan teet: “Vicky, Vicky, wole mer ti sache tswixich uns in ti ray tuun. Ich khëne tich, ich khëne tayn sinte, ich khëne tayn hërts — un ich liipe tich.”

Tiise nacht, khont ich net xloofe. Ich khont imer noch net klaape tas Yeehoowa mich liipe teet, awer ich hon aan kefang tsu tenke aan Yeesus sayn fray khaaf opfer. Mit mool, is es mich in te ketanke khom tas Yeehoowa aarich ketultich mit mich, xon fon een lang tsayt, is. Uf fiile aate, hot tee xon ketsaycht tas eyer mich liipt. Awer in woerheet tas waar wii ich saan teet fer iim: “Tayn liip is net kroos kenuuch fer mich noo khome. Tayne Soon sayn opfer is net kenuuch fer mayn sinte teke. “Tas waar wii ich te opfer tsurik kepe tsu Yeehoowa. Awer yets, noo kuut aan Yeehoowa sayn kexenk tenke, hon ich ëntlich aan kefang tsu xpiire tas Yeehoowa mich liipt.

WAS FER NUTS HON ICH KRIIT:

Ich xpiire mich sauwer, in friit un tsufriite. Mayn hayrat is peser kewoer un ich fraye mich tas mayn leepes kexicht khan anere helfe. Ich sin yeete taach tichter pay Yeehoowa.