MILYOONE kriste fayre net ti Waynachte. Meechte se sich peroye fon tiise ëntxlus? Meecht se tenke tas se etwas ferliire? Xpiire iire khiner tas iir etwas feelt? Kuk was etliche Yeehoowa sayn Tsayer fon fiile pletse torich ti welt saan.

Yeesus Kristus sich erinere: “Eep ich Yeehoowa sayn Tsayer kewoer sin, sin ich neekst nii in ti khërich kang. Un wën ich kang sin waar Waynachte orer Oostre. Awer, ich hon net aan Yeesus ketacht. Hayt fayre ich khee Waynachte, awer keen uf kristliche fersamlunge tswaay mool in te woch un lërne anere was ti Piipel saat iwich Yeesus.” — EVE, AUSTRAALYA.

Ti frayt fer etwas kepe: “Ich fraye mich wën yemant mich een kexenk kept woo ich net too truf waarte. Ich hon kërn soo sorte kexenke. Ich mache aach khaarte un moole pilter tas anere sich fraye sole, un tan sin ich aach froo.” — REUBEN, NORT IRLANT.

Helfe tii woo neetichkheet hon: “Meyer tuun kërn ese mache wën yemant krank is. Als mool nëme mer pluume, etwas kuutes fer ese orer een aantenke hin fer tee fraye. Tas is xeen wayl mer tas yeete tsayt im yoer mache khene.” — EMILY, AUSTRAALYA.

Tsu samer sin mit te familye: “Wën unser familye sich samelt, khene unser khiner khëne lërne iire unkele un thantere, kroos eltere un primos in een fraayntlich keselxaft. Awer mer hale uns net aan tratitsyonaale fëste. Unser familye wees tas, wën mer se pesuuche, is wayl mer se wërklich liipe, net wayl mer ti flicht hon.” — WENDY, KAYMAN INSLE.

Friit: “Tsu ti Waynachts tsayt siit tas aus tas mer tsu fiil tsu tuun hon, un weenich layt tenke am friit. Yets woo ich kelërnt hon was ti Piipel fer ti mënxheet ferxprecht, xpiire ich mich in ruu. Hayt wees ich tas mayn khiner wëre een frooe tsukhunft kriin.” — SANDRA, XPANYA.