Yaa, too sin milyoone in ti kans welt. Tii sin een kroos folek preeticherine fon te kuute notisye iwich Kot sayn Raych. Im Psalm 68:11 xteet een profetsii woo saat: “Yeehoowa xikt es; ti fraae, woo ti kuute notisye preetiche, sin een kroos militeer.”

Awer ti tiinst fon te fraae woo Yeehoowa sayn Tsayer sin, is kans anerste wii ti tiinerine fon anere relichyoone. Es kept taytliche unerxiite. Wole mer etliche siin.

In ti kristenthum, iwer nëme sich ti tiinerine ti fiirung in iire khëriche, un ti layt woo se in lërne sin ti mitkliiter fon te khërich. Tas is net soo mit Yeehoowa sayn Tsayer tiinerine. Tii lërne in haupstseechlich aus ti kemaynt, tas sin ti layt woo se aan trefe in iire tiinst haus tsu haus orer uf anere pletse.

In een aner aat wii Yeehoowa sayn tsayer tiinerine anerste sin wii ti fraae fon anere relichyoone is iire aarwayt in te kemaynt. In te kristenthum un aach anere relichyoone tuun ti fraae fiire un in lërne anere mitkliiter fon iire aychne kemaynt. Awer Yeehoowa sayn Tsayer tiinerine lërne net in te kemaynt wën ketaafte mëner tat sin. Noore mëner woo tas xtel hon fer in lërne, mache tas. — 1 Timoteus 3:2; Tyako 3:1.

Ti Piipel tsaycht tas ploos mëner hon ti responsapiliteet fer ti kemaynt fiire. Ti oryentiirunge woo te aphostel Phaul kep hot, tsu Titus, een aner superintentent, xtime mit tiise itee: “Ich hon tich in Krëta kelos tas tuu . . . [solst] in yeete xtat, elteste in setse.” Phaul hot noch kesaat tas te man woo raus kesuucht teet wëre “mist fray fon akusatsyoon sin, man fon ploos een fraa”. (Titus 1:5, 6) Phaul hot ti selwich oryentiirunge tsu Timoteus kep: “Wën eene man sich aan xtrengt fer superintentent se sin, tuut eyer kuut tings winxe. Te superintentent sol, tës weeche, korëkt un man fon een fraa sin, . . . un kuut in lërne khene.” — 1 Timoteus 3:1, 2.

Awer warom sole ploos ti mëner superintentente in te kemaynt sin? Phaul saat: “Ich erlaupe net tas ti fraa in lërnt, aach net autoriteet iwer te man tsaycht, awer tas se ruych plaype sol. Wayl Aatam waar te eyerste woo kemacht kep is, nochter Ewa.” (1 Timoteus 2:12, 13) Soo, ti ray woo Kot tas eyerste pheyerche kemacht hot tsaycht weyer eyer raus kesuucht hot fer fiire un in lërne.

Yeehoowa sayn Tsayer tiinerine mache Yeesus Kristus, iire fiire, noo. Te tisipel Lukas hot kexrip iwich Yeesus sayn tiinst: “Tee is xtat tsu xtat un altee tsu altee kang, un hot kepreeticht un kuute notisye fon Kot sayn Raych pekhant kemacht.” Xpeeter hot Yeesus sayn tisipele kexikt ti selwich aarwayt mache: “Ti sin torich te teritoryum kang, altee tsu altee un ti kuute notisye pekhant kemacht.” — Lukas 8:1; 9:2-6.

Hayt tii woo Yeehoowa tiine — mëner un fraae — tuun flaysich erfiile was Yeesus in foer raus kesaat hot: “Un tiise kuute notisye fom Raych wëre uf te kans pewoont eyert kepreeticht, tsum tsaye fer ale natsyoone; un tan khomt tas ën.” — Matheus 24:14.