Ti Piipel tuut leepe ënere

WAS hot eene man uf kemuut tsurik tsu sayn friirix relichyoon keen? Wii hot eene yunge man te fater kefun woo eyer imer kesuucht hot? Lees was tiise layt saan.

“Ich must wiiter tsurik tsu Yeehoowa keen.” — ELIE KHALIL

KEPORTSYOER: 1976

MUTER LANT: XIPRE

FOER KEXICHT: FERLOERNE SOON

WII WAAR MAYN LEEPE FRIIER KEWEES: Ich sin in Xipre uf te welt khom, awer ich sin kroos ketsoo kep in Austraalya. Mayn eltere sin Yeehoowa sayn Tsayer un tii hon sayn pestes kemacht fer mich in lërne Yeehoowa un sayn Wort, ti Piipel, liipe. Awer wii ich unkefeer 15 yoore alt waar, hon ich aan kefang mich repeliire. Oomts, hon ich mich heelich raus kexleep fon mayn haus un ich hon anere yunge layt ketrof. Meyer hon khare kextool un fiile propleeme mit kemacht.

Am aanfang hon ich ales heelich kemacht, wayl ich wolt net mayn eltere traurich lose. Awer mit te tsayt hon ich noo kelos mich ketanke too triwer mache. Ich hon fraaynte kemacht woo fiil elter wii ich waare un tii hon net Yeehoowa keliipt. Tii waare een xlecht influens iwer mich. Tsum xlus, hon ich fer mayn eltere kesaat tas ich wolt net mee Yeehoowa sayn Tsayer sin. Mit ketult, hon se fersuucht mich helfe, awer ich wolt niks wise. Mayn eltere sin mechtich traurich kep.

Ich hon mayn haus kelos un ich hon aan kefang troke penutse. Ich hon soo kaar makonya keplantst un fiil ferkhaaft. Mayn leepe waar imoraalix un ich waar imer in te boates. Ich hon aach aan kefang mich laycht pees xpiire. Wën yemant etwas kesaat orer kemacht hot woo ich net kërn hat, sin ich klaych wuutich kep. Ich hon ti layt kexënt un ferklopt. In khortse wërter: ales was een krist net mache thërft, hon ich kemacht.

WII HOT TI PIIPEL MAYN LEEPE KEËNERT: Ich sin een ticht fraaynt kep fon een man woo aach troke penutst hot. Meyer hon ofts pis xpeet in te nacht fertseelt. Als mool hot eyer fertseelt wii fiil ferlangre eyer hat fon sayn papa, woo kextorep is wii mayn fraaynt noch kans yung waar. Wayl mayn eltere mich in kelërnt hon iwer tas ufxtaye fon te toote, hon ich aan kefang se fertseele iwer wii Yeesus ti toote uf keruuft hot un wii eyer ferxproch hot tas noch mool im futuer mache. (Yoohan 5:28, 29) “Xtel tich mool foer tayn papa noch mool sin! — hon ich tëm kesaat. — Meyer al khene fer imer uf een Paratiis too uf te eyert leepe.” Was ich kesaat hon, hot mayn fraaynt ketreest.

Anere mool wolt mayn fraaynt xpreche iwer ti letste taache orer ti Triniteet. Ich hon tëm sayn Piipel penutst fer fiile tekste tsayche woo ti woerheet iwer Yeehoowa, Yeesus un ti letste taache in kelërnt hon. (Yoohan 14:28; 2 Timoteus 3:1-5) Woo mee ich mit mayn fraaynt iwer Yeehoowa kexproch hon, woo mee hon ich aan Yeehoowa ketenkt.

Ti soome fon te woerheet, woo mayn eltere sich aan kextrengt hon fer in mayn hërts planse, hon lamsam aan kefang se wakse. Tsum payxpiil: als mool in te feste, wën ich troke mit mayn fraaynte penutst hon, hon ich terek aan kefang se tenke iwer Yeehoowa. Fiile fon mayn fraaynte hon kesaat tas se Kot keliipt hon, awer sayn aanxtelung hot was aneres ketsaycht. Ich wolt net soo sin un ich hon kemërkt was ich mache must: ich must wiiter tsurik tsu Yeehoowa keen.

Kewis, wise was se mache is een tings; awer tas aan wëne, is een aner tings. Es waar laycht etliche ënerunge mache; fer mich, noo lose troke penutse, waar net xweyer. Ich hon aach mayn friirixe fraaynte kelos un aan kefang ti Piipel mit een elteste xtutiire.

