Ti Piipel tuut leepe ënere

WAS HOT eene man in Skotlant raus kefun woo tëm noch mee peloonung keprung hot wii een aarich kuut aarwayt? Was hot een man in Brasil keholef sayn imoraalix leepe im xtich lose un noo lose crack penutse? Wii hot een yung fon Sloweenya es hin kriit noo lose se saufe? Lees was tiise persoone too tefun saan.

“Mayn leepe hot aarich kuut aus kesiin.” — JOHN RICKETTS

KEPORTSYOER: 1958

MUTER LANT: SKOTLANT

FOERKEXICHT: EEN KEXEFTS MAN WOO SICH AARICH KUUT KEP HOT

MAYN FRIIRIXE TSAYTE: Ich sin in een familye kewaks woo een kuut ekonoomix situatsyoon hat. Mayn fater waar een ofitseer in te pritaanix militeer un tes weeche sin mer ofts kewanert. Meyer hon in Skotlant, Ënglant, Taytxlant, Keenya, Malaasya, Irlant, un Xipre kewoont. Fon 8 yoore aan, hon ich in etliche internate in Skotlant kelërnt. Xpeeter, hon ich mich in te Uniwersiteet fon Cambridge, in Ënglant, formiirt.

Wii ich 20 yoore alt waar, hon ich torich 8 yoore keaarwayt in een firma, woo mit petroleum xaft — am aanfang in Siit Amërika, tan in Afrika, un nochter in Oëst Austraalya. Noo ich tsu Austraalya kewanert sin, hon ich een firma fon inwestimënte uf kemacht, woo ich xpeeter ferkhaaft hon.

Noo ich tas ferkhaaft hon, khont ich mich xon mit 40 yoore aposentiire. Un ich hon mayn tsayt fer se reese penutst. Ich sin tswaay mool mit een moto torich kans Austraalya kefaar un ich sin aach um ti welt rom kereest. Mayn leepe hot aarich kuut aus kesiin.

WII HOT TI PIIPEL MAYN LEEPE KEËNERT: Xon eep ich mich aposentiirt hon, wolt ich een aat fine fer Kot tanke weeche tas leepe woo ich hat. Ich hon aan kefang in te Anklikaanixe Khërich keen, woo ich kroos kewaks sin. Awer tiise khërich hot weenich iwer ti Piipel in kelërnt. Nochter, hon ich mit te mormone xtutiirt, awer ich hon uf kep wayl tii net soo fiil ti Piipel penutst hon.

Eene taach, hon Yeehoowa sayn Tsayer aan mayn teer keklopt. Klaych, hon ich kesiin tas sayne inlërnunge sich kans uf ti Piipel kextaypt hon. Een tekst woo se mich ketsaycht hon, waar 1 Timoteus 2:3, 4. Tat saats tas Kot wil tas “ale sorte layt keret kepe un een kenau khëntnis fon te woerheet kriin”. Ich hon mich ferwunert wayl tii kesaat hon tas meyer mise net ploos khëntnis hon, awer ti kenau khëntnis fon te Piipel hon.

Ti Piipel mit Yeehoowa sayn Tsayer xtutiire, hot mich keholef tiise kenau khëntnis kriin. Tsum payxpiil, hon ich kelërnt tas Kot un Yeesus net teel mache fon een Triniteet woo een kehaymnis is; in woerheet sin tii tswaay unerxiitliche persoone. (Yoo. 14:28; 1 Kor. 11:3) Soo aynfach! Ich sin aarich froo kep. Awer uf te aner sayt, hon ich mich wuutich kexpiirt, wayl ich soo fiil tsayt un kraft ferloer hon fer fersuuche ti Triniteet ferxteen woo khee sin macht.

Ich hon palt aan kefang reeklich ti fersamlunge fon Yeehoowa sayn Tsayer pesuuche. Ich hon mich ferwunert mit te fraayntlichkheet un ti hooche moraal fon ale tat — fer mich hots aus kesiin wii wën se “hayliche” weyere. Tëne sayn woere liip hot mich sicher kelos tas ich ti woere relichyoon kefun hon. (Yoo. 13:35)

WII HOT TI PIIPEL MAYN LEEPE FERPËSERT: Noo ich mich taafe kelos hon, hon ich een wunerlich fraa kekhënt woo Diane heest. Tii is wii een Yeehoowa sayn Tsayer kroos kewaks un hat fiile xeene kwaliteete woo hot kemacht mayn aue xayne. Nochter, hon mer uns kehayrat. Ti fraayntxaft un ti unerxtitsung fon Diane waare een kroose seechen fon Yeehoowa.

Ich un Diane hon een kroos wunx ëntwikelt fer uns uf een plats wanere woo ti neetichkheet in te preetich kreeser waar. In 2010, sin mer tsu Peliise, Tsentraal Amërika, kewanert. Too, tuun mer fer layt preetiche woo Kot liipe un wole mee iwer Tëm lërne.

