‘Tiise kuute notisye fom Raych wëre kepreeticht’

“Tiise kuute notisye fom Raych wëre uf te kans pewoont eyert kepreeticht, tsum tsaye fer ale natsyoone; un tan khomt tas ën.” (MATHEUS 24:14)

Was wil tas saan? Lukas, woo eene fon te Ewankeelye kexrip hot, hot kesaat tas Yeesus is “xtat tsu xtat un altee tsu altee kang, un hot kepreeticht un kuute notisye fon Kot sayn Raych pekhant kemacht”. (Lukas 8:1) Yeesus selepst hot kesaat: “Ich mus ti kuute notisye iwer Kot sayn Raych aach in anere xtëte pekhant mache, wayl ich fer tas kexikt kep sin.” (Lukas 4:43) Eyer hot sayn tisipele kexikt ti kuute notisye in te xtëte un altee preetiche. Xpeeter, hot eyer tëne soo kesaat: ‘Teyer wërt mayn tsayer pis tsum letste ek fon te eyert.’ (Aphostele sayn Kexicht 1:8; Lukas 10:1)

Wii hon ti eyerste kriste tas aan kewënt? Yeesus sayn tisipele hon klaych aan kefang se mache was Yeesus tëne kexikt hot: “Un yeete taach, oone noo lose, im thempel un haus tsu haus, hon se wayter in kelërnt un pekhant kemacht ti kuute notisye iwich Yeesus Kristus.” (Aphostele sayn Kexicht 5:42) Preetiche waar net een priwilëj ploos fer een ekstra krup, awer fer ale sorte layt. Te historyatoer August Neander hot kesaat tas “Celso, te eyerst man woo keeche te kristyanismus kexrip hot, hot ti flaysiche preeticher fom Ewankeelyum ferxpot, wayl tii waare layt woo xtof kemacht hon, xuu keflikt hon un leter kekërpt hon. Ti meyerste waare keweenliche layt un oone xuul”. Jean Bernardi hot, in sayn puuch Ti Eyerste Yoer Hunerte fon te Khërich, * kexrip: “[Ti kriste] solte iweraal hin keen un fer ale kaar preetiche — uf ti xtroos, in te xtëte, uf ti puuplix prase un in te hayser — een tuun op se wilkhome orer net waare.” Un, soo wii tiise autoer nochter kesaat hot, tii solte “pis tas letste ek fon te eyert erayche”.

Weer keet hayt Yeesus sayn payxpiil noo? Te anklikaanix priister, David Watson, hot soo kexrip: “Een uersach wayl ti hayt se taach xwach in kaystlich aat sin, in wayl ti khëriche tuun ti preetich un inlërnung ërnst nëme.” In tëm puuch Warom sin te Katoolixer am fat keen?, * hot José Luis Pérez Guadalupe kexrip tas ti ewankelister, atwentister un anere “tuun net haus tsu haus keen”. Awer, iwer Yeehoowa sayn Tsayer, hot eyer kesaat: “Tii hon een orkanisiirt prokram fer haus tsu haus keen.”

Een puuch iwer kerichts ëntxlise * hot ti wërter fon Jonathan Turley foer keprung. Eyer hot was interesantes un woeres peopacht: “Wën ti layt aan Yeehoowa sayn Tsayer tenke, tuut pay tëne klaych in te khop khome preeticher woo aan sayn teer klope in uertsayte woo kuut phase. Fer Yeehoowa sayn Tsayer, haus tsu haus preetiche is net ploos een aarwayt fer sayn klaape aus prayte, awer is te funtamënt fon sayn klaape.”

Erkhënst tuu te sinaal fon te woere kriste?

Tëm noo ti tekste fon te Piipel woo mer in tiise ray fon artikele peopacht hon, was mënst tuu: Weer hot te sinaal woo pewayst tas eyer een woere krist is? Opwool hayt se taach fiile tausente khëriche un relichyeese krupe kepts, woo sich “kriste” nëne, tenk aan was Yeesus fer sayn nookeener kesaat hot: “Net al woo mich saat: ‘Hër, Hër’, khomt im Raych fom himel rin. Es khomt ploos rin tee woo te wile fon mayn Fater im himel macht.” (Matheus 7:21) Ti woere kriste sin tii woo te wile fom Fater mache. Wëns tuu raus kriist weer tiise layt sin un tich mit tëne fersamelst, khanst tuu eewiche seechne unich Kot sayn Raych kriin. Meyer muute tich uf fer mit eene Yeehoowa sayn Tsayer fertseele. Tan, khanst tuu mee informatsyoone kriin iwer Kot sayn Raych un ti seechen woo tas pringe tuut. (Lukas 4:43)

[Noote]