‘Hot liip tswixich aych’

“Ich kepe aych een naye kepoot: Tuut eene te anere liipe; soo wii ich aych keliipt hon, tuut aach eene te anere liipe. Torich tas, tuun al wise tas teyer mayne tisipele sayt: wën teyer liip unich aych hot.” (YOOHAN 13:34, 35)

Was wil tas saan? Kristus hot sayn tisipele in kelërnt tas se solte eene te aner liipe wii eyer tii keliipt hot. Wii hot Yeesus sayn liipt ketsaycht? In sayn tsayt, es waar keweent tas ti layt ti persoone fon anere lënter un fraae niter kextelt hon. Awer Yeesus hot tas nii kemacht. Tee hot ale layt keliipt. (Yoohan 4:7-10) Ti liipt hot Yeesus uf kemuut sayn tsayt, kraft un een kemiitlich leepe uf sayt lose fer ti anere helfe. (Markus 6:30-34) Tsum xlus, hot Kristus sayn kreest pewaysung fon liip ketsaycht. Tee hot kesaat: “Ich sin te kuute xeefer. Te kuute xeefer kept sayn leepe fer sayn xeef.” (Yoohan 10:11)

Wii hon ti eyerste kriste tas aan kewënt? Ti kriste in tas eyerst yoer hunert, hon eene te aner “pruuter” un “xwester” kenënt. (Fileemon 1, 2) In sayn kemaynt, waare mënxe fom ale natsyoone hërtslich wilkhome wayl ti kriste hon keklaapt tas es “kept khee unerxiit tswixich yuute un kreeker; te selwich Hër is iwer ale”. (Romaaner 10:11, 12) Noo te Phingste Taach fom yoer 33 noo Kristus, hon ti tisipele in Yeruusalem “sayn tings un aychentum ferkhaaft un tas kelt woo se kriit hon unich sich ferteelt, tëm noo was yeete eene praycht”. Tii hon tas kemacht tas ti naye ketaafte khente in Yeruusalem plaype un ‘sich wayter traan hale aan was ti aphostele in kelërnt hon’. (Aphostele sayn Kexicht 2:41-45) Was hot tii uf kemuut tas mache? Neekst 200 yoore noo ti aphostele kextorep sin, hot Tertuliano foer keprung was ti layt iwer ti kriste kesaat hon: “Kuk, wii se eene te anere liipe (...) un wii se wilich sin sayn leepe een fer ti anere ap kepe.”

Weer keet hayt Yeesus sayn payxpiil noo? Tas puuch fom yoer 1837, woo xprecht iwer ti tsayt wii tas romaanix raych xwach kep is un kefal is, * hot aus keleet tas torich fiile yoore, tii woo sich kriste kenënt hon, sin mit mee kropheet eene mit te aner um kang wii ti kropheet woo se mit kemacht hon fon tii woo khee klaape hate. Een khërtslich unersuuchung in te Fereenichte Xtaate hot ketsaycht tas es een xtark ferpiinung kept tswixich tiskriminatsyoon fon rase un relichyeese layt woo sich “kriste” nëne. Relichyeese layt fon een lant tuun ofts khee froyntxaft hon mit anere fon te selwich relichyoon fon een aner lant. Soo, kriin tii es net hin orer sin se net wilich fer sayne mitkliiter helfe wën se neetichkheete mit mache.

In 2004, hot torich tswaay moonate, hots een ray fon fier wint triles in Florita, Fereenichte Xtaate, kep. Noo tas, hot te presitent fon te Komisyoon fon Emerxens Operatsyoone fon te rechyoon noo kekukt op ti layt ti tinge woo se kriit hon kuut am penutst waare. Eyer hot kesaat tas khee krup soo kuut orkanisiirt waar wii Yeehoowa sayn Tsayer, un hot sich aan kepoot fer tëne kepe ales was se praychte. In 1997, is een umaniteer hilef krup fon Yeehoowa sayn Tsayer tsu Konko Temokraatix Repuplik kereest un hon metitsiin, ese un tsaych mit kenom fer sayn kristlich priiter un anere woo in noot waare helfe. Aach, Yeehoowa sayn Tsayer in Europa hon tinge kep fer tii woo in noot waare woo im kanse 1 milyoon tolare kekhost hon.

[Noote]