Ich xpiire een kroos friit wayl ich ti woerheet iwer Kot un sayn Wort, ti Piipel, kefun hon. Ich xafe fol tsayt in te preetich un ich sin aarich froo tas ich fiile layt iwer ti Piipel in lërne khan. Es kept khee kreeser frooheet wii siin tas ti Piipel tas leepe fon yemant ferpesere khan — soo wii tas mit mich pasiirt is. Yets yaa, hon ich ti pest aat kefun fer Kot tanke weeche tas leepe woo ich hon.

“Tii waare soo fraayntlich mit mich.” — MAURÍCIO ARAÚJO

KEPORTSYOER: 1967

MUTER LANT: BRASIL

FOERKEXICHT: IMORAALIXES LEEPE

MAYN FRIIRIXE TSAYTE: Ich sin in Avaré, een kleen xtat in te xtaat São Paulo kroos kewaks. Tat, tuun ti meyerste layt in ti faprike xafe.

Mayn papa is kextorep wii mayn mama fon mich xwanger waar. Wii ich noch een puup waar, hon ich tsaych fon mayn mama aan ketsoo wën se net tehëm waar. Ich hon imer mee een wayplich aat ëntwikelt un ti layt hon mich wii een gay aan kesiin. Mit te tsayt, hon ich aan kefang sëks mit anere puupe un mëner mache.

Am ën fon mayn muule yoore, hon ich ofts iweraal layt (een tuun op mëner orer fraae) kesuucht, woo ich mit tëne sëks mache khont — in potëke, in paale un soo kaar foer te khërich. In te tsayt fom karnewal, hon ich mich wii een fraa aan ketsoo un hon in xuule fon samba ketanst. Ich waar aarich pekhant.

Fiile fon mayn fraaynte waare gays, huure fraae un layt woo trooke penutst hon. Etliche fon tëne hon mich influentsiirt crack penutse un palt khont ich es net mee noo lose. Manich mool, hon ich ti kans nacht keraucht. Anere mools, sin ich te kanse taach aleen keplip un hon crack penutst. Ich sin kans tër kep tas ti layt ketenkt hon tas ich aids hët.

WII HOT TI PIIPEL MAYN LEEPE KEËNERT: Torich tiise tsayt, hon ich Yeehoowa sayn Tsayer kekhënt. Tii waare soo fraayntlich mit mich. Een tekst fon te Piipel woo se fer mich keleest hon, waar Romaaner 10:13, woo saat: “Al tii woo Yeehoowa sayn naame aan ruufe, wëre keret.” Tiise wërter hon fer mich kans taytlich kelos wii wichtich es is Yeehoowa sayn naame penutse. Fiil mools, noo ich crack ti kans nacht keraucht hon, hon ich tas fënster uf kemacht, fer te himel kekukt un fer Yeehoowa mit treene kepeet fer sayn hilef aan hale.

Ti trooke hon mich neekst kaput kemacht un mayn mama waar aarich ëngstlich un hot fiil kelit weeche tas. Wii ich tas kemërkt hon, hon ich ëntxlos noo lose trooke penutse. Klaych tëm noo, hon ich aan kenom ti Piipel mit Yeehoowa sayn Tsayer xtutiire. Tii hon mich sicher kelos tas tiise xtuutyum teet mich kraft kepe fer noo lose ti trooke penutse — un tas hot wërklich pariirt!

Wii ich tas piiplixe xtuutyum am mache waar, hon ich kemërkt tas ich kroose ënerunge mache mist. Es waar xweyer te homoseksualismus im xtich lose, wayl tas waar xon fon yung aan mayn aat fer se leepe. Etwas woo mich keholef hot, waar mayn friirix fraayntxafte im xtich lose un net mee in pletse keen wii potëke un paale.

Es waar kaar net laycht tiise ënerunge mache, awer etwas woo mich fiil ketreest hot, waar wise tas Yeehoowa sich ketanke mit mich macht un ferxteet te khampf woo ich am mit mache sin. (1 Yo. 3:19, 20) In 2002, hon ich net mee homoseksualismus praktisiirt un hon mich wii Yeehoowa sayn Tsayer taafe kelos.

WII HOT TI PIIPEL MAYN LEEPE FERPËSERT: Mayn mama hot sich mit tiise ënerunge soo ferwunert tas tii aach aan kefang hot ti Piipel xtutiire. Es is xaat, awer xpeeter hot se een xlaa kriit, toch tii tuut wayter sayn liip tsu Yeehoowa un tsu ti woerheet fon te Piipel ferxtërke.

In te letste 8 yoore, tuun ich fol tsayt ti Piipel fer ti anere in lërne. Ich mus saan tas als mools must ich keeche ferkheerte winxe khëmpfe. Awer was mich ferxtërkt, is se wise tas wayl ich net uf kepe keeche tiise winxe khëmpfe, tuun ich Yeehoowa aarich froo lose.

Ticht tsu Yeehoowa khome un in een aat leepe woo tëm kefalt, hot mayn selepst respekt ferkreesert. Hayt, khan ich saan tas ich een frooe man sin.

