Ti Piipel tuut leepe ënere

“Fiil frooche hon mich net in ruu kelos.” — RAUDEL RODRÍGUEZ RODRÍGUEZ

KEPORTSYOER: 1959

MUTER LANT: KUPA

FOERKEXICHT: TEE HOT SICH KEECHE TI RECHIIRUNG KEXTELT

WII WAAR MAYN LEEPE FRIIER KEWEES: Ich sin in Havana, Kupa, uf te welt khom. Ich sin in een aarm nochperxaft kroos kewakst un ti layt hon ofts uf te xtroose kextrit. Wii ich am wakse waar, hon ich mich aan judô un soo sorte sports interesiirt.

Ich waar een kuute xiiler kewees, un mayn eltere hon mich uf kemuut tsu te uniwersiteet keen. Tat, hon ich aan kefang se tenke tas te politixe sisteem fon mayn lant mist keënert wëre. Too, hon ich ëntxlist mich keeche ti rechiirung xtele. Ich un een koleke hon een poliis atakiirt, wayl mer wolte tëm sayn waf xteele. Weeche ti xtrayt, hon mer te poliis sayn khop aarich wee kemacht. Tes weeche, sin mer tsu te katee kexikt kep un mer teete een xweyer xtroof kriin: tii teete uns kaput xiise. Ich hat ploos 20 yoore un teet xon xtërpe!

Wii ich aleen in mayn sëla waar, hon ich kepleent wii ich mich aan xtele teet foer te soltaate woo mich um pringe teete. Ich wolt khee pang tsayche, awer in te selwich tsayt, fiil frooche hon mich net in ruu kelos: ‘Warom kepts soo fiil unkerechtichkheet uf te welt? Is tiise leepe ales was kept?’

WII HOT TI PIIPEL MAYN LEEPE KEËNERT: Mit te tsayt, is unser xtroof keënert kep: xtats um keprung wëre, teete mer 30 yoore in te katee plaype. Es waar in tiise tsayt woo ich etliche Yeehoowa sayn Tsayer khëne kelërnt hon, woo in te katee waare weeche tëne sayn klaape. Tas hot mich ferwunert wii koraajich un friitlich se waare. Opwool se unkerecht in kexpërt waare, waare se net pees orer kriinsich.

Tii hon mich in kelërnt tas Kot een tsiil fer ti mënxheet hot. Ich hon in te Piipel kesiin tas Eyer tuut fon te eyert een paratiis mache un es kept khee mee kriim orer unkerechtichkheet. Tii hon mich in kelërnt tas ti eyert fol kuute layt wërt woo ti xans kriin fer eewiche leepe in een perfekt welt hon. (Psalm 37:29)

Ich hat kërn was ich fon tëne kelërnt hon, awer ich hon ketenkt tas es xweyer fer mich weyer soo friitlich wii tii sin. Ich hon aach ketenkt tas es unmeechlich fer mich weyer khee sayt in te politik hoole orer net tsurik petsaale wën ti anere mich pelaytiche teete. Tes weeche, hon ich raus kesuucht ti Piipel aleen leese. Wii ich ti Piipel fërtich kelees hon, hon ich kemërkt tas ploos Yeehoowa sayn Tsayer xtele sich aan wii ti eyerste kriste.

Weeche mayn Piipel xtuutyum, wust ich tas ich mist kroose ënerunge in mayn leepe mache. Tsum payxpiil: ich must mayn tsung kontroliire, wayl ich keweent waar trekiche wërter penutse. Ich must aach noo lose se rauche un sayte in te politik hoole. Es waar net laycht fer mich ti ënerunge se mache, awer mit Yeehoowa sayn hilef, xrit noo xrit, hon ich es hin kriit.

Eene fon te xweyerste ënerunge waar lërne mayn wuut kontroliire. Pis hayt, tuun ich noch too triwer peete. Etliche tekste fon te Piipel hon mich fiil keholef, so wii Xpriiche 16:32, woo saat: “Weer net klaych pees wërt, is peser wii te xtarke man, un weer sich kontroliirt, is xtërker wii tee woo een xtat iwerfalt.”

In 1991, hon ich mich wii Yeehoowa sayn Tsayer ketaaft. Te taaf is in een waser tank in te katee pasiirt. Im neekste yoer, etliche woo in te katee waare, sin pefrayt kep un ich waar too tepay. Meyer sin tsu Xpaanya kexikt kep, wayl mer parente tat hate. Soo wii ich in Xpaanya khom sin, hon ich aan kefang in te fersamlunge fon Yeehoowa sayn Tsayer keen. Ti priiter tat hon mich hërtslich wilkhom, soo wii wën se mich xon yoore lang khëne teete. Un tii hon mich keholef een naye leepe tat aan fange.

WAS FER NUTSE HON ICH KRIIT: Yets, sin ich een frooe mënx, un ich tiine Yeehoowa mit mayn fraa un unser tswaay meet. Ich hon te priwilëj fer neekst mayn kans tsayt penutse fer ti anere iwer ti Piipel in lërne. Als mool, tenke ich mich noch traan te taach woo ich yung waar un te toot soo ticht waar. Un ich sin aarich petanklich fer ales was ich fon tiise tsayt aan kriit hon. Ich sin net ploos lepeentich… ich hon aach een hofnung. Ich tuun hërtslich waarte tas Paratiis woo klaych khome tuut — ti tsayt woo ti kerechtichkheet iwerhant nëmt un “es kept kheen toot mee”. (Apokalipsis 21:3, 4)