Awer anere ënerunge waare net laycht se mache. Es waar hauptseechlich xweyer fer mich mayn wuut kontroliire. Als mool, hon ich tas kuut kontroliirt torich een tsayt. Awer tan hot etwas mich aarich pees kelos... Tes weeche hon ich mich xultich kexpiirt un ketenkt tas ich khent nii ënere. Wii ich oone muut waar, hon ich mim elteste kexproch woo ti Piipel mit mich xtutiirt hot. Te elteste waar imer ketultich un liiplich un tee hot mich fiil keholef. Een mool, hot eyer mich ferlangt een artikel fon Te Wachthorm leese, woo kexproch hot iwer warom es wichtich is net uf kepe. a Meyer hon kexproch iwer was ich mache mist wën ich pees kepe teet. Ich hon aan kewënt was ich kelees hon un fiil tsu Yeehoowa kepeet. Mit te tsayt, hon ich aan kefang mayn wuut kontroliire. Tsum xlus, in april fom yoer 2000, sin ich ketaaft kep wii Yeehoowa sayn Tsayer. Ich mus kaar net saan, awer mayn eltere sin aarich froo kep.

WAS FER NUTSE HON ICH KRIIT: Yets, hon ich inerlich friit un een sauwer kewise, wayl ich tuun net mee troke penutse un een imoraalix leepe nëme. Hayt, in ales was ich mache, sin ich fiil frooer wii friier.

Ich tanke Yeehoowa weeche mayn eltere, woo mich nii ferkes hon. Ich tenke mich aach traan fon Yeesus sayn wërter in Yoohan 6:44: “Nimant khan tsu mich khome heekstens wën te Fater, woo mich kexikt hot, tëm tsiit.” Wayl Yeehoowa mich tsurik ketsoo hot, khont ich tsurik khome un ich sin aarich petanklich too teweeche.

“Ich hët soo kërn eene fater.” — MARCO ANTONIO ALVAREZ SOTO

KEPORTSYOER: 1977

MUTER LANT: XILE

FOER KEXICHT: HOT HEAVY METAL IN EEN KRUP KEXPIIL

WII WAAR MAYN LEEPE FRIIER KEWEES: Mayn mama hot mich kroos ketsoo in Punta Arenas, een xeen xtat kans am siit fon Siit Amërika. Mayn eltere sin aus naner kang wii ich 5 yoore alt waar. Tes weeche, hon ich mich im xtich kelos kexpiirt. Ich hët soo kërn eene fater...

Mayn mama hot ti Piipel xtutiirt mit Yeehoowa sayn Tsayer, un hat mich mit kenom uf te fersamlunge im Raych Saal. Ti fersamlunge hon mich kaar net kefalt. Ich hon mich peesich aan kextelt te kanse weech pis mer tat hin khom sin. Wii ich 13 yoore alt waar, hon ich noo kelos uf te fersamlunge keen.

In tiise tsayt, hon ich xon musik keliipt un hon kemërkt tas ich kexik hët tefoer. Mit 15 yoore, hon ich aan kefang heavy metal un death metal xpiile in kroose ewënte, bares un feste. Te kontakt woo ich hat mit kwape musikanter, hot mich uf kemuut interes in klasik musik hon. Ich hon aan kefang musik xtutiire in een kroos musik xuul. Wii ich 20 yoore alt waar, sin ich kewanert tsu ti haupst xtat, Santiago, fer wayter xtutiire. Ich hon aach wayter kexpiil mit krup musike fon heavy metal un death metal.

In tiise kans tsayt, hon ich mich soo leyer im leepe kexpiirt... Fer too temit um keen, hon ich troke penutst un kesof mit mayn koleke fom musik krup. Tii waare mayn familye. Ich waar repëlix un ma khont tas kenau mërke weeche mayn tsaych un hoer. Ich hon ploos tunkel tsaych aan ketsoo, een lange paart kehat un ich hon mayn hoer wakse kelos pis aan te hifte.

Ich hon mich traan keweent se xtrayte un ich hon propleeme mit te polise kehat. Een mool, waar ich pesof un sin xtrayte kang mit een krup woo troke ferkhaaft hot, woo mich un mayn fraaynte keayert hot. Tii hon mich soo ferklopt tas am ën, waar mayne pake knoche ferproch.

Awer ti kreest phayn woo ich kexpiirt hon, is khom fon yemant woo kans ticht tsu mich waar. Eene taach, hon ich raus kriit tas mayn xetsye mich hiner kang hat mit mayne peste fraaynt xon yoorelang. Mayn kanse fraaynte wuste tas, awer nimant hot mich tas kesaat. Ich waar fërtich mit te welt.

Ich sin tsurik noo Punta Arenas kewanert un hon aan kefang musik xuul hale un aach kexaft wii wiolonselister. Ich hon aach wayter heavy metal un death metal kexpiil un krawiirt. Ich hon een xeen meetche khëne kelërnt woo Sussan keheest hot. Meyer hon aan kefang mitsamer woone. Een tsayt tëm noo, hot Sussan kemërkt tas, anerste wii iire mama, hon ich net aan te Triniteet keklaapt. “Was is tan, ti woerheet?” — hot se kefroot. Ich hon keantwort ich wist tas ti inlërnung fon te Triniteet falx weyer awer ich khont tas net in te Piipel tsayche. Awer ich wust weer khent. Ich saat iir tas Yeehoowa sayn Tsayer khente ti woerheet in te Piipel tsayche. Tan hon ich kemacht was ich haufe yoore net kemacht hat — ich hon tsu Kot kepeet un hilef ferlangt.

