• KEPORTSYOER: 1963

• MUTER LANT: ENGLANT

• FOERKEXICHT: ICH SIN KUUT FORAN KHOM IN MAYN AARWAYT

WII WAAR MAYN LEEPE FRIIER KEWEES:

Ich sin kepoer in Croydon, Siit fon Londres. Ich sin ti seks fon noyn khiner. Mayn eltere waare fon São Vicente, een insel fon Karip. Mayn mama is in Metotist khërich kang. Ale tëm woo ich wolt imer mee lërne, hon ich khee interes kehat fer iwich Kot lërne. Wii ich xuul fërie hat, hon ich ti meyerst tsayt mich kesets neewer een lakoo ticht aan mayn haus un hon piicher keleest woo ich mich in te piplyoteek keporicht hon.

Phaar yoore tëm noo, wii ich aus ti xuul raus khom sin, hon ich kemënt ich teet kërn helfe layt woo in noot weyere. Tan, hon ich aan kefang tsu xafe mit layt woo khee woonung hon, woo khërperliche feeler hon un layt woo xweer kelërnt hon. Tan hon ich syens iwich ti kesuntheet xtutiirt in te uniwersiteet. Noochte, hon ich mich kewunert tas ich soo fiil kuute aarwayte kefun hon un khont een kuut un fayn leepe hon. Wayl ich fer mich selepst kexaft hon, wii yemant woo ti kexefte helft sich ferpesere un woo unersuuchung macht iwich wii ti layt erleepe, ales was ich praucht waar mayne laptop un internet. Oft mools, khont ich fer phaar woche reese tsu aus lant un plaype in mayn liipst hotel. Ich khont tas kuut penutse. Fom tsimer fënster, khont ich siin ti xeen umtree, in ti akatemii keen fer mich khërperlich iipe. Ich tacht: “Tas is tas woere leepe.” Awer ich hon toch mich foran ketanke kemacht iwich tii woo in noot waare.

WII HOT TI PIIPEL MAYN LEEPE KEËNERT:

Fer yoore lang, hon ich mich kefroot ‘Warom sin mer hiir?’ un ‘Was fer tswek hot tas leepe?’. Awer ich hon nii ti antwort in te Piipel kesuucht. Eene taach in 1999, is mayn xwester Margaret, woo yinger is wii ich un is Yeehoowa sayn Tsayer, mich pesuuche khom mit een fraayntin, woo aach fon tiise relichyoon waar. Tiise fraayntin waar soo liiplich mit mich tas ich een piiplix xtuutyum aan kenom hon. Awer ich sin net kuut foran khom, wayl mayn aarwayt un ti aat wii ich keleept hon, tsu fiil tsayt kenom hon.

Im somer fon 2002, sin ich kewanert tsu siitëst fon Englant. Tat, sin ich wiiter tsurik tsu te uniwersiteet kang fer foran xtutiire iwich mayn aarwayt, fer een heecher thitel fon PHD kriin. Ich hon aach aan kefang uf ti fersamlunge im Raych Saal keen mit mayn kleen khint. Opwool ich in ti uniwersiteet xtutiirt hon, tas waar ti Piipel xtuutyum woo mich keholef hot ferxteen ti kroose propleeme im leepe un wii mit tëne am ën mache. Wii ich Matheus 6:24 keleest hon, hon ich ferxtan tas ich khent net tswaay hëre tiine. Orer tiint ma Yeehoowa orer ti raychtum. Ich wust tas ich must een ëntxlus mache iwich was wichtiches in mayn leepe weyer.

Im yoer foer traan, hon ich oft mools mich kesamelt mit een Piipel xtuutyum krup fon Yeehoowa sayn Tsayer woo tas puuch Existe um Criador Que Se Importa com Você?  a xtutiirt hon. Tas hot mich ti sicherheet kep tas ploos unser Kriatoer, Yeehoowa, khan am ën mache mit te mënxliche propleeme. Awer, in te uniwersiteet hon mer kelërnt tas ti tswek fom leepe niks tsu tuun hët mit te klaape aan een Kriatoer. Tas hot mich kaar net kefal. Tswaay moonate tëm noo, hon ich ti uniwersiteet im xtich kelos un hon aan kefang mee tsayt penutse fer spirituaale aktiwiteete.

Te piiplixe tekst woo mich uf kemuut hot fer ferënere ti aat wii ich keleept hon, waar Xpriiche 3:5, 6: “Trau uf Yeehoowa mit tayn kans hërts; tuu net aan tayn aychne ferxtëntnis traue. Tenk aan tëm in ale tayn weeche un eyer tuut tayn weeche richt mache.” Lërne iwich unser liipliche Kot hot fer mich fiil mee weyert wii raychtum orer een hooche thitel PHD hon. Soo fiil mee wii ich kelërnt hon iwich Yeehoowa sayn opjetiiw fer ti eyert un iwich Yeesus sayn fray khaaf opfer, soo fiil mee wolt ich mayn leepe fer unser Kriatoer kepe. Ich sin ketaaft woer in April 2003. Fon tat aan foran, hon ich aan kefang mayn leepe keweenliche mache.

WAS FER NUTSE HON ICH KRIIT:

Mayn fraayntxaft mit Yeehoowa hot khee prays. Tas waar wayl ich tee khëne kelërnt hon tas ich inerlich friit un frayt kriit hon. Tas frayt mich aach mich samele mit Kotes woere aanpeeter.

Ti Piipel xtutiire un uf ti fersamlunge keen, tuun foran eneere te kroose wunx woo ich hon fer lërne. Tas frayt mich mit anere iwich mayn klaape xpreche. Tas is yets mayn aarwayt. Yets khan ich wërklich ti layt helfe net ploos een peser leepe yets hon, awer aach ti xeen hofnung fer leepe in een nay welt. Tsayt yuuni 2008, sin ich fol tsayt tiinerin, un sin fiil frooer un tsufriite mim leepe wii noch nii. Ich hon te woere tswek fom leepe kefun un tes weeche, sin ich aarich petanklich tsu Yeehoowa.