Ti Piipel tuut leepe ënere

Was hot uf kemuut eene man woo kexpiilt un kextool hot im xtich lose sayn xlechte kewoonheete un sayn leepe ferënere? Lees sayn kexicht.

“Ich waar ferikt uf khayl kareere.” — RICHARD STEWART

KEPORTSYOER: 1965

MUTER LANT: JAMAYKA

FOER KEXICHT: XPIILER UN XPITSPUUP

WII WAAR MAYN LEEPE FRIIER KEWEES: Ich sin kroos kewakst in een aarem un fiil pewoont sayt fon Kinkston, haupst xtat fom Jamayka. Tat waar fiil kriminaliteet un weenich aarwayt. Ti layt hon keleept mit angst fon te kankes. Neekst yeete taach khont ich heere wii se too rom kexoos hon.

Mayn mama hot fiil kexaft un tii hot ales kemacht was se khont fer mich, mayn yingste xwester un pruuter. Tii wolt hon tas mer solte een kuut inlërnung kriin. Ich sin net kërn in ti xuul kang. Ich waar ferikt uf khayl kareere. Ich hon ti xuul kefeelt fer uf te hipódromo keen un hon soo kaar ti khayl kerit.

Klaych hon ich aan kefang tsu wete aan ti khayl. Ich hat een imoraalix leepe kehat un sin ti fraae noo kang. Ich hon makonya keraucht un kextool fer soo foran leepe. Ich hat fiil wafe, awer ich fraye mich hayt tas nimant um kepracht is woer paym xteele. Ti polise hon mich kefang un in kexpërt.

Wii ich raus sin khom, hon ich kraat soo foran keleept wii eyerst. In woerheet, sin ich xlechter kewoer. Ale tëm woo ich tsaam aus kesiin hon, waar ich tik khopich, unketultich un xlecht. Ich hon mich um nimant kekhimert, ploos um mich selepst.

WII HOT TI PIIPEL MAYN LEEPE KEËNERT: In tiise xlim tsayt fon mayn leepe, hot mayn mama ti Piipel xtutiirt un is een fon Yeehoowa sayn Tsayer kewoer. Ich hon kesiin ti kuut ënerung woo se in iire personaliteet kemacht hot, un tas hot mich naykerich kelos. Tan, wolt ich raus kriin weeche was hët mayn mama sich soo keënert. Tes weeche, hon ich aan kefang tsu fertseele iwich ti Piipel mit Yeehoowa sayn Tsayer.

Ich hon kemërekt tas tëne iire inlërnung anerst waar wii tas woo ti anere relichyoone in kelërnt hon. Un tas ales woo se kelërnt hon hot sich aan ti Piipel kehal. Tas waar te eensiche krup woo ich kekhënt hon woo haus tsu haus is kang fer se preetiche, soo wii ti friirixe kriste tas kemacht hon. (Matheus 28:19; Aphostele sayn Kexicht 20:20) Wii ich kesiin hon ti woere liip woo unich tëne waar, waar ich sicher tas ich ti woere relichyoon aan ketrof hat. (Yoohan 13:35)

Was ich in te Piipel kelërnt hon, hot mich ketsaycht tas ich mist kroose ënerung mache. Ich hon kelërnt tas Yeehoowa Kot hast ti huureray un tas fer iim kefale mist ich im xtich lose tinge woo mayne khërper trekich mache teet. (2 Korinter 7:1; Hepreeyer 13:4) Tas hot mayn hërts aan kekrif wii ich kelërnt hon tas Yeehoowa xpiirunge hot un was ich mache teet khent tee pelaytiche orer fraye. (Xpriiche 27:11) Soo hon ich ëntxlist noo lose tsu makonya rauche, mayn wafe wech kexaft un mich aan kextrengt fer ënerunge mache in mayn personaliteet.

Ti xlimst ënerung woo ich must mache waar im xtich lose tas imoraalix leepe un noo lose tsu wete. Am aanfang wolt ich net tas mayn fraaynte tsu wise selte kriin, tas ich teet xtutiire mit Yeehoowa sayn Tsayer. Mayne ketanke hon sich keënert wii ich keleest hon Matheus 10:33 woo Yeesus saat: “Weer mich foer ti mënxe ap saat, wëre ich tee aach foer mayne Fater im himel ap saan.” Tiise tekst hot kemacht tas ich mayn koleke fertseelt hon tas ich mit Yeehoowa sayn Tsayer xtutiire teet. Tii wuste kaar net was se saan solte. Tii khonte net klaape tas yemant wii ich wolt eene krist wëre. Awer ich saat tas ich wolt niks mee tsu tuun hon mit tas leepe woo ich eyerst hat.

WAS FER NUTSE HON ICH KRIIT: Wii ich aan kefang hon aan wëne ti piiplixe oryentiirunge in mayn leepe, is mayn mama seer froo kewoer. Yets prauchst se sich khee ketanke mache ep ich teet etwas xlechtes mache orer net. Un aach, yets khene mer fertseele iwich etwas woo uns samer halt — unser liip tsu Yeehoowa. Als mool erinere ich mich wii ich waar un khan kaar net klaape aan ti ënerunge woo ich khont mache mit Kot sayn hilef. Ich wil net mee soo een imoraal un materyaalix leepe wii ich hat.

Wën ich hët net aan kenom ti inlërnung fon te Piipel, weyere ich hayt im xtant in te katee orer toot. Awer yets hon ich een xeen un froo familye. Ich fraye mich tas ich Yeehoowa tiine mit mayn liip fraa un meetche. Ich sin petanklich tas Yeehoowa lost mich teel mache in een liiplich kristlich pruuterxaft. Ich sin aach petanklich tas yemant sich aan kextrengt hot fer mich ti woerheet fon te Piipel in lërne. Ich kepe kroos weyert uf yeete keleechenheet woo ich hon fer anere helfe lërne was ti Piipel saat. Ich sin soo froo un petanklich tas Yeehoowa mich in sayn kroos kuutheet pay sich ketsoo hot.

[Hooch phunkt]

“Ich hon kelërnt tas Yeehoowa xpiirunge hot un mayn aktsyoone khente iim pelaytiche orer fraye”

[Pilt]

Ich hon kuute ënerunge in mayn mama sayn personaliteet kesiin

[Pilt]

Mit mayn fraa un meetche