Phaar taache tëm noo, hon ich een man kesiin woo mich pekhant aus kesiin hot. Ich hon tëm kefroot ep eyer Yeehoowa sayn Tsayer weyer. Ale tëm woo eyer sich ferxrok hot weeche mayn tsaych un hoer, waar eyer fraayntlich un hot mayn frooche keantwort iwich ti fersamlunge im Raych Saal. Ich waar mich sicher tas tiise pruuter aan trefe, waar ti antwort fer mayn kepeet. Ich sin in te Raych Saal kang un hon mich in te letste ray kesetst, tas khee eene mich mërke solt. Awer fiile hon mich kekhënt fon te tsayt wii ich een khint waar un sin uf te fersamlunge kang. Tii hon mich soo kuut aan kenom un mich fraayntlich um kekrif tas ich een kroos friit in mich kexpiirt hon. Tas waar wii wën ich hëm khom weyer. Wii ich kesiin hon te pruuter woo ti Piipel mich in kelërnt hot wii ich een khint waar, hon ich ferlangt tas eyer solt ti Piipel mit mich xtutiire.

WII HOT TI PIIPEL MAYN LEEPE KEËNERT: Eene taach, hon ich Xpriiche 27:11 kelees, woo saat: “Say kluuch, mayn soon, un mach mayn hërts froo.” Tas hot mayn hërts aan kekrif se tenke tas meyer — kleene mënxe — khente te Kriatoer fom Uniwërsum froo mache. Ich hon ferxtan tas Yeehoowa waar te Fater woo ich torich mayn kanse leepe kesuucht hon!

Ich wolt mayne himlixe Fater kefale un sayn wile mache, awer ich waar een sklaaw fon te troke un alkohool ketrenk torich haufe yoore. Ich hon aan kefang se ferxteen was Yeesus saat in Matheus 6:24: “Nimant khan sklaaw fon tswaay hëre sin.” In mayne khampf fer ti ënerunge mache, hot ti oryentiirung fon 1 Korinter 15:33 mich ti aue uf kemacht: “Xlechte keselxafte fersaue kuute kewoonheete.” Ich hon ferxtan tas ich khent net noo lose mit mayne xlechte kewoonheete wën ich wayter uf te selwiche pletse mit te selwiche layt keengt. Te aanreet fon te Piipel waar klaar: ich mist ales mache was ich khent fer mich fray mache fon te tinge woo mich xtolpere mache teete. (Matheus 5:30)

Ti xweyerste ëntxlus woo ich mache must, waar im xtich lose ti heavy metal musik woo ich soo kërn hat. Awer ti priiter fon te kemaynt hon mich keholef un ich hon es kephakt. Ich hon noo kelos troke penutse un saufe. Ich hon aach mayn hoer kexnit, te paart ap kemacht un mich net mee ploos xwarts aan ketsoo. Wii ich Sussan kesaat hon ich welt mayn hoer xnayte, is se naykerich kewoer iwer was ich im Raych Saal kemacht hon. Too hot se kesaat: “Ich keen mit tich. Wole mer siin was in tiise Raych Saal pasiirt.” Tas hot tëne kefalt was se tat kesiin hot. Un klaych hot se aach aan kefang ti Piipel xtutiire. Mit te tsayt, hon ich un Sussan uns kehayrat. In 2008, sin mer ketaaft woer wii Yeehoowa sayn Tsayer un yets tiine mer Yeehoowa mit mayn mama, un tas is een kroos frayt fer uns.

WAS FER NUTSE HON ICH KRIIT: In te welt khene ti fraaynte hinerlistich sin un ti frooheet, falx. Tsum klik, sin ich aus tiise welt kang! Ich liipe noch musik, awer yets phase ich uf was fer sort musik ich horiche. Ales was ich im leepe mit kemacht hon, penutse ich fer mayn familye un anere — hauptseechlich ti yunge — helfe. Ich wil se helfe siin tas fiil fon was ti welt aan piit, khan xeen aus siin, awer am ën hot tas khee weyert. (Filiper 3:8)

Ich hon woere fraaynte in te kemaynt kefun, een plats woo es liip un friit kept. Un, wayl ich ticht tsu Yeehoowa khom sin, hon ich ëntlich mayne Fater kefun!

[Noote]

[Hooch phunkt]

“Wayl Yeehoowa mich tsurik ketsoo hot, khont ich tsurik khome.”