“Ich waar wii een ‘fas woo nii fol wërt’.” — LUKA ŠUC

KEPORTSYOER: 1975

MUTER LANT: SLOWEENYA

FOERKEXICHT: PROPLEEM MIT ALKOHOOL

MAYN FRIIRIXE TSAYTE: Ich sin kepoer in Lyuplyaana, ti haupste xtat fon Sloweenya. Pis 4 yoore hat ich een kuut khintheet, awer tan hot mayn papa sich um keprung. Noo tiise unklik, must mayn mama fiil xafe fer sayn tswaay puupe — ich un mayn elter pruuter — kroos tsiie.

Mit 15 yoore, hon ich mit mayn wowo kewoont. Ich hon kërn mit tii kewoont wayl fiile fon mayn fraaynte waare tëne sayn nochpere. Ich hat aach mee frayheet wii in te tsayt wii ich mit mayn mama kewoont hon. Mit 16 yoore, hon ich aan kefang mit layt aus keen woo am ën fon te woch kesof hon. Ich hon mayn hoer wakse kelos, hon mich wii een repëlix persoon aan ketsoo un aan kefang se rauche.

Ich hon fiile trooke prowiirt, awer alkohool saufe is een sucht kep, wayl ich tas te meyerst kërn hat. Am aanfang, hon ich ploos phaar kleeser wayn ketrunk, awer klaych hon ich aan kefang mee wii een flax uf een mool trinke. Ich khont kuut ferxtekele tas ich pesof waar. Fiil mools, hot ma ploos kemërkt tas ich kesof hon weeche te keruch fon mayn maul. Awer toch, nimant hot kemërkt tas ich fiile liter wayn orer pier ketrunk hon — un tas ales mit fiil wotka!

Ti meyerst tsayt, es waar ich woo mayn fraaynte keholef hon xteen plaype noo een nacht in ti paal, aach wën ich woerxaynlich tas topelt wii tii ketrunk hon. Eene taach, hot eene fon tëne kesaat tas ich weyer wii een “fas woo nii fol wërt” — in Sloweenya tas is een pelaytichung fer yemant woo mee trinke khan wii al ti anere. Tiise wërter hon mich aarich wee kemacht.

Ich hon aan kefang noo tenke was ich mit mayn leepe am mache waar. Ich hon mich unutslich kexpiirt. Tiise xpiirung is net aus mayn khop kang. Es hot aus kesiin tas ales was ich am mache waar khee weyert hat.

WII HOT TI PIIPEL MAYN LEEPE KEËNERT: In tiise tsayt, hon ich kemërkt tas een xuul koleke hot sich yets anerste aan kextelt; tee is tsaamer kep. Ich sin naykerich kep un hon tëm in kelaat fer een khafe trinke. Tee hot aus keleet tas eyer aan kefang hat ti Piipel mit Yeehoowa sayn Tsayer xtutiire. Tee hot etliche tinge fertseelt woo eyer am lërne waar woo kans nay fer mich waare, wayl ich oone relichyoon kroos ketsoo kep sin. Ich hon aan kefang ti fersamlunge fon Yeehoowa sayn Tsayer pesuuche un ti Piipel mit tëne xtutiire.

Ti Piipel xtutiire hot mayn aue uf kemacht fer fiile mechtiche un ufmuutiche woerheete. Tsum payxpiil, hon ich kelërnt tas mer in een tsayt leepe woo ti Piipel wii “ti letste taache” nënt. (2 Tim. 3:1-5) Ich hon aach kelërnt tas klaych tuut Kot ti xlechte layt fon te eyert wech xafe un tuut ti keleechenheet fer ti kuute layt kepe tas se fer imer im Paratiis leepe khene. (Psal. 37:29) Ich hon een xtarke wunx kexpiirt fer mayn leepe in te ray lose tas ich teel tswixich ti kuute layt mache khent.

Ich hon aan kefang mit mayn fraaynte xpreche iwer ti piiplixe woerheete woo ich am lërne waar. Ti meyerste hon mich ferxpot, awer tsum xlus, waar tas een seechen. Tiise aanxtelung hot mich keholef se siin tas tii net mayn woere fraaynte waare. Ich hon kemërkt tas mayn propleeme mit alkohool hat fiil mit mayn fraayntxafte se tuun. Tii hon ti kans woch kewaart tas se khente noch mool am ën fon te woch sich pesaufe.

Ich hon tiise fraayntxafte im xtich kelos un aan kefang kuut keselxaft mit Yeehoowa sayn Tsayer hon. Mit tëne sin, hot mich fiil uf kemuut wayl tii sin layt woo Kot wërklich liipe un sich aan xtrenge fer noo Sayn oryentiirunge leepe. Lamsam, khont ich noo lose se saufe.

WII HOT TI PIIPEL MAYN LEEPE FERPËSERT: Ich sin aarich petanklich tsu Yeehoowa tas ich khee alkohool mee prauch fer mich froo xpiire. Ich wees net was mit mich pasiirt weyer wën ich wayter soo keleept hët. Awer ich sin mich sicher tas mayn leepe yets fiil peser is.

In te letste 7 yoore, hon ich tas priwilëj kriit im Petël fon Yeehoowa sayn Tsayer in Sloweenya tiine. Yeehoowa khëne un tëm tiine, hot fer mayn leepe een woere sin kep.