Sin ale woo sich “kriste” nëne wërklich kriste?

WEEST tuu wii fiile kriste kept hayt uf te eyert? Tëm noo te Atlas fom Kristyanismus uf te Kans Welt * hot kesaat tas, in 2010, es hat neekst 2,3 pilyoone kriste uf te kans welt kep. Awer tas puuch saat aach tas ti kriste keheere mee wii 41 tausent unerxiitliche relichyoone — yeete eene mit sayn aychne inlërnunge un reekele iwer wii sich aan xtele. Mit soo fiile “kristliche” relichyoone, khan ma ferxteen tas etliche layt ër kepe un fiilaycht frooe sich: ‘Meechte al woo sich kriste nëne, wërklich kriste sin?’

Wole mer tiise sache mit een payxpiil ferklayche. Wëns tuu tsu een aner lant reese wilst, wii tuust tuu tsayche fon woos tuu pist? Is es kenuuch ploos saan fon was fer lant tuu pist? Nee, tuu must tayn pasaport orer een aner tokumënt tsayche fer pewayse fon woos tuu heyer khomst. In te selwich aat, is es net kenuuch tas een woere krist ploos saat tas eyer klaape aan Kristus hot. Eyer must etwas hon fer sayn itentiteet wii woere kriste pewayse. Was is tas?

Tas wort “krist” hot aan kefang penutst wëre pisye tëm noo tas yoer 44 noo Kristus. Lukas, woo een teel fon te Piipel kexicht kexrip hot, hot kesaat: “In Antyokya waar tas eyerste mool woo ti tisipele, torich Kot sayn fiirung, kriste kenënt woer sin.” (Aphostele sayn Kexicht 11:26) Tii woo “kriste” kenënt kep sin, waare ti tisipele fon Kristus. Wii khan yemant een tisipel fon Kristus wëre? Tas Internatsyonaal Teoloxii Wërterpuuch fom Nay Testamënt * saat: “Yeesus sayn tisipel sin, petayt sich kans ap kepe (...) fer tas kanse leepe.” Wayl Yeesus te kristyanismus kekrint hot, een woere krist is yemant woo Yeesus sayn inlërnunge un instrutsyoone noo keet in sayn pest aat, oone krënse xtele.

Is es meechlich hayt se taach soo sorte layt fine tswixich tii woo sich kriste nëne? Was hot Yeesus kesaat iwer wii ma tëm sayn woere nookeener erkhëne khan? Fer ti antwort fon te Piipel fer tiise frooche fine, meyer laate tich in ti neekste 5 artikele fon tiise piichelche leese. Yeete artikel tuut een phunkt fon Yeesus sayn wërter foer xtele woo pewayst weer sayn woere nookeener sin. Meyer tuun siin wii ti kriste fom eyerst yoer hunert Yeesus noo kang sin. Un wole mer fersuuche raus fine weer hayt unich tii woo sich kriste nëne Yeesus sayn xrite noo keen.

[Noote]